NO IORG
Authors Posts by naci bedel

naci bedel

15011 POSTS 0 COMMENTS

85

هه‌ولێر، قائید میرۆ

رۆژ بۆ رۆژێ بهایێ كه‌لوپه‌لان د بازاڕێن هه‌رێما كوردستانێ به‌ر ب بلندبوونێ دچن، بسپۆره‌كێ ئابوری ژی ئه‌گه‌رێن بلندبوونا بهایی بۆ داكه‌تنا بهایێ دینارا عێراقی و بلندبوونا بهایێ په‌تڕۆلێ ڤه‌دگه‌ڕینیت و دده‌ت دیاركرن كو پێدڤی یه‌ حوكمه‌ت چاڤدێریه‌كا هویر یا بازاڕی بكه‌ت و بهایێ هه‌موو كه‌لوپه‌لان بهێته‌ كۆنتڕۆلكرن.

دكتۆر حه‌یده‌ر، بسپۆرێ ئابووری بۆ رۆژناما ئه‌ڤرۆ دیاركر ده‌مێ بهایێ دینارا عێراقی هه‌مبه‌ر بهایێ دۆلاری هاتیه‌ كێمكرن، كارتێكرنێن راسته‌وخۆ ل سه‌ر بازاڕی دروستكرن و گوت: (گرانیا نوكه‌ په‌یدابووی پشكه‌كا زۆر گرێدایی بلندبوونا بهایێ دۆلاریه‌ هه‌مبه‌ر دینارا عێراقێ، چونكه‌ به‌ری دۆلار بهێته‌ بلندكرن بۆ كڕینا هه‌ر كه‌لوپه‌له‌كی ل ده‌رڤه‌ بۆ نموونه‌ ئه‌گه‌ر تشته‌ك ل ده‌رڤه‌ بهایێ وی ئێك دۆلار بوویه‌ مه‌ ب ئێك هزار و 200 دینارا دكڕی، به‌لێ نوكه‌ 100 دۆلار گه‌هشتیه‌ 148 هزار دینارێن عێراقی، ئه‌ڤه‌ ژی دبیته‌ ئه‌گه‌ر كو بهایێ كه‌لو په‌لان بلندببیت، مخابن زۆربه‌یا كه‌لوپه‌لێن ئه‌م بكار دئینین ل ده‌رڤه‌ دهێن، نوكه‌ هنده‌ك وه‌زاره‌تێن حوكمه‌تا هه‌رێما كوردستانێ كار دكه‌ن زێده‌تر به‌رهه‌مێ نافخۆ بهێته‌ بكارئینان، ب تایبه‌تی وه‌زاره‌تا چاندنێ پێنگاڤێن باش هاڤێتینه‌، ئینانا هنده‌ك خوارنان ل ده‌رڤه‌ كێمكریه‌، تشتێ به‌ری نوكه‌ دڤێت ئه‌ڤرۆ ب بهایه‌كێ زۆرتر بكڕین،  ئاریشه‌ ئه‌ڤه‌ زۆربه‌یا خه‌لكێ مه‌ یان فه‌رمانبه‌ره‌ یا نژی ل كه‌رتێ تایبه‌ت كار دكه‌ت مووچه‌ ژی هه‌یڤانه‌ یێ دیاركریه‌ بۆهه‌ر فه‌رمانبه‌ره‌كی، بلندبوونا كه‌لوپه‌لان كاریگه‌ری ل سه‌ر ژیانا وه‌لاتیان په‌یداكریه‌، ژبه‌ركو مووچه‌ هه‌ر وه‌كی خۆیه‌ و بهایێ كه‌لوپه‌لان ژی بلندبوویه‌).

زێده‌تر گۆت: (ئه‌گه‌ره‌كێ دی یێ بلندبوونا بهای ب بلندبوونا بهایێ په‌تڕۆلێ ڤه‌دگه‌ڕیت، چونكه‌ ئه‌م یێ به‌ر ب وه‌رزێ زڤستانێ دچین و ل بازاڕێن جیهانێ بهایێ په‌تڕۆلێ بلندبوویه‌، بێگومان په‌تڕۆلێ كاریگه‌ریێن راسته‌وخۆ ل سه‌ر بازاڕێن هه‌موو جیهانێ هه‌نه‌، چونكه‌ هه‌موو كارگه‌  ب هێزا په‌تڕۆلێ كار دكه‌ن و ڤه‌گوهاستن ب رێیا ئاسمانی و ئه‌ردی ژی هه‌ر پێدڤی ب سوته‌مه‌نیێ هه‌یه‌، هه‌رده‌مێ په‌تڕۆل بلند دبیت ئێكسه‌ر به‌رهه‌م ئینان ژی زێده‌تر مه‌زاختی دڤێن و ل ژێده‌رێن سه‌ره‌كی بهایێ كه‌لوپه‌لان دهێته‌ بلندكرن، هه‌تا كه‌لوپه‌ل دگه‌نه‌ هه‌رێما كوردستانێ بهایێ زۆر زێده‌تر دچیته‌ سه‌ر، ئانكو قه‌یرانا نوكه‌ ئه‌م تێدا پشكه‌ك بۆ نافخۆ ڤه‌دگه‌ڕیت بهایێ دینارا عێراقێ داكه‌تیه‌ هه‌مبه‌ر دۆلاری، پشكه‌كا دی گرێدایی بازاڕێن جیهانێ و كاریگه‌ریێن بهایێ په‌تڕۆلێ لسه‌ره‌).

خالد حه‌یده‌ر ئاماژه‌كره‌ روویدانێن بۆری كاریگه‌ری لسه‌ر خه‌لكێ عێراقێ په‌یداكرینه‌ و گوره‌ی دوماهی ئامار رێژا بێكاریێ زێده‌بوویه‌، ژبه‌ركو مه‌زاختیێن وه‌لاتیان و حوكمه‌تێ ژی زێده‌بووینه‌ و داهاتێ تاكی و یێ گشتی ژی ئه‌گه‌ر كێمتر نه‌بیت ئه‌ڤه‌ بێگومان زێده‌ نه‌بوویه‌ و گوت ژی: (ئه‌ركێ حوكمه‌تا هه‌رێما كوردستانێ چاڤدێریا بازاڕی بكه‌ت، ب تایبه‌تی چاڤدێریا بهایێ سوته‌مه‌نیێ بكه‌ت، چونكی سوته‌مه‌نی ئه‌گه‌رێ هه‌رێ سه‌ره‌كیه‌ بۆ بلندبوونا بهایێ كه‌لوپه‌لان، پێدڤیی ه‌ كۆمپانیێن به‌نزین و گازێ بهێنه‌ زێده‌كرن و بشێوه‌یه‌كێ شه‌فاف ده‌لیڤه‌ بۆ هه‌موو كۆمپانیا هه‌بیت به‌رهه‌مێ سوته‌مه‌نیێ بینن هه‌رێما كوردستانێ، هه‌گه‌ر چاڤدێری نه‌بیت ئه‌ڤه‌ دبیت خه‌لكه‌ك ئه‌ڤێ گرانیێ بده‌لیڤه‌ بزانیت بۆ بلندكرنا بهایێ‌ دناڤا بازاڕی دا، ئه‌گه‌ر هه‌نه‌ ره‌وش هوسابیت هێشتا بهایێ كه‌لوپه‌لان بلندببیت).

6

ئه‌ڤرۆ،

د رێوره‌سمه‌كێ‌ تایبه‌ت دا و حه‌فتیا بوری لقا ئێك یا پارتی دیموكراتی كوردستان رێز ل ژماره‌كا مه‌زن یا وه‌رزشڤانێن پارێزگه‌ها دهۆكێ‌ بۆ یاریێن جودا گرت ئه‌وێن د وه‌رزێ‌ 2021ێ‌ دا شیاین چه‌ندین ناسناڤ و ده‌ستكه‌فت د قاره‌مانیێن هه‌رێمێ‌، ئیراقێ‌ و ده‌رڤه‌ ب ده‌ستڤه‌ ئیناین كو پێكهاتی بوون ژ راهێنه‌ر، یاریزان و ئێكه‌تیێن وه‌رزشی ئه‌وێن رۆله‌كێ‌ مه‌زن د پێشڤه‌برن و ده‌ستكه‌فتان هه‌بوویه‌.

خه‌لاتكرنا وان ژلایێ‌ سه‌ربه‌ست تروانشی ئه‌ندامێ‌ ئه‌نجومه‌نێ‌ سه‌ركردایه‌تیا پارتی دیموكراتی كوردستانێ‌ و به‌رپرسێ‌ لقا ئێك ب ئاماده‌بوونا د. ئه‌حمه‌د قاسم سه‌رۆكێ‌ نوونه‌راتیا دهۆك یا لژنا ئۆلۆمپیا كوردستانێ‌ و ژماره‌كا به‌رپرسێن وه‌رزشی كو رێزلێئینان بۆ 78 یاریزانێن كور و كچ، 10 باشترین ئێكه‌تیێن چالاك، حه‌فت راهێنه‌ر و شه‌ش دادڤان هاتنه‌ كرن ئه‌وێن پشكداری كرین و ده‌ستكه‌فت د قاره‌مانیێن ده‌رڤه‌ دا ئیناین.

مه‌حمود محه‌مه‌د ئه‌ندامێ‌ نوونه‌راتیا لژنا ئۆلۆمپیا كوردستانێ‌ بۆ رۆژناما ئه‌ڤرۆ گوت: پێخووشحالین ب پێنگاڤا پیروز یا لقا ئێكی هاڤێتی ب خه‌لاتكرن و رێزلێئینانا ژماره‌كا مه‌زن یا وه‌رزشڤانان ئه‌ڤچه‌نده‌ وێ‌ یه‌كێ‌ دیاردكه‌ت كو پارتی هه‌رده‌م پشته‌ڤان بوویه‌ بۆ هه‌موو ته‌خێن جودا یێن د ناڤ كۆمه‌لگه‌ها كوردستانێ‌ دا ژوانا وه‌رزش كو ئێك ژ به‌رنامێن هه‌ره‌ گرنگه‌ پووته‌دانێ‌ بۆ دكه‌ن، ئه‌ڤ خه‌لاتكرنه‌ بۆ ئه‌وان وه‌رزشڤانێن هه‌تا مێژوویا وێ‌ رۆژێ‌ هاتینه‌ دان ژبه‌ركو هێشتا مه‌ یێن ماین كو د نوكه‌ دا راهێنه‌ر و یاریزان پشكداری قاره‌مانیێن ده‌وله‌تی دبن، له‌ورا گه‌شبینم دێ‌ هه‌تا دووماهیا سالێ‌ خه‌لاتكرنا وان ژی هێته‌ دان و هه‌روه‌سان ژلایێ‌ پارێزگارێ‌ دهۆكێ‌ ژی ڤه‌ رێز ل هه‌موویان هێته‌ گرتن.

20

ئه‌ڤرۆ،

تیما ته‌پا پێی یا یانا دهۆك به‌رده‌وامه‌ ل سه‌ر پێشه‌نگیا خوه‌ یا سه‌رێ‌ لیستا كۆما ئێكێ‌ پشتی شیایی سه‌ركه‌فتنه‌كا گرنگ ل سه‌ر خودانێن یانا عه‌له‌م ئینا ب دو گۆلان به‌رامبه‌ر گۆله‌كێ‌ د یاریا واندا ئه‌وا دوهی ل باژێرێ‌ سه‌لاحه‌دین ژ چارچووڤێ‌ هه‌ڤڕكیێن گه‌ڕا حه‌فتێ‌ یا خولا پلا ئێكا ئیراقێ‌ و  ده‌ربازبوون به‌ره‌ ب پلا نایاب هاتیه‌ كرن.

هه‌ردو گۆلێن دهۆكێ‌ د نیڤا ئێكێ‌ دا ژلایێ‌ یاریزانان مورته‌جا عادل ناسر و ئه‌حمه‌د سه‌بری هاتنه‌ تۆماركرن ، بڤێ‌ ئه‌نجامێ‌ یانا دهۆكێ‌ ب 17 خالان پێشه‌نگیا سه‌رێ‌ لیستا كۆما خوه‌ پاراست، یانا عه‌له‌م ب خاله‌كێ‌ رێزا 12ێ‌ و دووماهیێ‌ دهێت.

د داخویانیه‌كێدا ئه‌حمه‌د سه‌بری خودانێ‌ گۆلا دویێ‌ و سه‌ركه‌فتنێ‌ بۆ رۆژناما ئه‌ڤرۆ گوت: ئه‌م رژدین به‌رده‌وامیێ‌ بده‌ینه‌ ئه‌نجامێن خوه‌ یێن سه‌ركه‌فتی و پێشه‌نگیا سه‌رێ‌ لیستێ‌ ژبه‌ركو مه‌ ئارمانجه‌كا مه‌زن هه‌یه‌ ئه‌وژی ده‌ربازبوون بۆ پلا نایابا ئیراقێ‌ یه‌، یاری ب سانه‌هی نه‌بوو هه‌رچه‌نده‌ تیمه‌كا دووماهیا لیستێ‌ بوو لێ‌ ب هه‌موو شیانێن خوه‌ و شه‌ڕی دكه‌ت كو خوه‌ ژ داكه‌فتنێ‌ دوور بێخیت

5

ئه‌ڤرۆ، عه‌لی حاجی:

د داخویانیه‌كێدا ئه‌ندامێ‌ ئێكه‌تیا ئیراقێ‌ بۆ یاریا خوه‌لێگدانێ‌ دیاركر یانا زاخۆ دێ‌ ب چار یاریزانا پشكداری قاره‌مانیا عه‌ره‌بی بۆ سیسته‌مێ‌ ئازاد بن ئه‌وا چاڤه‌ڕێ‌ یه‌ هه‌ڤڕكیێن وێ‌ سوبه‌هی ل وه‌لاتێ‌ مسرێ‌ ب رێڤه‌ بچیت.

زێده‌تر تاها ره‌مه‌زان بۆ رۆژناما ئه‌ڤرۆ گوت: تیما یانا زاخۆ ب چار یاریزانان دێ‌ بۆ كێشێن( 60كگم هه‌تا 75كگم، پشكداری قاره‌مانیا عه‌ره‌بی بن و هه‌موو به‌رهه‌ڤی ژی هاتینه‌ كرن كو پشكداریه‌كا سه‌ركه‌فتی بیت و گه‌شبینم دێ‌ ئه‌نجام و ده‌ستكه‌فتێن مه‌زن ب ده‌ستخوه‌ڤه‌ ئینن سه‌رباری ئه‌ركێ‌ وان ب سانه‌هی نابیت هه‌مبه‌ری یانێن دی یێن عه‌ره‌بی لێ‌ رژدین بیێ‌ ئه‌نجام نه‌ ڤه‌گه‌ریێن.

ژلایه‌كێ‌ دووڤه‌ ناڤهاتی گوت: هه‌رچه‌نده‌ چاڤه‌ڕێ‌ بوو یاریزانێن یانا زاخۆ ب ناڤێ‌ هه‌لبژارتیێ‌ ئیراقێ‌ پشكداری قاره‌مانیا نێڤده‌وله‌تی بن ب ناڤێ‌ قاره‌مانیا ئیراهیم موسته‌فا ل مسرێ‌، لێ‌ ژ نشكه‌كێ‌ ڤه‌ چه‌ند ژ ئه‌ندامێن ئێكه‌تیا ئیراقێ‌ یا خوه‌لێگدانێ‌ رازی نه‌بوون ب بوهانا پشكداریا یاریزانێن هه‌لبژارتیێن ئه‌مریكا و چه‌ند وه‌لاتێن كێشوه‌رێ‌ ئۆرۆپا و ئاسیا كو دێ‌ پشكداریه‌كا بیێ‌ مفا بیت و شیان دانینه‌ هه‌ڤركیێ‌ بكه‌ن و چو ئه‌نجام نابن، لێ‌ ب دیتنا من هه‌كه‌ پشكدار كربان دا شاره‌زاهیه‌كا باشتر ژێ‌ وه‌رگرتن و كه‌ڤیته‌ د خزمه‌تا یاریزانێن زاخۆ دا و هه‌روه‌سان گه‌له‌ك پێدڤی ب ڤان قاره‌مانیا هه‌بوون.

12

ئه‌ڤرۆ، زنار زوبێر:
تیما فۆتسالا ئافره‌تێن دهۆك قاره‌مانا وه‌رزێ‌ بوری یا كوردستانێ‌ ده‌مه‌كه‌ ده‌ست ب به‌رهه‌ڤیێن خوه‌ كرینه‌ بۆ هه‌ڤركیێن هه‌ردو خولێن هه‌رێما كوردستانێ‌ و ئیراقێ‌ سه‌ر ئاستێ‌ یانێن نایاب ئه‌وا بریاره‌ ده‌سپێكا هه‌یڤا كانوونا دویێ‌ بهێنه‌ ئه‌نجامدان و مه‌زنترین ئاسته‌نگ هه‌تا نوكه‌ نه‌بوونا هۆلا راهێنانێ‌ یه‌.
ل دور ره‌وشا تیمێ‌ و دووماهی به‌رهه‌ڤیان ناڵه‌ سوپه‌ر جێگرا سه‌روكا یانێ‌ بۆ رۆژناما ئه‌ڤرۆ گۆت: ده‌مه‌كه‌ تیم كه‌فتیه‌ لبن به‌رهه‌ڤیێن خولا نایابا هه‌رێمێ‌ دا و كارگێریا یانێ‌ چو كێماسی د پێكهاتیێ‌ تیمێ‌ دا نه‌هێلاینه‌ سه‌ره‌رای ره‌وشا دارایی یا خراب و لدووڤ پلانا خوه‌ هه‌ر تشته‌كێ‌ پێدڤی بۆ تیمێ‌ به‌رهه‌ڤكریه‌ ژبه‌ركو ئارمانجا یانێ‌ و ده‌سته‌یا راهێنه‌ران تنێ‌ ناسناڤێ‌ خولێ‌ یه‌ دوباره‌ بۆ پارێزگه‌هێ‌ ڤه‌گه‌رینن، دیسان هه‌ڤركیێن خولا ئیراقێ‌ ژی كو بریاره‌ ل ناڤه‌راستا هه‌یڤا كانوونا دویێ‌ یا بهێت ده‌سپێبكه‌ن مه‌ كار كریه‌ بۆ هه‌ڤركیا وێ‌ خولێ‌ ژی بین ژبه‌ركو باشترین یاریزان ل سه‌ر ئاستێ‌ ئیراقێ‌ و هه‌رێمێ‌ نوكه‌ یێن تیما مه‌نه‌ و هه‌موو یانه‌ تنێ‌ هزرێ‌ بۆ هێزا یانا مه‌ دكه‌ن.
ناله‌ سوپه‌ر ئه‌و چه‌نده‌ ژی دیاركر نوكه‌ دا مه‌زنترین ئاسته‌نگ به‌رامبه‌ر ئافره‌تێن دهۆكێ‌ ژوانا ئاریشا نه‌بوونا ترۆمبێلا گه‌هاندنا یاریزانان و نه‌بوونا هۆله‌كا تایبه‌ت یا یاریێ‌ و راهێنانێ‌ یه‌ ژبه‌ركو به‌ری نوكه‌ هه‌موو تیمان یاریێن خوه‌ ل هۆلا چالاكیێن وه‌رزشی یێن په‌روه‌ردا رۆژئاڤا دكرن لێ‌ نوكه‌ دا ئه‌ڤ هۆله‌ هاتیه‌ ته‌رخانكرن بۆ ڤاكسیندانانا دژی په‌تایا كورونایێ‌ له‌ورا داخاز دكه‌ین به‌ری ده‌سپێكرنا خولێ‌ ئه‌ڤ هۆله‌ بهێته‌ ڤالا كرن دا كو یانێن پارێزگه‌هێ‌ مفای ژێ‌ وه‌رگرن.
ژلایێ‌ خوه‌ڤه‌ روبینا گورگیس راهێنه‌را فۆتسالا ئافره‌تێن دهۆك گۆت: نوكه‌ تیم ژلایێ‌ هێزا له‌شی د گوپیتكێ‌ دا و ژلایێ‌ هونه‌ری و ته‌نكنیكی ژی كاره‌كێ‌ باش هاتیه‌ كرن بۆ به‌رهه‌ڤكرن و نێزكبوونه‌كا باش ناڤبه‌را یاریزانان دا په‌یدابوویه‌ تنێ‌ مایه‌ ئه‌و راهێنانێن خوه‌ ڤه‌گوهێزنه‌ هوله‌كا گرتی ژ به‌ركو هه‌تا نوكه‌ ئه‌و راهێنانان ل یاریگه‌ها ڤه‌كری یا چالاكیێن وه‌رزشی دكه‌ن.
نافهاتی ئه‌و چه‌نده‌ ژی گۆت: ئارمانجا من ل گه‌ل یانێ‌ ده‌ستڤه‌ئینانا هه‌ردو خولێن هه‌رێما كوردستانێ‌ و ئیراقێ‌ یه‌ و دێ‌ هه‌موو بزاڤێن خوه‌ بۆ هه‌ڤركیا ناسناڤان كه‌ین و چو كێماسی د تیمێ‌ دا نه‌ماینه‌ ژلایێ‌ یاریزانان ڤه‌ و ئه‌گه‌ر پێدڤی بوو ل ده‌مه‌كێ‌ دی یاریزانه‌كا پیشه‌كار ژی ل تیمێ‌ زێده‌كه‌ین پێخه‌مه‌ت باشتركرنا ئاستێ‌ تیمێ‌.

14

ئه‌ڤرۆ، زنار تۆڤی:

خانما شانۆكار نیگار نه‌بی، نوكه‌ قوتابیه‌ ل قووناغا پێنجێ‌ پشكا شانۆیێ‌ ل په‌یمانگه‌ها هونه‌رێن جوان ل دهۆكێ‌، د دیداره‌كێ‌ دا بۆ به‌رپه‌رێ‌ هونه‌ری یێ‌ رۆژناما ئه‌ڤرۆ دیار كر: د ژیێ‌ زارۆكاتیا خوه‌ دا، وێ‌ گه‌له‌ك حه‌ز ژ كارێن شانۆیێ‌ دكر و گه‌له‌ك جاران ب رۆلێ‌ كه‌سێن دانعه‌مر رادبوو و وێ‌ زاری وان ڤه‌دكر و حه‌ز ژ رۆلێن تراژیدی ژی دكر، هه‌ر ده‌مێ‌ ل قۆتابخانێ‌ وێ‌ كارێن شانۆیێ‌ دكرن، هه‌ڤالێن وێ‌ ترانه‌ ب وێ‌ دكرن و گه‌له‌ك تۆره‌ دكر، لێ‌ هه‌ر ئه‌و یا ل سه‌ر كارێ‌ خوه‌ به‌رده‌وام بوو و پشتی وێ‌ قووناغا ناڤنجی ب دووماهی ئینایی ئێكسه‌ر چوو په‌یمانگه‌ها هونه‌رێن جوان پشكا شانۆیێ‌.

ناڤهاتیێ‌ گۆت ژی: پشتی ئه‌ز چوویمه‌ په‌یمانگه‌ها هونه‌رێن جوان، په‌یمانگه‌هێ‌ ئه‌ز گه‌له‌ك گوهارتم، ره‌وشه‌نبیریه‌كا باش ل ده‌ف من په‌یداكر و دیسان من گه‌له‌ك كه‌س ژی نیاسین، كارێن من ژی گه‌له‌ك باشتر لێ‌ هاتن، د هه‌مان ده‌م دا من حه‌ز ژ كارێ‌ راگه‌هاندنێ‌ ژی كر، من لبه‌ره‌ كارێ‌ پێشكێشكاریێ‌ ژی بكه‌م، د شانۆگه‌ریان دا ئه‌ز حه‌ز رۆلێن تراژیدی دكه‌م، ب تایبه‌تی رۆلێ‌ كچێن شویم دگێرم، هه‌تا نوكه‌ من پشكداری د شانۆگه‌ریا ” ئه‌و زه‌لامێ‌ بوویه‌ سه‌” و ” تاتانیا ” دا كریه‌ و د شانۆگه‌ریا ” تاتانیا ” دا، من رۆلێ‌ كچه‌كا فێلباز گێرایه‌.

نیگار هێشتا دبێژیت: مه‌ لبه‌ره‌ بۆ فیسته‌ڤالا كه‌ركووكێ‌ ژی شانۆگه‌ریه‌كێ‌ پێشكێش بكه‌ین، د وێ‌ شانۆگه‌ریێ‌ ژی دا، من رۆلێ‌ كچه‌كا شویم گێرایه‌، هه‌روه‌سا هه‌تا نوكه‌ هێشتا ئاسته‌نگ ل پێشییا كچان دا هه‌یه‌، یێن كو كارێن هونه‌ری ئه‌نجام دده‌ن، دیسان هه‌كه‌ مالێن وان ژی رێكێ‌ بده‌نێ‌ كارێن هونه‌ری بكه‌ن، لێ‌ ژ جڤاكی د ترسن، چونكی هێشتا جڤاك ب چاڤه‌كێ‌ كێم ته‌ماشه‌ی كچێن هونه‌رمه‌ند دكه‌ن، لێ‌ دڤێت كچ ب خوه‌ هاریكاریا خوه‌ بكه‌ن، تشتێن خوه‌ بۆ مالا خوه‌ بێژن و بۆ وان دیار بكه‌ن، كو ئه‌و ڤی كاری ئه‌نجام دده‌ن.

وێ‌ شانۆكارێ‌ ئه‌و ژی گۆت: ل دهۆكێ‌ هه‌تا راده‌كێ‌ گرنگی ب شانۆیێ‌ هاتییه‌ دان، لێ‌ وه‌كو پێدڤی نینه‌، پتر گرنگی ب جۆرێن دیتر یێن هونه‌ری ل دهۆكێ‌ دهێته‌ دان، دیسان هۆلێن شانۆیێ‌ ژی د بچووكن، هه‌روه‌سا خه‌لكێ‌ مه‌ گه‌له‌ك حه‌ز ل سه‌ر شانۆگه‌ریان هه‌یه‌، دیسان هه‌كه‌ رۆله‌كێ‌ ل دووڤ دلێ‌ من هه‌بیت، ئه‌ز حه‌ز دكه‌م پشكداریێ‌ د كارێن سینه‌مایی ژی دا بكه‌م، وه‌كو ژیار هێشتا هونه‌ری چو نه‌دایه‌ من، لێ‌ من دڤێت ل سه‌ر كارێ‌ خوه‌ یێ‌ شانۆیێ‌ یا به‌رده‌وام بم، ئه‌ز حه‌ز دكه‌م، هه‌رده‌م رۆلێن باش د ناڤ شانۆگه‌ریان دا بگێرم.

 

9

ئه‌ڤرۆ، رێوار محه‌مه‌د ره‌شید:

هونه‌رمه‌ند محسن به‌ندی د دیداره‌كێ‌ دا بۆ به‌رپه‌رێ‌ هونه‌ری یێ‌ رۆژناما ئه‌ڤرۆ دیار كر كو پشتی ل هه‌یاما بۆری وی ستودیه‌ك بۆ ئه‌نجامدانا كارێن هونه‌ری یێن سترانبێژ و مۆزیكژه‌نان ڤه‌كری وی ب خوه‌ ژی سێ‌ سترانێن نوو كو بابه‌تێن وان ل دۆر ئه‌ڤینیێ‌ نه‌ ل وێ‌ ستودیۆیێ‌ تۆماركرینه‌ و ل ده‌مه‌كێ‌ نێزیك دێ‌ هه‌ر سێ‌ سترانان كلیپ كه‌ت و پێشكێشی حه‌زژێكه‌رێن ده‌نگێ‌ خوه‌ كه‌ت و گۆت: “د پلانا من دایه‌ كو به‌رده‌وامیێ‌ بده‌مه‌ تۆماركرن و كلیپكرنا سترانێن نوو و هه‌ر ده‌مێ‌ بوونه‌ 10 ستران پشتی ئێك ئێكه‌ به‌لاڤ دكه‌م دێ‌ كه‌مه‌ ئه‌لبۆم، راسته‌ ل سالێن بۆری ئه‌لبۆمێ‌ پتر گرنگیا خوه‌ هه‌بوو و مه‌ سترانێن خوه‌  ب شێوه‌یێ‌ ئه‌لبۆم به‌لاڤ دكرن، به‌لێ‌ نوكه‌ پشتی پێشكه‌فتنا ته‌كنه‌لۆژیایێ‌ و هه‌بوونا سوشیال میدیایێ‌ چێكرنا ئه‌لبۆمان چو رۆلێ‌ خوه‌ نه‌مایه‌”.

ناڤهاتی ئاماژه‌ دا وێ‌ چه‌ندێ‌ كو نوكه‌ ئه‌و یێ‌ به‌رهه‌ڤیان بۆ گێڕانا ئاهه‌نگا شه‌ڤا سه‌رێ‌ سالا نوو 2022 ل كۆچكا ئامه‌د ل گوندێ‌ به‌ندا دكه‌ت كو دێ‌ چه‌ندین هونه‌رمه‌ندێن كورد تێدا پشكداربن و دێ‌ ب شێوه‌یه‌كێ‌ ئێكه‌ر ل سه‌ر شاشه‌یا ته‌له‌ڤزیۆنا ئامه‌د هێته‌ په‌خشكرن و گۆت: “راسته‌ ل سه‌ر ده‌مه‌كی ده‌زگه‌هێ‌ ئامه‌د یێ‌ هونه‌ری گه‌له‌ك خزمه‌تا هونه‌رێ‌ كوردی و هونه‌رمه‌ندان دكر، به‌لێ‌ نوكه‌ ته‌له‌ڤزیۆنا ئامه‌د جهێ‌ ده‌زگه‌هێ‌ ناڤهاتی گرتیه‌ و ئه‌م ب رێیا ڤێ‌ ته‌له‌ڤزیۆنێ‌ نوكه‌ خزمه‌تا هه‌موو هونه‌رمه‌ندێن كورد بێ‌ جوداهی دكه‌ین”.

7

بارزان، ره‌مه‌زان زه‌كه‌ریا:

سترانبێژ زكری شوكری مێرووزی كو ب زمار مزووری یێ‌ به‌رنیاسه‌، د دیداره‌كێ دا بۆ رۆۆژناما ئه‌ڤرۆ گۆت: ده‌مێ چه‌ندین سالایه‌ سترانان دبێژم، به‌لێ ژ به‌ر نه‌بوونا چو پشته‌ڤانی و هاریكاریێ نه‌شیامه‌ چو به‌رهه‌مان دروست بكه‌م، دروستكرنا به‌رهه‌مان مه‌زاختیێن مه‌زن دڤێن و ئه‌و ژی دشیانێن من دا نینه‌ و گۆت: “ژبلی كارێ‌ هونه‌ری ئه‌ز پێشمه‌رگه‌مه‌ و به‌ره‌ڤانیێ‌ ژ ئاخا پیرۆزا كوردستانێ‌ دكه‌م”.

ناڤهاتی خویا كر كو به‌ری ب شێوه‌یه‌كێ‌ فه‌رمی ده‌ست ب كارێ‌ سترانگۆتنێ‌ بكه‌ت وی حه‌ز ل سه‌ر ژه‌نینا ئامیرێن مۆزیكێ‌ هه‌بوو و ساز دژه‌نی و ژه‌نینا ڤی ئامیره‌ی بوو ئه‌گه‌ره‌ك كو ده‌ست ب كارێ‌ سترانگۆتنێ‌ ژی بكه‌ت و گۆت: “ل سالێن بۆری من هنده‌ك سترانێن هونه‌رمه‌ندێن كوردێن وه‌غه‌ركرین ل ستودیۆیێ‌ تۆماركرینه‌، به‌لێ‌ نوكه‌ ژ به‌ر نه‌بوونا پشته‌ڤانیێ‌ نه‌شێم چو كارێن نوو یێن هونه‌ری ئه‌نجام بده‌م و بتنێ‌ هنده‌ك سترانان ب ئامیرێن مۆزیكێ‌ یێن ساده‌ ل مال تۆمار دكه‌م و ب وی شێوه‌یی نینن كو بشێم به‌لاڤ بكه‌م”.

زماری دیار كر كو ئه‌و به‌هرا پتر سترانان ل گه‌ل زارۆیێن خوه‌ دبێژیت ب شێوه‌یێ‌ گرۆپ و هاریكاریا زارۆیێن وی بوویه‌ ئه‌گه‌ره‌ك كو ئه‌و پتر حه‌ز ژ كارێ‌ هونه‌ری بكه‌ت و گۆت: “دخوازم هه‌ر جهه‌كێ‌ په‌یوه‌ندیدار یان سپونسه‌ره‌ك هه‌بیت پشته‌ڤانیا من بكه‌ت بۆ وێ چه‌ندێ به‌رهه‌مه‌كی دروست ل گه‌ل هه‌ر دو كچێن خوه‌ به‌لاڤ بكه‌م”.

5

ئه‌ڤرۆ:

سترانبێژ فلیپ ولیه‌م ئاشكرا كر كو ئه‌ڤه‌ بۆ ده‌مێ‌ 22 سالانه‌ ئه‌و ل ه‌ر كارێ‌ خوه‌ یێ‌ هونه‌ری یێ‌ به‌رده‌وامه‌ و بۆ كوردستان تیڤی گۆت: “ل ده‌ستپێكا كارێ‌ من یێ‌ هونه‌ری مالا من رێگربوون و نه‌دهێلان ئه‌ز كارێن هونه‌ری ئه‌نجام بده‌م به‌لێ‌ ل سالا 1999 ب پشته‌ڤانیا هه‌ڤژینا خوه‌ ئه‌ز شیام ب شێوه‌یه‌كێ‌ فه‌رمی ده‌ست ب كارێ‌ هونه‌ری بكه‌م و د هه‌مان ده‌م دا من نه‌ه ستران چێكرن و د ناڤ بازاری دا به‌لاڤكرن و خه‌لكی گه‌له‌ك حه‌ز ژێ‌ كر، ژ بلی كارێ‌ گۆتنا سترانان من په‌یڤ و ئاواز ژی چێكرن”.

ناڤهاتی ئاماژه‌ دا وێ‌ چه‌ندێ‌ كو ئه‌و داخباری ده‌نگێن هونه‌رمه‌ندێن كورد یێن وه‌غه‌ركری (ته‌حسین ته‌ها، ئه‌یاز زاخۆیی، ئه‌رده‌وان زاخۆیی) یه‌ و به‌رده‌وام گوهداریا سترانێن وان دكه‌ت و ئه‌و ب خوه‌ ژی وان سترانان نوكه‌ به‌رده‌وام ل داواتان دبێژیت و گۆت: “حه‌ز دكه‌م د كارێ‌ خوه‌ یێ‌ هونه‌ری دا پێش بكه‌ڤم”.

21

ئه‌ڤرۆ، رێوار:

ئه‌ڤین ئیبراهیم، یا به‌رنیاس ب ئه‌ڤین قامشلۆ كو نوكه‌ ل پارێزگه‌ها هه‌ولێرێ‌ دژیت د دیداره‌كێ‌ دا بۆ به‌رپه‌رێ‌ هونه‌ری یێ‌ رۆژناما ئه‌ڤرۆ خویا كر كو كارێن نوو یێن هونه‌ری ل به‌ر ده‌ستێ‌ وێ‌ هه‌نه‌، به‌لێ‌ ژ به‌ر نه‌بوونا پشته‌ڤانیێ‌ نه‌شێت چو ژوان كاران ئه‌نجام بده‌ت و گۆت: “پشتی ل سالێن بووری ژ رۆژئاڤایێ‌ كوردستانێ‌ هاتیم و ل پارێزگه‌ها هه‌ولێرێ‌ ئاكنجی بوویم، مخابن هه‌تا نوكه‌ من په‌یوه‌ندی ل گه‌ل چو هونه‌رمه‌ندێن ڤێ‌ پارێزگه‌هێ‌ نینن كو كاره‌كێ‌ هونه‌ری پێكڤه‌ ئه‌نجام بده‌ین و ئه‌و ده‌رفه‌ت بوو من په‌یدانه‌بوویه‌ كو ئه‌ز سه‌ره‌دانا سازیێن په‌یوه‌ندیدار ب هونه‌ری ڤه‌ بكه‌م بۆ وێ‌ چه‌ندێ‌ من بنیاسن كو ئه‌ز ژی سترانبێژه‌كا كوردم و هه‌كه‌ د شیانێن وان دابیت پشته‌ڤانیا من بۆ ئه‌نجامدانا كارێن هونه‌ری بكه‌ن”.

ناڤهاتیێ‌ خویا كر كو ل سالێن بۆری من به‌رهه‌مه‌ك به‌لاڤكربوو ب ناڤێ‌ (ته‌نابینم)، به‌لێ‌ ژ بلی به‌رهه‌می هه‌تا نوكه‌ من چه‌ندین كلیپ و سترانێن تۆماركری هه‌نه‌، به‌لێ‌ جهێ‌ داخێ‌ یه‌ كو ده‌زگه‌هێن راگه‌هاندنێ‌ ژی خوه‌ ل كار و به‌رهه‌مێن وێ‌ ناكه‌نه‌ خودان و په‌خش ناكه‌ن، ژ به‌ر ڤێ‌ چه‌ندێ‌ یا نه‌چاره‌ كارێن خوه‌یێن هونه‌ری ب رێیا وشیال میدیایێ‌ به‌لاڤ بكه‌ت و گۆت: “من چو به‌رنامه‌ بۆ شه‌ڤا سه‌رێ‌ سالا نوو نینن، به‌لێ‌ هه‌كه‌ داخواز بۆ گێڕانا كۆنسێرته‌كێ‌ یان پشكداریێ‌ د ئاهه‌نگه‌كێ‌ دا ژمن بهێته‌كرن ئه‌ز یا به‌رهه‌ڤم”.

website security
WP Facebook Auto Publish Powered By : XYZScripts.com