ئه‌ڤرۆ، نه‌وزاد هلۆری:

هه‌ر چه‌نده‌ د شه‌ریعه‌تی دا ئینانا ژنا دویێ‌ هه‌تا چارێ‌ دروسته‌، به‌لێ‌ قانونێ‌ ب مه‌ره‌ما رێكخستنا خێزانێ‌ ئه‌ڤ یه‌ك قه‌ده‌غه‌كریه‌ د حاله‌تێ‌ پێدڤی دا نه‌بیت، به‌لێ‌ پشكه‌ك ژ وان زه‌لامێن دخوازن ژنا دویێ‌ بینن په‌نایێ‌ بۆ دادگه‌ها شێخان دبن، پارێزه‌ره‌ك ژی ئه‌گه‌را دبێژیت.

جیهاد موسته‌فا، ماموستایێ‌ ئاینی ل سه‌ر بابه‌تی گۆت: (هه‌ڤژینی كاره‌كێ‌ ره‌وایه‌ دناڤبه‌را كچ و كورا، دڤێت ل سه‌ر بنه‌مایێ‌ ره‌وشت و باشیێ‌ ئه‌ڤ هه‌ڤژینیه‌ بهێته‌ پێكئینان و گرێبه‌ست ژی بۆ پاراستنا وێ‌ بهێته‌ دروستكرن، به‌لێ‌ هه‌كه‌ گرێبه‌ست هاته‌ هه‌لوه‌شاندن یان ژی هه‌كه‌ هه‌ڤژینا وی نه‌خوشیه‌ك هه‌بوو یان ره‌زامه‌ندی دا یان ژی ب هه‌ر رێیه‌كا كو پێدڤی بیت زه‌لام ژنه‌كا دی بینیت ل وی ده‌می ره‌وایه‌ بكه‌ته‌ دوو ژن).

جیهاد د به‌رده‌وامیا ئاخفتنا خوه‌دا گۆت: (دڤێت زه‌لاك دادپه‌روه‌یه‌كا بهێز دناڤبه‌را هه‌ردوو ژنان بكه‌ت، لێ‌ مخابن پرانیا وان كه‌سێن ژنا دویێ‌ ئینای تووشی ئاریشان بوینه‌ و نه‌شێن كونترولا دادپه‌روه‌ریا هه‌ردوو ژنان بكه‌ن، له‌وا پرانیا وان ل ده‌ڤ هه‌ڤدوو نامینن و دوو مالێن سه‌ربخوه‌ هاتینه‌ دروستكرن، ل ڤی ده‌می زه‌لام ژی نه‌شێت ب رولێ‌ دادپه‌روه‌ریێ‌ رابیت و دێ‌ تووشی ئاریشه‌یان بیت).

پارێزه‌ر بهادین ده‌شتانی، ل دادگه‌ها دهۆكێ‌ گۆت: (ل گوره‌ی داتایان ئه‌ڤ ساله‌ پتری 500 كه‌سان ل دادگه‌ها دهۆكێ‌ ژنا دویێ‌ ئینایه‌ و ژ وان ژی پرانیا وان ل ده‌ڤه‌رێن جودایێن پارێزگه‌ها دهۆكێ‌ و ده‌ورۆبه‌ران بوون، هه‌رچه‌نده‌ ل گوره‌ی قانوونا بارێ‌ كه‌سی یا هژمار 188 یا سالا 1959 یا راستڤه‌كری و مادا سێ‌ و برگێن چار و پێنج و شه‌ش و حه‌فت دا ره‌زامه‌ندی ل سه‌ر ئینانا ژنا دویێ‌ دایه‌، به‌لێ‌  كومه‌كا مه‌رجان بۆ داناینه‌).

پارێزه‌ری دا زانین كو ئه‌و مه‌رج ژی ئه‌ڤه‌نه‌، زه‌لامی شیانێن دارایی هه‌بن، نیه‌تا وی بۆ ئینانا ژنا دوویێ‌ یا ره‌وا بیت، ئه‌ڤ یه‌ك ژی بێ‌ رازیبوونا ژنا دوویێ‌ دهێته‌ كرن ل دادگه‌هێن شێخان و عیراقێ‌ و گۆت: (به‌لێ‌ هه‌كه‌ ژنا وی یا ئێكێ‌ سكالایێ‌ ل دادگه‌هێ‌ تومار بكه‌ت ل سه‌ر زه‌لامێ‌ خوه‌ ل وی ده‌می زه‌لام دێ‌ هێته‌ سزادان ئه‌و ژی هه‌كه‌ بێ‌ ره‌زامه‌ندیا وێ‌ زه‌لامی ژنا دوویێ‌ ئینا بیت ئه‌ڤه‌ ل گوره‌ی هه‌مان قانون).

ل بارا دادگه‌هێن هه‌رێما كوردستانێ‌ بهادین گۆت: (برگه‌یێن چار و پێنج و شه‌ش و حه‌فت یا هژمار سێ‌ یا قانوونا 188 یا سالا 1959ێ‌ هاتیه‌ راوستاندن ب قانوونا هژمار 15 یا سالا 2008ێ‌ و هنده‌ك مه‌رج بۆ ئینانا ژنا دوویێ‌ داناینه‌ ژ وان مه‌رجان ژی، ئینانا ژنا دوویێ‌ ب ره‌زامه‌ندی یا ژنا ئێكێ‌ بیت، نه‌خوشیه‌كا دومدرێژ ل ژنا ئێكێ‌ هه‌بیت كو رێگر بیت بۆ مه‌شاعرا هه‌ڤژینیێ‌ و چو چاره‌سه‌ری ژی بۆ نه‌بن، دیسان ره‌وشا دارایی یا زه‌لامی باش بیت، سووزنامه‌كێ‌ ل دادگه‌هێ‌ ئیمزا بكه‌ت كو دادپه‌روه‌ریێ‌ دناڤبه‌را هه‌ردوو ژنان دا بكه‌ت، چ مه‌رج نه‌بن ل گوره‌ی گرێبه‌ستا هه‌ڤژینیێ‌ یا ئێكێ‌، به‌روڤاژی هه‌ركه‌سێ‌ ژنا دوویێ‌ بینیت دێ‌ هێته‌ زیندان كرن نه‌ كێمتر ژ شه‌ش هه‌یڤان و نه‌ پتر ژ ساله‌كێ‌ و غرامه‌ كرن ب 10 ملیون دیناران).

ئه‌ڤرو، په‌روین سه‌لاح:

ل گه‌ل كوشتنا هه‌ر كه‌سه‌كی پرسا چه‌كی سه‌رهه‌لدده‌ت، چونكی ل هه‌رێما كوردستانێ‌ هه‌ر كه‌سه‌كێ‌ بڤێت دشێت چه‌كی ب ده‌ستخوڤه‌ بینیت، شاره‌زایه‌كێ‌ جڤاكی دیار كر، پتریا حاله‌تێن خوه‌ كوشتنێ‌ ل ده‌مێ‌ تۆره‌بوونێ‌ دهێنه‌ كرن، هه‌كه‌ كه‌سه‌ك تۆره‌ ببیت و چو چه‌ك ل نێزیكی وی نه‌بن، بێگومان كوشتن په‌یدا نابیت و حاله‌تێن كوشتنێ‌ دناڤ خێزانێ‌ و جڤاكی دا دێ‌ كێمتر لێ‌ هێن.

ره‌نگه‌ روژه‌ك نه‌بوریت و ده‌زگه‌هێن راگه‌هاندنێ‌ به‌حسێ‌ خوه‌كوشتن و خوه‌سوتنا كه‌سه‌كی دناڤ خێزانه‌كا هه‌رێما كوردستانێ‌ دا نه‌كه‌ن، به‌لێ‌ ئه‌وا دبیته‌ جهێ‌ سه‌رنجراكێشانێ‌، خوه‌كوشتنا دناڤ خێزانێ‌ ب خوه‌ دایه‌، ده‌مێ‌ خێزان هه‌موو وێ‌ حنێرێ ب چاڤێن خوه‌ دبینن و ئه‌ندامه‌كێ‌ خێزانێ‌ كه‌سه‌كی ژ خێزانا خوه‌ دكوژیت و ڤێ‌ یه‌كێ‌ ژی كارتێكرنه‌كا مه‌زن ل سه‌ر خێزانێ‌ هه‌یه‌،خوین رێتنا مروڤان ژ رژتنا خوینا هابیلێ‌ ب ده‌ستێن قابیلی ده‌ستپێكریه‌، ئه‌ڤه‌ ژی دهێته‌ هژمارتن ئێكه‌مین حاله‌تێ‌ كوشتنێ‌ دناڤ خێزانێ‌ دا.

زانا ئه‌حمه‌د شاره‌زایێ‌ جڤاكی ل زانكویا سه‌لاحه‌ددین بو ئه‌ڤرو دیار كر، گه‌له‌ك ئه‌گه‌ر هه‌نه‌ بو په‌یدابوونا حاله‌تێن كوشتنێ‌ دناڤ خێزانێ‌ دا و ژ وان ژی زێدبوونا ئاكنجیان، هه‌روه‌سا ته‌كنولوژیا نها ژی گه‌له‌ك گوهورین دناڤ جڤاكی دا په‌یدا كرینه‌ و بوویه‌ ئه‌گه‌ر رێژا تاوانان زێده‌ ببیت و په‌یوندیێن جڤاكی لاواز ببن و به‌ر ب نه‌مانێ‌ بچن.

محه‌مه‌د تاها حسێن ماموستایێ‌ دروونناسی ل زانكویا سه‌لاحه‌ددین ژ ئالیێ‌ دروونیڤه‌ دیار كر، هه‌كه‌ باب دناڤ خێزانێ‌ دا یێ‌ دكتاتۆر بیت و ب تنێ‌ بو به‌رژه‌وه‌ندیا خوه‌ ژیانا خێزانێ‌ ب رێڤه‌ ببه‌ت، ل وی ده‌می دێ‌ ئه‌ندامێن خێزانێ‌ كه‌رب ژێڤه‌ بن و ره‌نگه‌ تاوان دناڤ خێزانێ‌ ب خوه‌ دا په‌یدا ببن.

ماموستایێ‌ دروونناسی خویا ژی كر، د قانوونا سزادانا عیراقێ‌ دا ئه‌وێ‌ كه‌سه‌كی ب ئه‌نقه‌ست بكوژیت تۆندترین سزا بو هاتیه‌ دانان كو سێداره‌دان و زیندانكرنا هه‌تا هه‌تایێ‌ یه‌ بو كوشتنا د ناڤ خێزانێ‌ ژی دا هه‌مان سزایه‌، به‌لێ‌ ده‌مێ‌ دایك یان باب ئه‌ندامه‌كێ‌ خێزانا خوه‌ دكوژن ناهێنه‌ سێداره‌دان و د قورئانێ‌ ژی دا كوشتنا مروڤان ب ئه‌نقه‌ست ژ خرابكرنا كه‌عبا پیروز مه‌زنتر دانایه‌.

محه‌مه‌د تاها حسێن گۆتژی: (ڤه‌خوارنا مه‌یێ‌ ئێك ژ فاكته‌رێن سه‌ره‌كی یێن په‌یدابوونا كوشتنا دناڤ خێزانێ‌ دایه‌، گه‌له‌ك ژ حاله‌تێن كوشتنا خێزانێ‌ ژ مه‌ی ڤه‌خورانێ‌ په‌یدا دبن، چونكی دێ‌ ڤه‌گه‌ریته‌ مال یێ‌ سه‌رخوش و ئاگه‌ه ژ خوه‌ نینه‌ و هه‌كه‌ خێزانا وی داخوازیێن وی بجه نه‌ئینیت، دێ‌ وێ‌ كوژیت یان دربه‌كێ‌ كوژه‌ك لێ‌ ده‌ت، زیندانیه‌ك نها ل پارێزگه‌ها هه‌ولێرێ‌ هه‌یه‌ بابێ‌ خوه‌ كوشتیه‌ و پشتی دووڤچوونێ‌ ئاشكرا بوو كو ئه‌و بابێ‌ هاتیه‌ كوشتن ژی بابێ‌ خوه‌ كوشت بوو).