دهۆك، شاكر ئه‌تروشی:
فائیزه سه‌لیم، به‌پرسا گرۆپێ كاڤین یێ خوه به‌خش ل دهۆكێ، د دیداره‌كێ دا بۆ رۆژناما ئه‌ڤرۆ دیاركر كو راسته شه‌ڕ نه‌مایه، لێ ئه‌و به‌رده‌وام سه‌ره‌دانا سه‌نگه‌رێن پێشمه‌رگه‌ی دكه‌ن و خوارنان بۆ دبه‌ن، دووماهی سه‌ره‌دانا وان ژی به‌ری حه‌فتیه‌كێ بوو كو خوارن بۆ (400) پێشمه‌رگه‌یان بر بوو چیایێ مه‌تینی و ئه‌رزافێ ڤێ جارێ ژلایێ به‌رێزان (سه‌ربه‌ست له‌زگین و ئیحسان ئامێدی) هاتبوو دابینكرن و (زكری بارزانی) ژی ترۆمبێل ژی بۆ گه‌هاندنا خوارنێ دابینكربوون.
فائیزا كو ب (دایكا پێشمه‌رگه‌ی) دهێته نیاسین، زێده‌تر گۆت: ئه‌ڤه سه‌ره‌دانا مه یا (680) بوو، بۆ ناڤ سه‌نگه‌رێن پێشمه‌رگه‌ی، راسته ئه‌و پێدڤی ب خوارنێ نینن، لێ ژبۆ بلندكرنا مۆرالا وان ئه‌م بڤێ چه‌ندێ رادبین و گرۆپێ مه ژ (62) كچ و ژنان پێك دهێت و هه‌ر جاره‌كێ ئه‌م چه‌نده‌ك خوارنێ ل مالێن خوه چێدكه‌ین، ب تایبه‌ت ژی یێن كوردی وه‌ك ترشك و ئیپراخ و بۆ برایێن خوه یێن پێشمه‌رگه‌ی دبه‌ین و بۆ زانین چو میحوه‌ر نه‌ماینه مه جاره‌كێ یان پتر سه‌رده‌وانا وان نه‌كر بیت و خوارن بۆ نه‌بر بیت و هه‌تا نوكه ئه‌ز و ئه‌ندامێن گرۆپی ب شێوێ خوه به‌خش ڤی كاری دكه‌ین و هندی د شیانێن مه دا بیت دێ د سه‌ره‌دانێن خوه دا دبه‌رده‌وام بین، بۆ زانین ده‌مێ شه‌ڕێ داعش ده‌ستپێكری مه ئه‌ڤ گرۆپێ خوه‌به‌خش چێكریه، ل ده‌ستپێكێ گه‌له‌ك كۆمپانی و خێرخوازان ئه‌رزاق بۆمه دابین دكرن، لێ پشتی شه‌ڕ نه‌مای ئه‌و هاریكاری ژی نه‌مان و گه‌له‌ك یێن كێم بووین، له‌ورا نوكه هه‌یڤێ جاره‌كێ یان دو جاران سه‌ره‌دانا پێشمه‌رگه‌ی دكه‌ین و خوارنێ بۆ دبه‌ین و ژ كه‌سێن به‌رده‌وام هاریكاریا مه‌كرین به‌رێز رێڤه‌به‌رێ گشتی یێ ساخله‌میێ ل پارێزگه‌ها دهۆكێ ( یێ به‌رێ و یێ نوكه) هه‌روه‌سا خودانێ سه‌مۆنخانا باتمان ژی و هه‌كه پارێزگه‌رێ دهۆكێ بشێت بۆ گرۆپی خانیه‌كی دابینكه‌ت دێ شیێن پتر سه‌ره‌دانان كه‌ین، چنكو وه‌كو مه گۆتی هه‌تا نوكه ئه‌م خوارنێ ل مالێن خوه چێدكه‌ین.
نيشاندان