به‌رواری بالا، زنار تۆڤی:
ژ ئه‌گه‌رێ تۆپبارانا سۆپایێ توركیا ل گوندێ هرۆرێ یا گرێدایی ناحیا كانی ماسێ سێ وه‌لاتیێن وی گوندی ژه‌هراوی بووینه و بۆ نه‌خۆشخانێ هاتینه ڤه‌گوهاستن.
گۆهدار محه‌مه‌د خالد، هاریكارێ نۆشداری و رێڤه‌به‌رێ بنگه‌هێ ساخله‌میێ ل كۆمه‌لگه‌ها بریفكا بۆ رۆژناما ئه‌ڤرۆ دیار كر، ل شه‌ڤا بۆری تۆپخانێن سۆپایێ توركیا ده‌وروبه‌رێن گوندێ هرۆرێ تۆپباران كرینه، تۆپه‌ك ژ وان 100 مه‌تران نێزیكی مالا وه‌لاتیه‌كێ گوندی ب ناڤێ “عه‌بدوللا “، كه‌فتی یه، دۆكێله‌كا سپی ژێ ده‌ركه‌فتیه، ئه‌ندامێن وێ خێزانێ كو سێ كه‌س بووینه، زه‌لامه‌ك و هه‌ڤژینا خوه و كچا وان تۆشی بهێنته‌نگیێ و دلرابوونێ بووینه، هه‌روه‌سا سه‌روچاڤێن وان ژی سۆتینه.
ناڤهاتی گۆت ژی: هه‌ر زوو رێڤه‌به‌رێ ناحیا كانی ماسێ ئه‌م ل سه‌ر وی بابه‌تی هایدار كرینه، مه ژی هه‌موو به‌رهه‌ڤی كرن و مه چاره‌سه‌ریا ده‌ستپێكی بۆ كر و گۆت: “ل دووڤ پێشبینیێن مه ئه‌و غازا د ناڤا وێ تۆپێ دا ژ جۆرێ “ئێچ ئار” یێ ژه‌هراوی بوونێ یه، نوكه مه‌ترسیا مرنێ ل سه‌ر ژیانا وان نه‌مایه، لێ د پاشه‌رۆژێ دا دێ مه‌ترسی ل سه‌ر ژیانا وان مینن، دێ بهێنته‌نگی و گه‌له‌ك جاران ئه‌ڤ جۆرێ غازێ په‌نجه‌شێرێ ژی ل نك كه‌سێ تووشبوویی په‌یدا دكه‌ت، هه‌كه تۆپباران كرن ب ڤی ره‌نگی بیت، دێ ژیان ل گوندێ هرۆرێ ب زه‌حمه‌ت كه‌ڤیت”.
نيشاندان