ئه‌ڤرۆ، عه‌لی حاجی:

هاریكارێ‌ سه‌رۆكێ‌ زانكۆیا زاخۆ بۆ رۆژناما ئه‌ڤرۆ دیار كرن رازیبوون ل سه‌ر ئاڤاكرنا ئاڤاهه‌یه‌كی بۆ كۆلیژا نۆشداری ل زانكۆیا زاخۆ ژلایێ‌ حكومه‌تا هه‌رێمێ‌ ڤه‌ هاتیه‌دان و ئه‌و چاڤه‌رێ‌ نه‌ ب شێوه‌كێ‌ فه‌رمی ئه‌و بڕیار ب گه‌هیته‌ ده‌ستێ‌ وان، داكو بكه‌نه‌ ته‌نده‌ر و كار د دروستكرنا وی دا بهێته‌ كرن.

دكتۆر كاروان فه‌همی، هاریكارێ‌ سه‌رۆكێ‌ زانكۆیا زاخۆ گۆت: “به‌ری ڤه‌كرنا كۆلیژا نۆشداری ل زانكۆیا زاخۆ ئه‌و سۆز ب مه‌ هاتبوو دان كو دێ‌ ئاڤاهیه‌كێ‌ تایبه‌ت بۆ هێته‌ ته‌رخانكرن، به‌لێ‌ ئه‌و سۆز نه‌هاتبوو بجهئینان، لێ‌ د سه‌ره‌دانا دووماهیێ‌ یا وه‌زیرێ‌ خواندنا بلند و ڤه‌كۆلینێن زانستی دا بۆ باژێرێ‌ زاخۆ، مه‌ بۆ دیار كر كو ئه‌ڤ ساله‌ د شیانێن مه‌ دا نینه‌ بشێین قوتابیان بۆ سالا نوو یا خواندنێ‌ وه‌ربگرین، ژبه‌ر نه‌بوونا جهی، كو قوتابیێن مه‌ د ئاڤاهیێ‌ نه‌خۆشخانا زاخۆ یا گشتی دا ده‌واما خوه‌ دكرن، له‌وما ژی په‌یوه‌ندی ب سه‌رۆكێ‌ حكومه‌تێ‌ مه‌سرور بارزانی هاته‌ كرن و ل سه‌ر ئاڤاكرنا ئاڤاهیه‌كێ‌ تایبه‌ت بۆ كۆلیژا نۆشداری ل زانكۆیا زاخۆ رازیبوو”.

گۆتژی: “مه‌ داخوازا ملیار دیناران كری یه‌ و ئه‌و پاره‌یه‌ ژی هاتیه‌ ته‌رخانكرن و ئه‌م چاڤه‌رێ‌ نه‌ ئه‌و بڕیاره‌ بگه‌هیته‌ ده‌ستێ‌ مه‌، دا كو بكه‌ینه‌ ته‌نده‌ر و بكه‌ڤیته‌ د قووتاناغا بجهئینانێ‌ دا”.

ناڤهاتی ئاشكرا ژی كر، ئه‌و ئاڤاهی یه‌ هه‌ر د ناڤ ئه‌رێ‌ نه‌خۆشخانا زاخۆ یا گشتی دا دێ‌ هێته‌ ئاڤاكرن و جه ژی بۆ هاتیه‌ ده‌ستنیشان كرن و گۆت: “ب ئاڤاكرنا وی ئاڤاهی ژی مه‌ چو ئاریشا نه‌بوونا جهی نامینیت و دێ‌ خزمه‌ته‌كا باش یا كه‌رتێ‌ ساخله‌میێ‌ ل زاخۆ كه‌ت”.

دهۆك، له‌زگین جوقی:

رێڤه‌به‌رێ‌ ئوفیسا دهۆك یا كۆمسیۆنا بلندا سه‌ربخوه‌ یا هه‌لبژارتنان ل عیراقێ‌ ئاشكرا كر كو بنگه‌هه‌كێ‌ په‌یوه‌ندیان بۆ به‌لاڤكرنا كارتێن ده‌نگدانێ‌ ل پارێزگه‌ها دهۆكێ‌ هاتیه‌ ڤه‌كرن و رۆژانه‌ په‌یوه‌ندی ب هنده‌ك كه‌سان دهێته‌ كرن كو بهێن كارتێن خوه‌ یێن ده‌نگدانێ‌ ژ كۆمسیۆنێ‌ وه‌ربگرن.

خالد عه‌باس، رێڤه‌به‌رێ‌ ئوفیسا دهۆك یا كۆمسیۆنا بلندا سه‌ربخوه‌ یا هه‌لبژارتنان ل عیراقێ‌ ئاشكرا كر، ئه‌و دگه‌ل هه‌موو لایه‌نێن سیاسی یێن پشكدار د هه‌لبژارتنێن بهێن یێن په‌رله‌مانێ‌ عیراقێ‌ دا و رێكخراو و ئێكه‌تیێن ئافره‌تان و دام و ده‌زگه‌هان دێ‌ كۆم بن، داكو وه‌لاتیان هان بده‌ن بچن كارتێن خوه‌ یێن ده‌نگدانێ‌ وه‌ربگرن.

ناڤهاتی گۆت: “هێشتا 130 هزار كه‌سان كارتێن خوه‌ یێن ده‌نگدانێ‌ وه‌رنه‌گرتینه‌، ئه‌م هیڤیدارین وه‌لاتی قه‌ستا بنگه‌هێن ده‌نگدانێ‌ بكه‌ن بۆ وه‌رگرتنا كارتێن خوه‌ یێن ده‌نگدانێ‌، هه‌ر كه‌سه‌كێ‌ خوه‌ د سیسته‌مێ‌ بایۆمه‌تری دا تۆماركربیت، دشێت كارتا خوه‌ وه‌ربگریت”.

هه‌ولێر، قائید میرۆ:

ئه‌ندامه‌كێ لیژنا بلندا به‌رهنگاربوونا كۆرۆنایێ ئاشكرا كر، پشتی وه‌رگرتنا ڤاكسینێ ژلایێ مامۆستایان بڕیاره‌ قوتابی ژی ڤاكسینا دژی كۆرۆنایێ وه‌ربگرن و ده‌واما قوتابخانان دێ ل گوره‌ی رێنمایێن خوه‌پارێزیێ ب ڕێڤه‌چیت.

ده‌شتی بۆستانی، ئه‌ندامێ لیژنا به‌رهنگاربوونا كۆرۆنایێ بۆ رۆژناما ئه‌ڤرۆ دیار كر، پرۆسا وه‌رگرتنا ڤاكسینێ ژلایێ مامۆستایان یا به‌رده‌وامه‌ و پلان ئه‌ڤه‌یه‌، هه‌تا ده‌ستپێكرنا سالا نوو یا خواندنێ هه‌موو مامۆستا ڤاكسینێ وه‌ربگرن و گۆت: “د قووناغا دد ووڤ دا دێ ڤاكسین بۆ قوتابیێن ژیێ وان د سه‌ر 12 سالیێ ژی دا به‌رده‌ست بیت، چونكو ل گوره‌ی پلانا حوكمه‌تا هه‌رێما كوردستانێ پێدڤیه‌ 90%ێ قوتابی و مامۆستا ڤاكسینێ وه‌ربگرن هه‌تا پرۆسا خواندنێ ب شێوه‌یه‌كێ ئاسایی ب ڕێڤه‌ بچیت”.

ده‌شتی بۆستانی گۆتژی: “ده‌واما قوتابخانان دێ ل گوره‌ی رێنمایێن خوه‌پارێزیێ هێنه‌كرن، چونكو هێشتا ڤایرۆسێ‌ كۆرۆنایێ ل سه‌ر ژیانا وه‌لاتیان مه‌ترسیه‌، له‌وڕا ده‌مێ ڤه‌بوونا ده‌وامێ دێ كه‌مامه‌ هێنه‌ بكارئینان و دووریا د ناڤبه‌را قوتابیان دا دێ به‌رچاڤ هێته‌ وه‌رگرتن، هه‌تا مامۆستا و قوتابی بێ ئاریشه‌ بشێن ده‌وامێ بكه‌ن”.

ئه‌ڤرۆ:

سه‌رۆكێ لژنا دارایی ل په‌رله‌مانێ كوردستانێ دیار كر، ل دووڤ قانوونا هژماره‌ 2 یا سالا 2020 كو ب قانوونا چاكسازیێ به‌رنیاسه‌، سیسته‌مه‌كێ نوو یێ خانه‌نشینیێ هاتیه‌ دانان و ل گه‌ل سیسته‌مێ به‌رێ یێ‌ جودایه‌ كو پلێن بلند پێ دهاتنه‌ خانه‌نشینكرن.

زیاد جه‌بار، سه‌رۆكێ لژنا دارایی ل په‌رله‌مانێ كوردستانێ خویا كر، ل دووڤ سیسته‌مێ‌ به‌رێ‌ یێ‌ خانه‌نشینیێ‌، ده‌مێ پلێن بلند خانه‌نشین دبوون ب 80% ژ مووچێ وان دهاتنه‌ خانه‌نشینكرن، به‌لێ ل دووڤ قانوونا چاكسازیێ‌ ژ 15% ل دووڤ سالێن وان یێن خزمه‌تێ ده‌ست پێدكه‌ت و چه‌ند سالێن خزمه‌تێ هه‌بن، نابیت ژ 50% زێده‌تر بیت، ئانكو خزمه‌تا وان چه‌ند یا زێده‌تر بیت و خوه‌ بگه‌هیته‌ 70 یان 80% ێ ژی، هه‌ر دێ ل سه‌ر 50% هێنه‌ خانه‌نشینكرن و كه‌سێن ژییێ‌ وان نه‌گه‌هشتیه‌ خانه‌نشینیێ نابیت ژ 25% زێده‌تر بهێنه‌ خانه‌نشینكرن.

زیاد جه‌بار بۆ ئاژانسا خانی گۆت: “پلێن بلند یێن په‌رله‌مانتارێن هه‌ر چار خۆلێن چوویی یێن په‌رله‌مانێ كوردستانێ‌ دێ به‌ر ب ڤێ بڕیارێ كه‌ڤن و حوكمه‌تێ ده‌ست ب بجهئینانا قانوونا چاكسازیێ كریه‌، ئه‌ڤ قانوونه‌ دێ هه‌موو پلێن بلند ڤه‌گریت، هه‌ر ژ سه‌رۆكێ هه‌رێمێ و سه‌رۆكێ حوكمه‌تێ و سه‌رۆكێ‌ په‌رله‌مانی و وه‌زیر و رێڤه‌به‌رێن گشتی و په‌رله‌مانتاران و هه‌موو ئه‌و كه‌سێن ب پله‌ بلند د قانوونێ دا هاتینه‌ پێناسه‌كرن”.