دیدار، نیوار محه‌مه‌دسه‌لیم:
شاخه‌وان عه‌بدولا، به‌ربژارێ پارتی دیموكراتی كوردستان بۆ جڤاتا نوونه‌رێن عیراقێ ل بازنا كه‌ركووك ئێك د دیداره‌كێ دا بۆ رۆژناما ئه‌ڤرۆ به‌حس ل ره‌وشا نها یا كه‌ركووك و چوونا پارتی بۆ ناڤ پارێزگه‌هێ و بانگه‌شه‌یا پارتی یا هه‌لبژارتنان ل وێ پارێزگه‌هێ دكه‌ت و دده‌ته زانین ده‌نگدان ب پارتی دێ كێشێن كه‌ركووكیان چاره بن و ره‌وشا وان زووتر ئاسایی بیت و دیار ژی دكه‌ت ل ده‌ما پێشمه‌رگه‌ی كه‌ركووك د پاراست ژ لایێ ئه‌منی ڤه وه‌كو پارێزگه‌هه‌كا هه‌رێما كوردستانێ یا جێگیر بوو. نه‌ڤه‌شارت ژی كو هه‌لویستێ وان ل دۆر پارێزگارێ سه‌پاندی یێ كه‌ركووك یێ نه‌گۆڕه و دانپێدانێ پێ ناكه‌ن و ل گه‌ل نا روونن.
ئه‌ڤرۆ: ڤه‌گه‌ریانا پارتی بۆ كه‌ركووك ل پشتی روودانێن ئوكتوبه‌رێ چاوان د هه‌لسه‌نگینن؟
شاخه‌وان عه‌بدولا: پارتی هێزه‌كا سه‌ره‌كی یا هه‌رێما كوردستانێ و ده‌ڤه‌رێ یه. هیڤیا ب وێ چه‌ندێ هه‌یی كو دێ شێت هێزێ گوهۆڕیت، گه‌له‌ك تشت یێن هه‌ین پارتی قه‌بوول نه‌كریه و قه‌بوول ژی ناكه‌ت. پارتی یا دانوستاندنێ ل گه‌ل به‌غدا دكه‌ت و گه‌له‌ك پێنگاڤێن مه‌زن یێن هاتینه هاڤێتن و د به‌رده‌وامین ل سه‌ر وان دانوستاندنان.
پارتی بڕیار یا دایی نها به‌ربژارێن وێ ڤه‌گه‌رنه كه‌ركووك و ده‌ست ب بانگه‌شه‌یا هه‌لبژارتنان بكه‌ن ب مه‌ره‌ما وێ چه‌ندێ ل وێرێ بین و نێزیكی خه‌لكێ خوه بین. به‌ربژارێن وێ دێ بانگه‌شا مه‌زن ل ناڤ كه‌ركووكێ كه‌ن.
ئه‌ڤرۆ: پارتی دێ ب چه‌ند به‌ربژاران پشكداریێ د هه‌لبژارتنان دا كه‌ت؟
شاخه‌وان عه‌بدولا: چو پێ نه‌ڤێت هه‌ر لایه‌نه‌كێ سیاسی ب گۆره‌یی حه‌زا خوه دشێت كه‌سان به‌ربژار بكه‌ت، به‌لێ پارتی بۆ ڤان هه‌لبژارتنان دو كه‌س به‌ربژار كرینه ل بازنێ ئێك و ل بازانێ دو، ئه‌ز وه‌كو شاخه‌وان عه‌بدولا ل سه‌ر بازنێ ئێك هاتیمه به‌ربژار كرن ب ژماره 30، دیسا خووشكا نه‌جوا ژی ل بازنێ دو به‌ربژاره ب ژماره 52. ژبلی ڤان به‌ربژاران ژی به‌رنامێ خوه یێ هه‌یی.
ئه‌ڤرۆ: ڤه‌گه‌ریانا پارتی په‌یوه‌ندی ب ئالوزیێن ناڤ ئێكه‌تیێ ڤه هه‌یه؟
شاخه‌وان عه‌بدولا: نه‌خێر، پارتی و ئێكه‌تی چو په‌یوه‌ندی ب ئێك ڤه نینه و ئێكه‌تیا ئاریشه‌یه‌كا ناڤخۆیی یه هه‌یی، مه ب چو ره‌نگان په‌یوه‌ندی پێڤه نینه. ئاخفتنكه‌رێ ب ناڤێ پارتی ژی ئه‌ڤ چه‌نده ته‌كست كر ده‌ما گوتی بابه‌تێ ئێكه‌تیێ بابه‌ته‌كێ ته‌مام یێ ناڤخۆیه و په‌یوه‌ندیا وێ كێشێ ب تنێ ب ناڤخۆیا ئێكه‌تیێ ڤه هه‌یه. بابه‌ته‌كێ كه‌ركووكێ ژی چو په‌یوه‌ندی ب ئێكه‌تیێ ڤه نینه.
باوه‌ریا مه ب هندێ كو پارتی ئه‌و هێزه‌یه كو خه‌لكی باوه‌ری پێ هه‌یه و ب ئاماده‌بوونا پارتی گه‌له‌ك تشت دێ هێنه گوهۆڕین ژ به‌ر هندێ ژی و د وی چارچوڤی دا مه بڕیار دا ڤه‌گه‌رینه كه‌ركووك ل ناڤ خه‌لكێ خوه و بزاڤێ بكه‌ین ئه‌و ره‌وشا هه‌یی باشتر لێ بكه‌ین.
ئه‌ڤرۆ: پارتی دێ ئه‌و پۆستێن خوه یێن به‌رێ دووباره وه‌رگرتیه ڤه؟
شاخه‌وان عه‌بدولا: به‌لێ ئه‌ڤه بابه‌ته‌كێ دی یه و ده‌ستكه‌فتێ مه‌یه. دو قایمقام و دو رێڤه‌به‌رێن ناحیان، رێڤه‌به‌رێن چاندنێ و ساخله‌میێ مه یێن هه‌ین. رێڤه‌به‌رێ سایلۆیێ مه هه‌یه، رێڤه‌به‌رێ پۆلیسێن ده‌وروبه‌رێن كه‌ركووك مه هه‌یه و گه‌له‌ك پۆستێن دی و دێ ل گه‌ل حوكمه‌تێ كاركه‌ین كو پۆستێن خوه هه‌موویان ڤه‌گه‌رینن چونكو ده‌ستكه‌فتێ پارتی بووینه.
ئه‌ڤرۆ: ئه‌ڤ وه‌لاتیێن كه‌ركووك بجه هێلایی هه‌موو ڤه‌گه‌ریاینه؟ یان ژی هه‌كه مابن چاوان دێ ده‌نگێ خوه ده‌ن؟
شاخه‌وان عه‌بدولا: به‌رنامه‌كێ دانایه ب ره‌نگه‌كێ گۆنجایی بۆ ڤه‌گه‌ریانا وان كه‌سێن ژ به‌ر روودانێن ئوكتوبه‌رێ كه‌ركووك ب جه هێلایی. هنده‌ك یێن ڤه‌گه‌ریایین و ئه‌ڤێن مایین ژی بزاڤ دهێته كرن ب رێیا كۆمسیۆنێ هنده‌ك كۆمسیۆن ژ بۆ بهێنه دانان ل بن سه‌رپه‌رشتیا كوچ و كۆچبه‌ران. دێ بزاڤێ كه‌ن ده‌نگێن وان نه‌سۆژن و ب گۆره‌یی دستووری مافێ وایه ده‌نگێ وان نه‌هێته سۆتن. دێ هه‌موو بزاڤا كه‌ین ده‌نگێن وان ئاوارێن به‌رێز ب هه‌روه نه‌چن و ئه‌و ژی ده‌نگێن خوه بده‌ن.
ئه‌ڤرۆ: هوون پێشبینیا چه‌ند كه‌سان دكه‌ن كو هێشتا ڤه‌نه‌گه‌ریابن؟
شاخه‌وان عه‌بدولا: چو ئامارێن دروست ل به‌ر ده‌ستێن مه نینن، چونكو پشتی روودانان جودا ژ كادرێ پارتی خه‌لكه‌كێ زۆر ژی ئه‌و ژیوار قه‌بوول نه‌كریه، سه‌ره‌رایی وێ چه‌ندێ كو چو پۆست د ده‌ست دا نه‌بوون، به‌لێ به‌ر ب چه‌مچه‌مال و وێ ده‌ڤه‌رێ چووینه ژ به‌ر هندێ ژی یا ب زه‌حمه‌ته ئاماده‌ركا هوور هه‌بیت كو ب دروستی بزانین چه‌ند كه‌سان كه‌ركووك ب جه هێلایه. گه‌له‌ك كه‌س ژی وان ده‌رخستینه. ئه‌ڤ كه‌سێن هاتینه ده‌ركرن ب هزارانن.
ئه‌ڤرۆ: هه‌كه هوون چوونه ناڤ كه‌ركووكێ دێ زێده‌تر فوكسا هه‌وه ل سه‌ر چ بیت؟
شاخه‌وان عه‌بدولا: ئه‌ز وه‌كو د. شاخه‌وان عه‌بدولا كو به‌ربژارم ل سه‌ر لیستا پارتی دیموكراتی كوردستان بۆ جڤاتا نوونه‌رێن عیراقێ ل بازنا كه‌ركووك ئێك كو پێشتر ژی مه په‌رله‌مانتاری كریه و شیایمه هندی شه‌ش په‌رله‌مانتارێن دی كار بكه‌م و هندی ل به‌غدا بووینه مه رێ نه‌دایه چو پلانێن ل دژی مه سه‌ر بگرن و روو ب روویێ هه‌موو هزر و بۆچوونه‌كا شوفینێ بووینه و مه پارێزگاری ل خه‌لكێ خوه كریه، به‌لێ ئه‌ڤه د ماوێ چار سالێن بوری دا كو كوردان شه‌ش په‌رله‌مانتار ل كه‌ركووك هه‌نه هه‌ر كورد دهێنه ده‌ركرن و دبێ ده‌نگن ژی. ژ به‌ر هندێ ژی جوداهیا پارتی ئه‌ڤه كو خه‌لكه‌كێ كێم، به‌لێ خه‌لك ده‌ستبه‌رداریی كورداتیێ نه‌بیت و ده‌نگێ خوه نه فرۆشیت ئه‌وی خه‌لكی دهنێریته به‌غدا. پارتی بزاڤێ دكه‌ت كو باشترین ده‌نگ بهنێریته به‌غدا كو به‌ره‌ڤانیێ ژ كه‌ركووك و هه‌موو وان ده‌ڤه‌رێن ب سه‌رڤه بكه‌ت.
ئه‌ڤرۆ: هه‌لویستێ هه‌وه ل سه‌ر پارێزگارێ سه‌پاندی یێ كه‌ركووك هه‌ر وه‌كو خوه‌یه؟
شاخه‌وان عه‌بدولا: چو جوداهی د هه‌لویستێ مه دا ل سه‌ر پارێزگارێ سه‌پاندی یێ كه‌ركووك نینه، هه‌ر وه‌كو خوه‌یه. بۆ رۆژا ئێكی وه‌كو پارێزگار مه دان پێدان پێ نه‌كریه و وه‌كو پارێزگار ته‌ماشه نه‌كریه و چو بڕیارێن وی ژی بجه نائینین و ل گه‌ل ناروونین. ئه‌و سیاسه‌تا وی دژی كوردان ل وی باژێری كری، ب ته‌مامی یا دوژمنكاری و شوفینیانه بوویه، ژ به‌ر هندێ باوه‌ر ناكه‌ین رۆژه‌ك بهێت پشتی ئه‌و تاوانێن ل دژی كوردان كری بهێنه قه‌بوولكرن.
ئه‌ڤرۆ: هه‌رچه‌نده نها كارێن جڤاتا پارێزگه‌ها كه‌ركووك وه‌كو یێن هه‌موو پارێزگه‌هێن عیراقێ هاتینه راگرتن، به‌لێ بۆچوونا هه‌وه ل سه‌ر وێ چیه، هوون كۆمبوونێن وێ ب فه‌ر دبینن؟
شاخه‌وان عه‌بدولا: هه‌ر چه‌نده جڤاتا نوونه‌رێن عیراقێ بڕیارا حه‌لكرنا جڤاتێن پارێزگه‌هان ل عیراقێ دایه ژ بلی هه‌رێما كوردستانێ، هه‌ر چه‌نده ئه‌وان هه‌ڤركیا وێ قانوونێ كریه یا بۆ جڤاتێن پارێزگه‌هان هاتیه دانان ب گۆره‌یی قانوونا ژماره 36 یا سالا 2008ێ. د راستی ژی دا ئه‌ڤ بڕیاره د بنیات دا ژ جڤاتا پارێزگه‌ها كه‌ركووك ناگریت ژ به‌ر كو جڤاتا پارێزگه‌ها كه‌ركووك ل سه‌ر ده‌مێ حاكمێ عیراقێ پۆل بریمه‌ر هاتینه دامه‌زراندن، ژ به‌ر هندێ ژی ئه‌و دشێن ب راوێژ ل گه‌ل دادگه‌ها فیدرال ده‌ست ب كارێن خوه بكه‌ن و ڤه‌گه‌رنه سه‌ر كارێن خوه. ئێك ژ ئه‌گه‌رێن وێ چه‌ندێ كو گه‌نده‌لی ل كه‌ركووك زێده بوویی، نه‌بوونا چاڤدێریا جڤاتا پارێزگه‌هێ بوو ل سه‌ر ده‌سته‌لاتا كارگێری.
ئه‌ڤرۆ: ره‌وشا ئه‌منی یا كه‌ركووك یا چاوایه و دووباره داخواز نه‌هاتیه كرن كو پێشمه‌رگه ڤه‌گه‌ریته وان ده‌ڤه‌ران؟
شاخه‌وان عه‌بدولا: مه داخواز كریه فایلا ئه‌منی یا پارێزگه‌ها كه‌ركووك بكه‌ڤیته ده‌ست كه‌ركووكیان. هه‌كه كێماسیه‌ك ژی هه‌بیت ژ ده‌رڤه‌ی كه‌ركووك دشیان دایه پێشمه‌رگه وان ڤالاهیان چاره بكه‌ن. ب حوكمێ وێ چه‌ندێ باشوور و رۆژهه‌لاتێ كه‌ركووك دكه‌ڤیته گه‌ل ره‌شا و ریاز و حه‌وێجه، هه‌رده‌م ئه‌و ده‌ڤه‌ر هێلینا ڤه‌لڤینێن تیرۆرستان بووینه وه‌كو گرۆپێن ئه‌نسار و نه‌قشبه‌ندی و هه‌تا قاعیده ژی، ژ به‌ر هندێ پێشمه‌رگه ل وێ ده‌ڤه‌رێ دشێت دیواره‌كی دروست بكه‌ت كو ره‌وشا ئه‌منی گه‌له‌ك به‌ر ب باش ڤه ببه‌ت هه‌ر وه‌كو پێشتر ژی ئه‌ڤ چه‌نده كری، ل سه‌ر ده‌مێ پێَشمه‌رگه‌ی كه‌ركووك یا پاراستی بوو، ره‌وشا وێ یا ئه‌منی وه‌كو یا پارێزگه‌هێن هه‌رێما كوردستانێ لێ هاتبوو.
ب ڤه‌كێشانا پێشمه‌رگه‌ی ئه‌و بۆشایی نه‌هاتیه پڕ كرن و ڤه‌لڤینێن تیرۆرستان زێده بووینه، كه‌س نه‌شیایه ل وێرێ رۆلێ پێشمه‌رگه‌ی بگێریت ژ به‌ر هندێ ژی بوویه كو پێشمه‌رگه زێده‌تر خه‌لكێ كه‌ركووكێ بووینه و شاره‌زایی ل وێ ده‌ڤه‌رێ هه‌بوویه. وه‌كو كه‌سه‌كێ بیانی نه‌بووینه ژ به‌ر هندێ ژی گه‌له‌ك پێدڤی ب پێشمه‌رگه‌ی هه‌یه.
ئه‌ڤرۆ: ره‌وشا جۆتیارێن كه‌ركووك یا چاوایه؟ هێژ رێگریا چاندنێ لێ دهێته كرن؟
شاخه‌وان عه‌بدولا: هه‌تا راده‌كی هاتیه راوه‌ستاندن پشتی دانوستاندنێن ل گه‌ل به‌غدا، به‌لێ د سه‌ر هندێ ژی را، هه‌ر هه‌تا راده‌كی یا به‌رده‌وامه، چاره‌سه‌ریا ڤی بابه‌تی دێ ب قانوونا ب زووری ژێ وه‌رگرتنا ئه‌ردی ئه‌وا نها ل جڤاتا نوونه‌ران چاره بیت كو بهێته راستڤه‌كرن و رێكه‌فتنه‌كا سیاسی ل سه‌ر بهێته كرن، چاڤه‌رێ وێ چه‌ندێ دكه‌ین كو ئه‌و رێكه‌فتن بهێته كرن و قانوون ژی ل جڤاتا نوونه‌ران بهێته راستڤه‌كرن. نها پشكه‌ك ژ وان زه‌ڤیان هاتینه داگیركرن و یێن دژی هنده‌ك ماینه و كورد خوراگرانه به‌ره‌ڤانیێ ژێ دكه‌ن.
ئه‌ڤرۆ: ته پێ باشه ل 10/10 هه‌لبژارتن بهێنه كرن؟
شاخه‌وان عه‌بدولا: وه‌كو پارتی مه بڕیار دایه پشكداریا هه‌لبژارتنان بكه‌ین. هه‌موو به‌رهه‌ڤی مه كرینه، ئه‌ڤرۆ یان سوبه‌هی بهێنه كرن، وه‌كو پارتی بۆ مه چو جوداهی نینه. پارتی باوه‌ری ب بنگه‌هێ خوه یێ جه‌ماوه‌ری هه‌یه و هه‌ر ده‌مه‌كی یا ئاماده‌یه.
ئه‌ڤرۆ: پارتی دشێت زێده‌تر چو بكه‌ت بۆ كه‌ركووكێ دا پتر باوه‌ری بۆ دروست ببیت؟
شاخه‌وان عه‌بدولا: ب هێز بووینا پارتی ب هێز بوونا كوردانه. ئه‌ڤه هاوكێشه‌كه ناهێته گوهۆڕین. ده‌ما ده‌نگی دده‌نه پارتی پێگه‌ه و قه‌بارێ پارتی مه‌زن دكه‌ن. نێزیكترین دبنه‌ڤه ژ حه‌ز و خه‌ونێن خوه و كێشا كوردان دێ به‌ر ب پێشتر چیت و پێگه‌هێ پارتی ل عیراقێ هه‌موویێ ژی یێ دیاره. پارتی ده‌ما ده‌نگێ خوه دده‌نه پارتی، دێ زووتر ره‌وشێ باشتر لێ كه‌ت و كێشێن كه‌ركووكیان چاره بن.
نيشاندان