قەیس وەیس:

بڕیارە سوبەهی دەست ب هەڤڕكیێن وەرزێ‌ نوو یا كۆپا كەنداڤی بهێتە كرن ئەوا پشتی نەهـ سالێن ڤەقەتیانێ‌ كو دێ‌ ب پشكدارییا هەشت یانەیان ب شێوەیێ‌ خول دو قۆناغ هێنە ئەنجامدان دێ‌ بەردەوامبن هەتا 25ێ‌ نیسانا سالا 2025ێ‌، پشتی پشككێشان هاتیە كرن یانەیا دهۆك نوونەرا هەرێما كوردستانێ‌ و ئیراقێ‌ د كۆما دویێ‌ دا یە و بڤی رەنگی.
كۆما ئێكێ:‌ دهۆك، نەسر یا ئیماراتی، زەفار یا عومانی، ئەهلی سەنعا یا یەمەنی.
كۆما دویێ‌: عەرەبی یا قەتەری، ئیتفاق یا سعۆدی، ریفاع یا بەحرێنی، قادسییە یا كوێتی.
دوهی ب فەرمی یاریێن تیما یانەیا دهۆك د كۆپا كەنداڤی دا هاتنە بەلاڤكرن و بڤی شێوەی.
یارییا ئێكێ‌ ل 22-10-2024 یانەیا دهۆك دێ‌ ل یاریگەها خوە مێڤاندارییا یانەیا ئەهلی سەنعا یا یەمەنی كەت كو دێ‌ بیتە رێورەسمێن ڤەكرنا وەرزێ‌ نوو یا كۆپا كەنداڤی ئەوا دێ‌ ل دەمژمێر حەفتی شەڤ هێتە ئەنجامدان.
یارییا دویێ‌ دێ‌ یانەیا دهۆك ل دویێ‌ چرییا دویێ‌ یا بهێت بیتە مێڤانا یانەیا زەفار یا عومانی.
یارییا سێیێ‌ 27-11- 2024 ل دەمژمێر حەفتی شەڤ مێڤاندارییا نەسر یا كوێتی كەت.
یارییا چارێ‌ كۆ دبیتە قۆناغا دویێ‌ ژ كۆمێ‌ دێ‌ ل 3-12- 2024 بیتە مێڤانا نەسر یا كوێتی.
یارییا پێنجێ‌ ل 4-2-2024 دێ‌ بەر ب وەلاتێ‌ یەمەن چیت و بیتە مێڤانا یانەیا ئەهلی سەنعا.
یارییا پێنجێ‌ و یا دووماهیێ‌ ژ قۆناغا كۆمان دێ‌ ل 19-2-2024ێ‌ مێڤاندارییا یانەیا زەفار یا عومانی كەت كو دێ‌ ل دەمژمێر حەفتی شەڤ هێتە ئەنجامدان.
د ڕێورەسمێن پێشوازیەكا ڕێكخستی دا ژلایێ‌ یانەیا دهۆك ل فرۆكخانەیا هەولێر یا نێڤدەولەتی حەسەن ئەلكبۆس سەرۆكێ‌ یانەیا ئەهلی سەنعا یا یەمەنی كەیفخوەشیا خوە دیار كر ب پێشوازیا وان و بۆ رۆژنامەیا ئەڤرۆ گۆت: بۆ ئێكەم جارە ئەم هاتینە كوردستانێ‌ و ئیراقێ‌ بڕاستی پێشوازیەكا جوان ل مە هاتە كرن و سۆپاسییا یانەیا دهۆكێ‌ دكەین، بۆ مە هند گڕنگ نینە ئەنجامێ‌ یاریێ‌ بەلكو گرنگ ئەوە یارییەكا جوان بهێتە كرن، پێخوەشحالین مە سەرەدانا ئێك ژ باژێرێن جوان ل رۆژهەلاتا ناڤین كرییە، یانەیا دهۆك گیانێ‌ براینیێ‌ و ڤیان و رێزگرتنەكا مەزن ل مە كر، ئەڤە ژی خالەكا گەلەك گرنگە، ل پێش هەموو خەلكی و وەرزشڤانێن یانەیا ئەهلی سەنعا یا یەمەنی سۆپاسییا دهۆكێ‌ دكەین.
ژلایێ‌ خوەڤە جاسم محەمەد حاجی سكرتێرێ‌ یانەیا دهۆك و سەرپەرشتێ‌ تیما فوتبۆلا یانەیێ‌ گۆت: یاریەكا گرنگە و ب هێزە دێ‌ بیتە ئێكەم پێنگاڤا مە یا دەرڤە د وەرزێ‌ ئەڤ سالە دا تایبەت د گۆپا كەنداڤی دا، كادرێ‌ راهێنانێ‌ بەرهەڤیێن گەلەك باش كرینە و هەموو یاریزان ب مۆرالەكا بلند ژی بەرهەڤن ئێكەم سەركەفتن بینن، مە جەماوەرەكێ‌ مەزن هەیە و گەشبینن دێ‌ دیارییا سەركەفتنێ‌ ژی پێشكێشكەن، ب ئۆمێدین هەر ژ خولەكا ئێكێ‌ و هەتا فیركا دادڤانی ب دووماهی هاتنا یاریێ‌ ب كەیفخوەشی دێ‌ جەماوەر پشتەڤانییا تیما مە كەت، وەكو كارگێرییا یانەیێ‌ هەر تشتەكێ‌ پێدڤی ژی بۆ تیمێ‌ و پێشوازییا تیما مێڤان كرییە.

چاڤەڕێ‌ دهێتە كرن ئەڤرۆ هەردو تیمێن یانەیا زاخۆ ل سەر ئاستێ‌ پێشكەفتیان و تازەپێگەهشتییان یاریێن خوە ژ گەڕا پێنجێ‌ یا خولا باسكێت بۆلێ‌ بۆ یانەیێن پیشەكار ژ دەرڤەیی یاریگەها خوە بكەت دەمێ‌ دبنە مێڤانێن یانەیا حەشد ئەلشەعبی یا بەغدایی.
ل سەر ئاستێ‌ تازەپێگەهشتییان تیما زاخۆ دێ‌ دەمژمێر دویێ‌ پشتی نیڤرۆ ل هۆلا گرتییا شەعب ل بەغدا پایتەختێ‌ ئیراقێ‌ بنە مێڤانێن تازەپێگەهشتیێن حەشد ئەلشەعبی، نڤشێ‌ نوو یێ‌ تیما زاخۆ د پێنج یاریێن بۆری دا سێ‌ سەركەفتن ل سەر تازەپێگەهشتیێن ئەلتیجارە 65-35 خالان، بەرانبەر غاز ئەلشیمال 71-60 خالان و سەركەفتنا سێیێ‌ دەربەندیخان ب 60-49 خالان بوو، لێ‌ دگەل شورتە 32-67 خالان و دگەل كەرخ ب49-69 خالان تووشی خوسارەتیێ‌ بووی، بۆ ڤێ‌ یاریێ‌ دێ بزاڤێن سەركەفتنا چارێ‌ كەت.
ژلایێ‌ خوەڤە ل سەر ئاستێ‌ پێشكەفتییان بۆ یانەیێن پیشەكار تیما یانەیا زاخۆ ژی چاڤ ل سەركەفتنا چارێ‌ یە دەمێ‌ دەمژمێر پێنجی ئێڤاری ل هەمان هۆلێ‌ دبیتە مێڤانا یانەیا حەشد ئەلشەعبی د یارییەكا بهێز دا، كوڕێن خابووری بەرانبەر تاقیكرنەكا بهێزە ئەوێن د پێنج یاریێن بوری دا سێ‌ سەركەفتن بەرانبەر دەربەندیخان 124-82 خالان، بەرانبەر غاز ئەلشیمال 90-47 خالان و بەرانبەر ئەلتیجارە 96- 89 خالان، لێ‌ دگەل هەر ئێك شورتە ب59-91 خالان و كەرخ 90-103 خالان تووشی خوسارەتیێ‌ بوویە.
د داخویانیەكا پێشتر دا دلژار عەدنان ئەندامێ‌ كارگێریێ‌ و سەرپەرشتێ‌ تیما زاخۆ بۆ ئەڤرۆ دیاركر بووك و پشتی دۆڤچوونەكا تەسەل ل سەر ئاست و ئەنجامێن دەستپێكێ‌ یێن تیمێ‌ هاتبوونە كرن یاری بۆ یاری تیما وان یا دكەڤیتە ل سەر ڕێیەكا دروست و ئەو ئەنجامێن خراب بەر ب باشتر دچن، د وێ‌ باوەریێ‌ داینە دێ‌ ئاست و ئەنجامێن باش یێن تیمێ‌ بەردەوام بن و هیڤی و ئۆمێدێن مە ئەم بشێن بەر ب رێزێن پێشیێ‌ بچین.

راهێنەرێ‌ یانەیا مانچستەر یۆنایتد یا ئنگلتەرایێ‌ ئێریك تین هاچ دیار كر ب بتنێ‌ چیڤانۆكێ‌ یانەیا مان یۆنایتد سیر ئەلێكسۆن ڤێرگسۆن دشێت قورتال بكەت و ڤەگەڕیانا وی چارەسەرییە، ئەڤچەندە هات پشتی بۆرینا هەیڤەكێ‌ و پێنج یارییان ئێكەم سەركەفتن ل شەڤا دەربازبوو بەرانبەر برینتفۆرد ژ خولا ئنگلتەرایێ‌ ئینای.
زێدەتر راهێنەرێ‌ ناڤهاتی بۆ B.A.MIDYA گۆت: پشتی دووماهی ناسناڤێ‌ یانەیا مانچستەر یۆنایتد ب سەرپەرشتییا راهێنەرێ‌ ئوسكوتلەندی و چیڤانكوێ‌ یانەیێ‌ ڤێرگسۆنی ل سالا 2013ێ‌ و هەتا نوكە یانە تووشی گەلەك ئاستەنگا بوویە و نەشیایە ناسناڤان ب دەستڤە بینت، سەرباری دەست كاركێشانا خوە ژ راهێنەراتییێ‌ و دیسان شیرەتكارێ‌ هونەری یێ‌ تیمێ‌ لێ‌ هەتا نوكە ژی مانچستەر یۆنایتد پێدڤی ب شیانێن وی نە و ڕزگاركەرێ‌ یانێ‌ یە، ژبەركو فێرگسۆن ئانكو مان یۆنایتد لەوما ژی ئەم پێدڤی ب شیانێن وینە و هاتنا وی د نوكە دا گەلەك یا فەرە و دێ‌ شێت تیما مە قورتالكەت.

ستێرێ‌ سربی و پلەدارێ‌ چارێ‌ یێ‌ جیهانێ‌ نۆڤاك دیۆكۆڤێچ بۆ یارییا تێنسا ئەردی دیار كر هێشتا ئەوی شیانێن هەین ناسناڤان ب دەستخوە ڤەبینت سەرباری پێگەهشتنا كۆمەكا یاریزانێن گەنج بۆ ئاستێن بلند و گەشیبینە ڤەگەڕیتە سەرێ‌ لیستێ‌.
د كۆنگرەیەكێ‌ رۆژنامەڤانی دا ناڤهاتی گۆت: یێ‌ خەم نینن كو من سەرێ‌ لیستێ‌ ژ دەستدایە ژبەركو ئەڤە وەرزشە ناچ ێبیت بەردەوام سەركەفتنان بینن و سەرێ‌ لیستێ‌ بین، وەرزش وەستاینە و شیانە و خۆراگری و شارەزاییە، هەردەمێ‌ یاریزان بۆ یارییەكێ‌ بەرهەڤ نەبیت پێشبینییا خوسارەتیێ‌ ژی یاهەیی، د نوكە دا كۆمەكا باش یا یاریزانێن گەنج خودان شیان هەنە پێنەڤێت دارێ‌ سێربەندێ‌ نینە بەلكو وەستیان و راهێنانێن بەردەوام كریینە نموونە یێ‌ ئیتالی یانیك سینر و یێ‌ ئسپانی كارلۆس ئالكاراز، لێ‌ هێشتا دبینم من شیانێن هەین باشتر نیشان بدەم و ب گەهمە سەركەفتنان و ڤەگەڕێمە سەرێ‌ لیستێ‌، هەرچەندە بۆ من ئاساییە نە گەهمێ‌ چنكو من تێرا خوە ناسناڤ و سەرێ‌ لیستێ‌ وەكو دیرۆك تۆماركرینە.

د داخویانیەكێ‌ دا ئەندامێ‌ فدراسیۆنا فوتبۆلا ئیراقێ‌ ڕاگەهاند یاریێن گەڕا چارێ‌ ژ هەڤڕكیێن خولا ستێرێن ئیراقێ‌ بۆ دووماهییا ڤێ‌ حەفتیێ‌ هاتنە پاشئێخستن ژبەر پشكدارییا سێ یانەیێن ئیراقی د هەڤڕكیێن ئاسیا و كەنداڤی دا.
زێدەتر غالب ئەلزاملی گۆت: هەرچەندە بڕیار بوو هەڤڕكیێن گەڕا چارێ‌ یا خولا ستێرێن ئیراقێ‌ ئەڤرۆ دەستپێكربان لێ‌ ژبەر پشكدارییا هەرسێ‌ یانەیێن ئیراقی، شورتە و جەوییە بۆ كۆپا ئاسیا و یانەیا دهۆك بۆ كۆپا كەنداڤی، ل دووڤ پەیرەوێ‌ رێنمایێن فدراسیۆنێ‌ ل ژبەركو دا كارتیكرن ل سەر خشتەیێ‌ یارییان نەكەت و ئەنجامدانا یاریێن دووڤدا و ل جهێ‌ سێ‌ یاری بهێنە پاشئێخستن بڕیار هاتە دان یاریێن گەڕا چارێ‌ هەموو بۆ دووماهییا ڤێ‌ حەفتیێ‌ بهێنە پاشئێخستن و بڤێ‌ شێوەیی خوارێ‌.
رۆژا پێنج شەمبی، ئەلقاسم- هەولێر، تەلەبە- ئەلكەرمە، نەفت، نەفت ئەلبەسرا، حدود- شورتە، رۆژا ئەینی، زەورا- زاخۆ، ئەلكەرخ- نەفت میشان، نورۆز- نەجەف، كەربەلا- مینا، رۆژا شەمبی، دهۆك- كارەبا، جەویە- دیالا.
ژلایەكێ‌ دووڤە ناڤهاتی ئەو دەنگۆیێ‌ دوورئێخستنا راهێنەرێ‌ هەلبژارتیێ‌ ئیراقێ‌ خیسۆس كاساس ب نەوەیی دەرئێخستن و گۆت: چو راستی بوو نینە و هەكە ئەنجام ژی خراب بن دێ‌ هەر ل سەر كارێ‌ خوە مینت، مە شەش یاری ماینە د چارچووڤەیێ‌ ڤاڤارتنێن ئاسیا بۆ كۆپا جیهانی دو یاری بەرانبەر ئوردن، یارییەك بەرانبەر هەر ئێك ژ كوریا باشۆر، فلەستین، كوەیت و عومانێ‌.
بۆ زانین ئەڤرۆد كۆپا ئاسیا بۆ قارەمانیێن یانەیێن ئاسیایی تیما یانەیا شورتە دێ‌ بەرانبەر یانەیا باختكۆر یا ئوزپاكی كەت، ژلایێ‌ خوەڤە یانەیا دهۆك سوبەهی دێ‌ مێڤاندارییا یانەیا ئەهلی سەنعا یا یەمەنی كەت ژ چارچووڤەیی كۆپا كەنداڤی، هەروەسان یانەیا جەویە چارشەمبییا بهێت دێ‌ بەرانبەر یانەیا ئەلخالدییە یا بەحرێنی كەت.