NO IORG
نووترين نووچه
Authors Posts by naci bedel

naci bedel

15011 POSTS 0 COMMENTS

20

ئامێدیێ‌، مه‌حمود و نه‌وزاد:

ده‌ست ب قێركرنا رێیا گوندێ‌ هاریكا و رێیا هاڤینگه‌ها گه‌لیێ‌ شێرانه‌ هاتنه‌ كرن و گوژمێ‌ 348 ملیۆن دیناران بۆ هاتینه‌ ته‌رخانكرن.

راید غازی عزه‌ت، رێڤه‌به‌رێ‌ ناحیا دێره‌لۆكێ‌ ب وه‌كاله‌ت بۆ رۆژناما ئه‌ڤر دیار كر كو بجهئینانا پرۆژێ‌ قێركرنا رێیا گوندێ‌ هاریكا و هاڤینگه‌ها گه‌لیێ‌ شێرانه‌ گه‌له‌ك گرنگیا خوه‌ هه‌یه‌، چه‌ندین سالبوو ئه‌ڤ رێیه‌ ل هه‌مبه‌ر هاتنوچوونا خه‌لكێ‌ ڤێ‌ ده‌ڤه‌رێ‌ دبوونه‌ ئاریشه‌ و گۆت: “چێكرنا رێیا گوندێ‌ هاریكا ژبلی كو رێیا هه‌ژماره‌كا گوندان بوویه‌ ژلایێ‌ گه‌شت و گوزاری ڤه‌ ژی دێ‌ مفا ژێ‌ هێته‌ وه‌گرتن كو دبیته‌ رێیا سه‌ره‌كی یا هاڤینگه‌هێن گه‌لیێ‌ شێرانه‌ و گوندێ‌ بیاوێ‌، هه‌روه‌سا دبیته‌ رێیا ب سه‌دان جۆتیارێن ده‌ڤه‌رێ‌”.

ناڤهاتی خویا ژی كر كو ئه‌ڤ جاده‌ ب درێژاهیا سێ‌ كیلۆمه‌تران و فره‌هیا هه‌شت میتران ژلایێ‌ كۆمپانیه‌كا ناڤخوه‌یی ڤه‌ دهێته‌ چێكرن و گۆت: “بۆ ئه‌نجامدانا ڤان هه‌ردو پرۆژان گوژمێ‌ 348 ملیۆن دیناران هاتینه‌ ته‌رخانكرن”.

ژلایێ‌ خوه‌ ڤه‌ هه‌رمان سدقی، خودانێ‌ كۆمه‌لگه‌ها گه‌لیێ‌ شێرانه‌ یا گوزاری بۆ رۆژناما ئه‌ڤرۆ دیار كر، ل گه‌ل چێكرنا رێیا گوندێ‌ هاریكا ئه‌وان ب فه‌ر دیت رێیا سه‌یرانگه‌ها ئاڤا شین ل گه‌لیێ‌ شێرانه‌ ل سه‌ر ئه‌ركێ‌ خوه‌ و مه‌زاختنێن خوه‌ قێر بكه‌ن و گۆت: “ئه‌و جادا مه‌ ل سه‌ر ئه‌ركێ‌ خوه‌ دروستكری هزار و 300 میتران یا درێژه‌ و شه‌ش میتران ژی یا فره‌هه‌ و ب دووماهیك هاتنا ڤی پرۆژه‌ی دێ‌ خزمه‌ته‌كا باش ژلایێ‌ گه‌شت و گوزاری ڤه‌ گه‌هینیته‌ ده‌ڤه‌رێ‌ و گه‌شتیاران”.

6

دهۆك، له‌زگین جوقی:

به‌رپرسێ‌ راگه‌هاندنێ‌ ل رێڤه‌به‌ریا گشتی یا ساخله‌میا پارێزگه‌ها دهۆكێ‌ دیار كر، بۆ ئاسایبوونا ژیانێ‌ د ناڤ زانكۆ و په‌یمانگه‌هان دا ڤاكسینا دژی كۆرۆنایێ‌ بۆ قوتابیان دێ‌ هێنه‌ دانان و دبێژیت: داخوازێ‌ ژ قوتابیێن زانكۆ و په‌یمانگه‌هان دكه‌ین رۆژانه‌ ل ده‌مژمێر سێ‌ هه‌تا حه‌فتێ‌ ئیڤاری سه‌ره‌دانا بنگه‌هێ‌ یانا دهۆك یا وه‌رزشی بكه‌ن بۆ وه‌رگرتنا ڤاكسینا دژی كۆرۆنایێ‌.

حه‌مزه‌ ره‌زیكی، به‌رپرسێ‌ راگه‌هاندنێ‌ ل رێڤه‌به‌ریا گشتی یا ساخله‌میا پارێزگه‌ها دهۆكێ‌ بۆ رۆژناما ئه‌ڤرۆ گۆت: “53 بنگه‌هێن ڤاكسیندانانێ‌ ل سنوورێ‌ پارێزگه‌ها دهۆكێ‌ رۆژانه‌ د خزمه‌تا وه‌لاتیان بۆ دانانا ڤاكسینا دژی كۆرۆنایێ‌ كار دكه‌ن، ساخله‌میا دهۆكێ‌ بۆ ئاسایبوونا ژیانێ‌ هه‌ر ژ ده‌مێ‌ په‌یدابوونا ڤاكسینا دژی كۆرۆنایێ‌ ب پشته‌ڤانیا حوكمه‌تا هه‌رێما كوردستانێ‌ و وه‌زاره‌تا ساخله‌میێ‌ شیایه‌ هه‌ژماره‌كا پێدڤی یا قورچێن ڤاكسینێ‌ بۆ پارێزگه‌ها دهۆكێ‌ دابین بكه‌ت، وه‌كو رێیه‌كا كاریگه‌ر بۆ ئاسایبوونا ژیانا وه‌لاتیان”.

ناڤهاتی ئاشكرا ژی كر كو هه‌تا نوكه‌ ل دهۆكێ‌ 354 هزار و 458 كه‌سان ڤاكسینا دژی كۆرۆنایێ‌ وه‌رگرتینه‌ كو دۆرێن 150 هزار كه‌سان هه‌ردو قورچێن ڤاكسینێ‌ وه‌رگرتینه‌ و گۆت: “نوكه‌ بڕیار هاتیه‌دان دانانا ڤاكسینێ‌ بیته‌ راسته‌وخوه‌، ئانكو تۆماركرن نه‌مینیت، داكو ب سه‌ناهیتر وه‌لاتی ڤاكسینێ‌ وه‌ربگرن، هه‌ر كه‌سه‌كێ‌ د سه‌ر ژییێ‌ 16 سالیێ‌ دا دشێت ناسنامه‌یا خوه‌ ببه‌ت و بچت ڤاكسینێ‌ ئێكسه‌ر وه‌ربگریت”.

حه‌مزه‌ ره‌زیكی ئه‌و ژی دیار كر كو د ناڤ كه‌مپێن ئاواره‌ و په‌نابه‌ران دا ژی رێڤه‌به‌ریا ساخله‌میا دهۆكێ‌ ل حه‌فتیا بهێت دێ‌ ده‌ست ب دانانا ڤاكسینێ‌ د ناڤ كه‌مپێن ئاواره‌ و په‌نابه‌ران دا كه‌ت و گۆت: “ل پێنج كه‌مپان ده‌ست ب دانانا ڤاكسینێ‌ دێ‌ هێته‌ كرن، ئه‌و ژی كه‌مپا باجد كه‌ندالا، كه‌مپا بێرسڤێ‌، كه‌مپا قادیا، كه‌مپا كه‌به‌رتۆ و كه‌مپا گه‌وێلانن، ل ڤان كه‌مپان راسته‌وخوه‌ ڤاكسین بۆ ئاواره‌ و په‌نابه‌ران دێ‌ هێته‌ دانان”.

به‌رپرسێ‌ راگه‌هاندنێ‌ ل رێڤه‌به‌ریا گشتی یا ساخله‌میا پارێزگه‌ها دهۆكێ‌ گۆتژی: “داخوازێ‌ ژ وه‌لاتیان دكه‌ین ڤاكسینێ‌ ب گرنگی وه‌ربگرن و ل سه‌ر رێكارێن خوه‌پاراستنێ‌ دبه‌رده‌وام بن، ب تایبه‌ت ل جهێن گشتی”.

 

17

ئه‌ڤرۆ، نه‌وزاد هلۆری:

نێزیكی حه‌فتیه‌كێ یه‌ پشكه‌ك ژ قوتابیێن پشكێن ناڤخوه‌یی ل دهۆكێ بێ غازن و دخوازن كو غاز بۆ وان بهێته‌ دابینكرن، ژ به‌ركو ئه‌و قوتابیه‌ نه‌شێن بۆ خوه‌ دابین بكه‌ن.

ئاشتی زیاد، قوتابیه‌كێ پشكێن ناڤخوه‌یی یه‌ ل دهۆكێ بۆ ئه‌ڤرۆ گوت: “ئه‌ڤه‌ چه‌ندین روژه‌ قه‌یرانا غازێ دروست بووی و ب زحمه‌ت غاز ب ده‌ست مه‌ دكه‌ڤیت، قوتابیێن پشكێن ناڤخوه‌یی ژی وه‌كی هه‌موو خه‌لكێ ژ غازێ د بێ‌ به‌هرن، به‌لێ جوداهی ئه‌وه‌ كو قوتابیێن پشكێن ناڤخوه‌یی د ژیانه‌كا جودا ژ مالان دا دژین و ب چو ئاوایی غاز ب ده‌ست وان ناكه‌ڤیت، ئه‌ڤه‌ چه‌ندین روژه‌ دبێ غازن و نه‌شێن خوارنێ بۆ خوه‌ دروست بكه‌ن، سه‌ره‌رایی هه‌بوونا ئه‌ركێن خواندنێ یێن زانكۆیێ ئه‌و هه‌ر جار ل جهه‌كی و ب شێوه‌یه‌كی خوارنێ دخون یان دروست دكه‌ن”.

زێده‌تر گوت: “داخوازێ ژ جهێن په‌یوه‌ندیدار دكه‌ین كو چاره‌یه‌كێ ل حالێ قوتابیێن پشكێن ناڤخوه‌یی بكه‌ن و غازێ بۆ دابین بكه‌ن، ئه‌گه‌ر چ ب پارێ خوه‌ ژی بیت بلا بوو دابین بكه‌ن، ژ به‌ركو گه‌له‌ك ب زحمه‌ت ب ده‌ست دكه‌ڤیت و ئه‌و رێژا كێم ژی سرایه‌كا دوور و درێژه‌ و یا دووره‌ ژ ئاڤاهیێن پشكێن ناڤخوه‌یی، ئێدی كۆمپانی ژی بۆ كه‌سێ غازێ ناگه‌هیننه‌ بنه‌جهێ، به‌روڤاژی دڤێت قوتابی سه‌ره‌دانا جهێن وان بكه‌ن، ئه‌گه‌ر چو چاره‌سه‌ری نه‌هێنه‌كرن، مه‌ ژی دێ هه‌لویستێ خوه‌ هه‌بیت، چونكی ئه‌م خوارنێ ل خوارنگه‌ها و ده‌رڤه‌یی پشكێن ناڤخوه‌یی دخوین و دكڕین، یان ژی هنده‌ك جاران دچینه‌ وان ژوورێن ب ره‌خ خوه‌ڤه‌ ئه‌وێن هێشتا غازا وان مایی و ل نك وان بۆ خوه‌ خوارنێ‌ دروست دكه‌ین”.

11

ئه‌ڤرۆ، زنار تۆڤی:

د ئه‌ڤ ساله‌ دا ژ ئه‌گه‌رێ‌ گرانبوونا بهایێ‌ كه‌لوپه‌لان ل بازارێن هه‌رێما كوردستانێ‌ ره‌وشا بازاری نه‌سه‌قامگیریه‌ك ب خوه‌ڤه‌ دیتیه‌، فرۆشیار كێمتر ژ جاران تشتێن خوه‌ دفرۆشن، بكڕ ژی ژ ڤێ‌ ره‌وشێ‌ د دلگرانن و گازنده‌یان دكه‌ن و دخوازن كه‌لوپه‌ل هند گران نه‌بن، هه‌روه‌سا د نوكه‌ دا ل سه‌رانسه‌ری جیهانێ‌ بهایێ‌ كه‌لوپه‌لان گران بوویه‌ و بازرگان ژی ب گرانی كه‌لوپه‌لان ژ ده‌رڤه‌ دئینن.

وه‌لاتیه‌ك ب ناڤێ‌ ئه‌سعه‌د حه‌مدی، بۆ رۆژناما ئه‌ڤرۆ دبێژیت: ژ نه‌چاری مه‌ پێدڤیێن رۆژانه‌ كێمكرینه‌، ئه‌م وه‌كو جاران تشتان ناكڕین و ب تنێ‌ رۆژانه‌ وان تشتان بۆ مال دئینین، یێن كو مه‌ گه‌له‌ك پێدڤیاتی پێ‌ هه‌یی، چونكی بهایێ‌ هه‌موو تشتان گران بوویه‌، دیسا پشتی داكه‌فتنا بهایێ‌ دیناری ژی زیان گه‌هشتیه‌ مه‌، هه‌روه‌سا پڕانیا كه‌لوپه‌لێن خه‌لكێ‌ مه‌ پێدڤی پێ‌ هه‌یی ژ ده‌رڤه‌ی كوردستانێ‌ دهێن، له‌وما بهایێ‌ وان گران بوویه‌، رۆژ بۆ رۆژێ‌ تشت گرانتر لێ‌ دهێن، بازاری ژی سستی و خاڤبوونه‌كا به‌رچاڤ ب خوه‌ڤه‌ دیتیه‌، هه‌ر تشته‌كێ‌ ل بازاری هزار دینار هنده‌كان ژی دو هه‌تا سێ‌ هزار دیناران و هه‌نده‌ك تشتان پتر ژی چووینه‌ سه‌ر.

ئازاد عه‌بدولكه‌ریم، خودانێ‌ ماركێته‌كێ‌ یه‌ دبێژیت: پڕانیا تشتان یێن گران بووین و خه‌لك ژی وه‌كو به‌ری نوكه‌ تشتان ناكرن و بازار یێ‌ سست بوویی، ڤێ‌ چه‌ندێ‌ كارتێكرنه‌كا خراب ل سه‌ر كارێ‌ مه‌ و بازاری ب ره‌نگه‌كێ‌ به‌رچاڤ كریه‌، هه‌روه‌سا ژ به‌ر هه‌بوونا كۆرۆنایێ‌ و داكه‌فتنا بهایێ‌ دینارێ‌ عیراقی ل هه‌مبه‌ری دۆلاری ژی بازار سست بوویه‌، هه‌كه‌ ب ڤی ره‌نگێ‌ نوكه‌ بیت، دێ‌ ره‌وش به‌ر ب خرابترڤه‌ چیت و دبیت كه‌لوپه‌ل ژی گرانتر لێ‌ بهێن.

ئازادی گۆت: “هه‌ر ده‌مێ‌ كه‌لوپه‌ل گرانتر لێ‌ بهێن، بازارێ‌ مه‌ ژی گه‌له‌ك سستتر لێ‌ دهێت، له‌وما ئه‌م دخوازین كه‌لوپه‌ل ئه‌رزان ببن، داكو وه‌كو به‌ری نوكه‌ بازار ژی خۆشتر لێ‌ بهێت، لێ‌ هه‌كه‌ وه‌كو نوكه‌ بازار یێ‌ گران بیت، دێ‌ هه‌ر بازار ب ڤی ره‌نگی یێ‌ سست و خاڤ بیت”.

29

دووڤچوون، ئه‌میر ئه‌ترووشی:

رێڤه‌به‌رێ‌ ئاڤدانێ‌ ل پارێزگه‌ها دهۆكێ‌ دا زانین، ژ ئه‌گه‌رێ‌ هشكه‌سالیێ‌ و كێم هاتنا بارانان، د ماوه‌یێ‌ 20 سالێن ده‌ربازبووی دا زێده‌تری 700 كانیێن ئاڤێ‌ ل سنوورێ‌ هه‌موو پارێزگه‌ها دهۆكێ‌ هشكبووینه‌. رێڤه‌به‌رێ‌ ئاڤا ژێر زه‌ڤی ژی دیار كر كو نها هژمارا كۆلانا بیران گه‌هشتینه‌ سێ‌ هزار و 470 بیرێن ئیرتیوازی ل سنوورێ‌ پارێزگه‌ها دهۆكێ‌ و بێگومان ژی ئه‌ڤه‌ دێ‌ بیته‌ ئه‌گه‌رێ‌ مه‌ترسیا هشكبوونه‌ سه‌دان كانیێن ئاڤێ‌. شاره‌زایه‌كێ‌ جیولۆجی ژی دیار كر، هه‌تا نها حكوومه‌تا عیراقێ‌ چو پلانێن ستراتیژی بۆ چاره‌سه‌ریا ئاڤێ‌ نه‌دیتینه‌ و ئه‌ڤ یه‌ك ژی مه‌ترسیه‌ك مه‌زنه‌ ل سه‌ر هه‌رێمێ‌، چونكو سكرێ‌ مووسل و یێ‌ حمرین ل ژێر كۆنترۆلا عیراقێ‌ دانه‌ و ئه‌ڤه‌ ژی دێ‌ زیانێ‌ ب پاشه‌رۆژا ئاڤێ‌ ل هه‌رێما كوردستانێ‌ گه‌هینیت.

كۆلانا بیرێن ئیرتیوازی ل سنوورێ‌ پارێزگه‌ها دهۆكێ‌ رۆژ بۆ رۆژێ‌ به‌ره‌ڤه‌ زێده‌بوونێ‌ نه‌ و ئه‌ڤه‌ ژی بوویه‌ ئه‌گه‌ر كو مه‌ترسیه‌كا مه‌زن ل سه‌ر ئاڤا ژێر زه‌ڤی په‌یدا ببیت، بۆ نموونه‌ هه‌تا سالا 2000 ژی، كێمتری هزار بیرێن ئیرتیوازی ل سنوورێ‌ پارێزگه‌ها دهۆكێ‌ هه‌بوون، به‌لێ‌ نها گه‌هشتینه‌ سێ‌ هزار و 470 بیرێن ئیرتیوازی ل سنوورێ‌ پارێزگه‌ها دهۆكێ‌ و بێگومان ژی ئه‌ڤه‌ دێ‌ بیته‌ ئه‌گه‌رێ‌ مه‌ترسیا هشكبوونه‌ سه‌دان كانیێن ئاڤێ‌. “ناجی ئیبراهیم، رێڤه‌به‌رێ‌ ئاڤا ژێر زه‌ڤی ل پارێزگه‌ها دهۆكێ‌” هۆسا گۆت.

ناڤبری زێده‌تر گۆت: ئه‌ڤ بیرێن ئیرتیوازی یێن هه‌تا نها هاتینه‌ كۆلان بۆ سێ‌ مه‌ره‌مان بووینه‌، ڤه‌خوارن، چاندن و پیشه‌سازی، به‌ری نها ژی تێكرایێ‌ كۆلانا بیران هه‌تا 200 مه‌تران زێده‌تر نه‌دهاتنه‌ كۆلان، چونكو مه‌ ده‌وله‌مه‌ندیه‌كا باش یا ئاڤا ژێر ئه‌رد هه‌بوو، به‌لێ‌ نها هه‌تا 250 مه‌تران یان ژی 300 مه‌تران دهێته‌ كووركرن هه‌تا ئاڤ ده‌ردكه‌ڤیت، ئه‌ڤه‌ ژی هه‌موو ژ ئه‌گه‌رێ‌ هشكه‌سالیێ‌ و كێم هاتنا بارنانه‌ د ڤان چه‌ند سالێن ده‌ربازبوویی دا.

ناجی ئیبراهیم، رێڤه‌به‌رێ‌ ئاڤا ژێر زه‌ڤی ئه‌و یه‌ك ژی دیار كر، ئه‌ڤ سێ‌ هزار و 470 بیره‌ هه‌موو ئه‌ون یێن مۆله‌تا كۆلانێ‌ هه‌ی، به‌لێ‌ د ماوێ‌ 20 سالێن بۆری دا نێزیكی 500 بیرێن ئیرتیوازی ژی بێی مۆله‌ت و ب زێده‌گاڤی هاتینه‌ كۆلان و گۆت: ل دهۆكێ‌ كێمتر ژ پارێزگه‌هێن دی زێده‌گاڤی ل سه‌ر كۆلانا بیرێن ئیرتیوازی هاتینه‌ كرن.

ئه‌ندازیار هێژا عه‌بدولواحد، رێڤه‌به‌رێ‌ ئاڤدانێ‌ ل پارێزگه‌ها دهۆكێ‌ بۆ ئه‌ڤرۆ دیار كر، ل سنوورێ‌ پارێزگه‌ها دهۆكێ‌ سێ‌ هزار و 50 كانیك هه‌نه‌ ل گۆره‌ی وێ‌ مه‌سحا ژلایێ‌ رێڤه‌به‌ریا مه‌ڤه‌ هاتیه‌ كرن، گه‌له‌ك ژ وان كانیا ژی رووبارن، به‌لێ‌ هه‌ر ب كانیك دهێته‌ هژمارتن، چونكو ژێده‌رێ‌ وان كانیكه‌ و گۆت: ژ ئه‌گه‌رێ‌ هشكه‌سالیێ‌ و كێم هاتنا بارانان د چه‌ند سالێن ده‌ربازبوویی دا، 700 كانیك ل سنوورێ‌ پارێزگه‌ها دهۆكێ‌ هشكبووینه‌.

ل دۆر وان كانیكێن هشكبووین گۆت: بۆ نموونه‌ كانیكا بێشینكی ل ناحیا چه‌مانكێ‌ كانیكه‌كا مه‌زن بوویه‌ و هشك بوویه‌، به‌لێ‌ هشبووینه‌ 150 لیتر د ئێك چركه‌ دا دهاڤێتن، لێ‌ نها كێمتری 25 لیترا دهاڤێژیت و گه‌له‌ك كانیكێن دی ب ڤی شێوه‌ی به‌ره‌ڤ هشكبوونێ‌ نه‌.

شاره‌زایه‌كێ‌ جیۆلۆجی ل پارێزگه‌ها دهۆكێ‌ راگه‌هاند، گرتنا به‌نداڤێن توركی و گوهۆرینا ئاڤا رووباران ژلایێ‌ ئیرانێ‌ ڤه‌ ددێ‌ كاره‌ساتێن مرۆڤی و ژینگه‌هی په‌یداكه‌ت كو به‌ری نها ئه‌ڤ كاره‌ساته‌ نه‌ د دیرۆكا كه‌ڤن و نه‌ د دیرۆكا نوو دا په‌یدانه‌بووینه‌.

ره‌مه‌زان حه‌مزه‌، شاره‌زایێ‌ جیۆلۆجی ل پارێزگه‌ها دهۆكێ‌ دیار كر، گرتنا ئاڤا و ئه‌و به‌نداڤێن ژ نوو وه‌لاتێ‌ توركیا داناین دێ‌ بنه‌ ئه‌گه‌ر بۆ لاوازبوونا بۆنیاتێ‌ جیۆلۆجی و خوه‌ ل سالا 2003 من وه‌كو جیۆلۆجی ڤه‌كۆلینه‌ك ل سه‌ر ڤێ‌ چه‌ندێ‌ چێكربوو كو ئه‌ڤ تشته‌ دێ‌ په‌یدابیت و گۆتیشی: ئه‌ڤ پێنگاڤا وه‌لاتێ‌ توركیا هاڤێتێ‌ دێ‌ مه‌ترسیا په‌یدابوونا بیڤه‌له‌رزان ب رێژه‌یه‌كا مه‌زن ل ئیران و تۆركیا و عیراقێ‌ به‌ره‌ڤ زێده‌بوونێ‌ به‌ت.

ئاشكرا ژی كر، پێدڤی جڤاكێ‌ نێڤده‌وله‌تی و رێكخراوێن نه‌ته‌وه‌یێن ئێكگرتی مایتێكرنێ‌ تێدا بكه‌نن و ڤێ‌ مه‌ترسیێ‌ ل سه‌ر عیراقێ‌ راكه‌ن، چونكو گرتنا به‌نداڤا و رووباران ژلایێ‌ تۆركیا ڤه‌ دێ‌ بیته‌ ئه‌گه‌ر ئاڤا سه‌ر ئه‌رد و ژێر ئه‌رد یا عیراقێ‌ كێمتر لێ‌ بهێت و مه‌ترسیا په‌یدابوونا بیڤه‌له‌رزان ژی ب شێوه‌یه‌كێ‌ مه‌زن زێده‌تر لێ‌ بهێت.

ره‌مه‌زان حه‌مزه‌، شاره‌زایێ‌ جیۆلۆجی ئه‌و یه‌ك ژی دیار كر كو ئه‌ڤ كاره‌ساته‌ دێ‌ بیته‌ ئه‌گه‌ر كو عیراق بكه‌ڤیته‌ د قۆناغا هه‌ژاریا ئاڤێ‌ دا و ره‌نگه‌ پشتی سالا 2035 ره‌وشا عیراقێ‌ د بوارێ‌ ئاڤێ‌ دا به‌ره‌ڤ قۆناغێن مه‌ترسیدار بچیت.

ره‌مه‌زان زێده‌تر دبێژیت: هه‌تا نها حكوومه‌تا عیراقێ‌ چو پلانێن ستراتیژی بۆ چاره‌سه‌ریا ئاڤێ‌ نه‌دیتینه‌ و ئه‌ڤ یه‌ك ژی مه‌ترسیه‌ك مه‌زنه‌ ل سه‌ر هه‌رێمێ‌، چونكو سكرێ‌ مووسل و یێ‌ حمرین ل ژێر كۆنترۆلا عیراقێ‌ دانه‌ و ئه‌ڤه‌ ژی دێ‌ زیانێ‌ ب پاشه‌رۆژا ئاڤێ‌ ل هه‌رێما كوردستانێ‌ گه‌هینیت و عیراق ژی ئێدی دێ‌ هه‌موو ئاڤێ‌ بۆ خوه‌ كێشیت و ره‌نگه‌ هه‌رێما كوردستانێ‌ ژی تووشی هشكاتیێ‌ ببیت و زیانێن مه‌زن دێ‌ ب هه‌رێمێ‌ كه‌ڤن.

34

 

ئه‌ڤرۆ، ره‌مه‌زان زه‌كه‌ریا:

دار به‌روو داره‌كا خورسكیه‌ ل ده‌ڤه‌رێن چیایی شوون دبیت، پرانیا گوندنشینا بۆ به‌رهه‌مێ‌ ئاژه‌لداریێ‌ به‌رهه‌مێ‌ به‌روویا كوم دكه‌ن و ل وه‌رزێ‌ زستانێ‌ وه‌ك خوارنا دوویێ‌ بۆ په‌زی ب كاردئینن.

 

یاسین حه‌كیم، ئاژه‌ڵداره‌كێ‌ ده‌ڤه‌را ئاكرێ‌ بۆ ئه‌ڤرۆ دیار كر، ل كوردستانێ‌ و پرانیا ده‌ڤه‌رێن چیایێ‌ دار به‌روو یا هه‌ی، چه‌ندین جورێن به‌روویا هه‌نه‌ بلنداهیا وێ‌ ل سه‌ر جهی و ده‌ڤه‌رێ‌ دمینیت و هنده‌ك دار به‌رو هه‌تا 4 مه‌ترا بلند دبن و ل وه‌رزێ‌ پایزێ‌ ل گه‌ل دارێن دی به‌لگێن خوه‌ د وه‌رینن. سالانه‌ ئه‌م به‌رهه‌مێ‌ به‌روویا كۆمدكه‌ین بۆ خوارنێ‌ و بۆ كه‌رتێ‌ ئاژه‌ڵداریێ‌ ل كوردستانێ‌ چه‌ند جۆر هه‌نه‌ ب تنێ‌ جورێ‌ قه‌هوایێ بۆ خوارنێ‌ و ئاژه‌لداریێ‌ كوم دكه‌ین.

زێده‌تر گۆت: ئه‌م به‌روویا كۆم دكه‌ین وه‌ك خارنا دوویێ‌ بۆ كه‌رتێ‌ ئاژه‌لداریێ،‌ واته‌ ئه‌و ده‌مێ‌ به‌فر و بارانێن ب هێز دهێن و نه‌شێن ده‌ربێخین ب رۆژ به‌روویا ده‌ینه‌ په‌زی و ب شه‌ڤ ئالیكێ‌ وان یێ‌ دروست دده‌ینی و بۆ خوارنێ‌ ژی گه‌له‌ك دخون تایبه‌ت ل وه‌رزێ‌ زڤستانێ‌ ساڵانه‌ چه‌ندین ته‌نا كۆم دكه‌ین بۆ كه‌رتێ‌ ئاژه‌لداریێ‌.

تاهر ئالكه‌یی، چالاكڤانێ‌ ژینگه‌هێ‌ ل كوردستانێ‌ بۆ ئه‌ڤرۆ خویاكر، ل كوردستانێ‌ مه‌ دووڤچوونه‌كا گشتی كریه‌ ل گور ئه‌نجامێن دووڤچونێن مه‌ دیاربوویه‌ ل سنورێ‌ پارێزگه‌ها دهوكێ‌ ل ئامێدێی و ئاكرێ‌ و به‌روویه‌كا باش هه‌یه‌ ل چه‌ندین ده‌ڤه‌رێن سوران ژی هه‌نه‌، به‌لێ‌ وه‌رگرتنا ئامارا دروست ده‌مه‌كێ‌ زور دڤێت، له‌ورا ئه‌ڤه‌ چه‌ندین ساڵه‌ ئه‌م كار لسه‌ر ئامارا دروستا به‌رهه‌مێ‌ به‌روویا دكه‌ین، ب گشتی ل كوردستانێ‌ ل وان ده‌ڤه‌رێن دیاركری پتر به‌روو بۆ به‌رهه‌مێ‌ ئاژه‌لداریێ‌ دهێنه‌ كۆمكرن و كرین و فروتن هه‌ر ناڤبه‌را خودان ئاژه‌ڵ و مه‌رادارا دهێته‌ كرن.

ئاشكرا ژی كر كو ل هه‌موو كوردستانێ‌ ساڵانه‌ هه‌تا 700 ته‌نێن به‌روویا دهێنه‌ كومكرن ل چیایێن كوردستانێ و ئه‌ڤێ رێژێ گوهۆرین ب سه‌ر دا دهێن ژبه‌ر گوهۆرینا كه‌ش و هه‌وای، بۆ نموونه‌ ئه‌ڤساله‌ به‌رهه‌مێ به‌روویا كێمبوویه‌ ژبه‌ر هشكه‌ سالێی نه‌ما ژێده‌رێن ئاڤێ.

 

18

ئه‌ڤرۆ،

ژبۆ ده‌ستنیشانكرنا ده‌سته‌كا نوو یا كارگێریێن یانا بۆ چار سالێن بهێت پرۆسێسا هه‌لبژارتێن یانێن وه‌رزشی ل كوردستانێ‌ ب گشتی و پارێزگه‌ها دهۆكێ‌  تایبه‌تی به‌رده‌وامه‌ ئه‌وا ب سه‌رپه‌رشتیا رێڤه‌به‌ریا گشتی یا وه‌رزشی ل هه‌رێمێ‌ دهێته‌ بڕێڤه‌برن، ل پارێزگه‌ها دهۆكێ‌ هه‌تا نوكه‌ ژ سه‌رجه‌مێ‌ 13 یانا پێنچ ژوان هه‌لبژارتنێن خوه‌ ئه‌نجامداینه‌ و ئه‌ڤرۆ ژی هه‌تا 30ێ‌ ڤێ‌ هه‌یڤێ‌ دی به‌رده‌وامبن.

پشتی پرۆسێسا ده‌نگدانێ‌ ژلایێ‌ ده‌سته‌كا گشتی هاتینه‌ كرن ئه‌نجامێن ده‌ستنیشانكرنا كارگێریێ‌ یا هه‌ر پێنچ یانێن ل حه‌فتیا بوری بڤی ره‌نگی بوون.

یانا پۆلیته‌كنیك، ئاری عادل، سه‌ركه‌فت ره‌شید، ئه‌حمه‌د جه‌لال، شیلان موسا، دارا سلێمان، ئۆمێد محه‌مه‌د و كارزان عه‌ونی، یانا میدیا بۆ خودانێن پێدڤیێن تایبه‌ت ئه‌وژی، شێرزاد حه‌مید، حه‌مید تاهر، وه‌حید سه‌عید، شڤان سه‌عید، سه‌عدی شه‌عبان، یانا ئافره‌تێن دهۆكێ‌، چریسك یونس، ناله‌ سۆپه‌ر، زنار زوبێر، سارا سه‌ربه‌ست، لانا سه‌ربه‌ست، یانا به‌رده‌ره‌ش پیروان كه‌ریم، ناسر كاكل، سه‌میر عه‌بدولقادر، زه‌هدا عه‌بدولقادر، ئه‌رده‌لان محه‌مه‌د، كارزان عارف و شه‌مسدین محیه‌دین، هه‌روه‌سان یانا شێخان، فازل فاخر، عومه‌ر جرجیس، عومه‌ر فخری، به‌یدا خه‌یری، شیمال حه‌مید و مه‌هدی سالح.

د داخویانیه‌كێدا سه‌فه‌ر جه‌عفه‌ر سه‌رۆكێ‌ لژنا هه‌لبژارتنان ل رێڤه‌به‌ریا وه‌رزشی یا پارێزگه‌ها دهۆك بۆ رۆژناما ئه‌ڤرۆ گوت: د حه‌فتیا بوری دا پرۆسێسا هه‌لبژارتنان ب شێوه‌كێ‌ شه‌فاف و لدووڤ رێنمایێن هاتینه‌ ده‌ستنیشانكرن ژلایێ‌ رێڤه‌به‌ریا گشتی یا وه‌رزشی یا هه‌ریمێ‌ بڕێڤه‌چوون كو بێ‌ ئاریشه‌ و گازنده‌ و چو سكالا نه‌ هاتینه‌ تۆماركرن، هه‌لبژارتنێن یانا ته‌ناهی و زاخۆ بۆ ده‌مه‌كێ‌ نه‌ دیار هاتنه‌ پاشئێخستن، بڕیاره‌ ڤێ‌ حه‌فتیێ‌ ژی به‌رده‌وامبن و ئه‌ڤرۆ دێ‌ یانا گاره‌ هه‌لبژارتنان ئه‌نجامده‌ن.

14

ئه‌ڤرۆ،

تیما ته‌پا پێی یا یانا دهۆكێ‌ پێنگاڤا ئێكێ‌ ب سه‌ركه‌فتیانه‌ د خولا پلا ئێكا ئیراقێ‌ دا هاڤێژت پشتی ب سه‌ركه‌فتی ل سه‌ر مێڤانا خوه‌ یانا عه‌فك ب دو گۆلان بێی به‌رامبه‌ر، د یاریا واندا ئه‌وا ل ئه‌ینیا بوری ژ چارچووڤێ‌ گه‌ڕا ئێكێ‌ هاتیه‌ كرن، هه‌ردو گۆلێن دهۆكێ‌ ژلایێ‌ یاریزانان وه‌لید سه‌لمان خوله‌كا 23 و سیابه‌ند عه‌گید خوله‌كا 63ێ‌ ژ ده‌مێ‌ یارێ‌ دا تۆماركرن.

لدور ڤێ‌ یه‌كێ‌ و د داخویانیه‌كێدا سیابه‌ند عه‌گید هێرشبه‌رێ‌ دهۆكێ‌ بۆ رۆژناما ئه‌ڤرۆ گوت: هه‌رچه‌نده‌ كاروانێ‌ خولێ‌ درێژی و یاری هاتن و چوونه‌ لێ‌ مه‌ باش خوه‌ به‌رهه‌ڤكریه‌ و سه‌ركه‌فتنا ئێكێ‌ پالده‌ره‌ بۆ ئارمانجێن مه‌ كو ده‌ربازبوون بۆ پلا نایاب بیت، له‌ورا بۆ هه‌ر یاریه‌كێ‌ بتنێ‌ هزرا مه‌ سه‌ركه‌فتنه‌ و ناهێلین چو خالان ژ ده‌ست بده‌ین، وه‌كو یاریزانه‌كێ‌ كوڕێ‌ دهۆكێ‌ لدووڤ شیانا سۆزێ‌ دده‌م تۆماركرنا گۆلان به‌رده‌وامبیت پێخه‌مه‌ت سه‌ركه‌فتنان و هه‌موو یاریزان ل گه‌ل كادرێ‌ راهێنانێ‌ و كارگێریا یانێ‌ بۆ ڤێ‌ ئارمانجێ‌ درژن.

بۆ زانین وه‌رزێ‌ نوو یێ‌ خولا پلا ئێكا عیراقێ‌ دێ‌ پشكداریا 24 یانا و هاتینه‌ به‌لاڤكرن ل سه‌ر دو كۆما یاریێن وان دێ‌ ب شێوێ‌ خول دو قۆناغ هێنه‌ كرن، كۆما دهۆكێ‌ پێكهاتیه‌ ژ یانێن، عه‌فك، رومادی، حدوود، سلیخ، كۆفه‌، مه‌سافی ئه‌لجنوب، دیفاع ئه‌لمه‌ده‌نی، میسان، عه‌له‌م، مرور و سوق ئه‌لشیوخ، هه‌ر كۆمه‌كێ‌ یانه‌ك ئێكسه‌ر ده‌ربازبته‌ پلا نایاب و تیما سێیێ‌ دێ‌ هه‌مبه‌ر تیما 18ێ‌ یا پلا نایاب بیت ژبۆ پلێتا سێیێ‌ یا خولا نایاب.

22

ئه‌ڤرۆ،

جه‌ماوه‌رێ‌ وه‌رزشی چاڤه‌ڕێ‌ یاریێن ئه‌ڤرۆ یێن كلاسیكۆیێ‌ یا ته‌پا پێی نه‌ كو دهێته‌ هژمارتن بهێزترین یاریێن خولا د كیّشوه‌رێ‌ ئۆرۆپا دا ژوانا پێنچ یاریێن پری و مێژوو و تایبه‌تمه‌ندیا خوه‌ هه‌یه‌ ب شێوه‌كێ‌ جودا هێنه‌ ئه‌نجامدان.

  • به‌رشه‌لۆنا – ریال مه‌درید

ده‌مژمێر 5:15 ئێڤاری یاریگه‌ها كامب نۆ دێ‌ بیته‌ گۆره‌پانا شه‌ڕێ‌ كلاسیكۆیا خولا ئسپانیا دناڤبه‌را دو هه‌ڤڕكیێن مێژوویی دا ئه‌وژێ‌ ده‌مێ‌ یانا به‌رشه‌لۆنا مێڤانداریا یانا ریال مه‌درید ژ چارچووڤێ‌ یاریێن گه‌ڕا ده‌هێ‌ یا خولێ‌ دكه‌ت، خودانێن ئه‌ردی ل رێزا حه‌فتێ‌ دهێت ب 15 خالان و گه‌شبینه‌ سه‌ركه‌فتنا خوه‌ یا دیرووكی ب گه‌هینته‌ 73ێ‌ جاران لێ‌ ریال مه‌درید ئه‌وا ب 17 خالان رێزا دویێ‌ دهێت دێ‌ بزاڤێ‌ كه‌ت ئه‌وژی كلاسیكویا 76ێ‌ بده‌ستخوه‌ڤه‌ بینت و 35 جاران ژی وه‌كهه‌ڤبووینه‌ كو سه‌رجه‌مێ‌ دیدارێن وان یێن خولا ئسپانیا گه‌هشتینه‌ 182 یاریان، د چار یاریێن دووماهیێ‌ دا به‌رشه‌لۆنا نه‌شیایه‌ سه‌ركه‌فتنێ‌ تۆماربكه‌ت ب سێ‌ خوساره‌تی و وه‌كهه‌ڤیه‌ك بوویه‌،ستێرا به‌رێ‌ یا به‌رشه‌لۆنا لیۆنێل مێسی گۆلكه‌رێ‌ كلاسیكویه‌ ب 18 گۆلان ئه‌وێ‌ ب چوونا خوه‌ ژ به‌رشه‌لۆنا بۆ پاریس سانجێرمان جهێ‌ خوه‌ هێلایه‌ ڤالا، بۆ یاریا ئه‌ڤ شه‌ڤه‌ پێشبینی دهێته‌ كرن راهێنه‌رێ‌ یانا كاته‌لۆنی رۆنالد كۆمان پشتبه‌ستنێ‌ ب ژماره‌كا یاریزانان بكه‌ت ژوانا سێرجیو رۆبێرتۆ، جیرار پێكی، ئیریك گاریسیا، سێرجیۆ بۆسكێس، دی یۆنگ، ئانسۆ فاتی و ممفس دیبای، ژلایێ‌ خوه‌ڤه‌ كارلۆ ئه‌نشیلۆتی راهێنه‌رێ‌ ریال مه‌درید خودان یاریزانێن ستێره‌ ژوانا دێڤێد ئالبا، میلیتاو، ناتچو، كاسمێرۆ، لۆكا مۆدرێچ، تۆنی كروس، ڤینیسیوس، كه‌ریم بنزیمه‌، ئه‌ڤ كلاسیكویه‌ دهێته‌ هژمارتن یا گه‌نجان و نه‌بوونا یاریزانێن ستێر وه‌كو مێسی و رۆنالدویی.

  • مانچسته‌ر یونایتد – لیڤه‌رپۆل

كلاسیكویا دویێ‌ د یاریێن ئه‌ڤرۆ دا ژ چارچووڤێ‌ گه‌ڕا نه‌هێ‌ یا خولا ئنگلیزێ‌ دا هێته‌ ئه‌نجامدان ده‌مێ‌ یانا مانچسته‌ر یۆنایتد ل یاریگه‌ها خوه‌ ئۆلترافۆرد مێڤانداریا لیڤه‌رپۆل ل ده‌مژمێر 6:30 ئێڤاری بكه‌ت ئێك ژ هێزترین یاریێن خولێ‌، لیڤه‌رپۆل ب 18 خالان رێزا دویێ‌ دهێت هه‌مبه‌ری وێ‌ مانچسته‌ر ب 14 خالان رێزا شه‌شێ‌ یه‌، خودانێن ئه‌ردی ب سه‌ركێشیا ستێرا خوه‌ كریستیانۆ رۆنالدو دێ‌ بزاڤێن كه‌ن خوه‌ ژ ئه‌نجامێن خراب قۆرتالبكه‌ن تایبه‌ت پشتی د سێ‌ یاریێن ڤێ‌ دووماهیێ‌ دا دو خوساره‌تی و وه‌كهه‌ڤیه‌ك ئینایی، هه‌روه‌سان دبیت یاریا ئه‌ڤرۆ ده‌لیڤا دووماهیێ‌ بیت بۆ راهێنه‌رێ‌ وێ‌ سولشیاری ئه‌وێ‌ لبن گه‌ڤێن دووركه‌فتنێ‌ دا ژبه‌ر ئه‌نجامێن لاواز، هه‌مبه‌ری وێ‌ لیڤه‌رپۆل ب سه‌ركێشیا ستێرا خوه‌ محه‌مه‌د سه‌لاح گه‌شبینن به‌رده‌وامیێ‌ ب ده‌نه‌ ئه‌نجامێن خوه‌ یێن باش، ئامارێن هه‌ردو یانا د خولا ئنگلیزێ‌ دا لیڤه‌رپۆل شیایه‌ 68 سه‌ركه‌فتنا هه‌مبه‌ری 58 سه‌ركه‌فتێن مان یۆنایتد، ژ یاریزانێن كاریگه‌ر دناڤبه‌را هه‌ردو تیمان دانه‌ یێن لیڤه‌رپۆل ژوانا سادیۆ مانی، محه‌مه‌د سه‌لاح، ڤان دایك، كیتا، هندرسۆن و گۆتا، ژلایێ‌ خوه‌ڤه‌ رۆنالدو، لۆك شاو، ماركۆس راشفۆرد، پۆل بۆگبا، ماسۆن جرینۆد، فرید و ماكتۆمینای گرنترین یاریزانێن مان یۆنایتدێ‌ نه‌.

 

  • ئه‌نترمێلان – یۆڤانتۆس

ده‌مژمێر 9:45 شه‌ڤ حه‌ز ژێكه‌رێن خولا ئیتالیایێ‌ ژی چاڤه‌ڕێ‌ یاریا كلاسیكویێ‌ نه‌ دناڤبه‌را هه‌ردو یانێن ئه‌نتر میلان و یۆڤانتۆسێ‌ نه‌ ژ                 چارچووڤێ‌ هه‌ڤڕكیێن گه‌ڕا نه‌هێ‌ یا خولێ‌ ئه‌وا دێ‌ ل یاریگه‌ها سان سیرۆ ل باژێرێ‌ میلان هێته‌ ئه‌نجامدان، خودانێن ئه‌ردی رێزا سێیێ‌ دهێت ب 17 خالان و یۆڤانتۆس رێزا حه‌فتێ‌ دهێت ب 14 خالان، دیرووكا یاریێن واندا 176 جاران هه‌مبه‌ری ئێك بووینه‌، یۆڤانتۆس 85 سه‌ركه‌فتن هه‌مبه‌ری وێ‌ 47 سه‌ركه‌فتن بۆ ئه‌نتر و 44 وه‌كهه‌ڤی هاتینه‌، یانا یۆڤانتۆس دێ‌ زێده‌تر پشتبه‌ستن لسه‌ر یاریزانێن خوه‌ ژوانا كیێزا، رابیۆ، مۆراتا، گۆاردادو، دیبالا، لوكاتێلی، ماتیاس و كێلینی كه‌ت، ژلایێ‌ خوه‌ ڤه‌ ئه‌نتر پشت گه‌رمه‌ ب یاریزانێن خوه‌ باستۆنی، دی فرایی، ڤیدال، بارێلا، دی ماركۆ، دزیكۆ، لاوتارۆ مارتینێز و هانگلۆ.

  • مارسێلیا- پاریس سانجێرمان

یانا مارسێلیا دێ‌ ل ده‌مژمێر 9:45 شه‌ڤ مێڤانداریا پاریس سانجێرمان ژ چارچووڤێ‌ هه‌ڤڕكیێن گه‌را 11ێ‌ یا خولا فره‌نسا كه‌ت، هه‌رچه‌نده‌ سانجێرمان ب پێكهاتیه‌كێ‌ ب هێزه‌ و یاریزانێن ناڤوده‌نگن كو وه‌رزێ‌ ئه‌ڤ ساله‌ دا ئارمانجا وان نه‌بتنێ‌ ناسناڤێ‌ خولێ‌ یه‌ به‌لكۆ چامپیۆنزه‌، مارسێلیا ب 17 خالان رێزا سێیێ‌ دهێت و مێڤانا وێ‌ ب 27 خالان سه‌ركێشیا خولێ‌ دكه‌ت و دێ‌ پشت گه‌رمیا كۆمه‌كا ستێرێن خوه‌ هێته‌ دناڤ یاریگه‌هێ‌ دا ژوانا لۆنێل مێسی، مباپی، نه‌یمار، فیراتی، ماركینیۆس، هێرێرا و میندیز،هه‌مبه‌ری وێ‌ پشتبه‌ستنا مارسێلیا دێ‌ زێده‌تر ب بۆبكر كامارا، ماتیۆ گندۆزی، ئاركادیۆز بیت، د مێژوویا یاریێن واندا 71 جاران كلاسیكویا فره‌نسا ئه‌نجامدایه‌، 30 سه‌ركه‌فتن بۆ پاریسێ‌، 24 بۆ مارسێلیا و 17 جاران وه‌كهه‌ڤبووینه‌.

 

  • ئه‌یاكس- ئایدهۆڤن

د یاریه‌كا دی یا كلاسیكۆیێن ئۆرۆپا دا كو هه‌ڤڕكیا وێ‌ كێمتر نابیت ژ خولێن دی ئه‌یاكس ئه‌مستردام دێ‌ ل ده‌مژمێر5:45 ئێڤاری ل یاریگه‌ها یۆهان كرۆیڤ مێڤانداریا ئایندهۆڤن كه‌ت ژ چارچووڤێ‌ گه‌ڕا ده‌هێ‌ یا خولا هوله‌ندا، خودانێن ئه‌ردی سه‌رێ‌ لیستێ‌ دهێن ب 22 خالان، ب كێمتر خاله‌كێ‌ ئایدهۆڤن رێزا دویێ‌ دهێت.

 

69

ئه‌ڤرۆ، رێوار محه‌مه‌د ره‌شید:

به‌رپرسێ‌ به‌شێ‌ راگه‌هاندنێ‌ ل گه‌ڕا 8ێ‌ یا فلمه‌ فیسته‌ڤالا دهۆك یا نێڤده‌وله‌تی بۆ به‌رپه‌رێ‌ هونه‌ری یێ‌ رۆژناما ئه‌ڤرۆ دیار كر كو حه‌فت فلمێن كوردی یێن درێژ دێ‌ بۆ ب ده‌ستڤه‌ئینانا خه‌لاتێن باشترین فلم و باشترین سیناریۆ و باشترین ئه‌كته‌رێن كچ و كور و خه‌لاتێ‌ ژووری و خه‌لاتێ‌ فیبریسكی پێشبركیێ‌ د گه‌ڕا 8ێ‌ یا فلمه‌ فیسته‌ڤالا دهۆك یا نێڤده‌وله‌تی دا كه‌ن كو هنده‌ك ژ وان فلمان بۆ جارا ئێكێ‌ یه‌ ل سه‌ر ئاستێ‌ جیهانێ‌ دهێنه‌ نیشادان و هنده‌ك فلمێن دی بۆ جارا ئێكێ‌ یه‌ ل سه‌ر ئاستێ‌ رۆژهه‌لاتا ناڤه‌راست دێ‌ د فلمه‌ فیسته‌ڤالا ناڤهاتی دا هێنه‌ نیشادان.

حه‌سه‌ن عارف، به‌رپرسێ‌ به‌شێ‌ راگه‌هاندنێ‌ ل گه‌ڕا 8ێ‌ یا فلمه‌ فیسته‌ڤالا دهۆك یا نێڤده‌وله‌تی ئاشكرا كر كو ئه‌ڤ فلمه‌ د پێكهاتینه‌ ژ چه‌ندین  پرسگرێكان و چیرۆكێن جڤاكی ل ده‌ڤه‌رێ‌ د چه‌ند ده‌مێن ژێك جودا دا و گۆت: “فلمێ‌ كوردی یێ‌ درێژ بناڤێ‌ (زالاڤا) ده‌مێ‌ وی 93 خۆله‌كه‌، ئه‌ڤ فلمه‌ مه‌ ڤه‌دگه‌رینیته‌ سالێن دووماهیا حه‌فتێیان ل گونده‌كێ‌ بچووك یێ‌ ئیرانێ‌، هه‌ڤڕكیا زانینێ‌ دگه‌ل نه‌زانینێ‌ و دابونه‌ریتێن گوندان، ل سالا 1978 ل گونده‌كی ب ناڤێ‌ زالاڤا ئه‌وێ‌ كو خه‌لكێ‌ وێ‌ هزر دكه‌ن ژ لایێ‌ ئه‌هریمه‌نان ڤه‌ د بن چاڤكرینه‌ ل وی ده‌می پۆلیسه‌كێ‌ گه‌نج دیاردبیت و ئه‌و بزاڤێ‌ دكه‌ت خه‌لكێ‌ وی گوندی رزگاربكه‌ت ژ وێ‌ هزرا كو ئه‌و د بن چاڤكرینه‌ ژ لایێ‌ ئه‌هریمه‌نان ڤه‌، به‌لێ‌ ئه‌ڤ بزاڤه‌ ب دلێ‌ گوندیان نینه‌ ئه‌ڤ فلمه‌ ژ ده‌رهێنانا (ئه‌رسه‌لان ئه‌میری) یه‌، ژ دایكبوویێ‌ سالا 1975 یه‌ و خودان باوه‌رناما به‌كالوریوسێ‌ یه‌ دبیاڤێ‌ ده‌رهێنانا سینه‌مایێ‌ دا ژ زانینگه‌ها ته‌هرانێ‌، هه‌روه‌سا ئه‌ڤ فلمه‌ هاتیه‌ وێنه‌كرن ژ لایێ‌ (محه‌مه‌د ره‌سول)ی ڤه‌”.

ناڤهاتی ئاماژه‌ دا وێ‌ چه‌ندێ‌ كو فلمێ‌ (The Dance of Ali And Zin سه‌ما یا عه‌لی و زینێ‌) ده‌مێ‌ وی 79 خۆله‌كه‌ و ئێك ژ وان فلمێن كوردی یێن درێژه‌ یێن كو دێ‌ پێشبركیێ‌ د گه‌ڕا 8ێ‌ یا فلمه‌ فیسته‌ڤالا دهۆك یا نێڤده‌وله‌تی دا كه‌ت و گۆت: “ده‌رهێنه‌رێ‌ ڤی فلمی (محه‌مه‌د عه‌لی كونار) د فلمێ‌ خوه‌ دا د كه‌ش و هه‌وایێ‌ گوندێن كوردی یێن توركیا دا مه‌ دبه‌ته‌ هه‌ستێن دایكا خه‌مبار و شه‌پرزه‌ ئه‌وا د خه‌و دا دبینیت كار و بارێن شه‌هیانێ‌ بۆ كورێ‌ خوه‌ یێ‌ گه‌نج ئه‌وێ‌ وه‌غه‌ركری دكه‌ت، ئه‌ڤ چه‌نده‌ ژی دبیته‌ ئه‌گه‌رێ‌ هه‌ستێن هه‌ڤدژ د ناڤبه‌را وێ‌ دایكێ‌ و ئه‌ندامێن خێزانا وێ‌ و خه‌لكێ‌ گوندی دا و (ده‌نیز ئینیوكسیك) ب كارێ‌ وێنه‌گرتنا ڤی فلمی رابوویه‌”.

حه‌سه‌نی خویا كر كو ژ وه‌لاتێ‌ توركیا فلمێ‌ (پارێزڤانێ‌ برای Brothers Keeper) یێ‌ 85 خوله‌ك ژ ده‌رهێنانا (فه‌رید كاراهان)، د ئه‌ڤی فلمی دا چیرۆكا (یوسف)ێ‌ زارۆ و هه‌ڤالێ‌ وی میموی دهێته‌ ڤه‌گه‌ڕاندن كو هه‌ر دو قوتابی نه‌ ل قوتابخانه‌كا سه‌ره‌تاییل چیایێن رۆژهه‌لاتێ‌ ئه‌نادولێ‌، كو ئێك ژوان د هنده‌ك كاودانێن نه‌چاڤه‌رێكری دا نه‌خۆش دبیت و ئه‌وێ‌ دی نه‌چار دبیت بچیته‌ كارگێریا قوتابخانێ‌ ژ پێخه‌مه‌ت هاریكاریا هه‌ڤالێ‌ خوه‌ و گۆت: “ژ هه‌رێما كوردستانێ‌ سێ‌ فلمێن كوردی یێن درێژ دێ‌ پشكداری فلمه‌ فیسته‌ڤالا دهۆك یا نێڤده‌وله‌تی بن ئێك ژوان فلمان فلمێ‌ (بێ‌ نشتیمان Landleed) ده‌مێ‌ ڤی فلمی 77 خوله‌كن و ژ ده‌رهێنانا (تونج ئه‌سلانی) چیرۆكا ڤی فلمی ده‌ربابه‌ی سترانبێژه‌كا كورده‌ كو ل هیڤیا ژدایكبوونا زارۆیێ‌ خوه‌ یێ‌ نه‌خری یه‌، كو دووڤ دا قووناغه‌كا دی ده‌ستپێدكه‌ت دگه‌ل گرۆپه‌كێ‌ په‌نابه‌ران بزاڤا وێ‌ چه‌ندێ‌ دكه‌ن بگه‌هنه‌ جهه‌كێ‌ ئارام، ده‌رهێنه‌رێ‌ ڤی فلمی ژدایكبوویێ‌ سالا  1973 یه‌ ل كرمانشاهێ‌ و گه‌له‌ك فلمێن درێژ و به‌لگه‌ فلم ل كوردستانێ‌ و ئیرانێ‌  و توركیا وێنه‌كرینه‌”.

به‌رپرسێ‌ به‌شێ‌ راگه‌هاندنێ‌ ل گه‌ڕا 8ێ‌ یا فلمه‌ فیسته‌ڤالا دهۆك یا نێڤده‌وله‌تی دیار كر كو هه‌ر ژ هه‌رێما كوردستانێ‌ فلمێ‌ (Dirty Lands)  یێ‌ 71 خوله‌ك، ژ ده‌رهێنان و نڤیسینا هه‌ڤپشك یا ئالا هشیار و رزا عه‌لائی، چیرۆكا ڤی فلمی ژ هنده‌ك روودانێن راستی هاتیه‌ وه‌رگرتن، ئه‌و ژی پێشمه‌رگه‌كه‌ د شه‌رێ‌ دژی تیرۆرستێن داعش دا ده‌سته‌كێ‌ خوه‌ ژده‌ستدایه‌، ئه‌و فلمه‌ ژ وێنه‌گرنا وێنه‌گر (كرمانج هشیار)ی یه‌ و ژ قاره‌مانیا (هالو ره‌مشتی)یه‌ و گۆت: ” ژ دهۆكێ‌ ده‌رهێنه‌ر (رێبه‌ر دوسكی) ب فلمێ‌ خوه‌ یێ‌ درێژ بناڤێ‌ (سه‌دیق و پلنگ Sidik and the panther ) كو بۆ جارا ئێكێ‌ یه‌  ئه‌ڤ فلمه‌ ل رۆژهه‌لاتا ناڤه‌راست دێ‌ ل فلمه‌ فیسته‌ڤالا دهۆك یا نێڤده‌وله‌تی هێته‌ نیشادان ، ئه‌ڤ فلمه‌ چیرۆكا سه‌دیقی ڤه‌دگه‌ڕیت كو ئه‌ڤه‌ بۆ ده‌مێ‌ 25 سالانه‌ ئه‌و ل چیایێن كوردستانێ‌ ل توخمه‌كێ‌ پلنگان دگه‌ڕیت”.

ل دووماهیێ‌ حه‌سه‌نی ئاماژه‌ دا وێ‌ چه‌ندێ‌ كو فلمێ‌ (په‌نابه‌رێ‌ بچووك The little refugee) ئه‌ڤ فلمه‌ ژی ئێك ژ وان فلمێن كوردی یێن درێژه‌ یێن كو دێ‌ پێشبركیێ‌ د گه‌ڕا 8ێ‌ یا فلمه‌ فیسته‌ڤالا دهۆك یا نێڤده‌وله‌تی دا كه‌ت، ئه‌ڤ فلمه‌ به‌رهه‌میكێ‌ هه‌ڤپشكه‌ دناڤبه‌را توركیا و ئیرانێ‌ دا ژ نڤیسین و ده‌رهێنانا (به‌تین قوبادی)یه‌ ده‌مێ‌ ڤی فلمی 90 خوله‌كن كو چیرۆكا ئایلانێ‌ زارۆیێ‌ كورد ڤه‌دگه‌ڕیت ئه‌وێ‌ ب مری ل سه‌ر لێڤێن ده‌ریایه‌كێ‌ توركیا هاتیه‌ دیتن، هه‌ر د ڤی فلمی دا گه‌له‌ك چیرۆكێن دی یێن خێزانێن جوراوجور وه‌كو ڤێ‌ چیرۆكێ‌ دهێنه‌ نیشادان.

 

نيشاندان1...1,0001,1361,1371,138...1,502زێده‌تر لاپه‌ر 1,137 ژ 1,502
مالپه‌رێ فه‌رمى یێ رۆژناما ئه‌ڤرۆ یه‌ .
ئاگــــــه‌هــــــداری نـــــوویـــــــاتیـــــــان ببــــه‌ .
په‌یوه‌ندی : [email protected]
website security
© Copyright 2021 - Rojnameya Evro - Powered by Kurdo Plus
814 queries in 0.693 seconds.
WP Facebook Auto Publish Powered By : XYZScripts.com