ئه‌ڤرۆ:

دادگه‌ها باژێرێ سنه‌ ل رۆژهه‌لاتێ كوردستانێ بریار دا مامۆستایا زمانێ كوردی زارا محه‌مه‌دی ب ٥ سال سزایێ زیندانێ بهێته‌ سزادان و هه‌ر دوهی دادگه‌هێ داخواز ژ مامۆستایا كورد ژی كر كو خوه‌ راده‌ست بكه‌ت.

زارا محه‌مه‌دی مامۆستایا زمانێ كوردی یه‌ ل رۆژهه‌لاتێ كوردستانێ و چه‌ندین سالن ژ به‌ر كو وانان ب زمانێ كوردی دبێژیت هێزێن ئێمناهیێ به‌ری نها ئه‌و ده‌سته‌سه‌ر كربوون و پاشی ژی ب كه‌فاله‌ت هاته‌ ئازادكرن و دوهی ژی جاره‌كا دی سزایێ ٥ سالن زیندان ل سه‌ر مامۆستایا كورد زارا محه‌مه‌دی هاته‌ سه‌پاندن.

دهۆك، نه‌وزاد هلۆری:

رێڤه‌به‌ریا چاڤدێریا بازرگانی ل پارێزگه‌ها دهۆكێ‌ د كۆنگره‌یه‌كێ‌ رۆژنامه‌ڤانی دا ئامارا كار و چالاكیێن خوه‌ یێن سالا 2021ێ‌ به‌لاڤكرن، ب گوره‌ی داتایێن وان، د سالا بۆری دا 117 جهێن بارزگانی ل پارێزگه‌ها دهۆكێ‌ هاتینه‌ دائێخستن و 436 جه ژی هاتینه‌ سزادان.

عه‌بدوللا ئیبراهیم، رێڤه‌به‌رێ‌ چاڤدێریا بازرگانی ل پارێزگه‌ها دهۆكێ‌ گۆت: “مه‌ د سالا بۆری دا ل سنوورێ‌ پارێزگه‌ها دهۆكێ‌ 30 هزار و 934 سه‌ره‌دان بۆ جهێن بازرگانی كرینه‌، داكو ژ نێزیك بزانین و دووڤچوونێ‌ ل سه‌ر چاوانیا كڕین و فرۆتنا كه‌لوپه‌لان بكه‌ین، د ئه‌نجامێ‌ وان سه‌ره‌دانان دا 117 جهێن بارزگانی هاتینه‌ دائێخستن و 436 جه ژی هاتینه‌ سزادان، پڕانیا وان جهان ژی ل هه‌یڤا چار هاتینه‌ دائێخستن و سزادان”.

ناڤهاتی زێده‌تر گۆت: “ب گوژمێ‌ 63 ملیۆن و 685 هزار دیناران ئه‌و هه‌موو جهه‌ هاتینه‌ سزادان، دیسا 300 هزار و 717 كیلۆگرامێن كه‌لوپه‌لێن ئێكسپایه‌ر ژی هاتینه‌ گرتن و ژناڤبرن، لژنه‌یێن مه‌ ب هه‌ڤپشكی ل گه‌ل جهێن شوله‌ژێ‌ دێ‌ ل سه‌ر دووڤچوونێن خوه‌ به‌رده‌وام بن، داكو گیانێ‌ وه‌لاتیان و ساخله‌میا وان یا پاراستی بیت”.

دهۆك، نه‌وزاد هلۆری:
پشكه‌ك ژ كارمه‌ندێن ئوفیسا دهۆكێ‌ یا كۆمسیۆنا بلند یا سه‌ربخوه‌ یا هه‌لبژارتنان ل ئیراقێ‌ ل هه‌مبه‌ر ئوفیسا دهۆكێ‌ خرڤه‌بوونه‌كا نه‌رازیبوونێ‌ ئه‌نجام دا و تێدا داخواز كر كو گرێبه‌ستێن وان ببنه‌ هه‌میشه‌یی.
ئه‌حمه‌د سه‌لیم، ئێك ژ نوونه‌رێن خرڤه‌بوویان بۆ رۆژناما ئه‌ڤرۆ گۆت: “ئه‌ڤه‌ چه‌ندین ساله‌ ئه‌م ب گرێبه‌ست ل گه‌ل كۆمسیۆنێ‌ كار دكه‌ین، ل هه‌موو ده‌ڤه‌رێن ئیراقێ‌ گرێبه‌ست بووینه‌ هه‌میشه‌یی، به‌لێ‌ ئه‌م نزانین بۆچی یێن مه‌ نه‌بووینه‌ هه‌میشه‌یی، ئه‌م دخوازین كو ئه‌م ژی وه‌كو هه‌موو ده‌ڤه‌رێن دی یێن ئیراقێ‌ ببینه‌ هه‌میشه‌یی، ژبه‌ركو ئه‌ڤ یه‌ك مافێ‌ مه‌یه‌ و مه‌ شاره‌زایه‌كا باش د ئه‌ركێن كۆمسیۆنێ‌ دا یا هه‌ی”.
ژلایی َخوڤه‌ خالد عه‌باس، رێڤه‌به‌رێ‌ ئوفیسا دهۆكێ‌ یا كۆمسیۆنا بلند یا سه‌ربخوه‌ یا هه‌لبژارتنان ل ئیراقێ‌ بۆ رۆژناما ئه‌ڤرۆ گۆت: “ده‌نگێ‌ مه‌ ل گه‌ل ده‌نگێ‌ كارمه‌ندێن كۆمسیۆنێ‌ یه‌ و مافێ‌ وایه‌ كو گرێبه‌ستێن وان ببنه‌ هه‌میشه‌یی، مه‌ وه‌كو كۆمسیۆن چه‌ندین جاران داخوازیێن وان گه‌هاندینه‌ ئوفیسا نیشتمانی ل به‌غدا و ئه‌ڤ جاره‌ ژی دێ‌ گه‌هینین”.
خالد عه‌باس زێده‌تر گۆت: “هه‌ژمارا وان كارمه‌ندێن كو ب گرێبه‌ست ل گه‌ل مه‌ وه‌كو ئوفیسا دهۆكێ‌ كار دكه‌ن دبنه‌ نێزیكی 250 كارمه‌ندان، ئه‌ڤان كارمه‌ندان شاره‌زایه‌كا باش د كارێن كۆمسیۆنێ‌ و هه‌لبژارتنان یا هه‌ی و راهێنان و خول وه‌رگرتینه‌، ژ به‌رڤێ‌ كۆمسیۆنێ‌ پێدڤی ب وان هه‌یه‌ و مافێ‌ وان ژی یه‌ كو ببنه‌ هه‌میشه‌یی”.

هه‌ولێر، قائید میرۆ:

په‌یڤدارێ هاتنوچوونا هه‌رێما كوردستانێ بۆ رۆژناما ئه‌ڤرۆ دیار كر، د سالا بۆری 2021ێ دا ل سه‌رانسه‌ری هه‌رێما كوردستانێ چار هزار و 119 روودانێن هاتنوچوونێ هاتینه‌ تۆماركرن و دبێژیت: د ئه‌نجامێ‌ وان روودانان دا 662 وه‌لاتیان گیانێ خوه‌ ژ ده‌ست داینه‌ و حه‌فت هزار و 120 وه‌لاتیێن دی ژی بریندار بووینه‌.

عه‌مید ئه‌سعه‌د مه‌لا كه‌ریم، په‌یڤدارێ هاتنوچوونا هه‌رێما كوردستانێ ئاشكرا كر كو د سالا بۆری دا رێژه‌یا قوربانیێن روودانێن هاتنوچوونێ ل هه‌رێما كوردستانێ‌ زێده‌بووینه‌ و گۆت: “ئه‌گه‌رێ پتریا روودانێن هاتنوچوونێ ژی بوو له‌زاتی و بكارئینانا مۆبایلێ و پێگیری نه‌كرن ب رێنمایێن هاتنوچوونێ ڤه‌دگه‌ڕیت”.

عه‌مید ئه‌سعه‌د مه‌لا كه‌ریم گۆتژی: “د سالا بۆری دا 122 هزار تڕۆمبێل هاتینه‌ د ناڤا هه‌رێما كوردستانێ دا و ژلایێ رێڤه‌به‌ریێن هاتنوچوونێ ل پارێزگه‌هێن هه‌رێما كوردستانێ‌ هاتینه‌ تۆماركرن، كو سه‌رجه‌مێ تڕۆمبێلێن هه‌تا نوكه‌ هاتینه‌ تۆماركرن دگه‌هیته‌ ملیۆن و 960 هزار تڕۆمبێلان، هه‌روه‌سا د سالا بۆری دا 70 هزار مۆهله‌تێن شۆفێریێ بۆ وه‌لاتیان هاتینه‌ چێكرن و هه‌تا نوكه‌ ملیۆن و 900 هزار وه‌لاتی بووینه‌ خودان مۆهله‌تێن شۆفێریێ ب جۆرێن تایبه‌ت و كرێ و نێڤده‌وله‌تی ڤه‌”.

ئامێدیێ، مه‌حمود نهێلی:

ب به‌رهه‌ڤبوونا وارشین سه‌لمانن ده‌ڤه‌ردارێ ئامێدیێ و هه‌ژماره‌كا رێڤه‌به‌رێن دام و ده‌زگه‌هێن میری و حزبی و ئه‌منی و فه‌رمانده‌یێن له‌شكری ل ده‌ڤه‌رێ، دوهی 3/1/2022 د رێوره‌سمه‌كێ تایبه‌ت دا، سالح مه‌لا حه‌مدی، وه‌كو رێڤه‌به‌رێ نوو یێ ناوچه‌داریا كانی ماسێ ده‌ست ب كاربوو.

وارشین سه‌لمان، ده‌ڤه‌ردارێ ئامێدیێ ده‌ستخوه‌شی ل سه‌ربه‌ست سه‌بری، رێڤه‌به‌رێ به‌رێ یێ ناوچه‌داریا كانی ماسێ كر، بوو وه‌ستیان و ئه‌و خزمه‌تا بۆ ده‌ڤه‌رێ پێشكێش كری و داخوازا سه‌ركه‌فتنێ بۆ خواست د ئه‌ركێ نوو دا كو دێ پێ هێته‌ راسپاردن و بۆ رۆژناما ئه‌ڤرۆ گۆت: “ئه‌ڤ گوهۆرینه‌ د ئاسایی نه‌ و ژ بۆ پتر خزمه‌تكرنا خه‌لكێ ده‌ڤه‌رێ نه‌”.

ناڤهاتی گۆتژی: “ئه‌م داخوازا سه‌ركه‌فتنێ بو سالح مه‌لا حه‌مدی دكه‌ین كو وه‌كو رێڤه‌به‌رێ نوو یێ ناوچه‌داریا كانی ماسێ ده‌ست ب كار بووی و پشته‌ڤانیا كارگێریا ده‌ڤه‌رداریێ ژی ژ پێخه‌مه‌ت زێده‌تر خزمه‌تكرنا ده‌ڤه‌رێ و وه‌لاتیان بۆ دیار دكه‌ین”.

ئه‌ڤرۆ:

وه‌زاره‌تا كاره‌با حوكمه‌تا هه‌رێما كوردستانێ راگه‌هاند، د نوكه‌ دا به‌رهه‌مئینانا كاره‌بێ بۆ سێ‌ هزار و 337 مێگاواتان بلند بوویه‌، به‌لێ ژ ئه‌گه‌رێ ئاریشێن سۆته‌مه‌نیێ نه‌ شیاینه‌ هه‌تا وی ئاستی به‌رهه‌م بینن و پرۆسا ب تایبه‌تكرنا پشكا به‌لاڤكرنا كاره‌بێ د ئه‌ڤ ساله‌ دا دێ كه‌ڤیته‌ د بیاڤێ‌ بجهئینانێ‌ دا.

وه‌زاره‌تا كاره‌با حوكمه‌تا هه‌رێما كوردستانێ د راگه‌هاندنه‌كێ دا دیار كریه‌، هه‌تا نوكه‌ 80% پرۆژێ پیڤه‌رێ زیره‌ك تمام بوویه‌ و د نیڤا ئێكێ یا ئه‌ڤ ساله‌ دا دێ ب تمامی ب دووماهی هێت.

وه‌زاره‌تا كاره‌بێ‌ د وێ‌ راگه‌هاندنێ‌ دا خویا ژی كریه‌ كو هه‌وا نه‌هێلانا زێده‌گاڤیان ل سه‌ر تۆرێن كاره‌با نیشتمانی دێ‌ ده‌ست پێكه‌ت و سیسته‌مێ ده‌ستنیشانكرنا زێده‌گاڤیان ل سه‌ر تۆرا پیڤه‌رێ زیره‌ك دێ هێته‌ كاراكرن، هه‌روه‌سا دگه‌ل زێده‌بوونا هه‌ژمارا هه‌ڤپشكێن كاره‌بێ، پێدڤیه‌ 300 هزار پیڤه‌رێن دی ژی بهێنه‌ دانان.