هه‌ولێر، قائید میرۆ:

حه‌فتیا بۆری سه‌رۆكایه‌تیا جڤاتا وه‌زیرێن هه‌رێما كوردستانێ بڕیار دا، كۆمپانیێن گه‌هاندنێ بهێنه‌ نه‌چار كرن هه‌موو سیمكارت بهێنه‌ تۆمار كرن ژلایێ كۆمپانیاڤه‌ و به‌رۆڤاژی دێ لێپرسین ل گه‌ل هێته‌ كرن ئه‌ندامێ لژنا ئاشتكرنا خێزانان ژی دبێژیت: هژماره‌كا زۆر یا تاوانان ب رێیا سیمكارتێن نه‌ تۆمار كری دهێنه‌ ئه‌نجامدان و بڕیارا سه‌رۆكایه‌تیا جڤاتا وه‌زیران دێ كاریگه‌ری ل سه‌ر كێمبوونا تاوانان هه‌بیت.

حاجی عزه‌دین، ئه‌ندامێ لژنا ئاشتكرنا خێزانان بۆ ئه‌ڤرۆ دیار كر” بڕیارا سه‌رۆكایه‌تیا جڤاتا وه‌زیران بۆ قه‌ده‌غه‌كرنا سیمكارتێن بێناڤ و نه‌ تۆمار كری دێ كاریگه‌ری ل سه‌ر كێمبوونا رێژه‌یا توندۆتیژیێ هه‌بیت و گۆت: (چونكی ئێك ژ توندۆتیژیێن دهێنه‌ ئه‌نجامدان ب رێیا ئه‌ڤان سیمكارتێن نه‌ تۆماركری و نه‌ نیاسن، ژبه‌ركو ده‌مێ تاوانه‌ك دهێته‌ ئه‌نجامدان و ڤه‌كۆلین دهێته‌ كرن ژبه‌ر نه‌بوونا به‌لگه‌یان ل سه‌ر هژمارێن نه‌نیاس یێن تێله‌فونێ‌ تاوان ناهێته‌ ئاشكرا كرن ده‌مه‌كێ زوودا، یان ده‌مێ سكالا دژی هژماره‌كێ دهێته‌ تۆمار كرن دێ بینی چو خودان نینه‌ و لێپرسین دگه‌لدا ناهێته‌ كرن)

ئه‌ندامێ لژنا ئاشتكرنا خێزانان گۆتژی: (له‌وڕا بڕیارا سه‌رۆكایه‌تیا جڤاتا وه‌زیران دێ كاریگه‌ریه‌كا زۆر باش هه‌بیت ل سه‌ر كێمبوونا تاوانان، بتایبه‌تی ئه‌و تاوانێن ب رێیا تێله‌فونێ‌ دهێنه‌ ئه‌نجامدان، هه‌ر تێله‌فونه‌كا دیارب یت سه‌ر ناڤێ كێیه‌ ئه‌ڤه‌ تاوان زۆر كێم ب ئه‌ڤێ تێله‌فونێ‌ دهێنه‌ ئه‌نجام دان، هه‌كه‌ بهێت و تاوان ژی بهێنه‌ ئه‌نجامدان رێژا وان یا كێمه‌ و دهێنه‌ ئاشكرا كرن، ب درێژاهیا سالێن بۆری چه‌ندین تاوان هاتینه‌ ئاشكرا كرن، كو ب رێیا تێله‌فونێ‌ هاتینه‌ ئه‌نجامدان).

حاجی عزه‌دین ئه‌و چه‌نده‌ ژی دا زانین كو ل سالا 2008ێ قانوونا خراپ بكار ئینانا مۆبایلێ ژلایێ په‌رله‌مانێ كوردستانێ هاتیه‌ ده‌ركرن و پێدڤی بو ئه‌و قانوونه‌ بهێته‌ بجهئینان و په‌رله‌مانێ كوردستانێ دووڤچوونێ بكه‌ت، ده‌مێ قانوونه‌ك دهێته‌ ده‌ركرن ئه‌ركێ په‌رله‌مانیه‌ دووڤچوونێ بكه‌ت هه‌تا بزانین چه‌ند هاتیه‌ بجهئینان و گۆت: (ل گوره‌ی قانوونێ هه‌ر كۆمپانیه‌كا سیمكارتان بفرۆشیت و تۆمار نه‌كه‌ت ئه‌ڤه‌ كۆمپانیا گه‌هاندنێ هه‌تا 50 ملیۆن دیناران دێ هێته‌ سزادان، به‌لێ ئه‌ڤه‌ چه‌ندین ساله‌ ئه‌ف قانوونه‌ ژلایێ په‌رله‌مانی هاتیه‌ ده‌ركرن و هه‌تا نوكه‌ مه‌ نه‌دیتیه‌ تنێ ئێك كۆمپانیا ژی بهێته‌ سزادان لدۆر سیمكارتێن نه‌ تۆماركری، به‌لێ ئه‌م باوه‌رین بڕیارا سه‌رۆكایه‌تیا جڤاتا وه‌زیران هه‌كه‌ وه‌كی خۆ بهێته‌ بجهئینان، دێ دووماهیێ ب چه‌ندین تاوانان ئینیت و كاریگه‌ری دێ هه‌بیت ل سه‌ر رێژه‌یا توندۆتیژیێ).

عزه‌دین ئاماژه‌ پێ‌ كر كو پێدڤیه‌ هه‌ر كۆمپانیه‌كا سیمكارتێن نه‌ تۆماركری بده‌ته‌ بازاڕی ل گوره‌ی قانوونێ بهێنه‌ سزادان و دووڤچوون بۆ بجهئینانا بڕیارا سه‌رۆكایه‌تیا جڤاتا وه‌زیران بهێته‌ كرن و گۆت: (ئیدی رێكێ نه‌ده‌ن چو كه‌سه‌ك ب رێیا سیمكارتێن نه‌ تۆماركری تاوانان ئه‌نجام بده‌ت و خه‌لكێ كوردستانێ ببیته‌ قوربانی، مخابن خه‌لكێ كوردستانێ ئه‌زموونه‌كا باش ل گه‌ل تاوانان نینه‌ و هژماره‌كا زۆر یا وان تاوانان ژی ب رێیا هژمارێن نه‌ نیاس هاتینه‌ ئه‌نجامدان).

ئه‌ڤرۆ، نه‌وزاد هلۆری:

هنده‌ك ژ داب و نه‌ریتێن بێ‌ بنه‌ما دناڤ جڤاكێ‌ كوردستانێ‌ دا به‌لاڤ بوینه‌ و كارتێكرنێن نه‌رێنی و بارگرانی ل سه‌ر تاكێن جڤاكی دروست كریه‌، به‌لێ‌ د حاله‌ته‌كێ‌ جودا و كێم وێنه‌ دا وه‌لاتیه‌كێ‌ سنورێ‌ دینارته‌ داب و نه‌ریته‌كێ‌ جڤاكی دگوهریت.

نه‌شوان عومه‌ر، وه‌لاتیه‌كه‌ ل بارا وان داب و نه‌ریتێن جڤاكی كو بارگرانی بو خه‌لكی دروست كریه‌ گۆت: (هه‌ر چه‌نده‌ هه‌موو داب و نه‌ریتێن جڤاكێ‌ كوردی جهێ‌ گرنگیدان و شانازیێ‌ نه‌، به‌لێ‌ هنده‌ك جاران داب و نه‌ریتێن جڤاكی كو ئه‌ز باوه‌رم نه‌ یێن كوردی نه‌ دناڤ جڤاكی دا به‌لاڤ بوینه‌ و كارتێكرنێن نه‌رێنی ل سه‌ر وه‌لاتیان دروست كرینه‌ ئه‌و ژی ئه‌وه‌ ده‌ما كو كه‌سه‌ك ده‌واتا خوه‌ دكه‌ت یان ده‌ما زارویه‌ك په‌یدا بوو یان ژی ده‌ما خانیه‌ك دروست كر یان ژی باوه‌رنامه‌یه‌ك وه‌رگرت و هه‌تا دووماهیێ‌ ده‌وروبه‌ر د شه‌رمان دا و ب نه‌چاری رادبن دیاریێن جواروجور بو دبه‌ن، بێگومان ئه‌ڤێ‌ یه‌كێ‌ كارتێكرنێن خراب ل سه‌ر په‌یوه‌ندیێن جڤاكی و ئابوری هه‌نه‌ و دڤێت ئه‌ڤ یه‌كه‌ نه‌مینیت).

نه‌شوان زێده‌تر گۆت: (هه‌رچه‌نده‌ هنده‌ك ژ وان داب و نه‌ریتان نه‌ماینه‌ ب تایبه‌تی چونا سه‌رێ‌ زاڤای و دیاریان، به‌لێ‌ ل گه‌ل هندێ‌ ژی پشكه‌ك ژ وان داب و نه‌ریتان ماینه‌ وه‌كو ده‌ما كه‌سه‌ك خانیه‌كێ‌ دروست دكه‌ت دێ‌ كه‌س و كار و ده‌روبه‌رێن وان كه‌لوپه‌له‌كێ‌ بۆ كرن، هه‌رچه‌نده‌ ئه‌ڤ چه‌نده‌ كاره‌كێ‌ باشه‌ به‌لێ‌ د هه‌مبه‌ر دا بۆ كه‌سێ‌ به‌رامبه‌ر دبیته‌ بارگرانی ژبه‌ركو پشكه‌كا هه‌ره‌ زور یا وان ب نه‌چاری و شه‌رمان دا ئه‌و دیاریان بو دكرن).

به‌خیتار موسلح، وه‌لاتیه‌كێ‌ دینارتێ‌ یه‌ دیار كر كو داب و نه‌ریتێن جڤاكی ب درێژاهیا ده‌می گورانكاری ب سه‌ردا دهێن و گۆت: (بۆ ئێكه‌مجار ل دینارته‌ وه‌لاتیه‌كێ‌ پشتی كو خانیێ‌ خوه‌ ب دووماهی ئینای، نه‌هێلا كه‌س چو دیاریان بۆ بینیت و د هه‌مبه‌ر دا ب هه‌لكه‌فتا ب دووماهی ئینانا خانیێ‌ خوه‌ سه‌رجه‌م خه‌لكێ‌ گوندی ژی مێهڤانێ‌ خوارنه‌كا به‌رفره‌ه كرن و چه‌ند سه‌رێن په‌زی ڤه‌كوشتن، بێگومان ئه‌ڤێ‌ یه‌كێ‌ كارتێكرنه‌كا زۆر ل سه‌ر نه‌مانا دیاردا دیاریان و كرینا كه‌لوپه‌لان هه‌یه‌، به‌لێ‌ ل گه‌ل ڤێ‌ یه‌كێ‌ ژی دخوازم كو ئه‌ڤ یه‌ك ژی نه‌مینیت).

به‌ختیار زێده‌تر گۆت: (برنا دیاریان ب هه‌ر هه‌لكه‌فت و تشته‌كێ‌ بیت ب دیتنا من دوو ئه‌گه‌ر هه‌نه‌، یا ئێكێ‌ ژ نه‌چاری و شه‌رمێ‌ یه‌ یان ژی بو دلخوشی و پیرۆزباهیێ‌ یه‌، د حاله‌تێ‌ ئێكێ‌ دا هه‌كه‌ كه‌سه‌كێ‌ ئه‌و دیاری بۆ مرۆڤی نه‌ئینا دڤێت مرۆڤ دلگران نه‌بیت، به‌لێ‌ د حاله‌تێ‌ دوویێ‌ دا هه‌كه‌ ده‌وروبه‌ر پیرۆزباهیا مرۆڤی نه‌كه‌ن ل وی ده‌می مروڤی ماف هه‌یه‌ گازندا بكه‌ت).