زاخۆ، عه‌لی حاجی:
د. محه‌مه‌د شوكری، سه‌رۆكێ ده‌سته‌یا گشتی یا وه‌به‌رهێنانێ ل كوردستانێ دوهی 9/11/2021 سه‌ره‌دانا ئیداره‌یا سه‌ربخوه یا زاخۆ كر و ژ لایێ گوهدار شێخۆ، سه‌رپه‌رشتێ ئیداره‌یا سه‌ربخوه یا زاخۆ ڤه پێشوازی لێ هاته‌كرن، پاشی د رێوره‌سمه‌كی دا رێڤه‌به‌ریا وه‌به‌رهێنانێ ل زاخۆ ڤه‌كر.
گوهدار شێخۆ، سه‌رپه‌رشتێ ئیداره‌یا سه‌ربخوه یا زاخۆ د كۆنگره‌یه‌كێ رۆژنامه‌ڤانی دا گۆت: “رێڤه‌به‌ریا وه‌به‌رهێنانێ ل باژێرێ زاخۆ هاته ڤه‌كرن و ئه‌ڤه ژی دێ بیته پێنگاڤه‌كا باش بۆ خه‌لكێ ده‌ڤه‌رێ، هیڤی خوازین وه‌به‌رهێنه‌رێن مه زێده‌تر هاریكار و پشته‌ڤان بن، دا كو كه‌رتێ وه‌به‌رهێنانێ ل زاخۆ به‌ره‌ڤ پێشڤه بچیت و ب هه‌ڤكاریا كه‌رتێ گشتی خزمه‌تا وه‌لاتی بكه‌ت”.
دكتۆر محه‌مه‌د شوكری، سه‌رۆكێ ده‌سته‌یا وه‌به‌رهێنانێ ل هه‌رێما كوردستانێ د وی كۆنگرێ رۆژنامه‌ڤانی دا دیار كر، ب بڕیارا سه‌رۆكێ حوكمه‌تا هه‌رێما كوردستانێ رێڤه‌به‌ریا وه‌به‌رهێنانێ ل زاخۆ هاته ڤه‌كرن و رێڤه‌به‌ره‌ك ژی بۆ هاتیه ده‌ستنیشان كرن و جهه‌ك و فه‌رمانبه‌ر ژی دێ بۆ هێنه دابینكرن و گۆت: “ده‌ڤه‌را زاخۆ گه‌له‌ك ده‌ستكاری تێدا نه‌هاتیه كرن و ده‌لیڤه‌یێن مه‌زن یێن كاری تێدا هه‌نه كو بهێنه ئه‌نجامدان”.
سه‌رۆكێ ده‌سته‌یا وه‌به‌رهێنانێ ل هه‌رێما كوردستانێ گۆتژی: “بڕیار هاتیه دان كو نه‌خشه‌یێ وه‌به‌رهێنانێ یێ سه‌رانسه‌ری ل زاخۆ بهێته دانان و گه‌له‌ك بزاڤ هاتینه كرن كو ل سه‌رانسه‌ری كوردستانێ نه‌خشه‌یێ وه‌به‌رهێنانێ بهێته دروستكرن، به‌لێ مه ده‌لیڤه‌یه‌كا باش ل زاخۆ دیت و هه‌ر ژ زاخۆ ژی دێ ده‌ست پێكه‌ین، ئه‌ڤ چه‌نده ژی دێ ده‌ستپێشخه‌ریه‌كا باش بیت و ئه‌ڤ نه‌خشه ژی ژلایێ ئیداره‌یا سه‌ربخوه یا زاخۆ ڤه دێ هێته دروستكرن”.
د. محه‌مه‌د شوكری زێده‌تر د وی كۆنگرێ رۆژنامه‌ڤانی دا گۆت: “ده‌ستكاری د ماسته‌رپلانا زاخۆ دا دێ هێته كرن ژ بۆ هندێ هنده‌ك جهێن تایبه‌ت بۆ پرۆژه‌یێن وه‌به‌رهێنانێ بهێنه ده‌ستنیشان كرن و پرۆفایله‌كێ تایبه‌ت بۆ وه‌به‌رهێنانا زاخۆ دروست بكه‌ین، ئه‌م دێ هه‌موو وه‌به‌رهێنه‌رێن كوردستانێ ژ بۆ زاخۆ ئاراسته كه‌ین، دا كو بهێن ل زاخۆ كار بكه‌ن، گرنگترین كارێ د پاشه‌روژێ دا ل زاخۆ بهێته كرن، دێ دروستكرنا ده‌ڤه‌را پێشه‌سازی و ده‌ڤه‌را بازرگانی بیت ل زاخۆ و ئه‌ڤ كاره ژی دێ مه‌زنترین مفا بۆ هه‌موو كوردستانێ هه‌بیت”.
نيشاندان