عه‌بدولره‌حمان بامه‌رنی
هه‌ر كه‌سه‌ك خوه‌شیه‌كێ ژ هونه‌ری وه‌ردگریت و ئه‌ز دێ ڤێ خوه‌شیێ سه‌ر رێژ كه‌مه هونه‌رێ شانۆیێ و ئه‌و شانۆگه‌ریا ئه‌ز ل حه‌فتیا بۆری چوویمه پێش، كو ژ لایێ رێڤه‌به‌ریا هونه‌رێ شانۆیێ ڤه كۆما شانۆیا شۆره‌شڤان ل هۆلا په‌یمانگه‌ها هونه‌رێن جوان هاتبوو نمایشكرن و پالپشتیكرن.
ل حه‌فتیا بۆری نمایشا دوویێ بوو و لێ یا گرنگ بۆ من، ئه‌ز شیام بدلێ خوه ڤێ شانۆگه‌ریێ ببینم و من پرانیا لڤینێن ئه‌كته‌ران، ده‌نگێ مۆزیكێ، روناهی یا ل سه‌ر ده‌پێ شانۆیێ و ئاخفتنا ئه‌كته‌ران، كو ل هه‌می شانۆگه‌ریێن ئه‌ز چوویمێ، ئه‌كته‌ران ل سه‌ر ده‌پێ شانۆیێ فونه‌تیكه‌كا تایبه‌ت بخوه ڤه هه‌یه و هه‌ر وه‌كو دبێژنه بینه‌ران، ئه‌ڤه شێوازێ ئاخفتنا مه‌یه وئاخر دڤێت ژی تشتێن جوداتر هه‌بن، بۆ نمونه: ده‌پێ شانۆیێ بلندتر بیت و لڤین و نمایشا ئه‌كته‌ران ب شێوازه‌كی بیت چاڤێن بینه‌ران ب دوویڤ خوه‌ڤه راكێش بكه‌ن، هه‌ر چو نه‌بیت دا چاڤێن بینه‌ری دگه‌ل هه‌ناسه و لڤینان بن و تشتێ خوه‌ش ژ شانۆگه‌ریان ئه‌ز حه‌ز ژێ دكه‌م ژی هه‌ر ئه‌ڤه یه، ده‌ما ئه‌كته‌ر ل سه‌ر ده‌پێ شانۆیێ و ب هاریكاریا مۆزیكێ و رۆناهیێ، كارلێكی دگه‌ل من وه‌ك بینه‌ر دكه‌ت و من دكه‌ته به‌شه‌ك ژ ئه‌وا دهێته نمایشكرن.
ئه‌ڤا ل سه‌ری نه بابه‌تێ منه، لێ ئه‌ڤه رامان نینه ئه‌ز ڤی كارێ جوان به‌حس نه‌كه‌م، ئه‌كته‌رێن زیره‌ك و خودان شیان ب به‌رچاڤێن من كه‌فتن و هێشتا په‌یمانگه‌هـ ب دووماهی نه‌ئینا بوون، كو ئومێده‌ك ل ده‌ف من په‌یداكر، مه كارێن هونه‌رێ شانۆیێ یێن جوان یێن هه‌ین، لێ ل جهێن ڤه‌شارتی و تایبه‌ت بۆ هنده‌كان دهێنه نمایشكرن و هینگێ ئه‌ز تێناگه‌هم مفایێ نمایشا به‌رزه دێ چبیت؟!!
باژێر ب گه‌له‌ك تشتان ئاڤا دبن، ئه‌ڤه گه‌له‌ك جاران من یا هاتیه به‌ر گوهێن من، لێ ب تاوه‌ران ناهێنه نمایشكرن، تاوه‌ر بتنێ بۆ لبه‌ر كێشانا سیلفیانه لێ هونه‌ر و چایخانه و كافیتریایێن ره‌وشه‌نبیری و هونه‌ری، پرتووكخانه و شوونوار و مۆزه‌خانه باژێری دئیننه پێش و دبنه ناسناما باژێری و خه‌لكی به‌ر ب باژێری ڤه دئینن و ده‌ما دزڤرنه باژێرێن خوه یان وه‌لاتێن خوه، ئه‌و به‌حسا تاوه‌رێن مه ناكه‌ن، ژ به‌ركو یێن مه ل به‌ر چاڤێن یێن وان هه‌ر ژماره نینن، لێ دێ به‌حسا هونه‌ری كه‌ن و ره‌وشه‌نبیریا ته و یا من كه‌ن..!
نيشاندان