ئه‌ڤرۆ، هه‌رهین محه‌مه‌د:

ماموستایه‌كا باخچێ‌ زارۆیان دیاردكه‌ت كو وانا هونه‌ری گرنگیه‌كا مه‌زن هه‌یه‌ بۆ زارۆیی ل باخچه‌ی و پێدڤیه‌ هه‌رباخچه‌ك وه‌كو وانێن دی گرنگیێ‌ ب وانا هونه‌ری بده‌ن، چونكو هنده‌ك باخچه‌ هه‌نه‌ وه‌كو پێدڤی هونه‌ری و پشكێن وێ‌ بۆ زارۆیی دیارناكه‌ن و بتنێ‌ ره‌نگا و كاغه‌زی َده‌نه‌ف زارۆیی و خوه‌ پێڤه‌ مژوویل بكه‌ن.

ناریمان نافع زه‌كی، ماموستایا باخچێ‌ قه‌سارا بۆ به‌رپه‌رێ‌ په‌روه‌رده‌و زانكۆ  گۆت: هه‌تا نوكه‌ من نه‌ دیتیه‌ ل قوناغا باخچه‌ی هه‌تا كو ل قوناغێن دووماهیێ‌ ل ئاستێ‌ خاندنێ‌ پویته‌ ب وانا هونه‌ری دابیت و هه‌كه‌ پویته‌ ژی ب وا نا هونه‌ری بده‌ن هنده‌ك ره‌نگان و گه‌ل لاپه‌ره‌كی دانه‌ به‌رسنگێ‌ وان و خوه‌ پێڤه‌ مژوول دكه‌ن، ئانكو چو تشتێ‌ دی بۆ وان ناهێته‌ نیشاندان هونه‌رچیه‌ و چ پێكهاتیه‌ و چه‌ند به‌شن وه‌كو ئه‌ز دبینم هه‌رژده‌ستپێكا ژیێ‌ زارویی چه‌وان پیتێن زمانێ‌ كوردی دزانیت وه‌سا دڤێت زارۆ ژ ده‌ستپێكێ‌ بنیاتێ‌ هونه‌ری ژی ب زانیت، له‌ورا دخازم وه‌كو ماموستایه‌ك رێكا راست و درست نیشا قوتابیا و زارۆیان بده‌ین ل هه‌ر ئاسته‌كێ‌ دی یێ‌ خاندنێ‌ بیت ب تایبه‌ت ل قوناغا باخچه‌ی  و ل باخچێ‌ مه‌ ئه‌ز گه‌له‌ك گرنگیێ‌ ب وانا هونه‌ری ده‌م و گه‌له‌ك زه‌حمه‌تێ‌ دبه‌م هه‌تا كو نیشا زارۆیانده‌م كا هونه‌رچیه‌ و ژ چ پێكهاتیه‌ نه‌كو بتنێ‌ كاغه‌زێ‌ و ره‌نگان ده‌ینه‌ف زارۆیان و خوه‌ پێڤه‌ مژوول بكه‌ن و ل باخچه‌ی ئه‌م شانویان پێدكه‌ین و رێكێ‌ ده‌ینێ‌ سترانێن زارۆیان بێژن هه‌رتشته‌كێ‌ هه‌بیت گرێدای هونه‌ری بیت ئه‌م نیشا زارۆیی ده‌ین، چونكو زارۆیی گه‌له‌ك شیان هه‌نه‌ و زویكا تشتی وه‌ردگریت و فێردبیت

ناریمانێ‌ گۆت: چو جاران ل گه‌ل هندێ‌ نینم ل باخچان سترانێن مه‌زنان بهێنه‌ گۆتن، چونكو دڤێت زارۆ ل دووڤ ژیێ‌ خوه‌ سترانان بێژیت، چونكو هه‌كه‌ ستران لدووڤ ژیێ‌ زارۆیی بیت دبیت مفایی ژی َوه‌رگریت و سترانا مه‌زنان بۆ زارۆیێ‌ باخچه‌ی نه‌یا گۆنجایه‌ و دبیت هنده‌ك په‌یڤ هه‌نه‌ نابیت زارۆیێ‌ باخچه‌ی بێژت و بزانت و دیسان گه‌له‌ك باخچه‌ هه‌نه‌ وانا هونه‌ری كریه‌ وانا یاریا و یاریا ده‌نه‌ف زارۆیان بتنێ‌ دا خوه‌ پێڤه‌ مژوول بكه‌ن و رێڤه‌به‌رێن باخچان به‌رده‌وان كومبوونا ب ماموستایان ژی دكه‌ن دبێژنێ‌ نه‌بتنێ‌ زارۆیان ب یاریا و ره‌نگاڤه‌ مژوول بكه‌ن زارۆیان فێری وانا هونه‌ری بكه‌ن و هه‌وه‌ هزره‌ك هه‌بیت ب زارویان بده‌نه‌ كرن ئانكو شانوهه‌بن ماموستا ل گه‌ل قوتابی شانویێ‌ ب گێریت بتنێ‌ دا زارۆ فێر بیت و شه‌رمێ‌ نه‌كه‌ت و یا ژ گه‌له‌ك كه‌سان ڤه‌ ل قوناغا باخچه‌ی بتنێ‌ مژوولكرنا زارۆیانه‌ دبیت ئه‌ڤ چه‌نده‌ ل ده‌مه‌كی هه‌بوویه‌، به‌لێ‌ نوكه‌ پتریا  باخچان زارۆیی به‌رهه‌ڤ دكه‌ن بۆ قوناغا باخچه‌ی و گه‌له‌ك جاران ژی ده‌ستخوه‌شی بۆ مه‌هاتینه‌ ژلایێ‌ ماموستایێن قوناغا سه‌ره‌تایی ڤه‌ كو دبێژن هه‌وه‌ زارۆك یێن ئاماده‌كرین و ئه‌م گه‌له‌ك زه‌حمه‌تێ‌ ڤێرا نابه‌ین و گه‌له‌ك تشتان ئه‌و بخوه‌ دزانن، چونكو ل قوناغا باخچه‌ی فێربوویه‌ وه‌كو ژماره‌ و پیتێن كوردی و یت ئنگلیزی و گه‌له‌ك تشتێن دی و دبینم ئه‌و وه‌ستیانا ئه‌م ب زارۆیان ڤه‌ دبه‌ین ماموستایێن قوناغا سه‌ره‌تایی هند پێڤه‌ نابه‌ن، چونكو ل قوناغا باخچه‌ی سه‌رێ‌ زارۆیی یێ‌ ڤالایه‌ دزڤێت ئه‌م گه‌له‌ك پێزانینا بده‌ینێ‌ و هه‌تا كو دچیته‌ قوتابخانێ‌ دڤێت وان پێزانینا به‌رفره‌هتر لێ‌ كه‌ت و

ناڤهاتیێ‌ ئه‌و چه‌نده‌ژی گۆت: ئه‌و باخچێن گرنگیێ‌ ب وانا هونه‌ری نه‌ده‌ن گرنگیێ‌ ب وانه‌كا دی ده‌ن وه‌كو بیركاری و كوردی و ئینگلیزی و دبینم ئه‌ڤه‌ یا خه‌له‌ته‌ و هونه‌ر ژی بابه‌ته‌ وه‌كو هه‌موو بابه‌تێن دی و دڤێت گرنگی پێ‌ بهێته‌ دان و دوێ‌ وانێ‌ دا زارۆ خوه‌ ئارام دبینت و بۆ چوونا من چو جوداهی دناڤبه‌را باخچێ‌ حكومی و نه‌حكومی دانینه‌ و دبینم باخچێ‌ حكومی پتری باخچێن نه‌حكومی گرنگیێ‌ ده‌نه‌ وانا هونه‌ری و زارۆیی، چونكو نوكه‌ پتریا ماموستایێن باخچه‌ی تایبه‌تمه‌ندن.

دیدار، شاكر ئه‌تروشی:

مه‌سعود خالد گولی، سه‌رنڤیسه‌رێ‌ كۆفاره‌ سڤۆره‌، كو ئه‌ڤه‌ ماوه‌كێ‌ كێمه‌ ئه‌و پوست وه‌رگرتی، د دیداره‌كا تایبه‌ت دا ل گه‌ل رۆژناما ئه‌ڤرۆ ئاشكر كو كو ئێك ژ ئاریشێن هه‌ره‌ مه‌زنێن وان نه‌بوونا چو میكانیزمێن گونجایه‌ بۆ به‌لاڤكرنا كۆفارێ‌ و ب گۆتنا وی به‌رێ‌ و نوكه‌ ژی وه‌ك پێدڤی كۆفار نه‌گه‌هشتیه‌ هه‌موو جهان، له‌ورا هنده‌ك جاران هزر ا داخستنا وێ‌ ژی هاتیه‌ كرن، ده‌رباره‌ی ڤه‌كرنا كه‌ناله‌كێ‌ ته‌له‌فزیۆنی یێ‌ تایبه‌ت ب زارۆیان ڤه‌ ب ناڤێ‌ (كه‌نالێ‌ سڤۆره‌ یێ‌ زارۆیان) كو گرێداری كۆڤارا وان بیت، گۆت: بۆ ڤه‌كرنا كه‌ناله‌كێ‌ وه‌سا جه و ئامیره‌ و ستاف و مه‌زاختیه‌كێ‌ زۆر پێ‌ دڤێت، له‌ورا دڤی ده‌می دا دێ‌ یا ب زه‌حمه‌ت بیت،، لێ‌ چێدبیت ده‌مێ‌ زه‌مینه‌ خوه‌ش دبیت، جڤاتا ناڤه‌ندێ‌ ب هه‌ڤكارییا ته‌له‌ڤزیۆنا دهۆك و كۆڤارا سڤۆره‌ پێكڤه‌ بشێن ڤێ‌ بزاڤێ‌ بكه‌نه‌ راستی.

ئه‌ڤرۆ: پشتی تۆ بوویه‌ سه‌رنڤیسه‌ر، پلانا هه‌وه‌ چیه‌ بۆ پێشخستنا كۆڤارێ‌ د هه‌ر واره‌كی دا؟

پێشخستنا كۆڤارا مه‌ ده‌رگه‌هه‌كێ‌ ب تنێ‌ ب خوه‌ ڤه‌ ناگرت، چونكو د سالێن بۆری دا، د گه‌له‌ك واران دا كۆڤارا مه‌ ڤه‌ مابوو، و پترییا ڤێ‌ ڤه‌مانێ‌ ژی په‌یوه‌ندی ب ره‌وشا ناله‌بارا سیاسی و ئابووری و ساخله‌مییا وه‌لاتێ‌ مه‌ ڤه‌ هه‌بوو، كو خراب بوونا ڤێ‌ ره‌وشێ‌، مه‌ بڤێت نه‌ڤێت كاریگه‌ری ل سه‌ر هه‌موو وارێن ژیانا هاولاتیێن مه‌ كربوو، ئه‌م ژی وه‌ك كۆڤار ژ ڤێ‌ كاریگه‌ریێ‌ بێ به‌هر نه‌بووین. لێ‌ نوكه‌ وارێن كو مه‌ ل به‌ره‌ هه‌ولا پێشخستنا وان بده‌ین، دێ‌ ئه‌ڤێن خوارێ‌ بن:

د وارێ‌ هزری ڤه‌: مه‌ په‌یوه‌ندییێن مه‌یدانی ب هنده‌ك ده‌روونناس و مامۆستا و نڤیسه‌ر و خه‌مخۆرێن وارێن زارۆیان، هه‌روه‌سا هنده‌ك رێكخراوێن كو گرنگیێ‌ دده‌نه‌ پاراستن و گه‌شه‌كرنا زارۆیان، كرینه‌، ئه‌و ب زاره‌كی یان ب نڤیسین، هاریكار و رێنیشانده‌رێن مه‌ بووینه‌ بۆ بكارئینانا دروستترین سه‌ره‌ده‌ری ل گه‌ل ڤێ‌ توێژا نازك و دارشتنا هێژاترین نڤیسین كو ل گه‌ل هزر و ته‌مه‌نێن جودا جودا یێن زارۆك و خوانده‌ڤانێن كۆڤارا مه‌ بگونجت.

د وارێ‌ نڤیسینێ‌ دا: هه‌تا به‌ری نوكه‌ كه‌سێن كو بۆ كۆڤارا مه‌ دنڤیسین، پتریا وان نڤیسه‌رێن گه‌نجێن سنورێ‌ پارێزگه‌ها دهۆكێ‌ بوون، لێ‌ نوكه‌ ژ لایه‌كی ڤه‌ مه‌ په‌یوه‌ندی ب نڤیسه‌رێن باژێرێن دی یێن هه‌رێمێ‌، هه‌روه‌سا یێن پارچێن دی یێن كوردستانێ‌ ژی كریه‌ و ژ لایه‌ك دیڤه‌ ستافێ‌ نوو یێ‌ كۆڤارێ‌ ژی خودان هزرێن هێژا و قه‌له‌مێن تازه‌نه‌فه‌سن، ب باوه‌را مه‌ ئه‌ڤه‌ دێ‌ وه‌ كه‌ت كو بابه‌تێن جۆراو جۆرتر و بژاره‌تر د كۆڤارێ‌ دا بهێنه‌ وه‌شاندن.

د وارێ‌ هونه‌ری دا: مه‌ دیزاینا كۆڤارێ‌ ژ ره و ریشال یا گۆهارتی و ئه‌ڤ دیزاینه‌ د هه‌موو هژمارێن داهاتی دا دێ‌ به‌رده‌وام بت. هه‌روه‌سا دێ‌ د ئاینده‌ی دا هه‌ول ده‌ین پتریا نیگارێن كۆڤارێ‌ ژ به‌رهه‌مێ‌ نیگاركێشێ‌ مه‌ بخوه‌ بن و كێمتر ژ كۆڤارێن بیانی و ئینته‌رنێتێ‌ مفای وه‌ربگرین.

ئه‌ڤرۆ: هه‌وه‌ به‌حسێ‌ نڤیسینێ‌ كر، ئه‌رێ‌ ب دیتنا هه‌وه‌، هوون چاوا دبینن، زارۆك بۆ زارۆكی بنڤیست یان مه‌زن بۆ زارۆكی بنڤیست، و هون ل كۆڤارا خوه‌ گرنگیێ‌ دده‌نه‌ كیژك ژ وان؟

مسۆگه‌ر زارۆكی هندی نڤیسه‌رێن ب ته‌مه‌ن، پاشخانا هزری و زانستی و ئه‌ده‌بی نینه‌، كو بشێت بۆ هه‌ڤته‌مه‌نێن خوه‌ بنڤیست، لێ‌ ئه‌ڤه‌ نائێته‌ وێ‌ واتایێ‌ كو نابت ئه‌و بنڤیست، مه‌ د ڤی واری دا، ل كۆڤارا خوه‌ سێ‌ ده‌رگه‌ه یێن ڤه‌كرین. ده‌رگه‌هێ‌ ئێكێ‌ كو پتر ژ نیڤا لاپه‌رێن كۆڤارێ‌ یێن بخوه‌ڤه‌ گرتین، مه‌زن بۆ زارۆكی دنڤیسن، ده‌رگه‌هێ‌ دویێ‌ ژی شه‌ش لاپه‌ر مه‌ یێن ته‌رخان كرین بۆ بزاڤێن زارۆیان بخوه‌، دا بشێن به‌رهه‌مێن خوه‌ یێن ئه‌ده‌بی و هونه‌ری تێدا به‌رچاڤ بكه‌ن، و مه‌ ئه‌ڤ ده‌رگه‌هه‌ یێ‌ بۆ وان ڤه‌كری وه‌ك پشته‌ڤانییه‌ك بۆ وان دا بشێن ل پاشه‌رۆژێ‌ ببنه‌ هونه‌رمه‌ند یان نڤیسه‌رێن هه‌ژی، لێ‌ د ڤی ده‌رگه‌هی دا ژی ئه‌م بژاره‌ترین به‌رهه‌مێن وان هه‌لدبژێرین و مایێ‌ خوه‌ د هزر و بۆچوونێن وان ناكه‌ین، لێ‌ ژ لایێ‌ رێنڤیسێ‌ ڤه‌، هه‌كه‌ وان شاشی كربن ئه‌م بۆ وان په‌یڤێن وان راستڤه‌ دكه‌ین و ژنوو به‌لاڤ دكه‌ین. هه‌روه‌سا ده‌رگه‌هێ‌ سێیێ‌ ژی مه‌ بۆ بێهنڤه‌دان و دلخوه‌شكرنا زارۆیان یێ ته‌رخان كری، كو ئه‌و ژی شه‌ش لاپه‌ران بخوه‌ڤه‌ دگرت، و هنده‌ك ژ ڤان شه‌ش لاپه‌ران، بۆ نموونه‌ گۆشا گڕنژین ژ لایێ‌ زارۆیان بخوه‌ڤه‌ دهێته‌ به‌رهه‌ڤكرن و هنده‌ك ژ ڤان شه‌ش لاپه‌ران ژی ژ لایێ‌ مه‌زنان ڤه‌ دهێنه‌ ئاماده‌كرن.

ئه‌ڤرۆ: ئه‌رێ‌ وه‌ د وارێ‌ به‌لاڤكرنا كۆڤارێ‌ دا ئاریشه‌ هه‌بوون؟

به‌لێ‌ بێگومان، به‌رێ‌ و نوكه‌ ژی، مه‌زنترین ئاریشا مه‌ به‌لاڤكرنا كۆڤارێ‌ یه‌، و ب راستی به‌ری نوكه‌ ئه‌ڤ ئاریشه‌یه‌ هند مه‌زن بوو كو هنده‌ك جاران هزر ل دائێخستنا كۆڤارێ‌ دهاته‌ كرن. ئاریشه‌ ئه‌وه‌ كو به‌لاڤكه‌رێن مه‌ دشیان و دشێن كۆڤارێ‌ بگه‌هیننه‌ پرتووكخانه‌یان، لێ‌ زارۆك ناچنه‌ بازارێ‌ پرتووكفرۆشان و پترییا دایك و بابێن وان ژی، وان نابه‌نه‌ پرتووكخانه‌یان دا بۆ خوه‌ پرتووك و كۆڤارا بكڕن، دیسان ئه‌و دشیان و دشێن كۆڤارێ‌ ببه‌نه‌ ماركێتان، لێ‌ پترییا ماركێتان ب بهانه‌یێن جۆراوجۆر كۆڤار ژێ‌ وه‌رنه‌دگرتن و وه‌رناگرن، ئه‌و دشیان و دشێن كۆڤارێ‌ بگه‌هیننه‌ كته‌كا گه‌له‌ك كێم ژ قوتابخانه‌یان، و بۆ ڤێ‌ مه‌به‌ستێ‌ رێڤه‌به‌رییا په‌روه‌ردێ‌ هاریكار نه‌بوویه‌ و نوكه‌ ژی هێژ چ هیڤی نینن كو ئه‌و د هاریكار بن، هه‌روه‌سا گه‌هاندنا كۆڤاران بۆ باژێر و باژیركێن دی یێن هه‌رێمێ‌ ب زه‌حمه‌ت بوو و نوكه‌ ژی ب زه‌حمه‌ته‌، چونكی تێچوویێ‌ گه‌هاندنێ‌ ژ مفایێ‌ كۆڤارێ‌ پتره‌.

ئه‌ڤرۆ: پا نوكه‌ وه‌ چ هه‌ول داینه‌ بۆ باشتركرنا ره‌وشا به‌لاڤكرنا كۆڤارا خوه‌؟

نوكه‌ مه‌ هنده‌ك سه‌ره‌دانێن مه‌یدانی یێن بۆ قه‌زا و ناحیێن سه‌ر ب پارێزگه‌ها دهۆكێ‌ ڤه‌ كرین و ئه‌م ل گه‌ل هنده‌ك پرتووكخانه‌یان یێن رێكه‌فتین، كو ئه‌م ب هه‌ڤڕا كۆڤارا سڤۆره‌ بگه‌هینینه‌ سنۆره‌كێ‌ به‌رفره‌هتر، و دێ‌ ئه‌ڤ هه‌وله‌ د به‌رده‌وام بن دا خوانده‌ڤان و پشكدارێن مه‌ زێده‌تر لێ‌ بهێن، هه‌روه‌سا ژبه‌ركو نوكه‌ بینه‌ر و خوانده‌ڤانێن سۆشیال میدیایێ‌ ژی یێن گه‌له‌ك زێده‌ بووین، مه‌ ژی هه‌م وه‌ك ناڤه‌ندا خانی و هه‌م وه‌ك كۆڤارا سڤۆره‌ په‌یچ و سایتێن تایبه‌ت ب خوه‌ یێن ڤه‌كرین و ئه‌م كۆڤارا خوه‌ تێدا دوه‌شینین، هه‌رچه‌نده‌ ئه‌ڤ پێنگاڤه‌ یا نوویه‌، لێ‌ رۆژ بۆ رۆژێ‌ بینه‌ر و خوانده‌ڤانێن مه‌ ل سۆشیال میدیایێ‌ ژی یێ‌ زێده‌ دبن.

هه‌ژی گۆتنێ‌ یه‌ كو پتریا خوانده‌ڤانێن كۆڤارا مه‌ ل به‌رێ‌ و نوكه‌ ژی، قوتابیێن هێژا بووینه‌، لێ‌ مخابن ژ به‌ر ره‌وشا ساخله‌میێ‌ و هاتنا كۆرۆنایێ‌، و گرتنا ده‌رگه‌هێن قوتابخانه‌یان، و هه‌تا راده‌كێ‌ خه‌مسارییا مه‌ و به‌لاڤكه‌رێن مه‌، ئه‌م نه‌شیاین هژماره‌كا به‌رفره‌ه ژ كۆڤارا خوه‌ چاپ و به‌لاڤ بكه‌ین، لێ‌ سه‌ره‌رایی به‌لاڤكرنا وێ‌ د سایتی دا، ئه‌م دیسان ئه‌م یێ‌ هه‌ول دده‌ین كو هه‌یڤ بۆ هه‌یڤێ‌ تیراژێ‌ كۆفارێ‌ زێده‌تر لێ‌ بكه‌ین، و ئه‌ڤه‌ ژی گرێدایه‌ ب باشبوونا ره‌وشا ساخله‌میێ‌، هه‌روه‌سا به‌نده‌ ب وان ل هه‌ڤهاتنان یێن كو ئه‌م ل گه‌ل په‌رتووكخانه‌ و په‌روه‌ردێ‌ و فرۆشگه‌هێن قوتابخانه‌یان دكه‌ین.

ئه‌ڤرۆ: ئه‌رێ‌ د هزرا وه‌ دا هه‌یه‌ كو كۆڤارا سڤۆره‌ بكه‌نه‌ نیڤ هه‌یڤانه‌، ئانكو هه‌ر پازده‌ رۆژان جاره‌كێ‌ ده‌ركه‌ڤیت؟

هه‌كه‌ ئه‌م د گه‌لێك راستگۆ بین، ب وێ‌ كه‌فتن یان ب وێ‌ ئێخاندنا كو مه‌ و گه‌له‌ك ژ سازیێن راگه‌هاندنێ‌ یێن ده‌ڤه‌را به‌هدینان دیتین، بۆ ڤێ‌ ده‌لیڤێ‌ ب زۆر ئه‌م بشێین د وارێ‌ ئاماژه‌پێكریێن سه‌ری دا، هه‌ولا رابوون و پێشڤه‌چوونێ‌ بده‌ین، لێ‌ بۆ پاشه‌رۆژێ‌، وه‌كو دبێژن هه‌كه‌ دنیا ببته‌ شاما شه‌ریف، ئاره‌زوویێن مه‌ ژی ژ پازده‌ رۆژ و حه‌فتییانه‌كرنێ‌ هێژ وێڤه‌ترن. بۆ نموونه‌ مه‌ پرۆژه‌كێ‌ چاپكرنا كۆڤارێن زارۆیان هه‌بوو، و مه‌ بیست پرتووك چاپ كربوون، لێ‌ پشتی هاتنا داعش، ئه‌ڤ پرۆژه‌ یێ‌ راوه‌ستیای، له‌و ب بۆچوونا مه‌، شوونا ئه‌م كۆڤارێ‌ بكه‌ینه‌ پازده‌ رۆژان جاره‌كێ‌، ئه‌م دێ‌ پرۆژێ‌ خوه‌ یێ‌ چاپكرنا پرتووكان ڤه‌ژینینه‌ڤه‌.

ئه‌ڤرۆ: ل ده‌مه‌كی هنده‌ك بزاڤ هه‌بوون كو كه‌ناله‌كێ‌ زارۆیان یێ‌ گرێدای ب كۆڤارا سڤۆره‌ ڤه‌ هاتبا ڤه‌كرن، ئه‌رێ‌ چ لێ‌ هات؟

كۆڤارا سڤۆره‌ ئۆرگانه‌كا ناڤه‌ندا خانی یا ره‌وشه‌نبیری و راگه‌هاندنێ‌ یه‌، و د ده‌ستهه‌لاتێن كۆڤارێ‌ دا نینه‌ ئۆرگانه‌كا دی ڤه‌كه‌ت، لێ‌ هزره‌كا وه‌سا هه‌بوو كو ناڤه‌ندا خانی ئۆرگانه‌كا دی (مه‌ره‌مامه‌ كه‌ناله‌كێ‌ دی یێ‌ زارۆیان) ڤه‌كه‌ت، لێ‌ د ڤی ماوه‌ی دا ناڤه‌ندا خانی ب باشتر زانی (كه‌ناله‌كێ‌ وه‌رزشی) و (وه‌شانخانه‌یه‌كا پرتووكان) هه‌روه‌سا (ئاژانسا خانی یا ده‌نگوباسان) ڤه‌كه‌ت، و هه‌رچه‌نده‌ هێژ چ پێنگاڤ بۆ ڤه‌كرنا كه‌ناله‌كێ‌ زارۆیان نه‌هاتیه‌ هاڤێتن؛ چونكی ڤه‌كرنا وی كه‌نالی ژی، جه و ئامیر و ستاف و مه‌زاختییه‌كێ‌ زێده‌ پێ‌ دڤێت، لێ‌ چێدبیت ده‌مێ‌ زه‌مینه‌ خوه‌ش دبیت، جڤاتا ناڤه‌ندێ‌ ب هه‌ڤكارییا ته‌له‌ڤزیۆنا دهۆك و كۆڤارا سڤۆره‌ پێكڤه‌ بشێن ڤێ‌ بزاڤێ‌ بكه‌نه‌ راستی.