شێلادزێ، ئه‌سعه‌د رێكانی:
سالانه به‌رهه‌مه‌كێ باش یێ هنگڤینێ خومالی و چیایی دكه‌ڤته بازاری، لێ ئه‌ڤ ساله مێشه‌ڤان وه‌سا دیار دكه‌ن هشكه‌سالیێ و نه‌ئارامیا ده‌ڤه‌را وان كارتێكرن ل به‌رهه‌مێ هنگڤینی كریه و زۆر كێم بوویه.
موسته‌فا تاهر مێشه‌ڤانه‌كێ ده‌ڤه‌را شێلادزێ یه دیار كر، هشكه‌سالیێ كارتێكرن ل به‌رهه‌مێ هنگڤینی وان كریه و بۆ ئه‌ڤرۆ گۆت: ئه‌ڤ ساله ب گشتی به‌رهه‌مێ هنگڤینی زۆر یێ كێم بوو، ئه‌و ژی ژبه‌ر نه‌هاتنا بارانا و هشكه‌سالیێ و نه‌بوونا بوهاره‌كا باش مێشا هنگڤینی نه‌شیا ب دروستی ب كارێ چێكرنا هنگڤینی رابیت.
زێده‌تر گۆت: ئه‌ڤه چه‌ندین ساله ئه‌م خودانكرنا مێشا دكه‌ینه كارێ خۆ، ئه‌ڤ ساله نه‌چاربووین ژبه‌ر هشكه‌سالیێ مه پرانیا مێشێن خۆه برنه جهێن دوور و چیایی، لێ به‌رهه‌مێ وان هه‌ر یێ كێم بوونه‌چاربوین ڤه‌گوهێزینه جهه‌كێ دی لێ هه‌ر یا بێ مفا بوو ئه‌ڤ ساله ل پێش سالێن چووی ڤه 10% ژی به‌رهه‌مێ هنگڤینی نه‌هاتیه.
موسته‌فا تاهر ئه‌و ژی ئاشكرا كر و گۆت: هه‌ر چه‌نده نوكه ده‌مێ برینا هنگڤینی نینه، لێ ئه‌م نه‌چارین هه‌ر نوكه ده‌ست پێ بكه‌ین و ئه‌ز دشێم بێژم 15 سندوقا چه‌ند شانه‌كێن كێم ئیناینه ده‌ر و ئه‌ڤ ساله زیانه‌كا مه‌زن گه‌هشته مێشه‌ڤانان ژبه‌ر هشكه سالیێ.
قاسم دهیكی مێشه‌ڤانه‌كێ دی یێ ده‌ڤه‌رێ یه به‌حسێ زه‌حمه‌ت و چه‌وانیا ب خۆدانكرنا مێشێن هنگڤینی كر و گۆت : خۆدانكرنا مێشێشان زۆر یا ب زه‌حمه‌ته و ب تایبه‌تی ل ده‌ڤه‌را مه، چونكو مه چو جه نینن مێشا خۆجه بكه‌ین و ب دانینێ. ئه‌م به‌رده‌وام ڤه‌دگوهێزین ژ جهه‌كی بۆ جهه‌كێ دیتر.
قاسم دهیكی ئه‌و ژی ئاشكراكر، نه‌ئارامیا ده‌ڤه‌رێ كارتێكرن ل كارێ وان كریه و گۆت: خودانكرنا مێشا هنگڤینی چاڤدێریه‌كا به‌رده‌وام دڤێت بۆ سه‌خبێریكرنێ و دیسان تووشی نه‌خوشیا دبن و مه‌ترسیا ژ ناڤچوونێ ل سه‌ره و ژلایه‌كێ دی ڤه ژی ئه‌و جهێن دوور د ئارام نینن، ئه‌گه‌ر دا سالانه رێژه‌كا باش یا هنگڤینی به‌رهه‌م ئینین.
نيشاندان