ئه‌ڤرۆ:

پرۆفیسورێ ناڤدارێ كورد ل وه‌لاتێ كازاخستانێ نادر نادرۆڤ دوهی د ژیێ ٨٩ سالیێ دا ژ به‌ر نه‌خوه‌شیێ جانێ خوه‌ ژ ده‌ست دا.

نارین نادرۆڤ كچا زانایێ ناڤدارێ كورد راگه‌هاند كو مخابن دوهی بابێ وێ ژ به‌ر نه‌خوه‌شیێ جانێ خوه‌ ژ ده‌ست دایه‌.

پرۆفیسورێ كورد د بیاڤێ كیمایێ دا كار كریه‌ و خوه‌دانێ‌ ٩٥٠ گۆتارێن زانستی بوویه‌ و وه‌كو زانایه‌ك مه‌زن د ئاستێ جیهانی دا دهاته‌ نیاسین.

ئه‌ڤرۆ:

بریكارێ‌ وه‌زاره‌تا په‌روه‌ردێ‌ یا حوكمه‌تا هه‌رێما كوردستانێ‌ دیار كر، وه‌زاره‌تا په‌روه‌ردێ‌ به‌ری نوكه‌ بڕیار ل سه‌ر ده‌ستپێكرنا سالا نوو یا خواندنێ‌ 2021 – 2022 دایه‌ و دبێژیت: هه‌كه‌ ره‌وشا به‌لاڤبوونا كۆرۆنایێ‌ رێ‌ بده‌ت، ل 14/9/2021 پرۆسا خواندنێ‌ ل ناڤه‌ندێن خواندنێ‌ ده‌ست پێ‌ بكه‌ت.

سه‌یوان عه‌لی، بریكارێ‌ وه‌زاره‌تا په‌روه‌ردێ‌ یا حوكمه‌تا هه‌رێما كوردستانێ‌ ئاشكرا كر، وه‌زاره‌تا په‌روه‌ردێ‌ بڕیار دایه‌ ل 14/9/2021 پرۆسا خواندنێ‌ ل قوتابخانه‌ و ناڤه‌ندێن خواندنێ‌ یێن سه‌ر ب وه‌زاره‌تێ‌ ڤه‌ ده‌ست پێ‌ بكه‌ت و گۆت: “هه‌كه‌ چو پێشهاتێن گرێدای ب به‌لاڤبوونا ڤایرۆسێ‌ كۆرۆنایێ‌ نه‌هێنه‌ پێش، نێزیكی ملیۆن و 700 هزار قوتابی و 160 هزار مامۆستا یێن دامه‌زراندی و گرێبه‌ست دێ‌ ده‌ست ب ده‌وامێ‌ كه‌ن”.

وه‌كو دیار سالا بۆری یا خواندنێ‌ 2020 – 2021 ژ ئه‌گه‌رێ‌ به‌لاڤبوونا ڤایرۆسێ‌ كۆرۆنایێ‌، پرۆسا خواندنێ‌ د قوتابخانه‌ و ناڤه‌ندێن خواندنێ‌ یێن سه‌ر ب وه‌زاره‌تێ‌ ڤه‌ چه‌ند جاران هاته‌ راگرتن، له‌و وه‌زاره‌تێ‌ ژ نه‌چاری بڕیار دا، پشكه‌كا پرۆگرامان بهێنه‌ كۆرتكرن و ئه‌زموون ب وان بابه‌تان بهێته‌كرن.

ئه‌ڤرۆ:

ده‌سته‌یا ژینگه‌ها هه‌رێما كوردستانێ‌ دیار كر، هه‌ر موه‌لیده‌كێ‌ دابینكرنا كاره‌با مالان، دووكێلا ره‌ش هه‌بیت، بۆ چاره‌سه‌ركرنا وێ‌ ده‌مه‌ك دێ‌ بۆ هێته‌ دیاركرن، هه‌كه‌ د وی ده‌می دا خودانێ‌ موه‌لیده‌ی چاره‌ نه‌كه‌ت، دێ‌ هێته‌ سزادان.

ئه‌حمه‌د محه‌مه‌د، په‌یڤدارێ‌ ده‌سته‌یا ژینگه‌ها هه‌رێما كوردستانێ‌ خویا كر، لژنه‌كا دووڤچوونێ‌ بۆ رێكخستنا كاروبارێن موه‌لیدێن تاخان یا هه‌ی و رۆژانه‌ دووڤچوونا وان دكه‌ت، هه‌ر موه‌لیده‌كا دووكێلا ره‌ش بكه‌ت، دێ‌ هێته‌ ئاگه‌هداركرن و ده‌مه‌ك دێ‌ بۆ هێته‌ دیاركرن بۆ هندێ‌ د وی ده‌می دا وێ‌ ئاریشێ‌ چاره‌سه‌ر بكه‌ت، هه‌كه‌ د وی ده‌مێ‌ هاتیه‌ دیاركرن دا، چاره‌سه‌ر نه‌كه‌ت، دێ‌ هێته‌ سزادان و رێكارێن قانوونا دژی هێنه‌ بكارئینان.

ناڤهاتی بۆ رووداو گۆت: “سزا یێن ماددی و هه‌تا دگه‌هیته‌ دادگه‌هێ‌ ژی هه‌نه‌، حه‌فتیا بۆری خودانێ‌ موه‌لیده‌كی ب شه‌ش ملیۆن دیناران هاته‌ سزادان، ژ به‌ركو ئاریشا دووكێلا ره‌ش د ده‌مێ‌ بۆ هاتیه‌ دیاركرن دا چاره‌سه‌ر نه‌كربوو”.

گۆتژی: “ئه‌و گازا بكار دئینن، ل پارزینگه‌هێن نه‌قانوونی دهێته‌ دروستكرن، روونێ‌ پیسێ‌ ترۆمبێلان، تێزاب و چه‌ند ماددێن دی یێن كیمیایی ل گه‌ل تێكه‌ل دكه‌ن و وێ‌ گازێ‌ به‌رهه‌م دئینن كو كوالێتیا گه‌له‌كا خرابه‌ و مه‌ترسیه‌ بۆ سه‌ر ژینگه‌هێ‌”.

په‌یڤدارێ‌ وه‌زاره‌تا كاره‌بێ‌ ژی به‌ری چه‌ند رۆژان راگه‌هاندبوو: ب تمامبوونا پرۆژێ‌ پیڤه‌رێن زیره‌كێن كاره‌بێ‌، كه‌ربا نشتیمانی دێ‌ بیته‌ 24 ده‌مژمێری و ره‌نگه‌ ئێدی وه‌لاتی پێدڤی ب مولیدێن تاخان نه‌مینیت”.

ئه‌ڤرۆ:

ژێده‌ره‌كی دیار كر، عه‌بدولخالق بابیری وه‌كو به‌رپرسێ‌ لقێ‌ 20 پارتی دیمۆكراتی كوردستان ل شێخان ل جهێ‌ مه‌حمود ئێزدی هاته‌ دانان.

وی ژێده‌ری بۆ ئاژانسا خانی خویا كر، دهێته‌ پێشبینی كرن ل هه‌موو لقێن پارتی یێن ده‌ڤه‌را به‌هدینان گوهۆڕین بهێنه‌ كرن.

دیسا ژ لایه‌كێ‌ دیڤه‌، سه‌ربه‌ست بابیری وه‌كو به‌رپرسێ‌ میحوه‌رێ‌ رۆژئاڤایێ‌ دیجله‌ هاته‌ دانان.

ئه‌ڤرۆ، حه‌مۆ محه‌مه‌د:

لژنا ئاڤه‌دانكرن و وه‌به‌رهێنانێ‌ ل په‌رله‌مانێ‌ كوردستانێ‌ دیار كر، ئه‌و دێ‌ دووڤچوونا پشكه‌كا پرۆژێن جودا یێن وه‌به‌رهێنانێ‌ ل پارێزگه‌هێن هه‌رێما كوردستانێ‌ كه‌ن.

لژنا ئاڤه‌دانكرن و وه‌به‌رهێنانێ‌ ئاشكرا كریه‌ كو وان دانوستاندن ل سه‌ر پشكه‌كا پرۆژێن وه‌به‌رهێنانێ‌ ل پارێزگه‌هێن هه‌رێما كوردستانێ‌ كریه‌ و بڕیار هاتیه‌ دان، لژنه‌كا لاوه‌كی بهێته‌ پێكئینان و دووڤچوونێ‌ بۆ پشكه‌كا پرۆژێن جودا یێن وه‌به‌رهێنانێ‌ ل پارێزگه‌هێن هه‌رێما كوردستانێ‌ بكه‌ت.

لژنێ‌ خویا ژی كریه‌ كو بڕیار هاتیه‌ دان، دووڤچوون بۆ بڕیارا ده‌سته‌یا وه‌به‌رهێنانێ‌ یا تایبه‌ت ب قستێن یه‌كێن ئاكنجیبوونێ‌ بهێته‌ كرن.

وه‌كو دیار به‌ری نوكه‌ ده‌سته‌یا وه‌به‌رهێنانێ‌، ژ ئه‌گه‌رێ‌ بلندبوونا بهایێ‌ دۆلاری هه‌مبه‌ر دینارێ‌ عیراقی، بڕیاره‌ك ل دۆر قستێن یه‌كێن ئاكنجیبوونێ‌ ده‌رئێخست بوو كو وه‌به‌رهێنه‌ر دۆلاری ب 130 هزار دیناران وه‌ربگرن و پارێ‌ مایی بچیته‌ سه‌ر قستێن دووماهیێ‌.

دهۆك، له‌زگین جوقی:

رێڤه‌به‌رێ‌ گشتی یێ‌ گه‌شت و گۆزارێ ل پارێزگه‌ها دهۆكێ‌ دیار كر، پلانه‌كا ستراتیژی بۆ پێشڤه‌برنا كه‌رتێ‌ گه‌شت و گۆزاری ل پارێزگه‌ها دهۆكێ‌ دهێته‌ دانان و دبێژیت: ئه‌ڤ ساله‌ هاتنا گه‌شتیاران بۆ پارێزگه‌ها دهۆكێ‌ گه‌له‌ك زێده‌بوویه‌ و هه‌تا نوكه‌ دۆرێن 250 هزار گه‌شتیاران قه‌ستا پارێزگه‌ها دهۆكێ‌ كرینه‌.

د. خه‌یری عه‌لی، رێڤه‌به‌رێ‌ گشتی یێ‌ گه‌شت و گۆزارێ ل پارێزگه‌ها دهۆكێ‌ بۆ رۆژناما ئه‌ڤرۆ خویا كر، حوكمه‌تا هه‌رێما كوردستانێ‌ گرنگیه‌كا مه‌زن دایه‌ كه‌رتێ‌ گه‌شت و گۆزاری و چه‌ند پرۆژه‌یێن گرنگێن گه‌شتیاری ژلایێ‌ كه‌رتێ‌ تایبه‌ت ڤه‌ ل دهۆكێ‌ دهێنه‌ دروستكرن و هنده‌ك ژ وان ژی تمامبووینه‌، مینا: تلفریكا چیایێ‌ زاوا، دیسا نووژه‌نكرنا ئۆتیلا به‌ری ل سه‌رسنكێ‌ و مه‌له‌ڤانگه‌ها ئولمپی و گۆت: “هژماره‌كا پرۆژه‌یێن گرنگ نوكه‌ ل به‌رده‌ستێ‌ مه‌ هه‌نه‌ و ب هه‌ڤكاریا پارێزگارێ‌ دهۆكێ‌ و قایمقامێن سه‌ر ب پارێزگه‌هێ‌ ڤه‌ دێ‌ بزاڤان كه‌ین كه‌رتێ‌ گه‌شت و گۆزاری پتر پێشڤه‌ ببه‌ین”.

گۆتژی: “ده‌مێ‌ شه‌ش هه‌یڤانه‌، ئه‌م ل پارێزگه‌ها دهۆكێ‌ كار ل سه‌ر پلانه‌كا ستراتیژی بۆ پێشڤه‌برنا كه‌رتی گه‌شت و گۆزاری دكه‌ین”.

د. خه‌یری زێده‌تر گۆت” “ئه‌م دێ‌ ل گه‌ل كۆمپانیێن گه‌شتیاری یێن توركیا، ئیران و ئه‌رمینیا كۆم بین و دانوستاندنێ‌ ل سه‌ر پلانا گه‌شتیاری ل گه‌ل كه‌ین، مه‌ره‌ما مه‌ ئه‌وه‌ گه‌شتیار ژ توركیا، ئیران و ئه‌رمینیا و ده‌وله‌تێن بیانی بهێنه‌ پارێزگه‌ها دهۆكێ‌”.

ل دهۆكێ‌ هه‌تا 900 بنگه‌هێن گه‌شتیاری یێن مۆله‌تدایی و 110 ئۆتێل و مۆتێل و كۆمه‌لگه‌هێن گه‌شتیاری هه‌نه‌ كو د شیان دایه‌ د شه‌ڤه‌كێ‌ دا 15 هزار گه‌شتیاران ب حه‌وینن.

ئامێدیێ‌، مه‌حمود نهێلی:

رێڤه‌به‌رێ‌ ساخله‌میا قه‌زا ئامێدیێ‌ بۆ رۆژناما ئه‌ڤرۆ دیار كر، هه‌تا نوكه‌ پتر ژ 10 هزار و 500 كه‌سان ل سنوورێ‌ قه‌زا ئامێدیێ‌ ڤاكسین دانایه‌ و ل ده‌مه‌كێ‌ نێزیك دێ‌ دو بنگه‌هێن دی ژی یێن ڤاكسین دانێ‌ ل ده‌ڤه‌رێ‌ هێنه‌ ڤه‌كرن.

د. شاكر عه‌بدولعه‌زیز، رێڤه‌به‌رێ‌ ساخله‌میا ئامێدیێ‌ خویا كر، نوكه‌ ل سنوورێ‌ ساخله‌میا قه‌زا ئامێدیێ‌ حه‌فت بنگه‌هێن دانانا ڤاكسینێ‌ هه‌نه‌ و گۆت: “ژ به‌ر هه‌بوونا رێژه‌كا زۆر یا توشبوویێن كۆرۆنایێ‌ ل ڤێ‌ داویێ‌ گه‌له‌ك وه‌لاتی قه‌ستا بنگه‌هێن دانانا ڤاكسینان دكه‌ن، له‌و ئه‌م نه‌چار بووین سێ‌ بنگه‌هێن دی ژی زێده‌ بكه‌ین، دیسا مه‌ ل به‌ره‌ دو بنگه‌هێن دی ژی ل بامه‌رنێ‌ و چه‌مانكێ‌ ڤه‌كه‌ین”.

گۆتژی: “رێژا دانانا ڤاكسینان ل ده‌ڤه‌را مه‌ گه‌له‌كا باشه‌ و ل دووڤ وێ‌ پلانێ‌ یا وه‌زاره‌تا ساخله‌میێ‌ دانای، ئه‌م دێ‌ زووتر گه‌هینه‌ وێ‌ رێژێ‌ یا وان دڤیا”.

رێڤه‌به‌رێ‌ ساخله‌میا ئامێدیێ‌ خویا كر، نوكه‌ توشبوون ب ڤایرۆسێ‌ كۆرۆنایێ‌ گه‌هشتیه‌ گۆپیتكێ‌ و راوه‌ستیایه‌ و گۆت: “ئه‌م پێشبینی دكه‌ین ئه‌ڤ رێژه‌ بهێته‌ خوارێ‌، رۆژانه‌ ئه‌م دۆرێن 100 پشكنینان دكه‌ین 20 هه‌تا 30 پشكنین پوزه‌تیڤ ده‌ردچن و هه‌تا نوكه‌ دۆرێن چار هزار و 300 توشبووی ل ده‌ڤه‌را ئامێدیێ‌ هاتینه‌ تۆماركرن”.