دكتۆر نەوزاد عەبدوللا، بەپرسێ لقێ ئێك یێ پارتی ب هەلكەفتا سەركەفتنا پارتی د هەلبژارتنێن خولا شەشێ‌ یا پەڕلەمانێ‌ كوردستانێ‌ دا پەیامەكا پیرۆزباهیێ ئاراستەی جەماوەرێ پارتی ل دهۆك و سێمێلێ كر و تێدا هاتیە: «ب هەلكەفتا ڤێ سەركەفتنا مەزن و دیرۆكی یا پارتییا مە، پارتی دیموكراتی كوردستان، ب پشتەڤانی و دەنگێن رەسەن و زەلالێن هەوە د هەلبژارتنێن خولا شەشێ یا پەرلەمانێ كوردستانێ دا تۆماركری، گەرمترین پیرۆزباهیان ئاراستەی سەرۆك و لێڤەگەڕێ گەلێ مە، جەنابێ سەرۆك مسعود بارزانی، هەردو جێگرێن پارتی دیموكراتی كوردستان (نێچیرڤان بارزانی و مەسرور بارزانی) و فەرماندە مەنسور بارزانی و سەركردایەتیا پارتی و تەڤایا كادر و ئەندام و لایەنگر و پشتەڤان و دەنگدەرێن پارتی یێن خۆشتڤی ل قەزایێن دهۆك و سێمێلێ‌ دكەم».
دیسا تێدا هاتیە: «هەر چەندە قەبارێ پیلانێن نەیار و نەحەز و دوژمنێن گەلێ كوردستانێ گەلەك د مەزن بوون، لێ ب حیكمەتا سەرۆك بارزانی و خۆڕاگریا كەلها خورستییا جەماوەرێ وەفادارێ پارتی هەمبەر هەمی ئالنگاریان، پیلان و مینێن دوژمن و نەحەزان هاتن رامالین و راكرن و پێگەهێ پارتی و هەرێما كوردستانێ بهێزتر لێكر».
د پەیاما لقێ‌ ئێك دا هاتیە: «سەركەفتنا مەزنا لیستا پارتی د ڤان هەلبژارتنان دا، بەلگەیێ هشیارییا سیاسی و پابەندبوونا جەماوەرێ گەلێ مەیە ب رێبازا راستەقینە یا كوردایەتیێ و نیشتیمانپەروەریێ، پاداشتێ گەلێ كوردستانێ یە، بۆ هەلوەستێن نەتەوەیی و نیشتیمانیێن پارتی و داكۆكیكرنا بەردەواما وێ ژ دەستكەفت و مافێن رەوایێن گەلێ كوردستانێ، هەروەسا وەفاداریا خەلكێ كوردستانێ یە بۆ خوینا شەهیدان و خەباتا پێشمەرگێن قەهرەمان و خۆڕاگریا پارتی د دەمێ رۆژێن سەخت و قەیرانان دا ب تنێ مل دایە بەر بەرپرسیاریێ و قەوارەیێ هەرێما كوردستانێ».
لقێ‌ ئێك ئاشكرا ژی كریە كو سەركەفتنا پارتی د ڤان هەلبژارتنان دا، سەركەفتنا ئەزموونا حومكڕانیا پارتیە ل كوردستانێ و سەركەفتنا ئیرادەیا ئاشتیخوازی و هشیاری و بلندبوونا ئاستێ هشمەندییا گەلێ كوردستانێ یە و رەتكرنا وێ سیاسەتا چەوت و خاپینووك و وێ گۆتارا تۆندرەو و شەرانگیز و ترسنووكا هندەك ئالیێن سیاسی یە و تێدا هاتیە: «هەوە ب سەرئێخستنا لیستا پارتی د ڤان هەلبژارتنان، بنیاتەكێ نوو یێ مكوم و خورستی بۆ پارتیا خۆ و قەوارەیێ هەرێما كوردستانێ داناڤە و گیانێ شەهیدێن خۆ شادكر».
دیسا د پەیاما لقێ‌ ئێك دا هاتیە: «سوپاسیا ماندیبوونا هەمی ئەندام، كادر، لایەنگر و دەنگدەر و هەمی جەماوەرێ ب ئەمەكێ پارتی بكەم، هەروەسا سوپاسیا هەمی دەزگەهێن راگەهاندنا پارتی بكەم، ب تایبەتی سەربازێن بەرزە یێن سوشیال میدیایێ، ئەویێن د ڤێ هەوا هەلبژارتنان دا شەڤ و رۆژ كرینە ئێك ژ بۆ روو ب رووبوونا درەو و بوختان و چەوەشاكاریێن نەیار و نەحەزان و پەیاما راست و دروستا پارتی گەهاندیە خەلكێ كوردستانێ، دوبارە سەركەفتنا مەزن و دیرۆكی یا پارتی یا مە، ل هەوە و تەڤایا گەلێ كوردستانێ پیرۆزبیت».

بەردەوامیدان ب گەهاندنا پڕۆژەیێن خزمەتگوزاری بۆ هەموو دەڤەران، د. عەلی تەتەر، پارێزگارێ دهۆكێ ب ئامادەبوونا خەلیل مەحمود، دەڤەردارێ سێمێلێ و چەندین رێڤەبەرێن گشتی یێن پەیوەندیدار پڕۆژەیێ جاددەیا 60 مەتری و سێ جاددەیێن 30 مەتری ل سنوورێ كۆمەڵگەها تەناهی ل دەڤەرداریا سێمێلێ ب گوژمێ 20 ملیار و 218 ملیۆن دیناران ب درێژاهیا نەه كیلۆمەتر و 350 متران ڤەكرن.
پارێزگارێ دهۆكێ سوپاسیا سەرۆكێ حكومەتا هەرێما كوردستانێ كر كو هەردەم پشتەڤانیێ ل داخوازیێن خەلكێ پارێزگەهێ دكەت و گۆت: «ڤان هەر چار جاددەیان گرنگیا خوە یا تایبەت هەیە و خەلكێ تەناهی و باژێرێن دهۆك و سێمێلێ و دەروبەران ژی دێ گەلەك مفای ژێ وەرگرن، كاروانێ ئاڤەدانكرنێ دێ یێ بەردەوامبیت، ل رۆژێن بهێن پتر پڕۆژە ل دەڤەرێ دێ هێنە راگەهاندن و چێكرن».

بەردەوامیدان ب گەهاندنا پڕۆژەیێن خزمەتگوزاری بۆ هەموو دەڤەران د. عەلی تەتەر، پارێزگارێ دهۆكێ سەرەدانا سنوورێ‌ دەڤەرداریا شێخان كر و ب ئامادەبوونا سالح حەیدەر، بەرپرسێ لقێ 20 یێ پارتی ل شێخان و سەردار یەحیا، دەڤەردارێ شێخان و چەندین رێڤەبەرێن گشتی یێن پەیوەندیدار بەرێ بنیاتی بۆ پتری 90 پڕۆژەیان ل ناوچەداریێن قەسرۆك و ئەترووش و كەلەكچی ب گوچمێ‌ پتری 12 ملیار دیناران دانا.
پارێزگارێ‌ دهۆكێ‌ ل سنوورێ ناوچەداریا قەسرۆكێ و كۆمەڵگەها چڕەی و گوندێن دەوروبەر بەرێ‌ بنیاتی بۆ 45 پڕۆژەیان د بیاڤێن جودا دا ب گوژمێ پێنج ملیار و 795 ملیۆن دیناران دانا.
دیسا د. عەلی تەتەر، پارێزگارێ دهۆكێ ل سنوورێ ناوچەداریا ئەترووش و گوندێن دەوروبەر بەرێ بنیاتی بۆ 36 پڕۆژەیان د بیاڤێن جودا دا وەكو: (رێك و ئاڤ و ئاڤدێری و پەروەردە و كارەب و وەرزش و هتد) ب گوژمێ سێ‌ ملیار و 400 ملیۆن دیناران دانا.
دیسا ل سنوورێ ناوچەداریا كەلەكچی پارێزگارێ‌ دهۆكێ‌ بەرێ بنیاتی بۆ كۆمەكا پڕۆژەیان ب گوژمێ پتری سێ ملیار دیناران دانا.
پارێزگارێ دهۆكێ دوپاتكر كو ل دووڤ راسپاردێن بەردەوام یێن مەسرور بارزانی، سەرۆكێ حكومەتا هەرێما كوردستانێ كاروانێ ئاڤەدانكرنێ و گەهاندنا پڕۆژەیێن خزمەتگوزاری بۆ هەموو دەڤەران دێ یێ بەردەوامبیت.

زاخۆ، دلۆڤان هالۆ:

ب چاڤدێریا گوهدار شێخۆ، سەرپەرشتێ ئیدارەیا سەربخوە یا زاخۆ، ب گوژمێ 25 ملیۆن دۆلاران بەرێ بنیاتی بۆ كۆمەلگەها سەرچنار یا گەشتیاری و بازرگانی هاتە دانان.
گوهدار شێخۆ، د كۆنگرەیەكێ ڕۆژنامەڤانی دا دیار كر كو كەرتێ تایبەت و وەبەرهێنانێ رۆلەكێ باش و بەرچاڤ ل زاخۆ دیتییە و گۆت: «ئەم خوەشحالین ب دانانا بەرێ بنیاتی بۆ ڤی پڕۆژەیێ گرنگ ل زاخۆ، كو دێ بیتە ئەگەرێ پەیداكرنا ب سەدان دەلیڤەیێن كاری بۆ وەلاتیێن مە ل دەڤەرێ».
گۆتژی: «ل سەر ڕاسپاردەیا مەسرور بارزانی، سەرۆكێ حوكمەتا هەرێما كوردستانێ، پێشكێشكرنا خزمەتگوزارییان ل سنوورێ ئیدارەیا سەربخوە یا زاخۆ بەردەوامە».