ئه‌ڤرۆ، رێوار محه‌مه‌د ره‌شید:

هونه‌رمه‌ند (محسن به‌ندی) د دیداره‌كێ‌ دا بۆ به‌رپه‌رێ‌ هونه‌ری یێ‌ رۆژناما ئه‌ڤرۆ ئاشكرا كر كو ئه‌و ژ كارێ‌ هونه‌ری دوور نه‌كه‌فتیه‌ و به‌رده‌وام كارێن خوه‌ یێن نوو یێن هونه‌ری ب رێیا سوشیال میدیایێ‌ و ته‌له‌ڤزیۆنا (ئامه‌د) پێشكێشی حه‌زژێكه‌رێن ده‌نگێ‌ خوه‌ دكه‌ت و نوكه‌ ژی مژوولی تۆماركرنا سترانه‌كێ‌ یه‌ كو بابه‌تێ‌ وێ‌ ل دۆر ئه‌ڤینیێ‌ یه‌ و ژڤانه‌ ل رۆژێن داهاتی ل پارێزگه‌ها دهۆكێ‌ كلیپ بكه‌ت، به‌لێ‌ ئه‌و كارێ‌ ئه‌كته‌ریێ‌ د ناڤ ڤێ‌ كلیپێ‌ دا ناكه‌ت و گۆت: “مودێلا به‌رهه‌مان نه‌مایه‌ ژ به‌ر ڤێ‌ چه‌ندێ‌ هزر د چێكرنا چو به‌رهه‌مان دا ناكه‌م و نوكه‌ كلیپه‌كا باش جهێ‌ به‌رهه‌مه‌كی دگریت”.

ناڤهاتی ئاماژه‌ دا وێ‌ چه‌ندێ‌ كو بۆ ده‌مێ‌ چه‌ندین سالان وی ب رێیا ده‌زگه‌هێ‌ (ئامه‌د) یێ‌ هونه‌ری خزمه‌تا هونه‌رمه‌ندێن كورد دكر، به‌لێ‌ نه‌خۆشیا وی بۆ ئه‌گه‌ره‌كێ‌ سه‌ره‌كی كو ده‌زگه‌هێ‌ ناڤهاتی بهێته‌ داخستن، لێ‌ پشتی ره‌وشا وی یا ساخله‌میێ‌ به‌ر ب باشبوونێ‌ ڤه‌ چوی نوكه‌ ته‌له‌ڤزیۆنه‌ك ب ناڤێ‌ (ئامه‌د) ڤه‌كریه‌ و ب رێیا ڤێ‌ ته‌له‌ڤزیۆنێ‌ خزمه‌تا هه‌موو هونه‌رمه‌ندێن كورد بێ‌ جوداهی دكه‌ت، هه‌روه‌سا بۆ ده‌مێ‌ پێنج سالانه‌ به‌رنامه‌كێ‌ هونه‌ری ژی بناڤێ‌ (كۆچكا ته‌له‌ڤزیۆنا ئامه‌د) پێشكێش دكه‌ت و گۆت: “ئه‌ز به‌رده‌وام پشته‌ڤانیێ‌ ل زارۆیێن خوه‌ دكه‌م كو بهێنه‌ د ناڤ جیهانا هونه‌ری دا و نوكه‌ كورێ‌ من (رۆژهات) ئێك ژ مۆیكژه‌نێن باشه‌ و ئامیرێ‌ ئورگێ‌ د ژه‌نیت و من نه‌ڤێت چوجاران ده‌رگه‌هێ‌ هونه‌ری ل مالا من بهێته‌ داخستن”.

ئه‌ڤرۆ، هه‌رهین محه‌مه‌د:

سترانبێژێ‌ گه‌نج سابر شێلادزی، د دیداره‌كێ‌ دا بۆ به‌رپه‌رێ‌ هونه‌ری یێ‌ رۆژناما ئه‌ڤرۆ دیاركر كو نوكه‌ ئه‌و یێ‌ راهێنانان ل سه‌ر ده‌نگێ‌ خوه‌ بۆ سترانان دكه‌ت ب زمانێ‌ كوردی و عه‌ره‌بی ژ به‌ر كو وی ناڤێ‌ خوه‌ تۆماركریه‌ بۆ پشكداریكرنێ‌ د به‌رنامێ‌ (عیراق ئایدول) دا.

زێده‌تر ژی گۆت: هه‌تا نوكه‌ من ل به‌ر نینه‌ سترانا دوقۆلی چێكه‌م، به‌لێ‌ هه‌كه‌ داخواز ژ من هاته‌ كرن ژ لایێ‌ سترانبێژه‌كی ڤه‌ یێ‌ ئاماده‌مه‌ و هه‌تا نوكه‌ ژی من ئه‌و چه‌نده‌ نه‌كریه‌ د سه‌رێ‌ خوه‌ دا كو بێژم خوه‌زی سترانا فلان هونه‌رمه‌ندێ‌ نه‌مر یا من با و من گۆتبا، به‌لێ‌ حه‌زدكه‌م سترانێن وان بێژم ل هه‌ر جهه‌كی بیت چ ل روونشتنا بن، یان ده‌واتان بن و گه‌له‌ك جاران ب رێیا سوشیالێ‌ داخواز ژ من دهێته‌كرن و من پشكداری ل ئاهه‌نگێن نه‌ته‌وه‌یی و سه‌رێ‌ سالان و به‌رنامێن ته‌له‌ڤزیونی و به‌رنامێن به‌ریكانان دا كریه‌ و نوكه‌ خودانێ‌ دو كلیپا مه‌ و ل نێزیك دێ‌ ده‌ست ب كاره‌كێ‌ دی یێ‌ نوی كه‌م و سترانان دبێژم دا به‌رنیاس بم و ده‌مێ‌ مرۆڤ چوو د مه‌یدانا ستران گۆتنێ‌ دا مرۆڤ نه‌شێت ل گه‌ل هونه‌ری كاره‌كێ‌ دی بكه‌ت و پێدڤیه‌ مرۆڤ ل سه‌ر كاره‌كی ب راوه‌ستیت دا كو باشی ئه‌نجام بده‌ت و بژیت.

ئه‌ڤرۆ، زنار تۆڤی:
هونه‌رمه‌ند ژیان ئارژین، د دیداره‌كێ‌ دا بۆ رۆژناما ئه‌ڤرۆ دیار كر: ئه‌و خه‌لكێ‌ ئامه‌دێ‌ یه‌ ل باكۆرێ‌ كوردستانێ‌، د ژیێ‌ حه‌فت سالیێ‌ دا هه‌تا نوكه‌ ئه‌و د ناڤ هونه‌ری دا یه‌ و بابێ‌ وی ژی سترانبێژه‌كێ‌ ناڤدار بوویه‌ ل باژێرێ‌ ئامه‌دێ‌ و د هه‌مان ده‌مدا مۆزیكژه‌ن ژی بوویه‌ و ئامیرێ‌ جۆمبشێ‌ دژه‌نی، دیسان مالباتا وی گه‌له‌ك پشته‌ڤانی لێ‌ كریه‌ و هه‌ڤژینا وی ژ هه‌موویان پتر پشته‌ڤانیێ‌ ل كارێ‌ وی دكه‌ت، ل سالا 2011 چوویه‌ وه‌لاتێ‌ ئه‌لمانیا و هه‌تا نوكه‌ ل وی وه‌لاتی دژیت، ل سالا 2017 ئه‌لبۆما خوه‌ یا ئێكێ‌ ب ناڤێ‌ ” هێڤیێن نێز ” تۆمار كریه‌، كو ژ هه‌شت تراكان پێك دهات، هه‌روه‌سا هه‌تا نوكه‌ دو كلیپ ژی ب شێوێ‌ پرۆفێشنال چێكرینه‌ و پشكداری د چه‌ندین به‌رنامان دا ل ته‌له‌ڤزیۆن و رادیۆیان دا كریه‌، نوكه‌ ژی مژوولی تۆماركرنا ئه‌لبۆما خوه‌ یا دویێ‌ یه‌ و وی لبه‌ره‌ چار سترانان د وێ‌ ئه‌لبۆمێ‌ دا تۆمار بكه‌ت، د هه‌مان ده‌م دا وی ستۆدیۆیه‌ك د ناڤ مالا خوه‌ دا چێكریه‌ و هه‌موو كارێن خوه‌ یێن هونه‌ری ئه‌و چێدكه‌ت و تۆمار دكه‌ت.
ناڤهاتی گۆت ژی: نوكه‌ ره‌وشا مۆزیك و سترانا كوردی د ئاسته‌كێ‌ خراب دایه‌، رۆژ بۆ رۆژێ‌ به‌ر ب خرابتر ڤه‌ دچیت و ڤێ‌ چه‌ندێ‌ وه‌كریه‌ كو ڤالاهیه‌كا مه‌زن دناڤبه‌را هونه‌رمه‌ندان و حه‌ز ژێكه‌رێن سترانا كوردی دا په‌یدا ببیت، هه‌روه‌سا هه‌تا راده‌كێ‌ كۆرۆنایێ‌ ژی كارتێكرن ل كارێ‌ مه‌ یێ‌ هونه‌ری كریه‌ و ئه‌م نه‌شیاینه‌ وه‌كو پێدڤی خزمه‌تا هونه‌رێ‌ خوه‌ بكه‌ین، دیسان د وارێ‌ مۆزیكێ‌ ژی دا كار دكه‌ت و ئامیرێن وه‌كو سازێ‌ و جۆمبشێ‌ و عۆدێ‌ و گیتارێ‌ دژه‌نیت، ئه‌و پتر حه‌ز ژ موزیكا كلاسیك یا كوردی دكه‌ت و دیسان ئه‌و پتر ب گیتارێ‌ ڤه‌ مژوول دبیت و پتر حه‌ز ژ وی ئامیرێ‌ مۆزیكێ‌ دكه‌ت.
ناڤبری دیار كر كو ئه‌و لبه‌ر ده‌نگێ‌ هونه‌رمه‌ندێن نه‌مر ته‌حسین ته‌هایی و محه‌مه‌د عارفێ‌ جزیری و محه‌مه‌د شێخۆیی و كاراپێتێ‌ خاچۆیی و ئه‌یازی مه‌زن بوویه‌، ل گه‌ل هندێ‌ وی ستایلێ‌ خوه‌ یێ‌ تایبه‌ت هه‌یه‌ و ئه‌و ب ستایلێ‌ پۆپێ‌ سترانان دبێژیت، هه‌روه‌سا ئه‌و وانێن مۆزیكێ‌ دبێژیته‌ پتری 25 قۆتابیان و ئه‌و وان فێری ئامیرێ‌ عۆدێ‌ و گیتارێ‌ و سازێ‌ و جۆمبشێ‌ دكه‌ت و هه‌تا نوكه‌ وی پتری 130 كه‌سان فێری موزیكێ‌ كرینه‌ و نۆتێن موزیكێ‌ نیشا وان داینه‌، هه‌ر چه‌نده‌ نوكه‌ گه‌له‌ك ئاریشه‌ و كێماسی دناڤا موزیكا كوردی دا هه‌نه‌.
ژیان هێشتا دبێژیت: دناڤا سترانبێژێن جیهانی دا كارتێكرنا مایكل جاكسۆنی گه‌له‌ك ل سه‌ر من هه‌بوویه‌، نوكه‌ ژی ده‌مێ‌ ئه‌ز ته‌ماشه‌ی كلیپێن وی دكه‌م، ئه‌ز فێری تشتێن نوو دبم د وارێ‌ هونه‌ری دا، هه‌روه‌سا مه‌ تێكه‌لیێن گه‌له‌ك كێم ل گه‌ل هونه‌رمه‌ندێن ئه‌لمانی هه‌نه‌، دیسان هه‌تا نوكه‌ ب تنێ‌ من پشكداری د چار كۆنسێرتێن ئه‌لمانی دا كریه‌ و ئه‌ڤه‌ ژی تشته‌كێ‌ گه‌له‌ك كێمه‌، هه‌تا راده‌كێ‌ خه‌مساری ژ مه‌ ژی بوویه‌، هه‌روه‌سا مه‌ چو پرۆژێن هه‌ڤپشك ژی ل گه‌ل سترانبێژێن ئه‌لمانی چێنه‌كرینه‌.
ژیانی ئه‌و ژی ئاشكرا كر: ل ده‌رڤه‌ی وه‌لاتی چێكرنا كارێن هونه‌ری كاره‌كێ‌ ب زه‌حمه‌ته‌، چونكی موزیكژه‌ن گه‌له‌ك ژێك د دوورن و هه‌تا ئه‌م كاره‌كێ‌ هونه‌ری تۆمار دكه‌ین، گه‌له‌ك ده‌م پێڤه‌ دچیت، هه‌تاكو ئه‌م چێدكه‌ین، دیسان ئه‌م نه‌شێین كۆنسێرتێن هونه‌ری ژی ل وه‌لاتێ‌ ئه‌لمانیا بكه‌ین، چونكی كورد ژێك د دوورن و ئه‌م نه‌شێن هند مرۆڤان كۆمڤه‌ بكه‌ین، لێ‌ ب تنێ‌ د هه‌لكه‌فتێن نه‌ته‌وه‌یی دا كورد ل هه‌ڤدو كۆمڤه‌ دبن، دیسان خه‌لكێ‌ ئه‌لمانی ژی د كوردیێ‌ ناگه‌هن، له‌وما ل ئاهه‌نگ و كۆنسێرتێن كوردان به‌رهه‌ڤ نابن.

ئه‌ڤرۆ، هه‌رهین محه‌مه‌د:

لێده‌رێ‌ ئامیرێ‌ عودێ‌ مه‌سعود محه‌مه‌د ئاكره‌یی، د دیداره‌كێ‌ دا بۆ به‌رپه‌رێ‌ هونه‌ری یێ‌ رۆژناما ئه‌ڤرۆ گۆت: مۆزیكێ‌ هه‌ست و ڤیان ل ده‌ڤ من په‌یداكریه‌ و شیایه‌ تێكه‌لی خوینا من بیت و بوویه‌ ئه‌گه‌ره‌ك كو هه‌ر ده‌مێ‌ هه‌ست ب بهێن ته‌نگیێ‌ و بتنێ‌ بوونێ‌ بكه‌م خوه‌ ب مۆزیكێ‌ ڤه‌ مژوول دكه‌م و پێ‌ ئارام دبم و دشێم هه‌تا چار ده‌مژمێران بێ‌ كو ب راوه‌ستم عودێ‌ ب ژه‌نم، چونكو ده‌مێ‌ مۆزیكێ‌ دژه‌نم به‌رب جیهانه‌كا دی دچم و خوه‌ ژبیرڤه‌ دكه‌م و ئامیرێ‌ من یێ‌ سه‌ره‌كی عوده‌، به‌لێ‌ ژبلی عودێ‌ ئامیرێ‌ كه‌مانێ‌ و سازێ‌ ژی دزانم ب ژه‌نم.

ل دووماهیێ‌ مه‌سعودی گۆت: نه‌هه‌ر كه‌سه‌كێ‌ بۆ دێ‌ بیته‌ مۆزیكژه‌ن و فێربوونا ئامیره‌كێ‌ مۆزیكێ‌ نه‌هندا ب ساناهیه‌ و گه‌له‌ك ده‌م پێ‌ دڤێت هه‌تا كو مرۆڤ فێربیت و ل گه‌ل هندێ‌ ژی دڤێت مرۆڤی حه‌زا مۆزیكێ‌ هه‌بیت دا كو ب شێوه‌كێ‌ باش فێربیت و ئه‌و ژه‌نینه‌ بۆ گوهێن خه‌لكی یا خوه‌ش بیت و مۆزیكژه‌نێ‌ راسته‌قینه‌ ئه‌وه‌ شیانێن خوه‌ بۆ یێن هونه‌ری بۆ خه‌لكی دیاركه‌ت ب وی ئامیرێ‌ ئه‌و دژه‌نت و راسته‌ ل وه‌لاتێن بیانی مۆزیك ل سه‌ر جاده‌یان دهێته‌ ژه‌نین و ب وی داهاتی ژیانا خوه‌ پێ‌ دبورینن، به‌لێ‌ هێشتا جڤاكێ‌ مه‌ نه‌گه‌هشتیه‌ وی ئاستی وه‌كو مۆزیكژه‌نێن ئورۆپی مۆزیكێ‌ ل سه‌ر جاده‌یان ب ژه‌نن.