ئه‌ڤرۆ، رێوار محه‌مه‌د ره‌شید:

سترانبێژێ‌ گه‌نج (شڤان دۆسكی) د دیداره‌ێ‌ دا بۆ به‌رپه‌رێ‌ هونه‌ری یێ‌ رۆژناما ئه‌ڤرۆ دیار كر كو نوكه‌ ئه‌و مژوولی تۆماركرنا سترانه‌كێ‌ یه‌ ب شێوه‌یێ‌ كوكتێل كو  ژ سێ‌ سترانان  پێك دهێت دو ستران فلكلۆرن و ئێك ژ وان سترانان ژی ژ په‌یڤ و ئاوازێن وی ب خوه‌یه‌ و گۆت: “ئه‌ڤ سترانه‌ یا ل ستودیۆیا (محه‌مه‌د مه‌جید)ی دهێته‌ تۆماركرن و هه‌ر ده‌مێ‌ ب دووماهی هات دێ‌ كلیپ كه‌م و پێشكێشی حه‌ز ژێكه‌رێن ده‌نگێ‌ خوه‌ كه‌م، به‌لێ‌ هه‌تا نوكه‌ من جهێ‌ كلیپكرنا ڤێ‌ سترانێ‌ ده‌ستنیشان نه‌كریه‌”

ناڤهاتی ئاماژه‌ دا وێ‌ چه‌ندێ‌ كو هه‌تا نوكه‌ وی دو به‌رهه‌م هه‌نه‌، هه‌روه‌سا سترانێن دوقۆلی ژی دگه‌ل دو هونه‌رمه‌ندان و راپه‌ره‌كی گۆتینه‌ و ب شێوه‌یه‌كێ‌ گشتی هه‌تا نوكه‌ ژ چو كارێن خوه‌ یێن هونه‌ری په‌شێمان نه‌بوویه‌، ژ به‌ر كو به‌ری هه‌ر كاره‌كێ‌ هونه‌ری ئه‌نجام بده‌ت ب شێوه‌یه‌كێ‌ گه‌له‌ك باش هزرا خوه‌ د وی كاری دا دكه‌ت و گۆت: “ب دیتنا من ئه‌و سترانێن ئه‌ز نوكه‌ چێدكه‌م هه‌كه‌ بكه‌مه‌ كلیپ دێ‌ ژ به‌رهه‌می باشتر بن پێشكێشی حه‌ز ژێكه‌رێن ده‌نگێ‌ خوه‌ بكه‌م”.

شڤانی خویا كر كو ئه‌و مزگینیێ‌ دده‌ته‌ هه‌موو حه‌ز ژێكه‌رێن ده‌نگێ‌ خوه‌ كو ل ده‌مه‌كێ‌ نێزیك دێ‌ چه‌ندین سترانان یێن كو به‌ری نوكه‌ وان گوهداری بۆ كری ب شێوه‌یه‌كێ‌ سه‌رده‌مانه‌ و تراك تراك تۆمار كه‌ت و گۆت: “د كارێ‌ سترانگۆتنێ‌ دا ئه‌ز گه‌له‌ك ب فلكلۆری ڤه‌ یێ‌ گرێدایمه‌، به‌لێ‌ هنده‌ك جاران سترانێن سه‌رده‌م ژی دبێژم، ژ به‌ر كو حه‌ز ژێكه‌رێن ده‌نگێ‌ من حه‌ز ژ گوهداریا هه‌ر دو جوره‌ سترانان دكه‌ن”.

ئه‌ڤرۆ، هه‌رهین محه‌مه‌د:

سترانبێژ ئیڤان لبنان، د دیداره‌كێ‌ دا بۆ به‌رپه‌رێ‌ هونه‌ری یێ‌ رۆژناما ئه‌ڤرۆ دیار كر كو ئه‌و ستران وه‌ك سیتافكێ‌ نه‌ بۆ ئێك و دو نه‌شێن بێ‌ ئێك و دو ب قه‌تینن وی هه‌موو ژیانا خوه‌ دایه‌ ستران گۆتنێ‌ و به‌رامبه‌ر ستران گۆتنێ‌ بینه‌ره‌ك و حه‌زژێكه‌ره‌كێ‌ وه‌فادار دایه‌ وی و حه‌زدكه‌ت ل گه‌ل هه‌موو هونه‌رمه‌ندان سترانا بێژیت چ كور، یان كچ بیت هونه‌رناما پێكڤه‌ ژیانێ‌ یه‌.

ناڤبری گۆت: گه‌له‌ك سترانبێژ هه‌نه‌ ده‌نگێ‌ مه‌ ل گه‌لك دگونجیت و دبینم بینه‌ر و گوهدار دشێن وێ‌ بریارێ‌ بده‌ن كا ده‌نگێ‌ من ل گه‌ل كیژ ده‌نگی دگۆنجیت و ئه‌و ناما فمن ب دوووماهی نه‌هاتیه‌ و هێشتا یێ‌ ل ده‌ستپێكا نڤیسینا وێ‌، چونكو هونه‌ر ده‌ریایه‌كا گه‌له‌ك مه‌زنه‌ و ب ساناهی كه‌س ژێ‌ ده‌رباز نابیت.

دلایه‌كێ‌ دی دا گۆت: هونه‌رمه‌ند یوسف نه‌شێت بۆ چو كه‌سان بیته‌ ئه‌یازه‌كێ‌ دی، چونكو ئه‌یازی گه‌لك قوربانی دا هه‌تا شیایی ناڤێ‌ خوه‌ توماربكه‌ت دناڤ مێژوویا هونه‌رێ‌ كوردی دا و دبینم چ ژ وێ‌ تاوانێ‌ مه‌زنتر نینه‌ كو مرۆڤ خوه‌ ل سه‌ر كیستێ‌ كه‌سه‌كێ‌ دی به‌رنیاس بكه‌ت و ئه‌ز ژی چو جاران نه‌شێم بمه‌ ئه‌یاز كو هونه‌رمه‌ندێ‌ خودێ‌ ژێ‌ رازی ئه‌یاز زاخویی كورخالێ‌ من بوو، له‌ورا دێ‌ ل سه‌ر ناما خوه‌ یێ‌ به‌رده‌وام بم دا كو بشێم بمه‌ ئیڤان و ل پاشه‌رۆژی َمن ژی خه‌باته‌ك وه‌كو یا هه‌موو هونه‌رمه‌ندێن وه‌غه‌ركری هه‌بیت و من ژی دڤێت ناما خوه‌ ب دووواهی بینم هونه‌ره‌ك ب مولك و ناڤێ‌ من بیت.

ئه‌ڤرۆ، رێوار محه‌مه‌د:

ئالان ئدریس، په‌یكه‌رسازه‌كێ‌ پارێزگه‌ها دهۆكێ‌ یه‌ د دیداره‌كێ‌ دا بۆ رۆژناما ئه‌ڤرۆ دیار كر كو بۆ ده‌مێ‌ هه‌شت سالانه‌ ئه‌و كارێ‌ هونه‌رێ‌ په‌یكه‌رسازیێ‌ دكه‌ت بێ‌ كو چو جهێن په‌یوه‌ندیدار ب هونه‌ری ڤه‌ پشته‌ڤانیێ‌ لێ‌ بكه‌ن و گۆت: “من گه‌له‌ك كارێن هونه‌رێ‌ په‌یكه‌سازیێ‌ ب شێوه‌یه‌كێ‌ خوه‌به‌خش ئه‌نجامداینه‌ و هه‌تا نوكه‌ من چو قازانج ژ هونه‌رێ‌ خوه‌ یێ‌ په‌یكه‌رسازیێ‌ نه‌كریه‌ و نه‌شیایمه‌ ب رێیا هونه‌ری ژیانا خوه‌ ب رێڤه‌ ببه‌م، ژ به‌ر ڤێ‌ چه‌ندێ‌ نوكه‌ بوویمه‌ كرێكار ل به‌ر ماركێته‌كێ‌”.

ناڤهاتی ئاماژه‌ دا وێ‌ چه‌ندێ‌ كو چه‌ندین جاران وی ب رێیا ده‌زگه‌هێن راگه‌هاندنێ‌ و سوشیال میدیایێ‌ داخواز ژ جهێن په‌یوه‌ندیدار ب هونه‌ری ڤه‌ كریه‌ بتنێ‌ كه‌ره‌ستێن پێدڤی بۆ كارێن وی یێن هونه‌ری دابین بكه‌ن داكو بشێت به‌رده‌وامیێ‌ بده‌ته‌ كارێ‌ خوه‌ به‌لێ‌ یا بێ‌ مفا بوویه‌ ژ به‌ر ڤێ‌ چه‌ندێ‌ نوكه‌ ئه‌و ژ پشته‌ڤانیا كارێن هونه‌ری بێ‌ هیڤی بوویه‌ و گۆت: “نوكه‌ ل دووڤ شیانێن خوه‌ ئه‌ز پرۆڤان د كارێ‌ خوه‌ یێ‌ په‌یكه‌رسازیێ‌ دا دكه‌م، به‌لێ‌ هه‌كه‌ هه‌ر ره‌وش بڤی شێوه‌یی بیت و پشته‌ڤانیا من نه‌هێته‌كرن ئه‌ز دێ‌ نه‌چاربم بێ‌ كو ل دووڤ حه‌زا خوه‌ ئه‌ز كارێ‌ هونه‌ری بهێلم دێ‌ ژێ‌ دوور كه‌ڤم ئه‌ڤه‌ دده‌مه‌كی دایه‌ كو ئه‌ز ده‌رچوویێ‌ پشكا شێوه‌كای مه‌ ل په‌یمانگه‌ها هونه‌رێن جوان ل دهۆكێ‌ و نوكه‌ ژی قوتابیێ‌ قووناغا سێیێ‌ مه‌ ل پشكا شێوه‌كاری ل كۆلیژا زانستێن مرۆڤایه‌تی – زانكۆیا دهۆك و گه‌له‌ك حه‌ز ژ كارێ‌ خوه‌ یێ‌ هونه‌ری دكه‌م، به‌لێ‌ مخابن كه‌س پشته‌ڤانیا من ناكه‌ت بۆ وێ‌ چه‌ندێ‌ ب شیانێن خوه‌ یێن هونه‌ری خزمه‌تا ملله‌تێ‌ خوه‌ بكه‌م”.

ئه‌ڤرۆ، هه‌رهین محه‌مه‌د:

سترانبێژێ‌ باكوورێ‌ كوردستانێ‌ هوزان بشار، ددیداره‌كێ‌ دا بۆ به‌رپه‌رێ‌ هونه‌ری یێ‌ رۆژناما ئه‌ڤرۆ دیاركو نوكه‌ ئه‌و مژوولی كلیپه‌كێ‌ یه‌ بناڤێ‌ (فه‌له‌ك) كو ژ په‌یڤ و ئاوازێن وی ب خوه‌ نه‌ و ژڤانه‌ ل نێزیك بهێته‌ به‌لاڤكرن.

هوزانی گۆت ژی: هه‌ر سترانبێژه‌كێ‌ ده‌نگ خوه‌ش بیت یێ‌ ئاماده‌مه‌ سترانا دوقۆلی ل گه‌ل بێژم و حه‌ز دكه‌م ل گه‌ل هونه‌رمه‌ند شڤان په‌روه‌ر و هوزان دیار و هوزان ئایدن و كرمانج باكووری بێژم و هه‌روه‌سان هونه‌رمه‌ندێن باشوور ژی حه‌ز دكه‌م ل گه‌ل رۆمی هه‌ركی سترانا بێژم، چونكۆ مۆزیك و هه‌لبه‌ستێن وی گه‌له‌ك یا خوه‌شه‌ و سترانا دبێژم نه‌كو دا داهاته‌كی ب ده‌ست خوه‌ ڤه‌ بینم هه‌ر سترانا دبێژم ئێش و ئازارێن ملله‌تێ‌ خوه‌ پێ‌ دیاردكه‌م و دیرۆكا ملله‌تێ‌ مه‌ ل سه‌ر ده‌نگ بێژیێ‌ هاتیه‌ نڤیسین و پێدڤیه‌ گه‌نجێن مه‌ ئه‌وێن ژنوی سترانا دبێژن ڤێ‌ چه‌ندێ‌ بزانن و نه‌بتنێ‌ ل ده‌واتان سترانا بێژن.