،راپۆرت: قه‌یس وه‌یس:
چاڤه‌ڕێ دهێته كرن ئه‌ڤرۆ ده‌ست ب هه‌ڤڕكیێن خولا ستێرێن ئیراقێ یا فوتبۆلێ بهێته كرن پشتی بۆ ماوه‌یێ مه‌هه‌كه هاتییه ڕاوه‌ستاندن ژبه‌ر پشكداریێن هه‌لبژارتیێ ئیراقێ د ڤاڤارتنێن ئاسیا ده‌ربازبوون بۆ مۆندیالا جیهانی 2026ێ، چار یاری دێ ئه‌ڤرۆ هێته كرن و بڕیاره سوبه‌هی ژی چار یاری بهێنه ئه‌نجامدان و شه‌مبییا بهێت به‌رده‌وامبن ئه‌وا دێ ژ چارچووڤه‌یێ گه‌ڕا چارێ ل یاریگه‌هێن جودا هێنه كرن.
هه‌ولێر گه‌شبینه بۆ سه‌ركه‌فتنێ
بڕیاره ئه‌ڤرۆ چار یاری بڤی شێوه‌یی بهێنه كرن تیما یانه‌یا هه‌ولێرێ دێ ل یاریگه‌ها كوت بیته مێڤانا یانه‌یا ئه‌لقاسم د ده‌لیڤه‌كا دی دا یا كۆمكرنا خالان و پاراستنا سه‌رێ لیستێ، ئه‌وا نوكه ب حه‌فت خالان رێزا ئێكێ دهێت ژ دو سه‌ركه‌فتن و وه‌كهه‌ڤیه‌كێ، خودانێن ئه‌ردی ئه‌لقاسم چار خال هه‌نه ل رێزا 10ێ دهێت ئه‌ڤ یاریه دێ ل ده‌مژمێر 2:45 پشتی نیڤرۆ هێته كرن، ژ یاریێن دی یێن ئه‌ڤرۆ، حدود- شورته، نه‌فت- نه‌فت ئه‌لبه‌سرا، ته‌له‌به- ئه‌لكه‌رمه.
زاخۆ د ئه‌ركه‌كێ ب زه‌حمه‌ت دایه
بۆ رۆژا ئه‌ینی چاڤه‌ڕێ یه چار یاریێن دی ژ هه‌ڤڕكیێن گه‌ڕا چارێ بڤی شێوه‌یی بن، یانه‌یا زاخۆ دێ ل باژێرێ به‌غدا به‌رانبه‌ر یانه‌یا زه‌ورا شه‌ڕی بۆ سه‌ركه‌فتنێ دكه‌ت د كۆپیتكا یاریێن ڤێ حه‌فتیێ دا ئه‌وا بڕیاره ل ده‌مژمێر2:45 یاریگه‌ها زه‌ورا مێڤاندارییا وێ بكه‌ت، كوڕێن خابۆری د نوكه‌دا ل رێزا شه‌شێ دهێن ب پێنج خالان ژ سه‌ركه‌فتنه‌ك و دو وه‌كهه‌ڤییان، لێ یانه‌یا زه‌ورا حه‌فت خال هه‌نه ئه‌وا ل رێزا شه‌شێ دهێت، زاخۆ د ده‌مه‌كێ باش دا ده‌رباز دكه‌ن و به‌رهه‌ڤیێن باش ژی هاتینه كرن ئه‌وا ل دووڤ داخویانییا ستێرێ گه‌نج یێ تیمێ ره‌مه‌زان سه‌دیق گۆت: پشتی به‌رهه‌ڤیێن زێده‌تری 20 رۆژان و دانانا كه‌مپه‌كێ راهێنانێ، ئه‌م ب هه‌موو لایه‌كی ڤه د به‌رهه‌ڤین و تیما مه د ڕه‌وشه‌كا باش دایه، هه‌رچه‌نده یارییه‌كا بزه‌حمه‌ته لێ هه‌موو یاریزان ژی رژدن بۆ سه‌ركه‌فتنێ.
نه‌ورۆز دێ بزاڤێن ئاشتكرنا جه‌ماوه‌رێ خوه كه‌ت
یانه‌یا نه‌ورۆز دێ ل یاریگه‌ها خوه ل باژێرێ سلێمانیێ مێڤاندارییا یانه‌یا نه‌جه‌ف كه‌ت د یارییه‌كا ب زه‌حمه‌ت دا، نه‌ورۆز ب تنێ دو خال هه‌نه ژ دو وه‌كهه‌ڤییان ل رێزا 18ێ دهێت هه‌مان خال یانه‌یا نه‌جه‌ف هه‌نه و رێزا 17ێ دهێت، ئه‌ڤ یارییه یا پڕی حه‌ق و حیساباتن ژبۆ ڤه‌گه‌ڕاندنا سه‌ركه‌فتنان ئاشتكرنا جه‌ماوه‌رێ خوه، بڕیاره یاری ل ده‌مژمێر 2:45 نیڤرۆ هێته كرن، ژ یاریێن دی، كه‌ربه‌لا دێ مینا مێڤان كه‌ت و نه‌فت میسان دێ بیته مێڤانا كه‌رخێ.
دهۆك ژ شادییا سه‌ركه‌فتنا كه‌نداڤی به‌ر ب هیڤیێن هه‌مان ئه‌نجام
بڕیاره ل شه‌مبییا بهێت هه‌ڤڕكیێن گه‌ڕا چارێ یا خولێ ب ئه‌نجامدانا دو یارییان ب دووماهی بهێت، تیما فوتبۆلا دهۆكێ دناڤ ئه‌رد و جه‌ماوه‌رێ خوه دا دێ مێڤاندارییا یانه‌یا كاره‌با یا به‌غدایی كه‌ت و چاڤێ وێ ل سه‌ركه‌فتنێ یه ئه‌وا بڕیاره ئه‌ڤ یارییه ل ده‌مژمێر 5:15 ئێڤاری بهێته كرن، هه‌تا نوكه ئامارێن ئه‌لهۆیێن چیا د خولێ دا د باش نینن ژ سێ یارییان ئێك سه‌ركه‌فتن و دو خوساره‌تی هه‌نه ب سێ خالان رێزا 14ێ دهێت، لێ ئه‌ڤه نابیت هه‌لسه‌نگاندنه‌ك ژبه‌ركو ده‌ستپێكا خولێ یه و دنوكه دا مۆرالا یاریزانێن دهۆكێ د كۆپیتكێ دایه تایبه‌ت پشتی سه‌ركه‌فتنا ئێكێ یا دیرۆكی ل سه‌ر ئه‌هلی سه‌نعا یا یه‌مه‌نی ژ كۆپا كه‌نداڤی كو ئه‌ڤه دێ بیته پالپشتیه‌ك بۆ تیمێ سه‌ركه‌فتنێ ل سه‌ر مێڤانێن خوه كاره‌با بینن و ئێكه‌م خوساره‌تیێ ب گه‌هینێ ئه‌وا ئه‌وا ب پێنج خالان ل رێزا هه‌شتێ دهێت، یارییا دویێ یا شه‌مبییا بهێت یانه‌یا جه‌وییه به‌رانبه‌ر ئه‌ركه‌كێ ب سانه‌هی دا ده‌مێ ل یاریگه‌ها خوه مێڤاندارییا یانه‌یا دیالا دكه‌ت، جه‌وییه خودانا حه‌فت خالان رێزا چارێ دهێت، دیالا بێ هیچ خاله‌ك رێزا 20ێ و دووماهیێ دهێت.
نيشاندان