بۆ دووڤچوونا پڕۆژەیێن خزمەتگوزاری، ئەوێن د ناڤ سەنتەرێ‌ باژێرێ دهۆكێ دا دهێنە ئەنجامدان، د. عەلی تەتەر، پارێزگارێ دهۆكێ و ب ئامادەبوونا ئیسماعیل محەمەد، دەڤەردارێ دهۆكێ و رێڤەبەرێ گشتی یێ ساخلەمیێ و سەرۆكێ باژێرڤانیا دهۆكێ، دوهی سپێدێ 23/10/2024 جودا جودا سەرا سێ‌ پڕۆژەیێن گرنگ و ستراتیژی دا.
پارێزگارێ‌ دهۆكێ‌ د سەرەدانا خوە دا بۆ وان پڕۆژەیان، ژ نێزیك سەحكرە قووناغێن بجهئینانا هەر پڕۆژەكی و دوپاتكر، كو دڤێت هەموو پڕۆژە ل دووڤ پیڤەرێن ئەندازیاری و د دەمێ دەستنیشانكری دا بهێنە بجهئینان.
ئەو پڕۆژەیێن د. عەلی تەتەر، پارێزگارێ دهۆكێ دوهی سەرەدانا وان كری ئەڤەبوون:-
1- پڕۆژەیێ ئاڤاكرنا سەنتەرێ‌ چارەسەركرنا ئێشا پەنجەشێرێ ل تاخێ ئێتیتێ، پڕۆژە ل سەر بودجا حكومەتا هەرێمێ ب گوژمێ 16 ملیار و 500 ملیۆن دیناران دهێتە ئەنجامدان و هەتا نوكە 30% هاتیە ئاڤاكرن.
2- پڕۆژەیێ چێكرنا پاركا سەرهلدان، ل جهێ پیشەسازیا بەڕۆشكێ، هەتا نوكە 7% هاتیە دروستكرن، پارك ل سەر رووبەرێ 48 دۆنەمان دهێتە دروستكرن.
3- پڕۆژەیێ پاقژكرن و چێكرنا رووبارێ هشكەڕۆ ل تاخێ سەرهلدان، هەتا نوكە خانیێن زێدەگاڤی هاتینە راكرن و رووبار هاتیە پاقژكرن و چەند پرێن پیادە بۆ هاتنوچوونا وەلاتییان هاتینە دروستكرن.
دیسا هەر دوهی 23/10/2024 د. عەلی تەتەر، پارێزگارێ دهۆكێ سەرا سەنتەرێ بازارێ دهۆكێ دا و هەڤدیتن ل گەل چەند كاسبكار و وەلاتییان كر و ژ نێزیك سەحكرە رەوشا بازاری و ژین و ژیارا وان.

ئاكرێ‌، رەمەزان زەكەریا:

د ناڤ سەنتەرێ دەڤەرداریا ئاكرێ دا هەژمارەكا جاددەیێن ناڤخوەیی دهێنە قێركرن و كۆنكریتكرن.
دەڤەرداریا ئاكرێ بەلاڤكریە: د. دلاوەر بۆزو، دەڤەردارێ ئاكرێ ل گەل بلند رزا زبێر، سەرۆكێ باژێرڤانیا ئاكرێ دووڤچوونا هەژمارەكا پڕۆژەیێن چێكرنا جاددەیێن ناڤخوەیی ل گەرەكا گولان كر كو ژ 28 جاددەیان پێك هاتبوون، ئەو جاددەیە نوكە د قووناغێن بجهئینانێ‌ دانە و دهێنە قێركرن و كۆنكریتكرن.
ئاشكرا ژی كریە: هەژمارەكا بەرچاڤا جاددەیێن ناڤخوەیی ل تاخێ‌ 11 ئەیلۆل و رێكا دەواجنێ و رێكێن تاخێ ئالەیێ ل ژێر بجهئینانێ‌ دانە ل سەنتەرێ ئاكرێ، ئەڤ پڕۆژە ب گوژمێ سێ‌ ملیار و 100 ملیۆن دیناران ل سەر بودجا حوكمەتا هەرێما كوردستانێ دهێنە بجهئینان.
دەڤەرداریا ئاكرێ‌ خویا ژی كریە، ب تەمامبوونا ڤان جاددەیان دێ رەنگ و سیمایێ جوانێ باژێرڤانیێ روویەكێ جوان ب خوەڤە گریت و دێ بیتە ئەگەرێ كار ئاسانیا هاتنوچوونا وەلاتیان، حكومەتا هەرێما كوردستانێ بەردەوامە ل سەر بجهئینانا پڕۆژەیێن خزمەتگوزاری د بیاڤێن جودا دا.

هەولێر، قائید میرۆ:

پەیڤدارێ وەزارەتا ئاڤاكرنێ ئاشكرا كر، یەكەیێن ئاكنجیبوونێ ل سەر كرێداران دێ هێنە بەلاڤكرن و دبێژیت: ناڤێن كرێداران هاتینە ڤاڤارتن ب مەرەما مفاداربوونێ و هەر كەسەكێ مەرج تێدا هەبن، ل گورەی خالێن هاتینە دیاركرن دێ مفاداربیت.
مەریوان مەلا حەسەن، پەیڤدارێ‌ وەزارەتا ئاڤاكرنێ‌ بۆ رۆژناما ئەڤرۆ دیار كر، دەست ب بەلاڤكرنا یەكەیێن ئاكنجیبوونێ‌ دێ‌ هێتە كرن، ئەوێن ژ لایێ‌ وەزارەتا ئاڤاكرنێ‌ ڤە هاتینە ئاڤاكرن، ئەو یەكەیێن بڕیارە بهێنە بەلاڤكرن، هندەك ژ وان ب دووماهی هاتینە و هندەكان ژی كاركرن تێدا یێ‌ بەردەوامە و پشتی ناڤێن وەلاتیان دەردكەڤن دێ‌ هێنە تەمامكرن.
مەریوان مەلا حەسەن گۆت: «ئەو كەسێن بەری نوكە ناڤێن وان هاتینە تۆماركرن و ژ لایێ حوكمەتێ ڤە هاتینە ڤاڤارتن دێ ژ وەرگرتنا یەكەیێن ئاكنجیبوونێ مفاداربن و ل گورەی خالبەندیێ شوقە دێ هێنە بەلاڤكرن، ئەو كەسێن شوقە ژی بەر ناكەڤن ئەڤە مافێ‌ وان دێ مینیت و د دووڤ دا دێ مفاداربن، ب تنێ ل دهۆكێ دو هزار و شەش یەكە ل سەر وەلاتیێن كرێدار دێ هێنە بەلاڤكرن».

ژێدەرەكی ژ وەزارەتا دارایی و ئابوورییا حوكمەتا هەرێما كوردستانێ دیاركر، هەموو وەزارەتان لیستەیێن مووچەی بۆ وەزارەتا دارایی هنارتینە، د نوكە دا هووربینی بۆ دهێتە كرن و ل حەفتییا بهێت بۆ بەغدایێ‌ دێ هێنە هنارتن.
ئاماژە ب هندێ ژی دا، هەتا 18ی ڤێ مەهێ‌ 105 هزار و 560 مووچەخۆرێن دی بایۆمەتری دروستكرییە، 75%ێ ئاریشەیا بایۆمەترییا مووچەخۆران هاتییە چارەسەركرن، هەتا دووماهییا ئەڤ سالە هەموو ئاریشەیێن هونەریێن لیستەیا مووچەی دێ چارەسەربن.

ل دووڤ ئاخڤتنێن لایەنێن پەیوەندیدار، نێزیكی 20 هزار سەیێن بەرەلا ل دهۆكێ هەنە و پەیڤدارێ باژێرڤانییا دهۆكێ ژی دبێژیت: ئەو جهێ‌ بۆ كۆمكرنا سەیێن بەرەللا هاتیە دروستكرن، تەمامبوویە، لێ‌ هەتا نوكە چو سە بۆ وی جهی نەهاتینە ڤەگوهاستن.
ئیسماعیل مستەفا، پەیڤدارێ باژێرڤانییا دهۆكێ دیار كر، شێلتەرەك بۆ كۆمكرنا سەیێن بەرەللا هاتییە دروستكرن، لێ هەتا نوكە چو سە بۆ وێرێ نەهاتینە ڤەگوهاستن و گۆت: «هەتا كارگێڕییەك بۆ وی جهی دهێتە دروستكرن، ژ نوو سە بۆ وێرێ دێ هێنە ڤەگوهاستن».
ڕێڤەبەرییا ڤێتێرنەرییا دهۆكێ ئاشكرا كر، پلانا وان ئەوە پشتی سەیان دبەنە شێلتەرێ، دێ نەزۆك كەن و بەردەنە د ناڤ سروشتی دا، لێ هێشتا بڕیارا فەرمی ل سەر ڤێ چەندێ نەهاتییە دان.