نایف مه‌حموود
ژ ڕۆژێ
ئه‌ز بوو مه هه‌تاڤ
ژ باغێ گولان
ئه‌ز حه‌لیام، ئه‌ز بوومه ئاڤ
ل بیابانێ بوومه ده‌روێش
ئه‌ز گه‌ڕیام و پیره‌كاله‌كێ
قه‌لین كێش
تێهنیێ وێ عه‌شقا ئاریای
ئه‌ز ڕاوه‌ستیام، من نه‌مان گاڤ
ئاخینك ژ هناڤا هاتن
وه‌كی ئاگرێ ته‌نوورێ
دل و هناڤ ل من سۆتن
بۆ وێ نارینا بسك تێل
هێستر بارین
مینا تاڤیێن بوهارێ
ل من كۆره بوون
ئه‌ڤ هه‌ردو چاڤ.
شه‌مال ئاكره‌یی
پشتی بۆ چه‌ند هه‌فتییان، مه ب رێكا چاتێ هه‌ڤدو باش نیاسی، من زانی كا چه‌ند یا ب زه‌حمه‌ته ژ مال ده‌ربكه‌ڤیت لێ ئه‌ز هه‌ر بێهیڤی نه‌دكرم. ل پشتی نیڤرۆیه‌كا زوو، نامه‌یه‌ك ل مه‌سنجه‌ری بۆ من هێلا بوو ونڤیسی بوو: “ئه‌ڤرۆ ده‌لیڤه‌كا باش مه یا هه‌ی، دێ ل ده‌مژمێر 4:00 چمه كلینیكا نۆژداری و تو ژی ل فلكا هه‌سپا ل سه‌ر جاده‌یا دچیته زه‌ری لاند ل ژڤانێ من به، دێ نۆژداری بینم و هێم”.
بێهنخوه‌شترین گولاڤ من ب خوه داكر، رندترین جلك من كرنه به‌رخوه، من هزرا خوه د جوانترین رسته و هه‌ڤۆكان دا كر دا كو د ڤێ دیدارێ دا ئاراسته‌ی وێ بكه‌م. دا ژ بیر نه‌كه‌م، من قه‌فته‌كا گولان ژی بۆ كڕی، هه‌رچه‌نده من هزرا هندێ نه‌كر دێ ب چ به‌هانه وان گولان ل گه‌ل خوه به‌ته مالێ.!
وه‌كو هه‌موو وان كه‌سێن ل هیڤیا ژڤانه‌كێ ئه‌سته‌م، من ل گه‌ل خوه گۆت: “ئه‌رێ راسته خه‌ون دێ بیته ڕاستی؟”..
د ترۆمبێلێ دا ل به‌نده‌مانێ مام، پشتی من جامێن ده‌رگه‌هێن ترۆمبێلێ ڤه‌كری هێلاین و دویكێلا جگاره‌كێ و ئێكا دی و ئێكا دی ژی دای بای، هه‌ر ب خه‌یال ئه‌ز یێ هزرا وێ گاڤێ دكه‌م كو ژ كلینیكی ده‌ردكه‌ڤیت و به‌ره‌ڤ من ڤه دهێت، ئه‌ز یێ ب باوه‌رم دێ ترۆمبێلا من ناسكه‌ت چونكی من ره‌نگ و جۆرێ وێ گۆتبوونێ.
ژ خافله‌تی ڤه و پشتی نزیكی ده‌مژمێره‌ك و پازده خۆله‌كان، من دیت یا خوه ب چاكیته‌كێ ڕه‌ش پێچای و شاله‌كا سۆر یا ل گه‌رده‌نا خوه ئالاندی و یا به‌ره‌ڤ ترۆمبێلێ ڤه دهێت.
ده‌رگه‌هێ ترۆمبێلی ڤه‌كر و سووار بوو، ئێكسه‌ر گۆت بهاژۆ، هنده‌كێ ژ ڤێرێ دوور بكه‌ڤه.. دنیا هنده‌كێ تاری بوو بوو و بارانه‌كا هوور دباری، من ژی بێ دودلی به‌ره‌ڤ ژووردا ترۆمبێل هاژۆت و من دیت جاده‌یه‌كا ڤالا و تاری ل وێرێ هه‌یه، من ترۆمبێل ڕاگرت، ژ هژمه‌ت و خه‌ریبیێ دا من نه‌كره نه مه‌ردی و من لیڤێن خوه بۆ جۆت لێڤێن وێ برن و ب ماچه‌كا ژ دل لێڤ لێ مێتن.. هندی وێ كر و نه‌كر و بزاڤا ره‌دكرنا من دا و د گۆت نه.. نه لێ؛ نه خێر من لێڤ هه‌ر به‌رنه‌دان.
من سووراتییه‌كا گه‌رم تام كر، پشتی لێڤێن من شل بووین، من رۆناهییا ترۆمبێلێ هه‌لكر.. و ب كلینیكسه‌كێ لێڤێن خوه سترین، من دیت كو كلینیكس یا سۆر بووی! من گۆتی: ” دینێ ما ته چه‌ند سۆراڤ د لیڤێن خوه دایه؟”. گۆت: ” من هه‌ر سۆراڤ بكار نه‌ئینایه!؟”. ” پا ئه‌ڤه چ سۆراتییه؟!.. تیق تیق كره كه‌نی و گۆت: ” دلێ من، ئه‌ز ل كلینیكا نوژدارێ ددانا بووم و من ددانه‌كێ خوه یێ ئیناتیه ده‌ر!
دهۆك: له‌زگین جوقی:
د. هه‌كار شه‌عبان سلمان، تایبه‌تمه‌ندێ نه‌خۆشیێن گولچیسكان و میزه‌رۆیێ دیاركر نه‌كونترولكرنا ده‌ستئاڤا زراڤ پتر ل ده‌ڤ ژنان هه‌یه كو نه‌ساخ نه‌شێت ده‌ستئاڤا خوه كونترول بكه‌ت ب تایبه‌تی ژی ده‌مێ كاره‌كێ ئه‌نجام د ده‌ت وه‌كو ب روونیت و راببیت و ب بێهنژیت یان بكه‌نیت دێ دیاربیت.
هه‌كار شه‌عبان سلمان، دیاركر كو ده‌ستئاڤا نه‌ساخی بێی وی دهێته خوار و ئه‌ڤه كارتێكرنێ ل سه‌ر نه‌ساخی دكه‌ت ب تایبه‌تی ژی دوارێ ده‌روونی دا، هه‌تا نه‌شێـت كارێن خوه یێن رۆژانه بجه بینیت و گۆت: ئه‌گه‌رێن سه‌ره‌كی یێن ڤێ نه‌ساخیێ لاوازبوونا ماسولكایه ئه‌وێن مرۆڤ ده‌ستئاڤا خوه یا زراڤ پێ كونترول دكه‌ت، ئه‌و ماسولكه ریگریێ ل ئینانا ده‌ستئاڤا مرۆڤی دكه‌ن و ناهێلن ده‌ستئاڤ بهێته خار و ئه‌و ماسولك لاواز دبن و مرۆڤ نه‌شێت كونترول بكه‌ت.
ئاشكه‌را كركو: ماسولك گه‌له‌ك جاران ل ده‌ڤ ژنان پشتی زارۆكبوونێ ب تایبه‌تی ژی رێیێن نورمال كارتێكرن ل وان ماسولكا دبیت یێن ده‌ستئاڤێ كونترول دكه‌ن و ئه‌ڤه دبیته ئه‌گه‌ر ماسولك لاواز ببن ئه‌و نه‌شێت كونترولێ ل سه‌ر ده‌ستئاڤا خوه یا زراڤ بكه‌ت و هنده‌ك جاران قه‌له‌وی و دانعه‌مری و جگاره‌كیشان پتر كارتێكرنێ ل سه‌ر لاوازبوونا ماسولكا دكه‌ن و مرۆڤ نه‌شێت كونترولێ ل سه‌ر ده‌ستئاڤا خوه یا زراڤ بكه‌ت و هنده‌ك ئه‌گه‌رێن دیتژی هه‌نه ب تایبه‌تی ژی پشتی ئه‌نجامدانا نشته‌رگه‌ریان یان كۆخكه‌كا دومدرێژ هه‌بیت ئه‌وژی مرۆڤی پتر تووشی ڤێ چه‌ندێ دكه‌ن.
خۆیا ژی كركو دو رێیێن چاره‌سه‌ریێ هه‌نه ئه‌وژی ئێك ب رێیا نشته‌رگه‌ریێ ئه‌وژی چه‌ند جۆر هه‌نه نه‌ساخ مفای ژێ دبینیت، یانژی وه‌رزش ژی یا باشه بۆ ڤان كه‌سان یێن تووشی نه‌كونترولكرنا ده‌ستئاڤا زراڤ دبن ئه‌ژوی جۆره‌كێ وه‌رزشی هه‌یه دبێژنێ ( KEGEL EXERCISES) ئه‌ڤ جۆرێ وه‌رزشێ ماسولكێ بهێز دكه‌ت و نه‌ساخ مفای ژێ وه‌ردگریت بۆ كونترولكرنا ده‌ستئاڤێ و پێدڤیه ڤه‌خوارنا چایێ و قه‌هوێ كێم بكه‌ت و گه‌له‌ك رێیێن دێ یێن چاره‌سه‌ری هه‌نه.
ه.تاقیگه‌هێ، ئاریان سه‌عدو سلێمان
تاقیگه‌ها نۆشداری كو پشكنینێن نۆشداری تێدا دهێنه ئه‌نجامدان، د نوكه دا گه‌له‌ك گرنگیا هه‌ی، ب گشتی دو جورێن پشكنینان هه‌نه، پشكنین ب مه‌ره‌ما خۆپاراستنێ كو به‌ری نه‌خۆشی په‌یداببیت، كو هنده‌ك نیشان د پشكنینان دا ده‌ردكه‌ڤن كو دبنه ئه‌گه‌ر ئه‌و كه‌سه هنده‌ك كارێن خۆپارێزیێ بكه‌ت داكو ئه‌و نه‌خوشیه بو چێنه‌بیت، بوو نموونه پشكنینێن چه‌وری، كارێ گولچیسكان، كارێ مێلاكێ، جورێ دوێ پشكنینێن ب مه‌ره‌ما ده‌ستنیشانكرنا نه‌خوشیێ و دیاركرنا چاره‌سه‌ریا دروست، كو ئه‌ڤه پشتی نه‌خوشی په‌یدادبیت ئه‌ڤ پشكنینه دهێنه ئه‌نجامدان، بو هندێ ب دروستی جورێ نه‌خوشیێ بهێته ده‌سنیشانكرن و چاره‌سه‌ریا دروست بو نه‌خوشی بهێته ئه‌نجامدان و ب به‌رده‌وامی پشكنین بهێنه‌كرن بو زانینا كا ئه‌رێ چاره‌سه‌ریێ كارێ خوه كریه یان نه وهه‌تا چ راده ره‌وشا نه‌خوشی باشتر یان خرابتر لێدهێت.
چاوانیا دروستكرنا پشكنینێن نۆشداری؟
گه‌له‌ك جورێن پشكنینێن نۆشداری یێن هه‌ین ئه‌ڤه‌ژی دبیته ئه‌گه‌ر كو گه‌له‌ك رێك و شێوازێن چێكرنا پشكنینان هه‌بن كو هنده‌ك ژوان ب ئامیرێن ئه‌لكترونی كو تایبه‌ت هاتینه چێكرن بو مه‌ره‌ما پشكنینا دهێنه چێكرن و هنده‌ك پشكنین ژی بێی هیچ ئامیره‌ك ب تنێ ب كارئینانا هنده‌ك ماددێن تایبه‌ت ب پشكنینا دگه‌ل سامپلێ نه‌خوشی دهێنه كرن، هه‌روه‌سا هنده‌ك پشكنین ب تنێ ب چاڤی ئانكو ب دیتنا سامپلی دهێنه كرن.
بوچی هنده‌ك پشكنین زوو ده‌ردكه‌ڤن و هنده‌ك گیرودبن؟
گیرۆبوون و زوو ده‌ركه‌فتنا ئه‌نجامێن پشكنینا ب هنده‌ك فاكته‌را ڤه گرێداییه ژ وان فاكته‌را ژی جورێ پشكنینێ كو هنده‌ك پشكنینا ده‌مه‌كێ ده‌ستنیشانكری هه‌یه و تو نه‌شێی ده‌ستكاریێ تێدا بكه‌ی بو نموونهESR كو ب ده‌مژمێره‌كێ ئه‌نجام دهێته خاندن و هنده‌ك جارا نۆشدار داخازا ئه‌نجامێ ESR دو ده‌مژمێری دكه‌ت، ئه‌گه‌ره‌كێ دی یێ كاردكه‌ته سه‌ر گیروبوون و زوی ده‌ركه‌فتنا ئه‌نجاما كه‌ڤناتی و نووییاتیا وان ئامیرایه یێن كو پشكنین پێ دهێنه كو ئامیرێن كه‌ڤن ئێك ئێكه سامپلا وه‌ردگرن و ده‌مه‌كێ درێژ پێ دڤێت هه‌تا ئه‌نجامی دده‌ت، به‌لێ ئامیرێن نوی و هه‌ڤچه‌رخ دشیاندایه گه‌له‌ك سامپل پێكڤه بهێنه وه‌رگرتن د ئامیره‌یدا و ب ماوه‌كێ گه‌له‌ك كێم ئه‌نجامێن هه‌میا پێكڤه بده‌ت، فاكته‌ره‌كێ دیتژی یێ هه‌ی ئه‌وژی زیره‌كی و شاره‌زاییا ستافێ پشكنینا دكه‌ت كو ب هویربینی و بله‌ز دڤێت كاربكه‌ن دا كو ئه‌نجام گیرو نه‌بن.
ئه‌ڤرۆ، به‌رپه‌رێ ساخله‌میێ:
♦فشارا خوینێ:
* كه‌نگی: هه‌ر ته‌مه‌نه‌كی، ب تایبه‌ت پشتی 40 سالیێ.
* چه‌ند: كێمتر 140 ل سه‌ر 90 ئاساییه، ژڤێ پتر نه ئاساییه.
* چاوا:هه‌كه ئاسایی بوو سالێ جاره‌كێ، هه‌كه بلندبوو پێدڤیه چاره‌سه‌ریێ وه‌ربگریت و ل ژێر چاقدێریا نۆشداری بیت.
* پشكنینا روینێن خوینێ:
* كه‌نگی: پشتی20 سالیێ.
* چه‌ند:
1-كۆلیستیرۆل: كێمتر 180 ملگم/دل
2-ترایگلیسیراید: كێمتر 150ملگم/دل
* چاوا: هه‌كه یا ئاسایی بوو 5 سالا جاره‌كێ، هه‌كه یا بلند بوو 6 هه‌یڤا جاره‌كێ.
* پێدڤیه پشكنین ب برسیاتی بهێته‌كرن 12 ده‌مژمێرا چ نه‌خۆی).
• پشكنینا شه‌كرا خوینێ:
* كه‌نگی: پشتی 45 سالیێ، زووتر هه‌كه مه‌ترسی ل سه‌ر بوو (قه‌له‌وی، شه‌كر ل خێزانێ دا).
* چه‌ند:
1-ڕێژه ب برسیاتی ( 8 ده‌مژمێر) : كێمتر 126ملگم/دل
2-ڕێژه پشتی خوارنێ (2 ده‌مژمێر): كێمتر 200 ملگم/دل
* چاوا: هه‌كه ئاسایی بوو 3 سالا جاره‌كێ، هه‌كه یا بلند بوو چاره‌سه‌ریێ وه‌ربگریت و ل ژێر چاڤدێریا نۆشداری دا بیت.
♦ پشكنینا په‌نجه‌شێرا قۆلۆنێ:
* كه‌نگی: پشتی 50 سالیێ، پشتی 10 سالان هه‌كه نێزیكێن پله ئێك په‌نجه‌شێرا قۆلۆنێ هه‌بیت.
* چه‌ند: پێدڤیه ئاسایی بیت (گرێ و برین نه‌بن).
* چاوا :
1-پشكنین بۆ خوینا ڤه‌شارتی دناڤ به‌رمایكێن مرۆڤی دا: سالێ 1 جار.
2-نازوور: سیگمۆیدۆیكۆپ ( 5 سالا جاره‌كێ)، كۆڵۆنۆسكۆپ 10سالا جاره‌كێ)..
♦پشكنینا ڤیتامین D :
* كه‌نگی: پشتی 40 سالیێ.
* چه‌ند: 50 – 70 نگ/مل
* چاوا: سالێ جاره‌كێ.
تایبه‌ت بو ژنان:
♦️پشكنینا پێتیبوونا هه‌ستیان (DEXA) :
* كه‌نگی: پشتی 45 سالیێ.
* چه‌ند: زێده‌تر ل (-1).
* چاوا : 5 سالا جاره‌كێ.
♦️ تیشكا مه‌مكی (مامۆگرافی) :
* كه‌نگی: پشتی 45 سالیێ.
* چه‌ند: پێدڤیه ئاسایی بیت (گرێ نه‌بن)
* چاوا : سالێ 1 جار.
تایبه‌ت بو زه‌لامان:
♦️پشكنینا تایبه‌ت ب په‌نجه‌شێڕا پڕۆستاتان (PSA) :
* كه‌نگی : پشتی 50 سالیێ.
* چه‌ند: زێده‌تر ژ 4 نگ/مل.
* چاوا: سالێ 1جار.
دهۆك، هه‌رهین محه‌مه‌د:
هینكا محه‌مه‌د سالح، په‌یامێرا كه‌نالێ (mbc ) ئیراق، دیداره‌كێ دا بۆ رۆژناما ئه‌ڤرۆ گۆت: ئه‌ڤه بۆ ده‌مێ سێ سالایه ئه‌ز وه‌كو په‌یامنێر ل كه‌نالێ ناڤهاتی كاردكه‌م و ب دیتنا من پێدڤیه مرۆڤ ژ په‌یامنێریێ ده‌ستپێبكه‌ت هه‌تا دگه‌هیته بێژه‌ری و پێشكێشكاریێ و نه‌یا ب ساناهی یه ل ده‌ستپێكێ مرۆڤ بیته بێژه و پێشكێشكار ب ره‌نگه‌كێ زیندی به‌رنامه‌یان پێشكێش بكه‌ت و دبه‌رنامێ من دایه ژی ل داهاتی به‌رنامان ژی پێشكێشبكه‌م دستۆدیویێ ڤه و نوكه په‌یامنێرم ل وی كه‌نالی و د به‌رنامه‌كێ جڤاكی دا ده‌ردكه‌ڤم و یا كه‌یخۆشم داب و نه‌ریت وفۆلكلۆر و جوانیی و ره‌وشه‌نبیریا خه‌لكێ كوردستانێ ڤه دگوهێزم
هینكایێ گۆت: گه‌له‌ك كه‌نالان داخاز ژمن كریه كو ل گه‌ل وان كاربكه‌م، به‌لێ ل گه‌ل كه‌نالێ خوه یا ئارامم و دبه‌رنامێ من دایه ل هه‌مان كه‌نال به‌رنامه‌كی پێشكێشبكه‌م، به‌لێ ڤێ چه‌ندێ ژی ده‌مه‌ك دڤێت هاتا بشێم پێشكێشكاریێ ژی بكه‌م و جهێ شانازیێ یه ژی بۆ من كو ئێكه‌م كچا كوردم كو لڤی كه‌نالی كاردكه‌م و ڤی كاری دكه‌م نه ژبه‌ر داهاته‌كی یان به‌رنیاسبوونێ، چونكو فه‌رمانبه‌رم و ده‌رچوویا په‌یمانگه‌ها كومیۆته‌ری مه و من هوله‌كا وه‌رزشی ژی هه‌یه، و دڤی سه‌ره‌ده‌می دا كچا كورد دشێت خوه پێشبێخیت، راسته جڤاكێ دبیت رێكێ نه‌ده‌ت و ل ده‌مێ رێز ل ئازادیا خوه گرت دێ گه‌هیته ئاست و جهێن بلند و ده‌مێ ئه‌ز ژی كاره‌كی دكه‌م و یا ژ خوه پشت راستبم و دبینم چو تشت كارتێكرنێ ل كچا كورد ناكه‌ت و كچا كورد یا كاردكه‌ت و مالا خوه ژی ب رێڤه دبه‌ت و ده‌می بۆ جارا ئێكی ل سه‌ر كه‌ناله‌كێ عه‌ره‌بی ده‌ركه‌فتیم گه‌له‌ك نامه و ته‌له‌فون بۆ من هاتن و كه‌یفخۆشیا خوه بۆ من دیاركرن.
دهۆك، شاكر ئه‌تروشی:
34 هونه‌رمه‌ندێن دهۆكێ، كو ژ گرۆپێ هونه‌رێ هه‌ڤچه‌رخن، ئه‌ڤرۆ رۆژا چارشه‌مبی رێكه‌فتی 2/2/2022 ل ده‌مژمێرچاری ئێڤاری دێ پێشانگه‌ها هه‌ڤپشك ل ژێر ناڤێ (دایلۆكا هه‌ست) ل هولا گه‌له‌ریا دهۆكێ ڤه‌كه‌ن و هه‌ر ئێك ژوان ب دو به‌رهه‌مان دێ پشكدار بیت.
بێوار ته‌حسین، به‌رپرسێ ناڤه‌ندا شێوه‌كاری ل سه‌ندیكا هونه‌رمه‌ند كوردستانێ/لقێ دهۆك، د دیداره‌كێ دا بۆ رۆژناما ئه‌ڤرۆ دیاركر كو وان وه‌ك سه‌ندیكا پشته‌ڤانی ل ڤه‌كرنا ڤێ پێشانگه‌هێ كریه و ئه‌ڤه دبیته پێشانگه‌ها چارێ یا وی گرۆپی، هه‌ر هونه‌رمه‌نده‌ك ب دو به‌رهه‌مان یێ پشكداره كو ژ كه‌ڤالان و په‌یكه‌ران پێك دهێن، بۆ زانین پشكدار هه‌موو ژ سه‌نته‌رێ دهۆكێ نه و بتنێ ئێك ژ زاخۆیه، ژوانا چارده ئافره‌تن، و ئه‌م وه‌كو سه‌ندیكا هه‌رده‌م پالپشت و پشته‌ڤانێن ڤان جۆره چالاكیانه، چنكو به‌رده‌وام هیڤیا مه ئه‌وه ئه‌م هونه‌رێ كوردی ب هه‌موو تایێن خوه ڤه ژوانا (كه‌ڤال و په‌یكه‌ر) پتر به‌ر ب پێشڤه ببه‌ین و دێ به‌رده‌وام پشته‌ڤانیێ ل هه‌موو هونه‌رمه‌ندان، ب تایبه‌ت یێن داهێنه‌ر كه‌ین و ده‌رگه‌هێن مه بۆ وان دڤه‌كری نه.
پێشانگه‌ها ئه‌ڤرۆ ژلایێ رێڤه‌به‌ریا گشتی یا ره‌وشه‌نبیری و هونه‌ری ل پارێزگه‌ها دهۆكێ/رێڤه‌به‌ریا هونه‌رێ شێوه‌كاری، ب پشته‌ڤانیا سه‌ندیكا هونه‌رمه‌ند كوردستانێ/لقێ دهۆك هاتیه رێكخستن و بۆ ده‌مێ چه‌ند رۆژان دێ یا به‌رده‌وام بیت.
دهۆك، شاهۆ فه‌رید:
قوتۆگرافه‌ر (سه‌عه‌د بابیری) د دیداره‌كێ دا بۆ رۆژناما ئه‌ڤرۆ گۆت: دژیه‌كێ بچووكدا حه‌زا وێنه‌گرتنێ ل ده‌ف من هه‌بوو، له‌ورا من كامیره‌ك بۆ خوه كری و ل دووف زانینا خوه وێنه دگرتن، پاشان ده‌لیڤه هاتن و من پشكداری د چه‌ند خولان دا كر، هه‌روه‌سا به‌رده‌وام من بزاڤ دكرن پتر خوه ئاڤابكه‌م و پێزانینێن نوو ل سه‌ر هونه‌رێ وێنه‌گرتنێ وه‌ربگرم، هه‌تا نوكه من پشكداری د پێنج پێشانگه‌هێن هه‌ڤپشك دا كریه و من ل به‌ره پێشانگه‌هه‌كا تایبه‌ت بۆ خوه ڤه‌كه‌م.
سه‌عه‌دی گۆت: ده‌مێ ئه‌ز هه‌ر وێنه‌كی دگرم خوه پێڤه ماندی دكه‌م دا بشێم ب جوانی دیاربكه‌م، و گه‌له‌ك كه‌یفا من دهێت ده‌مێ وێنێن من دناڤ تۆرێن جڤاكی دا دهێنه به‌لاڤكرن، ئانكو ده‌مێ ئه‌ز دبینم خه‌لكه‌ك حه‌ز ژ وان وێنه‌یان دكه‌ت ئه‌وێن من گرتین ئه‌ز وه‌ستیانێ ژ بیردكه‌م، لێ مخابن هه‌تا نوكه خه‌لكه‌ك جوداهیێ د ناڤبه‌را فوتۆگرافه‌ری و وێنه‌گری دا ناكه‌ت، و گه‌له‌ك جاران ده‌مێ ئه‌م دچینه ئاهه‌نگه‌كێ یان شه‌هیانه‌كێ ئێكسه‌ر به‌حسێ پاره‌ی ل گه‌ل مه دكه‌ن و هنده‌ك وه‌سا تێ دگه‌هن چه‌ند پاره پتر بیت ئه‌و وێنه‌گر باشتره، لێ ئه‌ز دبینم یا دروست ئه‌وه بهای چو په‌یوه‌ندی ب كاری ڤه نینه، بۆ زانین گه‌له‌ك جاران من وێنه ب مۆبایلێ گرتینه گه‌له‌ك جوانتر هاتیه یێ ژ ب كامیرێ گرتی، بۆ زانین ئه‌ز ئه‌ندامێ سه‌ندیكایێ و كومه‌لا وێنه‌گرامه، لێ هه‌تا نوكه چو پشته‌ڤانی ل من نه‌كرینه، هه‌روه‌سا بۆ چو چالاكیێن خوه ژی ئه‌ز داخواز نه‌كریمه.
دهۆك، هه‌رهین محه‌مه‌د:
شێوه‌كار (به‌ختیار ئه‌بوبه‌كر) د د دیداره‌كێ دا بۆ رۆژناما ئه‌ڤرۆ گۆت: ئه‌ز نه‌شێم بێژم كا ئاستێ من یێ شێوه‌كاری یێ چاوایه، به‌لكو دڤێت بینه‌ر وێ چه‌ندێ بێژن و كه‌ڤالان چێدكه‌م و ئه‌و تشتێ د هزرا من دا دانمه سه‌ركه‌ڤالی و پتریا كه‌ڤالێن من ده‌ربڕینێ ژ كلتۆرێ كوردی دكه‌ن و حه‌ز دكه‌م كه‌ڤالێن ب شێوه‌كی واقعی بهێنه دیاركرن و د رۆژانێن خواندنێ دا ب گه‌له‌ك هونه‌رمه‌ندێن شێوه‌كاری یێن جهانی داخباردبووین و وه‌كو قوتابخانه‌كێ بوون بۆمه و ستایل و شێوازێن وان كاریگه‌ریا خوه ل سه‌ر من هه‌یه.
به‌ختیاری گۆت: هونه‌ر ب گشتی حه‌زو ئاره‌زویه و چو هونه‌رمه‌ند نه‌شێن بێژن ژبه‌ر پاره‌ی و به‌رنیاسبوونێ ڤی كاری دكه‌م و هه‌موو ده‌مان دڤێت به‌ر ب خه‌ونا خوه ڤه بچیت و هه‌كه هونه‌رمه‌ند یێ راستگۆ بیت ل گه‌ل هونه‌ری ب ناڤ و ده‌نگ دكه‌ڤیت و داهاته‌كی ژی ب ده‌ست خوه ڤه ئینت و ب رۆژه‌كێ و د رۆژان نه‌شێت به‌رهه‌م بینت و پێدڤی ب ده‌می یه و دڤێت هونه‌رمه‌ند هه‌موو ده‌مێ خوه بده‌ته هونه‌رێ خوه دا كو هونه‌ره‌كێ جوان به‌رهه‌م بینت و هه‌كه هونه‌رمه‌ند بزاڤێ نه‌كه‌ت و رۆژ بۆ رۆژێ خوه پێش نه‌ئێخیت ئه‌وا وی كری هه‌موو دێ د به‌ر ئاڤێ دا چیت و ژبلی كارێ هونه‌ری ماموستایێ وانا هونه‌ری مه ل قوتابخانه‌كێ و من گه‌له‌ریه‌كا بچووك هه‌یه هه‌موو كارێن خوه یێن هونه‌ری وه‌كو چێكرنا كه‌ڤالان تێ ڤه دكه‌م و هه‌موو هیڤێن من ئه‌وه هونه‌رێ شێوه‌كاری بگه‌هیته ئاسته‌كێ بلند و بگه‌هیته جهێ خوه هونه‌ر ژی بشێت خزمه‌تا هونه‌رێ كوردی بكه‌ت و شێوه‌كارێن مه ژی بشێن هونه‌رو كلتۆرو هه‌رئایشه‌كا دجڤاكی دا چێبیت بكه‌ته كه‌ڤال و نیشا خه‌لكی بده‌ت.
دهۆك، شاكر ئه‌تروشی:
دلڤین ئه‌ندراوس موشی، كچه‌كا مه‌سیحی یه، ژدایكبوویا سالا 1988 یه، ل باژێرێ زاخۆ دژیت، پتری دوازده سالانه كارێ تراشینا پرچێ و مه‌یك ئاپی دكه‌ت، ئه‌و دبێژن ئه‌ز ب گه‌له‌ك ب كارێ خوه یا دلخۆشم، چنكو ب وه‌ستیانا خوه دشێم دلێ گه‌له‌ك ئافره‌تان خۆش دكه‌م، له‌ورا هه‌رده‌م دبێژم كارێ مه ژی جۆره‌كه ژ هونه‌ری، چنكو ئه‌م دشیێن دێم و سه‌روچاڤێن هه‌ر كه‌سه‌كێ ب گوهۆرین.
هه‌روه‌سا گۆت: د ژیه‌كێ بچووك دا من حه‌ز ژڤی كاری دكر و هه‌تا راده‌كی ل به‌ر ده‌ستێ خویشكا خوه فێربوویمه، لێ نوكه پشت به‌ستنێ ب خوه دكه‌م و خویشكا من (وارین) هه‌رده‌م پشته‌ڤان و پالپشته‌كا بهێز بوویه بۆ من و سه‌رخستنا كارێ من، بۆ زانین ئه‌ز كارێن خوه د سناپی دا به‌لاڤ دكه‌م و گه‌له‌ك ئافره‌ت ب وێ رێ په‌یوه‌ندیێ ب من دكه‌ن.
ل دووماهیێ ده‌رباره‌ی وێ چه‌ندێ كو خه‌لكه‌ك گازندان ژ خودانێن جوانكاریان دكه‌ن و دبێژن بهایێن وان گه‌له‌ك دگرانن، دلڤینێ گۆت: كار ژ كاری یێ جودایه، ئانكو دبیت ئه‌و كارێ ئه‌م ل ڤێره بۆ ئافره‌تان دكه‌ین ل جهێن دی نه‌شێن وه‌كو مه بكه‌ن، چنكو كه‌رستێن مه ژ جۆرێن گه‌له‌ك باشن، هه‌روه‌سا بلندبۆنا بهایێ دۆلاری و كریێن دوكانان ژی كارتێكرنا خوه هه‌یه، لێ هه‌ر چاوا بیت خه‌لكه‌ك كارێ باش و نه‌باش ژیك جودا دكه‌ن و كارێ باش دنیاسن، و ده‌مێ ئه‌ز كاردكه‌م حه‌زناكه‌م كه‌س مایێ خوه دكارێ من بكه‌ت، چنكو هنده‌ك ئافره‌ت هه‌نه دێ كه‌سه‌كا دی ل گه‌ل خوه ئینن و دێ هند بینی مایێ خوه دكارێ مرۆڤی دا كر بێی كو ئه‌و تشته‌كی ژێ بزانیت، لێ ئه‌ز دێ هه‌ر ل سه‌ر كارێ خوه یا به‌رده‌وام بم و به‌رده‌وام دێ بزاڤێ كه‌م تشتێ كارێ خوه باشتر لێ بكه‌م و داهێنانێ بكه‌م.
نيشاندان