ئه‌ڤرۆ، ئه‌میر ئه‌ترووشی:
فه‌رمانگه‌ها میدیا و زانیاریان یا حۆكمه‌تا هه‌رێما كوردستانێ راگه‌هاند كو هه‌تا دووماهیا ئه‌ڤ ساله دێ پیڤه‌رێن زیره‌ك یێن كاره‌بێ بۆ سه‌رجه‌م پشكدارێن كاره‌بێ ل هه‌رێما كوردستانێ هێنه دانان، ژ بلی وان تاخێن ژ نوو دهێنه چێكرن و هه‌تا نوكه پیڤه‌رێن زیره‌ك بۆ ملیۆنه‌ك و 47 هزار پشكداران هاتینه دانان.
ل گۆره‌ی زانیاریێن فه‌رمانگه‌ها میدیا و زانیاریان یا حۆكمه‌تا هه‌رێما كوردستانێ، هه‌تا نوكه ملیۆنه‌ك و 47 هزار و 450 پیڤه‌رێن زیره‌ك بۆ پشكدارێن كاره‌بێ ل سه‌رانسه‌ری هه‌رێما كوردستانێ هاتینه دانان، ژ ڤی سه‌رجه‌می ژی 207 هزار پیڤه‌ر ل پارێزگه‌ها دهۆكێ هاتینه دانان و 382 هزار ل هه‌ولێرێ و 364 پیڤه‌ر ل سلێمانیێ هاتینه دانان.
ئاشكرا ژی كر، ل گۆره‌ی پلانێ، پێدڤیه هه‌تا دووماهیا ئه‌ڤ ساله یا 2021، پیڤه‌رێن زیره‌ك یێن كاره‌بێ بۆ هه‌موو پشكدارێن كاره‌بێ ل هه‌رێما كوردستانێ هێنه دانان، ژبلی وان تاخێن نوو دهێنه ڤه‌كرن و درۆستكرن و هه‌ر تاخه‌كێ ژ نوو بهێته چێكرن دێ ده‌ملده‌ست پیڤه‌رێن زیره‌ك بۆ وان ژی هێنه دانان.
هاریكار شه‌فیق، ئێك ژ هاوولاتێن تاخێ زڕكایه ل پارێزگه‌ها دهۆكێ بۆ ئه‌ڤرۆ دیار كر، پشتی دانانا پیڤه‌رێن زیره‌ك گه‌له‌ك كارتێكرن ل كاره‌با مه یا گشتی هاتیه كرن و ئێدی ئه‌م نه‌شێین چو ئامیران هه‌لكه‌ین، هه‌رده‌مێ دو هیته‌ر پێكڤه دهه‌لبن و ئامیره‌كێ دی هه‌لكه‌ین، ئێكسه‌ر سركێتێ كاره‌با مه یا گشتی دهێته خار و دڤێت ئه‌م ته‌له‌فونا سه‌خبێریا كاره‌بێ بكه‌ین هه‌تا سركێتی بلند دكه‌ن.
فه‌رمانگه‌ها میدیا و زانیاریان یا حۆكمه‌تا هه‌رێما كوردستانێ ئاشكرا كریه كو ل زڤستانا ئه‌ڤ ساله دێ پیڤه‌رێن زیره‌ك كارتێكرنا خوه ل سه‌ر كاره‌بێ هه‌بیت، چونكه پیڤه‌رێن زیره‌ك ب هویری كاره‌بێ دهه‌ژمێریت و ئه‌و مه‌زاختیا كاره‌بێ یا به‌ری نوكه دهاته كرن ناهێته كرن، چونكو هه‌ر پشكداره‌ك ل گۆره‌ی پێدڤیا خوه دێ كاره‌بێ مه‌زێخیت. به‌ری نوكه هه‌كه خێزانه‌كا كێم كاره‌ب مه‌زاختبایه و خێزانه‌كا گه‌له‌ك چو سانسۆر ل سه‌ر نه‌بوون، به‌لێ نوكه هه‌ر پشكداره‌ك ل گۆره‌ی پێدڤیا خوه و نه‌شێت مافێ كه‌سه‌كێ دیتر بخۆت.
ئاشكرا ژی كریه، پیڤه‌رێن زیره‌ك دهێنه هژمارتن ئێك ژ سه‌ركه‌فتیترین پرۆژه‌یێن كاره‌بێ و ب كوالێتیه‌كا بلند دهێنه دانان، بێگومان ژی دانانا ڤان پیڤه‌ران به‌ری نها ل چه‌ندین وه‌لاتێن دی بوویه ئه‌گه‌ر كو ئه‌ڤ پرۆژه ل هه‌رێما كوردستانێ ژی بهێته بجهئینان.
ل گۆره‌ی زانیاریێن فه‌رمانگه‌ها میدیا و زانیاریان یا حۆكمه‌تا هه‌رێما كوردستانێ، ل هه‌رێما كوردستانێ نها ملیۆنه‌ك و 600 هزار پشكدارێن كاره‌بێ هه‌نه و نها هژماره‌كا كێم ماینه ئه‌ڤ پیڤه‌ره بۆ نه‌هاتینه گرێدان و پشتی ب دووماهی هاتنا گرێدانا ڤان پیڤه‌ران، دێ ئه‌و هێلێن كاره‌بێ یێن ب سه‌رپێچی هاتینه گرێدان هه‌موو هێنه بڕین و ئێدی كه‌س نه‌شێت سه‌رپێچیێ ل سه‌ر هێلێن كاره‌بێ بكه‌ت.
نيشاندان