ئه‌ڤرۆ:

هونه‌رمه‌ندێ‌ كورد نه‌ورۆز ئۆره‌ماری ئاكنجیێ‌ له‌نده‌نه‌، د به‌رسڤدانا پسیاره‌كا ئه‌ڤرۆ دا كانێ‌ ئه‌و ئه‌و سترانبێژه‌ یان هونه‌رمه‌نده‌، گۆت ل به‌ریتانیا دبێژنه‌ من هونه‌رمه‌ندێ هزرڤان، چونكو سترانان ل گه‌ل  فه‌لسه‌فێ تێكهه‌ل دكه‌م.

دیسا دیاركر كو ئه‌وی سترانێن تایبه‌ت یێن وی، نێزیكی 400 ستران هه‌نه‌، لێ ده‌رفه‌ت نه‌كه‌فتیێ به‌لاڤكه‌ت و گۆت: من نه‌ه ستران ل ته‌له‌ڤزیۆنێن كوردی یێن هه‌ین، هه‌روه‌سا 36 ستران ژی من یێن ل رادیۆیان تۆماركرین، سه‌ره‌رایی ڤێ‌ چه‌ندێ‌ ئه‌ز سترانێن فولكۆری كوردی ژی نووژه‌ن دكه‌م.

پسیاره‌كا دیتر ژی هاته‌كرن كانێ‌ ئه‌و هونه‌رێن رۆژئاڤا (غه‌ربی) ژی تێكڤه‌دده‌ت، هه‌كه‌ به‌لێ‌ چ و جوداهی دبینیت د ناڤبه‌رێ‌ دا، یان هونه‌رێ‌‌ كوردی ل چ ئاسته‌كی یه‌؟

گۆت به‌لێ ئه‌ز ل گه‌ل چه‌ندین تیپێن رۆژئاڤا سترانان دبێژم ژ وان: كۆڕالا وه‌لاتیێن جیهانێ، مینا ل گه‌ل ڤان سترانبێژان، یێ‌ ئینگلیزی جۆن بنتلی، یێ ئینگلیزی مایك كرك پاتربك، یێ ئیتالی دینۆ، یا كه‌نه‌دی ئێریال فیلدینگ، یا ئه‌مریكی ماری هتد….، جوداهیێن مه‌زن یێن هه‌ین، چونكو چار ئێك تۆن (ربع تۆن)  یا د مۆزیكا كوردی دا یا هه‌یی، له‌وما بنگه‌هێ وێ مێلۆدی یه‌، وه‌كو دی بنگه‌هێ مۆزیكا رۆژئاڤا، هارمۆنی یه‌.

نه‌ورۆز ئوره‌ماری گۆت: ئه‌ز دشێم بێژم ئه‌ز یێ هاتیمه‌ بڕین ژ مۆزیكا كوردی، نوزانم  د چ ئاستی دایه‌، ته‌خمین دكه‌م گه‌له‌ك خرابه‌، چونكو وه‌كی ئه‌ز گوهلێ دبم سترانێن نوكه‌ بۆ ده‌مێ‌َ حه‌فتیه‌كێ دژین، مۆزیكا رۆژئاڤا گه‌له‌كا پێشكه‌فتی یه‌ ئه‌م هه‌تا ملیۆن سالێن دیتر ناگه‌هینه‌ وان.

ته‌ ژ به‌ر لایف و ڤیدیۆیێن سۆشیال میدیایێ‌ د بیاڤێ‌ فه‌لسه‌فی دا هونه‌رێ‌ خوه‌ پاشخستیه‌؟

نه‌خێر ئه‌ز ل گه‌ل ئورۆپی و ئه‌مریكیان یێ‌ به‌رده‌وامم ل ئۆرۆپا و شانۆگه‌ریا وان ئاهه‌نگان، ئه‌ڤ ساله‌ هه‌ر چه‌نده‌ كۆرۆنا یا هه‌یی، ئه‌ز پشكداری هه‌شت ئاهه‌نگان بوویمه‌. پێنچ رۆژنامه‌یێن سه‌ره‌كی یێن بریتانی ل گه‌ل من چاڤپێكه‌فتن كرن و ب ملیۆنان ئه‌و چاڤپێكه‌فتن خواندینه‌، رادیۆیا (بی بی سی) یا جیهانی چاڤپێكه‌فتنه‌ك 45 خۆله‌ك ل گه‌ل من كر و چه‌ندین جاران یا به‌لاڤكری و زێده‌تر ژ چار ملیار كه‌سان گوهداری یا كری.

ڤێ حه‌فتیێی من ستران گۆتن بۆ كۆمپانیایه‌كا جیهانی و هه‌ر ڤێ حه‌فتیێ ئه‌ز هاتیمه‌ خه‌لاتكرن ژ لایێ هونه‌رمه‌ندا كورد (ئه‌مه‌ل سه‌عید) ڤه‌، كورده‌ ل به‌رنامێ (مروواریه‌كانی غوربه‌ت).

به‌ری هه‌یڤه‌كێ ئه‌ز پشكداربووم ل گه‌ل فلمه‌كێ ئینگلیزی وه‌كی سترانبێژه‌كێ كورد و  ل هه‌یڤا دو یا سالا دهێت دێ ل جیهانێ به‌لاڤ بیت.

ستران ب خوه‌ فه‌لسه‌فه‌كا بچویكه‌، فه‌لسه‌فه‌ پسیاره‌ و مه‌نده‌هۆشی یه‌ و هزره‌كا نوویه‌. فه‌لسه‌فه‌ هونه‌ری پاش نائێخیت به‌روڤاژی پێشدئێخیت.

ئه‌و هونه‌رمه‌ندێ، سترانبێژێ فه‌لسه‌فێ و مه‌نتقی و به‌لگه‌یێن مادی نه‌زانیت، دێ خولیا حه‌فت ده‌وله‌تان ب سه‌رێ مله‌تی وه‌ركه‌ت.

ل دووماهیێ‌ گۆتنا نه‌ورۆزی بۆ سترانبێژان و بۆ جه‌ماوه‌ری وی ئه‌و بوو، كو هونه‌رمه‌ند د ترسۆكه‌ر نه‌بن، د مه‌لاق نه‌بن، خوه‌ ره‌زیل نه‌كه‌ن بۆ پاره‌ی و ناڤداریێ و زكره‌ش نه‌بن ل ئێك. د زیره‌ك بن و راستیێ بێژن، رێبه‌ربن، ره‌وشه‌نبیر بن، ژ جه‌ماوه‌ری نه‌ترسن، بلا جه‌ماوه‌ر ل دووڤ هه‌وه‌ بهێت نه‌كو هوون ل دووڤ جه‌ماوه‌ری بچن، هزرێن نوو ب ئافه‌رینن، گۆتنا وی بۆ جه‌ماوه‌رێ، هونه‌رمه‌ند نه‌ مولكێ هه‌وه‌یه‌، هه‌وه‌ هونه‌رمه‌ند نه‌ كریه‌، پشتا هونه‌رمه‌ندی نه‌گره‌، چونكو ژ عه‌شیرا ته‌یه‌ یان ژ دیانه‌ت و باژێرێ ته‌یه‌، ل دووڤ هونه‌رمه‌ندیا وی بهایێ وی بده‌یێ.

ئه‌ڤرۆ، هه‌رهین:

سترانبێژێ‌ گه‌نج موه‌فه‌ق گۆران، د دیداره‌كێ‌ دا بۆ به‌رپه‌رێ‌ هونه‌ری یێ‌ رۆژناما ئه‌ڤرۆ گۆت: ئه‌ز مژوولی كاره‌كێ‌ نوو یێ‌ هونه‌ری بووم ئه‌و ژی چێكرنا سترانه‌كێ‌ بوو خودانێ‌ سترانێ‌ ستران دا بۆ من و سترانبێژه‌كێ‌ دی، ئه‌و ده‌كمه‌ك بۆ وی سترانبێژی كار ل سه‌ر نه‌دكر و خودانێ‌ سترانێ‌ ژی گه‌له‌ك دڤیا ئه‌ز وێ‌ سترانێ‌ بێژم، به‌لێ‌ وی سترانبێژی چه‌وا دیت ئه‌ز یێ‌ ئاماده‌كاریان بۆ چێكرنا وێ‌ سترانێ‌ دكه‌م رابوو به‌ری من ده‌ست هاڤێته‌ وێ‌ سترانێ‌.

ناڤهاتی گۆت: راسته‌ ئه‌ڤه‌ ده‌مه‌كه‌ ئه‌ز ژ ستران گۆتنێ‌ و چێكرنا كلیپان دوور كه‌فتیمه‌، به‌لێ‌ هه‌ر یێ‌ ل سه‌ر كارێ‌ خوه‌ یێ‌ هونه‌ری یێ‌ به‌رده‌وامم و ئه‌ڤ كاودانه‌ بووینه‌ ئه‌گه‌ر ژێ‌ دوور كه‌فتیم و داهاتێ‌ مه‌ هه‌موو ل سه‌ر چوونا ده‌واتانه‌ و چێكرنا سترانا و چێكرنا كلیپا، راگه‌هاندن هه‌موو ب پاره‌ دهێته‌ كرن و چو پشته‌ڤانی بۆ هونه‌رمه‌ندان ناهێته‌كرن و سپونسه‌رێن تایبت دڤێن و نه‌بوونا سپونسه‌ران و پاره‌ی ئه‌ز ژ سترانێ‌ دوور خستیمه‌ و من گه‌له‌ك مفا ژ سترا گۆتنێ‌ دیتیه‌ و دشێم بێژم هه‌موو ژیانا خوه‌ و شانازیێ‌ ب كارێ‌ خوه‌ دبه‌م، به‌لێ‌ وه‌كو پاره‌ من چو مفا نه‌دیتیه‌ بتنێ‌ به‌رنیاس بوون بوویه‌ و حه‌زژێكرنا خه‌لكی بۆ من هه‌موو تشته‌ و گه‌له‌ك گه‌نج هه‌بووینه‌ زارڤه‌كرنا من و ده‌نگێ‌ من دكه‌ن و دزام گه‌له‌ك حه‌ز ژ من و ده‌نگێ‌ من دكه‌ن و كه‌یفا من گه‌له‌ك دهێت ده‌مێ‌ زارڤه‌كرنا من دكه‌ن، چونكو ناڤێ‌ من ل گه‌ل ناڤێ‌ وی دهێت و حه‌زدكه‌م ب هزاره‌هان زارڤه‌كه‌رێن ده‌نگێ‌ من هه‌بن، چونكو ل گه‌ل ناڤێ‌ هه‌ر كه‌سه‌كی دێ‌ ناڤێ‌ من هێت و سترانا من دێ‌ بێژن شانازیه‌ بۆ مرۆڤی و هه‌كه‌ سترانبێژ ژی یێ‌ باش نه‌بیت كه‌س زارڤه‌كرنا وی ناكه‌ت.

دلایه‌كی دی دا موه‌فه‌قی گۆت: ده‌نگێن هونه‌رمه‌ندێن كچ پتریا وان دخوه‌شن و من گه‌له‌ك حه‌زدكر سترانبێژه‌كا كچ هه‌با من وێ‌ سترانه‌كا دوقۆلی گۆتبا، به‌لێ‌ ب مه‌رجه‌كی ده‌نگێ‌ من و  وێ‌ ل گه‌لك ب گونجیت، چونكو گۆتنا سترانا بتنێ‌ و یا دوقۆلی وه‌كو ئێكه‌ و چو زه‌حمه‌تی تێدانینه‌.