دهۆك، له‌زگین جوقی:

ساخله‌میا دهۆكێ‌ د گه‌ل رێكخراوا giz یا ئه‌لمانیی دوهی 13/9/2021ێ‌ گرێبه‌ستێن گه‌رادویێ‌ یا پشته‌ڤانیا كارمه‌ندێن ساخله‌میێ‌ بۆ 64 خوه‌به‌خشان ئیمزاكرن.

د. ئه‌فراسیاب موسا، رێڤه‌به‌رێ‌ گشتی یێ‌ ساخله‌میا پارێزگه‌ها دهۆكێ‌ بۆ رۆژناما ئه‌ڤرۆ دیار كر، وان وه‌كو ساخله‌میا دهۆكێ‌ ب هه‌ڤكاری د گه‌ل رێكخراوا giz یا ئه‌لمانی گه‌را دویێ‌ یا پشته‌ڤانیا كارمه‌ندێن ساخله‌میێ‌ یێن د ناڤ ده‌زگه‌هێن ساخله‌میێ‌ دا كار دكه‌ن دوباره‌ پشته‌ڤانیا وان هاته‌ كرن و گریبه‌ست د گه‌ل دا هاتنه‌ ئیمزا كرن بۆ وی چه‌ندێ‌ به‌رده‌وامیێ‌ ب كارێ‌ خوه‌ بده‌ن و گۆت: “ئه‌ڤ گرێبه‌سته‌ بۆ ده‌مێ‌ دو هه‌یڤانه‌ و رێكخراوا giz یا ئه‌لمانی ب هه‌ڤكاریا رێڤه‌به‌ریا كۆچ و كۆچبه‌ران و به‌رسڤدانا قه‌یرانان یا حوكمه‌تا هه‌رێما كوردستانێ‌ ل پارێزگه‌ها دهۆكێ‌ دێ‌ پشته‌ڤانیا وان كه‌ن”.

رێڤه‌به‌رێ‌ گشتی یێ‌ ساخله‌میا پارێزگه‌ها دهۆكێ‌ ئاشكرا ژی كر كو هه‌موو ئه‌و كارمه‌ندێن ساخله‌میێ‌ یێن ب شێوه‌یێ‌ ئونلاین پێشكێش كرین هاتینه‌ وه‌رگرتن و گرێبه‌ست د گه‌ل دا هاتنه‌ ئیمزاكرن و گۆت: “ڤان كارمه‌ندان به‌ری نوكه‌ خوه‌به‌خش د ناڤ ده‌زگه‌هێن ساخله‌میێ‌ دا كار كرینه‌ و نوكه‌ ژی گرێبه‌ست د گه‌ل دا هاتنه‌ ئیمزاكرن و دێ‌ به‌رده‌وامیێ‌ ده‌نه‌ كارێ‌ خوه‌”.

مه‌نال محه‌مه‌د، رێڤه‌به‌را كۆچ و كۆچبه‌ران و به‌رسڤدانا قه‌یرانان ل پارێزگه‌ها دهۆكێ‌ گۆت: “ئه‌م به‌رده‌وام كار دكه‌ین گڤاشتنێ‌ ل سه‌ر هه‌موو رێكخراوان دروست بكه‌ین، داكو پشته‌ڤانیا دام و ده‌زگه‌هێن حوكمه‌تا هه‌رێما كوردستانێ‌ بكه‌ن، د ڤی چارچوڤه‌ی ژی دا، دوهی ب رێیا رێكخراوا giz یا ئه‌لمانی گرێبه‌ست د گه‌ل كارمه‌ندێن ساخله‌میێ هاتنه‌ ئیمزاكرن، ب تایبه‌تی ژی ئه‌و كارمه‌ندێن خوه‌به‌خش كار دكرن، داكو ل سه‌ر ئه‌نجامدانا كارێن خوه‌ د ناڤ ده‌زگه‌هێن ساخله‌میێ‌ دا دبه‌رده‌وام بن”.

ئامێدیێ‌، محمود نهێلی:

سه‌رۆكێ‌ باژێرڤانیا ئامێدیێ‌ بۆ رۆژناما ئه‌ڤرۆ دیار كر كو نوكه‌ سێ‌ پرۆژێن چێكرنا رێیان ل سه‌نته‌رێ‌ قه‌زا ئامێدیێ‌ دهێنه‌ بجهئینان و جادا د ناڤ بازارێ‌ ئامێدیێ‌ ژی دا ب به‌رێ‌ بازی و ل سه‌ر شێوازێ‌ كه‌ڤن دێ‌ هێته‌ چێكرن.

ئه‌ندازیار ئه‌ڤراز ئامێدی، سه‌رۆكێ‌ باژێرڤانیا ئامێدیێ‌ خویا كر، نوكه‌ ده‌ست ب چێكرنا هه‌ژماره‌كا پرۆژه‌یان ل سنوورێ‌ باژێرڤانیا وان هاتیه‌ كرن و گۆت: “رێیا مرێبكا بۆ مێرسته‌كێ‌ و مرێبكا بۆ بێبادێ‌، رێیا كانیا مالا و سه‌نته‌رێ‌ ئامێدیێ‌ و پرۆژێ‌ چێكرنا كولانا قوچا ب گوژمێ‌ ملیاره‌ك و 600 ملیۆن دیناران دهێنه‌ بجهئینان”.

ناڤهاتی ئاشكرا ژی كر كو جادا سه‌ره‌كی یا د ناڤ بازارێ‌ باژێرێ‌ ئامێدیێ‌ دا ب ته‌به‌قه‌كا به‌رێ‌ بازی دێ‌ بۆ هێته‌ دانان و ب شێوازه‌كێ‌ كه‌ڤن و جوان و ل دووڤ ستانده‌ردێن باش دێ‌ هێته‌ چێكرن و ل ڤان نێزیكان دێ‌ ده‌ست ب كاری هێته‌ كرن.

ئه‌ڤرۆ:

ب مه‌ره‌ما دووڤچوونا پرۆژێن خزمه‌تگۆزاری ئه‌وێن ل سنوورێ ده‌ڤه‌رداریا سێمێلێ دهێنه‌ ئه‌نجامدان، دوهی 13/9/2021 د. عه‌لی ته‌ته‌ر، پارێزگارێ دهۆكێ ب به‌رهه‌ڤبوونا خه‌لیل مه‌حمود، ده‌ڤه‌ردارێ سێمێلێ و چه‌ند به‌رپرسێن حزبی و ئیداری به‌رێ بنیاتی بۆ هه‌ژماره‌كا پرۆژان هاته‌ دانان و هه‌ژماره‌كا پرۆژان ژی ب رێژێن جودا كار ل سه‌ر هاتیه‌ ئه‌نجامدان.

د داخویانیه‌كێ دا پارێزگارێ دهۆكێ گۆت: “ل دووڤ راسپاردێن مه‌سرور بارزانی، سه‌رۆكێ حوكمه‌تا هه‌رێمێ و به‌رنامێ كابینا نه‌هێ‌ خزمه‌تگۆزاری به‌رده‌وام بۆ خه‌لكێ كوردستانێ دێ هێنه‌ دابینكرن، رۆژانه‌ هه‌ژماره‌كا پرۆژان دهێنه‌ ئه‌نجامدان، به‌ری چه‌ند رۆژان مه‌ هه‌ژماره‌كا پرۆژان ل سنوورێ ناوچه‌داریا فه‌یدیێ ڤه‌كرن و به‌رێ بیناتی بۆ هنده‌كێن دی دانا، دوهی ژی مه‌ ل سنوورێ ده‌ڤه‌رداریا سێمێلێ به‌رێ بنیاتی بۆ هه‌ژماره‌كا پرۆژان دانا و ب گشتی نوكه‌ ب گوژمێ پتر ژ 18 ملیار و 500 ملیۆن دیناران پرۆژه‌ ل سنوورێ ده‌ڤه‌رداریا سێمێلێ دهێنه‌ ئه‌نجامدان و هه‌موو پرۆژه‌ ژی ل سه‌ر بودجا حوكمه‌تا هه‌رێما كوردستانێ نه‌”.

پارێزگه‌ری گۆتژی: “ئه‌م مزگینیێ دده‌ینه‌ خه‌لكێ خوه‌ كو حوكمه‌تا هه‌رێمێ دێ به‌رده‌وام خزمه‌تگۆزاریان پێشكێشی وه‌لاتیان كه‌ت و ل رۆژێن بهێن ژی ب گوژمێ پتر ژ هه‌شت ملیار دیناران پرۆژه‌ دێ هێنه‌ راگه‌هاندن”.

دیسا ژ وان پرۆژێن دوهی پارێزگاری َدهۆكی َبه‌رێ‌ بنیاتی دانای و سه‌ره‌دانا وان كری، ئه‌ڤه‌نه‌:

1-            به‌رێ بنیاتی بۆ چێكرن و قێركرنا سایده‌كێ جادا 30م و چێكرنا رێیێن ناڤخوه‌یی ل كۆمه‌لگه‌ها ته‌ناهیێ‌ ب درێژاهیا كیلۆمه‌تر و نیڤان ب گوژمێ 559 ملیۆن دیناران هاته‌ دانان.

2- سه‌ره‌دانا پرۆژێ چێكرنا ئه‌نده‌ر پاسا سێمێلێ ل سه‌ر رێیا نیڤده‌وله‌تی (دهۆك – سێمێل – زاخۆ) كر كو هه‌تا نوكه‌ د ناڤبه‌را (20 بۆ 25%) كار تێدا هاتیه‌ كرن و گوژمێ پتری چار ملیار دیناران بۆ هاتینه‌ ته‌رخانكرن.

3- به‌رێ بنیاتی بۆ چێكرنا رێیێن ناڤخوه‌یی ل سه‌نته‌رێ ناوچه‌داریا باتێلێ ب درێژاهیا 652 مه‌تران و ب گوژمێ 196 ملیۆن دیناران هاته‌ دانان.

4- به‌رێ بنیاتی بۆ چێكرنا رێیا سه‌ره‌كی قووناغا سێیێ‌ دگه‌ل چێكرنا سۆلینا ل كۆمه‌لگه‌ها خانكێ ب گوژمێ 744 ملیۆن دیناران هاته‌ دانان.

5- به‌رێ بنیاتی بۆ چێكرنا رێیێن ناڤخوه‌یی كه‌رتێ سی َو چار ب درێژاهیا نێزیكی شه‌ش كیلۆمه‌تران دگه‌ل چێكرنا سۆلینه‌كا پایپ یا (90)سم ب درێژاهیا هزار مه‌تران ل سه‌نته‌رێ سێمێلێ ب گوژمێ 827 ملیۆن دیناران هاته‌ دانان.

پارێزگارێ دهۆكێ حه‌فت پرۆژێن خزمه‌تگۆزاری ره‌وانه‌یی جێبه‌جێكرنێ كرن

دیسا ژ لایه‌كێ‌ دیڤه‌ د. عه‌لی ته‌ته‌ر، پارێزگارێ دهۆكێ حه‌فت پرۆژێن خزمه‌تگۆزاری كو ژ هه‌ژماره‌كا رێیێن گوندان پێك دهێن، د چه‌ند رۆژێن بهێن دا ب گوژمێ 730 ملیۆن دیناران دێ‌ كه‌ڤنه‌ د وارێ‌ بجهئینانێ‌ دا.

دیسا هه‌ر دوهی 13/9/2021 د. عه‌لی ته‌ته‌ر، پارێزگارێ دهۆكێ پێشوازی ل موسا ئه‌حمه‌د، سه‌رۆكێ ده‌زگه‌هێ خێرخوازیێ بارزانی كر و د هه‌ڤدیتنه‌كێ دا به‌حسی رۆلێ ده‌زگه‌هێ خێرخوازی یێ بارزانی و پێشكێشكرنا هاریكاریێن مرۆڤایه‌تی ب گشتی و ب تایبه‌تی بۆ ئاواره‌ و په‌نابه‌ران هاته‌كرن.

دیسا هه‌ر دوهی و ل دووڤ راسپارده‌یێن پارێزگارێ دهۆكێ و ب سه‌رپه‌رشتیا ماجد سه‌ید سالح، جێگرێ پارێزگارێ دهۆكێ بۆ كاروبارێن ته‌كنیكی ب وه‌كاله‌ت و ب به‌رهه‌ڤبوونا رێڤه‌رێن سازیێن په‌یوندیدار و 29 رێكخراوێن ناڤخوه‌یی و بیانی یێن د وی بیاڤی دا كار دكه‌ن كۆمبوونه‌ك ل دۆر زیانێن هشكه‌سالیێ و كێمیا ئاڤێ هاته‌ ئه‌نجامدان.

ئه‌ڤرۆ:

وه‌زیرێ باژێرڤانی و گه‌شت و گوزارێ ل حوكمه‌تا هه‌رێما كوردستانێ‌ دیار كر، ل سه‌ر داخوازا سه‌رۆكێ حوكمه‌تا هه‌رێما كوردستانێ هه‌ر باژێر و تاخه‌كێ هه‌رێما كوردستانێ پێدڤی ب خزمه‌تگۆزاریان هه‌بیت دێ بۆ هێنه‌ دابینكرن.

ساسان عه‌ونی، وه‌زیرێ باژێرڤانی و گه‌شت و گوزارێ راگه‌هاند: مه‌سرور بارزانی، سه‌رۆكێ حوكمه‌تا هه‌رێما كوردستانێ به‌رده‌وام رێنمایان دده‌ته‌ وه‌زاره‌تا باژێرڤانی و گه‌شت و گوزارێ كو پێدڤیه‌ خزمه‌تگۆزاریان بگه‌هیننه‌ هه‌موو كوردستانێ.

ساسان عه‌ونی دیار ژی كر، وه‌زاره‌تا باژێرڤانی و گه‌شت و گوزارێ دێ هه‌موو بزاڤان كه‌ت داكو باشترین خزمه‌‌تگوزاریان پێشكێشی وه‌لاتیان بكه‌ت.

ئه‌ڤرۆ:

وه‌زیرێ په‌روه‌ردل حوكمه‌تا هه‌رێما كوردستانێ‌ دیار كر، ئه‌ڤرۆ 14/9/2021 پرۆسا خواندنێ‌ بۆ سالا 2021 – 2022 ل هه‌موو ناڤه‌ندێن خواندنێ‌ ل سه‌رانسه‌ری هه‌رێما كوردستانێ‌ دێ‌ ده‌ست پێكه‌ت و دبێژیت: سێ‌ حه‌فتیێن ده‌ستپێكا خواندنێ‌ ژی بۆ قه‌ره‌بووكرنا وانێن سالا بۆری بۆ پۆلێن دو هه‌تا نه‌هێ‌ بنه‌ره‌تی و 11 ئاماده‌یی دێ هێنه‌ ته‌رخانكرن.

ئالان حه‌مه‌ سالح، وه‌زیرێ په‌روه‌ردێ دیار ژی كر، وانه‌ و بابه‌ت ژ ئالیێ لژنه‌كا تایبه‌ت هاتینه‌ ده‌ستنیشانكرن و ب تنی پێداچوون دێ بۆ وان بابه‌تان بیت.

ژ لایه‌كێ‌ دیڤه‌ ل دووڤ راگه‌هاندنه‌كا وه‌زاره‌تا په‌روه‌ردێ‌ كو ئیمزا وه‌زیری ل سه‌ره‌ و ب مه‌ره‌ما پاراستنا گیانێ‌ مامۆستا و قوتابیان و ستافێ‌ كارگێری، دڤێت رێنمایێن ساخله‌می و خوه‌پارێزیێ‌ بجه بینن و بۆ ڤێ‌ مه‌ره‌مێ‌ ژی دڤێت مامۆستا و قوتابی و ستافێ‌ كارگێری كه‌مامێ‌ ب كاربینن و ئه‌ڤه‌ نه‌چاریه‌ بۆ وان.