ئه‌ڤرۆ:
سه‌رۆك وه‌زیرێن ئیسرائیلێ راگه‌هاند كو ئیران و حزبوللا لوبنانێ دخوازن ب رێیا لوبنانێ ئێرشی وه‌لاتێ مه بكه‌ن، ژ به‌ر هندێ ژی ئه‌م ب توندی هۆشداریێ دده‌ینه لوبنانێ كو رێ نه‌ده‌ت وه‌لاتێ وان ل دژی مه بهێته بكارئینان.
ل ئالیێ دی حه‌سه‌ن نه‌سروللا سكرتێرێ حزبوللا لوبنانێ ژی راگه‌هاند كو هه‌كه ئیسرائیل ئێرشی به‌رژه‌وه‌ندیێن وان بكه‌ت ئه‌و دێ ب توندی به‌رسڤا هه‌ر ئێرشه‌كێ ده‌ن و ل هه‌مبه‌ر ئیسرائیلێ بێده‌نگ نابن.
ئه‌ڤرۆ ،سالار محه‌مه‌د دۆسكی:
پتریا مامۆستا و كه‌سانێن سازیێن په‌روه‌ردێ و خواندنا یلند دا كار دكه‌ن، دیار دكه‌ن كو ئه‌ف ساله قوتابیان هه‌ست ب بهێنڤه‌دانا هاڤینێ نه‌كریه، ل دور ڤی بابه‌تی ژی بۆچوونێن جودا هه‌نه.
بده‌ل گابێركی، مامۆستا و میدیاكار، ل دور بابه‌تی گۆت: قوتابی خاوكێشه‌كا گرنگ و كاریگه‌ره دپێشڤه‌برنا هه‌ر وه‌لاته‌كیدا یا گرنگه هه‌می جڤاك و حوكمه‌ت ب هه‌ستیاریڤه خزمه‌تا ڤێ ته‌خا گرنگ یا جڤاكی بكه‌ن، هه‌كه نه دێ وه‌لات هه‌موو باجا ڤێ ته‌خا هه‌ستیار ده‌ت ل پاشه‌رۆژێ..
هاتنا كورونایێ كاریگه‌ریێن نه‌رێنی ل سه‌ر پرۆسێسا خواندنێ هه‌بووینه و قوتابی بووینه قوربانیێن ئێكێ و چه‌ندین مودێلێن خواندنێ ده‌ركه‌فتینه و بگره ئونلاین و حه‌فتیێ دو رۆژ یانژی هه‌ر رۆژه‌كێ نه ئێكێ یان ژی دور كه‌فتن ژ خواندنێ بۆ ده‌مه‌كێ درێژ.
قوربانیێ دناڤبه‌را دووماهی ئینانا خواندنا ئه‌ڤ ساله و ده‌سپێكرنا سالا نوو یا خواندنێ وه‌كی یا دیاره چ بهێنڤه‌دانا هوسا نینه ب تایبه‌ت بۆ قوتابیێن پولا دوازدێ ئه‌وێن ده‌رنه‌چووین و دیسا ئه‌وا قوتابیان ئه‌وێن ب هنده‌ك وانان كه‌فتین دێ خولا دووێ ئه‌زموونان كه‌نه ڤه ئه‌ڤ چه‌نده ژی دێ
بیته ئه‌گه‌رێ نه ئارامیا قوتابیان دسالا نوو یا خواندنێدا وه‌كو نه به‌رهه‌ڤیا قوتابیان ژلایێ ده‌روونی ڤه و نه‌بوونا پشته‌ڤانیه‌كا بهێز ژلایێ خێزانێ ڤه چنكو پێشڤه‌برنا خواندنێ ل ده‌ف قوتابیان دڤێت خێزان ژی خودان پێگه‌هه‌كێ بهێز بیت بگره ژلایێ ئابووری و ره‌وشه‌نبیری ڤه.
هه‌مان میدیاكار گۆت: ئه‌م هه‌می دزانین دووماهی ئینانا خواندنا ئه‌ڤ ساله چه‌ندین كێماسی هه‌بوونه وه‌كو كورتكرنا بابه‌تان و دانانا ئه‌ركه‌كێ زێده ب قوتابیان كو ببوو بارگرانی بۆ قوتابیان و تێكچوونا ده‌روونێ وان و ترس ژ شكه‌ستنێ، ل دووماهیێ یا گرنگه وه‌زاره‌تا په‌روه‌ردێ بۆ ده‌سپێكرنا سالا نوویا خواندنێ دیتنه‌كا زانستی بۆ ژیان و ژینگه‌ها قوتابی هه‌بیت چنكی قوتابی بێ هه‌بوونا ده‌روونه‌كێ ئارام و ژینگه‌هه‌كا ئارام چ جارا سه‌رناكه‌ڤیت هه‌كه هه‌می رۆژێن سالێ دناڤا قوتابخاندابیت.
نێچیرڤان عه‌بدوالخالق، مامۆستایێ قوتابخانا نی ره‌نگ، ل دور بابه‌تی گۆت: راسته ڤێ په‌ژیكا كورونایێ هه‌می جیهان تێكدا وسه‌رێك وبنك كر وپه‌روه‌رده وزانین ژی ژدربێ وێ دڤه‌ده‌ر ودویر نه‌بوون چونكی هه‌كه ب دروستی ب سه‌نگینین دێ بینین كارتێكرنا هه‌ره مه‌زن ئه‌وه یا لسه‌ر كه‌رتێ په‌روه‌ردێ كری چونكی ب راستی سالا پار نیڤه‌ك ژێ چوو وپروگرام ب دوماهی نه‌هاتن وتاقیكرن دگه‌ش وهه‌وایه‌كی ب ترس ونه‌خوشدا هاتن ئه‌نجامدان وئه‌ڤ ساله ئێكجار كاودان دگونجای نه‌بوون وچه‌ندین جارا ڤه‌قه‌تیان كه‌ته خواندنێ وڤێ چه‌ندێ بخۆ ئه‌ڤ ساله گرانگتر لێ كر لسه‌ر قوتابیان كو ژلایه‌كی ڤه ترس ودوودلی لسه‌ر قوتابیێن زیره‌ك وخه‌مخور په‌یدا كر ژبه‌ر ترسا وان كو سالا وان یاخواندنێ ژێ بچیت وژلایه‌كێ دیڤه سستیه‌ك وته‌مبه‌لیه‌ك زێده په‌یدا كر لده‌ف قوتابیان نه‌ل ئاستیًنَ باش یێن خواندنێ , له‌وما دێ بینین فشارا هه‌ره مه‌زن كه‌ته سه‌ر هه‌یڤا دوماهیێ ژسالا خواندنێ كو هه‌می هه‌ول وپێكول ئه‌وبوون ژلایێ سازیێن په‌روه‌رده‌یی ڤه پروكرام بدوماهیك وتانوكه ئه‌و فششارا خواندنێ یابه‌رده‌وامه لسه‌ر ته‌خه‌كا قوتابیان ودئه‌نجامێ ڤێ هه‌میێ دا دێ بینین دگه‌ل فشارێ هه‌میێ گازیێن دهێن راهێلان بۆ زوی ڤه‌كرنا قوتابخانان وده‌سپێكرنا سالا نوی یاخواندنێ ب به‌هانه‌یا كو سالا پار بهێته قه‌ره‌بوو كرن . له‌وما ئه‌ز ب رێكا ده‌زگه‌هێ وه یێ هێژا ڤێ نامێ دگه‌هینمه خودانێن بریارێ بلا ژ بریارێن وه‌سا بله‌ز نه‌ده‌ن پاشی په‌شێمان ببن بو ده‌سپێكرنا زوی بو سالا خواندنێ ,یا ئێكێ ژبه‌ر كو ئه‌م هێشتا یێن دناڤا كه‌ل كه‌لا پێلا هه‌را دژوارا كورونایێ نوی ویادووێ بلا لایه‌نێ ده‌روونی یێ قوتابیان لبه‌ر چاڤێن مه‌بیت وهه‌ر چنه‌بیت هه‌یڤا بهێت ژی بهێلین نه‌فه‌سه‌كێ وه‌رگرن وخوشیه‌كێ ژبهێن ڤه‌دانا هاڤینێ وه‌ربگرن . هه‌تا كا دێ چ ل دنیایێ هیتن
خه‌تاب خه‌لیل ابراهیم، رێڤه‌به‌رێ قوتابخانا هه‌لویست ل كومه‌لگه‌ها ئه‌ڤرۆ ستی، ل دور بابه‌تی گۆت: هه‌ر ژ ده‌سپێكا هاتنا كورونایێ قواتبی ژ زه‌ڕه‌رمه‌ندێن سه‌ره‌كی بوون و هه‌ر ژ ده‌سپێكا گرنتینی و مانا قوتابی ل مال و سه‌رده‌ریكرنا ل گه‌ل وی دهاته‌كرن یا نه دروست ل گه‌ل ڤی سیسته‌می ژ نه‌بوونا ئه‌نترنێتێ و ڤه‌قه‌تیانا به‌رده‌وام ژ خواندنێ بۆ ئه‌گه‌رێ لاواز بوونا وی قوتابی و ڤێ چه‌ندێ كارتێكرنه‌كا نه‌رێنی ل سه‌ر قوتابی هه‌بوو و سه‌ره‌رایی ڤێ چه‌ندێ قوتابی وه‌ك ده‌روون ژی نه‌یێ ئارام بوو، له‌وما ژی ڤێ چه‌ندێ هه‌می كارتێكرن ل سه‌ر بهێنڤه‌دانا قوتابیان كریه و په‌روره‌ده ژی نه‌چار بوویه ژ به‌ر سلامه‌تیا مامۆستا و قوتابیان ده‌ما ب گوهوریت.
هه‌ولێر، قائید میرۆ
بڕیاره ده‌ستپێكا هه‌یڤا داهاتی ده‌واما سالا نوویا خواندنێ بهێته ده‌ستپێكرن و ئه‌ندامه‌كا لیژنا په‌روه‌ردێ و خواندنا بلندژی ئاشكراكر، هه‌گه‌ر ره‌وشا كۆرۆنایێ وه‌ك نوكه یا دژواربیت زه‌حمه‌ته ده‌رگه‌هێن قوتابخانا بهێنه ڤه‌كرن و ده‌وام بهێنه ده‌ستپێكرن هه‌روه‌سا دبێژیت، ئه‌ڤه بۆده‌مێ دو سالانه ڤه‌گوهاستنا مامۆستا هاتیه راگرتن و پێداچوون ب میلاكێ مامۆستا تێته‌كرن، به‌لێ دێ پرۆسا ڤه‌گوهاستنا مامۆستا هێته ده‌ستپێكرن.
گولستان باقی، ئه‌نداما لیژنا په‌روه‌ردێ لپه‌رله‌مانێ كوردستانێ بۆ رۆژناما ئه‌ڤرۆ دیاركر”به‌ری چه‌ند رۆژان لیژنا په‌روه‌دێ و خواندنا بلند لدۆر ره‌وشا په‌روه‌ردێ كۆمبوویه و بڕیاره كۆمبوونه‌كادیژی بهێته ئه‌نجامدان تێدا دێ ره‌وشا په‌روه‌ردێ و چاوانیا ده‌ستپێكرنا سالا نوویا خواندنێ دێ هێته به‌حسكرن، چونكه دده‌مێ نوكه‌دا ڤایرۆسا كۆرۆنایێ دژواربوویه و كێمتر ژ هه‌یڤه‌كێ مایه بۆ ده‌ستپێكرنا سالا نوویا خواندنێ، ژبه‌ركو بڕیاره ده‌ستپێكا هه‌یڤا ئیلوونێ ده‌ست ب پرۆسا خواندنێ بهێته‌كرن، به‌لێ هه‌گه‌ر ره‌وشا كۆرۆنایێ وه‌ك نوكه یا به‌رده‌وامبیت ئه‌م وه‌كی په‌رله‌مان دگه‌ل ده‌ستپێكرنا ده‌وامێ نینه، هه‌تا وه‌زاره‌تا په‌روه‌ردێ و هه‌موو لایه‌نێن په‌یوه‌ندیدار دگه‌ل ده‌ستپێكرنا ده‌وامێ نینه، كو ژیانا مامۆستا و قوتابیان بكه‌ڤیته مه‌ترسیێ دا، چونكه پاراستنا ژیان و گیانێ مامۆستا و قوتابی ژ هه‌موو تشته‌كێ پیرۆزتره، ئه‌م ناڤه‌شێرین مه‌ترسیێن كۆرۆنایێ هه‌نه و ئاسته‌نگ بۆ كه‌رتێ په‌روه‌ردێ په‌یداكرینه، هه‌گه‌ر ره‌وش هوسابیت ده‌ستپێكا هه‌یڤا داهاتی ئه‌م باوه‌رناكه‌ین ده‌واما قوتابخانا بهێته ده‌ستپێكرن، ئیدی دێ مینیت لسه‌ر رۆژێن داهاتی و بڕیارێن حوكمه‌تێ بۆ ده‌ستپێكرنا ده‌وامێ، هه‌ر چاوابیت دڤێت ره‌وشا قوتابی و مامۆستا به‌رچاف بهێته وه‌رگرتن و نابیت زیان بگه‌هن قوتابیان.
ئه‌ڤێ ئه‌نداما لیژنا په‌روه‌ردێ گۆت” كۆرۆنایێ كاریگه‌ریێن خراپ كرینه سه‌ر ئاستێ زانستیێ قوتابیان و مخابن ژبه‌ر نه‌بوونا ده‌وامێ ئاستێ خواندنێ داكه‌تیه، هه‌روه‌سا سیسته‌مێ ئه‌لكترۆنی ژی نه‌شیایه ببیته به‌دیل بۆ خواندنێ، به‌لێ بڕیارا خواندنا ئه‌لكترۆنی ب نه‌چاری هاتبوودان، ژبه‌ركو چور ێكێن دی نه‌بوون یان دڤێت خواندن بهێته راگرتن و نه‌هێته هژمارتن یانژی سیسته‌مێ ئه‌لكترۆنی بهێته بجه ئینان ئه‌گه‌ر بهێت و ده‌وام نه‌هێته‌كرن، په‌روه‌ردێ بڕیاردایه هه‌موو مامۆستا ڤاكسینێ كۆرۆنایێ دانن ئه‌ڤه‌ژی وه‌ك به‌رهه‌ڤیه‌ك ئه‌گه‌ر ره‌وش هوسابیت مامۆستا بشێن ده‌وامێ بكه‌ن.
لدۆر ڤه‌گوهاستنا مامۆستاژی گولستان باقی ئاماژه‌كر” ئه‌ڤه بۆده‌مێ دو سالانه ڤه‌گوهاستنا مامۆستا هاتیه راگرتن و بڕیاره په‌روه‌رده پێداچوونێ ب میلاكێ مامۆستادا بكه‌ت، مخابن هنده‌ك په‌روه‌ردێن باژێڕا میلاكێ وانا یێ زێده‌یه به‌رۆڤاژی په‌روه‌ردێن ده‌روبه‌ر میلاك یێ كێمه و مامۆستا نه‌شێن بڕێڤه‌ببه‌ن ئه‌گه‌ر بهێت و ڤه‌گوهاستن بهێته ده‌ستپێكرن، نوكه پرۆسا پێداچوونا میلاكی بڕێڤه‌دچیت و بڕیاره پشتی دوماهی هاتنا پێداچوونێ ڤه‌گوهاستنا مامۆستا بهێته ده‌ستپێكرن بشێوه‌یه‌كی چو كاریگه‌ری لسه‌ر كه‌رتێ په‌روه‌ردێ نه‌بن، گوره‌ی دوفچوونه‌كا مه كری ل هنده‌ك قوتابخانا زێده‌تر مامۆستایێن وانه‌بێژ قوتابخانێ بڕێڤه‌دبه‌ن و ژبه‌ر نه‌بوونا میلاكی مامۆستایێن پێدڤی نینه، نه‌بوونا میلاكێ پێدڤی ل هنده‌ك په‌روه‌ردان ئاریشه‌یه‌كا مه‌زنه و ئه‌گه‌ر مامۆستایێن وانه‌بێژ ئه‌و ڤالاهی تژی نه‌كربا له‌وانه‌یه تووشی ئاریشه‌یێن مه‌زن ببایه كه‌رتێ په‌روه‌ردێ، مامۆستا مافێ خۆیه داخوازا ڤه‌گوهاستنێ بكه‌ن ئه‌ڤه‌ژی پشتی چه‌ند سالێن خزمه‌تێ ل ده‌رڤه‌ی باژێڕا، به‌لێ دڤێت ره‌وشا په‌روه‌ردێ ژی به‌رچاف بهێته وه‌رگرتن.
دهۆك، له‌زگین جوقی:
به‌رپرسێ راگه‌هاندنێ ل رێڤه‌به‌ریا گشتی یا ساخله‌میا پارێزگه‌ها دهۆكێ دیار كر كو ل رۆژا 8/8/2021ێ ساخله‌میا پارێزگه‌ها دهۆكێ رۆژه‌كا تایبه‌ت بۆ فه‌رمانبه‌رێن دام و ده‌زگه‌هێن حكومه‌تا هه‌رێما كوردستانێ ل دهۆكێ ده‌ستنیشان كر كو بچن ڤاكسینێ بدانن.
حه‌مزه ره‌زیكی، به‌رپرسێ راگه‌هاندنێ ل رێڤه‌به‌ریا گشتی یا ساخله‌میا پارێزگه‌ها دهۆكێ بۆ رۆژناما ئه‌ڤرۆ خویا كر، ب سه‌رپه‌رشتیا د. ئه‌فراسیاب موسا، رێڤه‌به‌رێ گشتی یێ ساخله‌میا پارێزگه‌ها دهۆكێ كۆمبوونه‌ك ل سه‌ر پرۆسا ڤاكسیندانانێ هاته ئه‌نجامدان و بڕیار هاته‌دان كو ڤاكسیندانان ل هه‌موو رۆژێن شه‌مبی بۆ فه‌رمانبه‌ران بیت و ل هه‌موو رۆژێن سێشه‌مبی بۆ مامۆستایان بیت، دیسا داخواز هاته كرن وه‌لاتی خوه ب سیسته‌مێ ئونلاین تۆمار بكه‌ن بۆ ڤاكسیندانانێ، داكو ب شێوه‌كێ رێكخستێ ژڤانێن ڤاكسینێ وه‌ربگرن.
ره‌زیكی گۆت: “ساخله‌میا دهۆكێ دێ بنگه‌هێن ڤاكسیندانانێ ل دووڤ پێدڤیاتیا هه‌ر ده‌ڤه‌ره‌كێ و مه‌شقدان و راهێنانا كارمه‌ندان و دابینكرنا ڤاكسینان ل دۆر پێدڤیێ زێده‌تر كه‌ت”.
ئه‌ڤرۆ، ره‌مه‌زان هه‌رنی:
ل سنوورێ قه‌زا به‌رده‌ڕه‌ش لقێ نه‌هێ پارتی دیموكراتی كوردستان ده‌ست ب پرۆپاگه‌ندا هه‌لبژارتنان كر و سه‌رۆكێ لیستا پارتی بۆ جه‌ماوه‌رێ ده‌ڤه‌رێ دا نیاسین.
حه‌كیم محه‌مه‌د حاجی، كارگێڕی لقێ نه‌هێ پارتی دیموكراتی كوردستان ل ئاكرێ بۆ رۆژناما ئه‌ڤرۆ راگه‌هاند: “د چارچوڤێ پلان و به‌رنامێ پارتی دیموكراتی كوردستان دا بۆ پرۆسا هه‌لبژارتنێن به‌روه‌خت ل عیراقێ، لقێ نه‌هێ پارتی دیموكراتی كوردستان ب سه‌رپه‌رشتیا سه‌باح به‌یتولا، به‌رپرسێ لقێ پرۆپاگه‌ندا هه‌لبژارتنان ل قه‌زا به‌رده‌ڕه‌ش ده‌ستپێكر”.
ناڤهاتی گوت: “ل سنوورێ بازنه‌یێ ئاكرێ به‌رده‌ڕه‌ش، پارتی سێ به‌ربژار هه‌نه، خسرۆ گوران، سه‌رۆكێ لیستا پارتی دیموكراتی كوردستانه و به‌ربژارێ هژماره 24 بۆ جه‌ماوه‌رێ ده‌ڤه‌رێ دا نیاسین، دیسا شه‌هاب موافق سورچی و دكتۆره ڤیان ئاكره‌یی ژی ل سنوورێ به‌رده‌ڕه‌ش به‌ربژارن و ل رۆژێن بهێن ل ئاكرێ ژی دێ پرۆپاگه‌نده یا به‌رده‌وام بیت”.
دهۆك، نه‌وزاد هلۆری:
رێڤه‌به‌ریا حه‌ج و عومرێ ل پارێزگه‌ها دهۆكێ دیار كر كو بڕیاره دو رۆژێن بهێن دوباره گه‌شتێن عومرێ ل هه‌رێما كوردستان و پارێزگه‌ها دهۆكێ ژی بۆ مه‌ككه‌هـ و مه‌دینێ ده‌ست پێ بكه‌نه ڤه.
سه‌رمه‌د ئالیخان، رێڤه‌به‌رێ حه‌ج و عومرێ ل پارێزگه‌ها دهۆكێ بۆ رۆژناما ئه‌ڤرۆ گۆت: “پشتی راگرتنا گه‌شتێن عومرێ ژلایێ وه‌لاتێ سعودیێ ڤه ژ ئه‌گه‌رێ به‌لاڤبوونا ڤایرۆسێ كۆرۆنایێ، هه‌ر ب بڕیارا وه‌لاتێ سعودیێ جاره‌كا دی ده‌رگه‌هێن چوونا گه‌شتێن عومرێ دێ هێته ڤه‌كرن و گه‌شتیارێن عومرێ دشێن قه‌ستا عومرێ ل مه‌ككه‌ه و مه‌دینێ بكه‌ن”.
زێده‌تر گۆت: “گه‌شتێن عومرێ دێ ل رۆژا 10/8/2021ێ ده‌ستپێكه‌ن، به‌لێ پێدڤی یه ئه‌وێ دچیته عومرێ ل سه‌ر ژیێ 18 سالی بیت و هه‌ردو قورچێن ڤاكسینا دژی كۆرۆنایێ بدانیت، به‌روڤاژی نه‌شێت بچیته عومرێ”.
ئالیخانی دیار كر ژی كو بهایێ چوونا عومرێ گرێدای كۆمپانیایه كا چه‌ند جهه‌كێ گرنگ و ستراتیژی بۆ گه‌شتێن عومرێ دابین دكه‌ن و گۆت: “پێدڤی یه هه‌ر وه‌لاتیه‌كێ حه‌زا چوونا عومرێ هه‌بیت، سه‌ره‌دانا بنگه‌هێن دانانا ڤاكسینێ بكه‌ت، دێ بزاڤێ كه‌ین ل گه‌ل ساخله‌میا دهۆكێ میكانزمه‌كێ بۆ وان كه‌سان دانین كو دخوازن بچنه عومرێ، داكو ڤاكسین بۆ بهێته دانان”.
هه‌ولێر، قائید میرۆ:
پشتی پێكئینانا لژنه‌یه‌كا بلند بۆ چاره‌سه‌ركرنا ئاریشائه‌ردێ كریستیانان و نوونه‌ره‌كا كریستیانان ژی دبێژیت: ب تنێ ل سنوورێ پارێزگه‌ها دهۆكێ 55 سكالا هاتینه تۆماركرن.
كلارا عودیشۆ، نوونه‌راكریستیانان ل په‌رله‌مانێ كوردستانێ بۆ رۆژناما ئه‌ڤرۆ دیار كر، پشتی پێكئینانا لژنا بلند بۆ چاره‌سه‌ركرنا ئاریشا ئه‌ردێ كریستیانان، كو چه‌ندین ساله زێده‌گاڤی ل سه‌ر هاتیه كرن، هژماره‌ك لیژنه‌یێن دی ژی ل سه‌ر ئاستێ ده‌ڤه‌ران هاتینه پێكئینان و گۆت: “ب تنێ ل سنورێ پارێزگه‌ها دهۆكێ 55 سكالا هاتینه تۆماركرن، ل ده‌ڤه‌رێن دی ژی سكالا هه‌بووینه، به‌لێ هژمارا وان ناهێته زانین، مه هیڤیه‌ك هه‌یه ڤێجارێ ئاریشا ئه‌ردێ كریستیانان بهێته چاره‌سه‌ركرن، ب تایبه‌تی سه‌رۆكێ حوكمه‌تا هه‌رێما كوردستانێ ل سه‌ر چاره‌سه‌ركرنا ئاریشا ئه‌ردێ كریستیانان یێ رژده”.
كلارا عودیشۆ گۆتژی: “ئه‌و ئاریشه‌یێن ل سه‌ر ئه‌ردێ وه‌لاتیێن كریستیان هه‌ی زێده‌تر ئه‌و ئاریشه پشتی سه‌رهه‌لدانێ په‌یدابووینه، ئانكو ئاریشه‌یێن به‌رێ هاتینه چاره‌سه‌ركرن، به‌لێ پشتی سه‌هه‌لدانێ ده‌مێ كۆچا ملیۆنی و وه‌لاتی ئاواره‌بووین و پاشی خه‌لك ڤه‌گه‌ڕیایه سه‌ر مال و حالێن خوه زێده‌گاڤی ل سه‌ر ئه‌ردێ كریستیانان هاتنه كرن”.
ئه‌ڤرۆ، سالار محه‌مه‌د دۆسكی:
رێڤه‌به‌رێ ئوفیسا دهۆك یێ كومسیۆنا بلندا سه‌ربخوه یا هه‌لبژارتنان ل عیراقێ، د كۆنگره‌كێ رۆژنامه‌ڤانی دا نووترین پێشهات و به‌رهه‌ڤیێن كومسیۆنێ ل دۆر ئه‌نجامدانا هه‌لبژارتنان دانه دیاركرن.
خالد عه‌باس عومه‌ر، رێڤه‌به‌رێ ئوفیسا دهۆك یێ كومسیۆنا بلندا سه‌ربخوه یا هه‌لبژارتنان ل عیراقێ گۆت: “22 هزار كه‌سان فۆرم پێشكێش كرینه كو ل سه‌ر سندۆقێن ده‌نگدانێ ل رۆژا هه‌لبژارتنان وه‌ك فه‌رمانبه‌رێن كومسیۆنێ ل گه‌ل مه كار بكه‌ن، لێ مه پێدڤی ب 11 هزاران هه‌یه، ناڤ بۆ به‌غدا هاتینه بلندكرن و دێ ب شێوێ پشككێشانێ 11 هزار ناڤ هێنه دیاركرن”.
گۆتژی: “نوكه هژماره‌كا باش یا فه‌رمانبه‌ران پشكداری خولێن راهێنانێ بووینه، دیسا كومسیۆن ژی مژوولی چاپكرنا پوسته‌رێن پرۆپاگه‌ندا هه‌لبژارتنان و كاغه‌زێن ده‌نگدانێ یه”.
ناڤهاتی ئاشكرا كر، پرۆپاگه‌ندا هه‌لبژارتنان ل 8/7/2021 ده‌ستپێكریه و هه‌تا 7/10/2021 دێ یا به‌رده‌اوم بیت و گۆت: “مه داخواز ژ به‌ربژاران كریه نوكه پرۆپاگه‌ندا خوه نه‌كه‌ن، به‌لكو ل 1/9/2021 ده‌ست پێ بكه‌ن”.
عه‌باسی زێده‌تر گۆت: “مه ل حه‌فتیا بۆری تێسته‌كا مه‌زن بۆ ئامیرێن ده‌نگدانێ كر و سێ ئامیره ل رۆژا ده‌نگدانێ دێ هێنه بكارئینان، ئامیرێ ئێكێ دبێژنێ پشكنینا په‌نجه‌مۆرێ ناڤ و په‌نجه‌مۆر و پێزانینێن ده‌نگده‌ری د ناڤ دانه، ده‌مێ ده‌نگده‌ر په‌نجه‌مۆرا خوه ددانیت، دێ هێته پشتڕاستكرن كا ئه‌ڤه ئه‌و ده‌نگده‌ره یان نه ده‌نگێ خوه دای، ئامیرێ دویێ ڤاڤارتنا ده‌نگان دكه‌ت و ئه‌و ئامیره ب خوه به‌لاڤ دكه‌ت كا ده‌نگده‌ری ده‌نگێ خوه دایه كیژ هژمارێ، ئامیرێ سێیێ میمۆری یه و ئه‌و ڤاڤارتنێ دكه‌ت كا چه‌ندا په‌نجه‌مۆر دانایه و چه‌ند كاغه‌ز تێدانه و دو تێستێن دی ژی بۆ ئامیران ل هه‌یڤا ئیلۆنێ دێ هێنه كرن و ل ده‌ستپێكا هه‌یڤا ده‌ه ژی ب هه‌مان شێوه وه‌ك به‌رهه‌ڤی بۆ هه‌لبژارتنان”.
خالدی د وی كۆنگرێ رۆژنامه‌ڤانی دا خویا كر، ل چارشه‌مبیا بۆری 100 هزار كارتێن بایۆمه‌تری گه‌هشتینه دهۆكێ و یێن وان ده‌نگدارانه یێن ل سالێن 2018 و 2019 و 2020 و 2021 خوه تۆماركرین و پشكنین بۆ هه‌موو كارتان هاتیه كرن و ل سه‌ر بنگه‌هان هاتینه به‌لاڤكرن، دا خه‌لك كارتێن خوه وه‌ربگریت، بلندترین رێژا به‌لاڤكرنا كارتان ل سه‌رانسه‌ری عیراقێ ل دهۆكێ یه كو ژ 92% پتره و گۆت: “په‌یاما مه یا سه‌ره‌كی بۆ لایه‌نێ، سیاسی و ده‌نگده‌ران و به‌ربژێران هاندانا خه‌لكی بكه‌ن بچن كارتێن خوه وه‌ربگرن، چونكو بێی كارتا بایۆمه‌تری یان ئه‌لكترۆنی ده‌نگدان ناهێته‌كرن و كارتا ئه‌لكترۆنی یا بێ وێنه ژی دروسته‌ی”.
ل دور رێكخراوان ژی گۆت: “هه‌تا چار رێكخراوێن بیانی ل گه‌لUN خوه تۆماركرینه كو سه‌رپه‌رشتیا هه‌لبژارتنان ب شێوه‌كێ ئێكسه‌ر بكه‌ن، جوداهی یا ڤان هه‌لبژاتنان ل گه‌ل یێن سالێن بۆری ئه‌وه پتر زه‌لالی دێ تێدا هه‌بیت و ئاریشێن سالێن بۆری ب تایبه‌ت یێن ئاوران دوباره نابن، دیسا 80 هزار ئاواره ل سنوورێ پارێزگه‌ها دهۆكێ د ناڤ كه‌مپان و ژ ده‌رڤه‌ی كه‌مپان هاتینه تۆماكرن و دێ ده‌نگێ خوه ل دهۆكێ ده‌ن”.
بۆ زانین ل سنوورێ پارێزگه‌ها دهۆكێ 778 هزار كه‌سان مافێ ده‌نگدانا گشتی یێ هه‌ی و 51 هزار پێشمه‌رگه و زێره‌ڤانی مافێ ده‌نگدانێ هه‌یه و ل رۆژا 8/10/2021 ئاواره و پێشمه‌رگه پێكڤه دێ ده‌نگێ خوه ده‌ن.
دیدار، نیوار محه‌مه‌دسه‌لیم:
هۆشه‌نگ تاجر، رۆژنامه‌ڤان و چاڤدێرێ ره‌وشا ئیرانێ د دیداره‌كێ دا بۆ رۆژناما ئه‌ڤرۆ به‌حس ل گرنگیا سه‌ره‌دان و ئاماده‌بوونا سه‌رۆكێ هه‌رێمێ كوردستانێ ل ده‌مێ سووندخوارنا سه‌رۆك كۆمارێ ئیرانێ دكه‌ت و دده‌ته زانین كو دانانا ئالایێ كوردستانێ د رێوره‌سمێن پێشوازیكرنێ وێ چه‌ندێ دگه‌هینیت كو ئیرانێ بریار دایه كو ل گه‌ل هه‌رێما كوردستانێ ده‌ست ب قۆناغه‌كا نوو بكه‌ت. ئاشكه‌را ژی دكه‌ت كو به‌ری نها دو جاران وه‌زیرێ ده‌رڤه یێ ئیرانێ محه‌مه‌د جه‌واد زه‌ریف هاته هه‌ولێرێ و ئه‌و په‌یامه دا سه‌ركردایه‌تیا سیاسی یا هه‌رێما كوردستانێ كو ئیران به‌رهه‌ڤه ل گه‌ل هه‌رێمێ ده‌ست ب قۆناغه‌كا نوو بكه‌ت
ئه‌ڤرۆ: ئاماده‌بوونا سه‌رۆكێ هه‌رێما كوردستانێ ل رێوره‌سمێن سووندخوارنا سه‌رۆك كۆمارێ ئیرانێ چ دگه‌هینیت؟
هوشنگ تاجر: سه‌ره‌دانا سه‌رۆكێ هه‌رێما كوردستانێ بۆ ئیرانێ و بلندكرنا ئالایێ كوردستانێ و ئه‌و پێشوازیا گه‌رم كو ل فرۆكه‌خانا مێهرئاباد یا ئیرانێ هاته كرن ده‌نگڤه‌دانه‌كا خوه یا مه‌زن د ئاستێ كوردستانێ و جیهانێ دا هه‌بوو، بێگومان دڤێت ئه‌م چه‌ندین خالێن گرنگ ل دۆر بلندكرنا ئالایێ كوردستانێ و پێشوازیا گه‌رم یا به‌رپرسێن ئیرانێ ژ سه‌رۆكێ هه‌رێما كوردستانێ دیار بكه‌ین، خالا ئێكێ وه‌كو دهێته زانین ئه‌مریكا دێ هێزێن خوه ژ عیراقێ ڤه‌كێشیت و ره‌وشا ناڤخوه‌یی یا عیراقێ ژی گه‌له‌ك خرابه، ل ئالیێ دی دو سالان به‌ری نها خوه‌نیشادان ل پرانیا ده‌ڤه‌رێن شیعه ل عیراقێ هاتنه كرن و ئالایێ ئیرانێ و وێنێن رێبه‌رێن ئیرانێ تێدا هاتنه سوتن، ئه‌و یه‌ك ژی په‌یامه‌كا گه‌له‌ك ئاشكرا بوو بۆ ئیرانێ كو خه‌لكێ عیراقێ قه‌بوول ناكه‌ن ئیران وه‌كو پارێزگه‌هه‌كا خوه سه‌ره‌ده‌ریێ ل گه‌ل عیراقێ بكه‌ت، ئه‌و یه‌ك ژی بۆ ئه‌گه‌رێ هندێ كو ئیران نه‌چار بیت پێداچوونێ د ستراتیژیا خوه دا ل هه‌مبه‌ر عیراقێ بكه‌ت.
ل ئالیێ دی هێزێن شیعه یێن كو ب سالانه ئیران هاریكاریا وان دكه‌ت نها ئه‌و ژی ژ به‌ر به‌رژه‌وه‌ندیێن خوه ناكۆكیێن گه‌له‌ك مه‌زن ل گه‌ل هه‌ڤدو هه‌نه و ئیران نه‌شێت وه‌كو سالێن بۆری ل سه‌ر وان حساب بكه‌ت و ژ به‌ر هندێ ژی ئیرانێ بریار دایه كو ل گه‌ل هه‌رێما كوردستانێ ده‌ست ب قۆناغه‌كا نوو بكه‌ت، به‌ری نها دو جاران وه‌زیرێ ده‌رڤه یێ ئیرانێ محه‌مه‌د جه‌واد زه‌ریف هاته هه‌ولێرێ و ئه‌و په‌یامه دا سه‌ركردایه‌تیا سیاسی یا هه‌رێما كوردستانێ كو ئیران به‌رهه‌ڤه ل گه‌ل هه‌رێمێ ده‌ست ب قۆناغه‌كا نوو بكه‌ت، به‌رهه‌مێ هه‌لویستێ ئیرانێ ژی مرۆڤ دشێت د نه‌رمبوونا هه‌لویستێ هێزێن شیعه یێن سه‌ر ب ئیرانێ ل هه‌مبه‌ر هه‌رێما كوردستانێ ببینیت، ئاشكرایه هه‌ر ده‌مێ ل به‌غدا هه‌لویستێ حوكمه‌تێ و ئالیێن شیعه ل هه‌مبه‌ر هه‌رێما كوردستانێ نه‌رم بیت دڤێت ئه‌م تێبگه‌هین كو ده‌ستێ ته‌هرانێ د ڤی كاری دا هه‌یه، ئانكۆ ئیرانێ داخواز ژ وان ئالیان كریه كو ل هه‌مبه‌ر هه‌رێما كوردستانێ نه‌رم بن، بێگومان تشتێ ئیران دكه‌ت گه‌له‌ك ئه‌گه‌رێن خوه هه‌نه و ئیرانێ ژی داخوازی ژ هه‌رێما كوردستانێ هه‌نه.
ئه‌ڤرۆ: بۆچی ئیرانێ دڤێت د ڤی ده‌می دا په‌یوه‌ندیێن خوه ل گه‌ل هه‌رێمێ خۆش بكه‌ت؟
هۆشه‌نگ تاجر: به‌ری هه‌ر تشته‌كێ هه‌رێما كوردستانێ پشتی ریفراندۆمێ چه‌ند سالێن گه‌له‌ك زه‌حمه‌ت و دژوار ده‌رباز كرن لێ سه‌ره‌رای هه‌موو قه‌یران و ئالۆزیان ژی هه‌رێما كوردستانێ شیا قه‌وارێ خوه بپارێزیت و هه‌روه‌سا رۆلێ هه‌رێمێ د هه‌ڤسه‌نگیێن سیاسی ل رۆژهه‌لاتا ناڤین و عیراقێ دا بهێزتر لێ هات و ژ به‌ر هندێ ژی ئیران تێگه‌هشت كو دڤێت ئێدی راستیا هه‌ی قه‌بوول بكه‌ت و هه‌لوه‌ستێ خوه ل هه‌مبه‌ر هه‌رێما كوردستانێ ب گوهۆریت، بێگومان گوهۆرینا سیاسه‌تا ئیرانێ ل هه‌مبه‌ر هه‌رێما كوردستانێ گه‌له‌ك ب دلێ هه‌رێما كوردستانێ یه ژی، چونكو بۆ هه‌ر كه‌سه‌كێ ئاشكرایه كو د چه‌ند سالێن بۆری دا هه‌رێما كوردستانێ گه‌له‌ك خوه نێزیكی توركیا كر و خوه ژ ئیرانێ دوور كر، ته‌هرانێ ژی گه‌له‌ك ئاسته‌نگی و ئاریشه بۆ هه‌رێما كوردستانێ دروست كرن، بڕینا بۆدجه‌ی و سه‌رنه‌گرتنا چه‌ندین رێككه‌فتنێن ئابووری یێن د ناڤبه‌را هه‌رێما كوردستانێ و به‌غدا دا ژی هه‌ر ئه‌گه‌ر ئیران بوویه و ئه‌و یه‌ك گه‌له‌ك ئاشكرایه، لێ نها كێم ژی بیت پاره‌یه‌ك ژ به‌غدا دهێته هه‌رێما كوردستانێ كو ل گۆر باوه‌ریا من ئه‌و یه‌ك ب رازیبوونا ئیرانێ دهێت، هه‌كه ته‌هران ل دژی هندێ بیت به‌غدا نه‌شێت پاره‌ی بۆ هه‌رێما كوردستانێ ره‌وانه بكه‌ت، ئانكۆ ئیرانێ هنده‌ك په‌یام داینه هه‌رێمێ و هه‌رێما كوردستانێ ژی پێ باشه قۆناغه‌كا نوو ل گه‌ل ئیرانێ ده‌ستپێ بكه‌ت، لێ دڤێت به‌رپرسێن كورد د سه‌ره‌ده‌ریا ل گه‌ل ئیرانێ دا گه‌له‌ك هشیار بن، راسته بۆ راگرتنا هه‌ڤسه‌نگیا ل گه‌ل توركیا گرنگه هه‌رێما كوردستانێ په‌یوه‌ندیێن سیاسی و ئابووری ل گه‌ل ئیرانێ بهێز بكه‌ت، لێ ئه‌و یه‌ك ژی ناهێته ڤه‌شارتن كو ئیرانێ دڤێت هه‌رێما كوردستانێ ژ ئه‌مریكا، رۆژئاڤا و توركیا دوور بكه‌ت و بێگومان ئه‌و یه‌ك د به‌رژه‌وندیا هه‌رێما كوردستانێ دا نینه، لێ باشتره په‌یوه‌ندیێن مه ل گه‌ل ئیرانێ وه‌كو سالێن به‌رێ نه‌بیت و هنده‌كێ باشتر ببن.
ئه‌ڤرۆ: ئه‌ڤ بزاڤا ئیرانێ دێ چه‌ند كارتێكرنێ ژ لایێ ئابووری ڤه ل سه‌ر هه‌رێمێ و ئیرانێ كه‌ت؟
هۆشه‌نگ تاجر: سالا بۆری ئێك ژ به‌رپرسێن ئیرانێ راگه‌هاند كو توركیا بازارێ مه ل هه‌رێما كوردستانێ داگیر كریه و دڤێت ئیران په‌یوه‌ندیێن خوه یێن ئابووری و سیاسی ل گه‌ل هه‌رێما كوردستانێ باشتر لێ بكه‌ت، هه‌روه‌سا د دیدارا سه‌رۆكێ هه‌رێما كوردستانێ یا ل گه‌ل ئیبراهیم ره‌ئیسی سه‌رۆك كۆمارێ نوو یێ ئیرانێ ژی، ره‌ئیسی ب ره‌نگه‌كێ ئاشكرا بۆ سه‌رۆكێ هه‌رێما كوردستانێ دیار كر كو ئیرانێ دڤێت ل گه‌ل هه‌رێما كوردستانێ ده‌ست ب قۆناغه‌كا نوو بكه‌ت، بێگومان ئه‌و یه‌ك بێ به‌رامبه‌ر نابیت، دیاره باره‌گایێن چه‌ندین پارتێن رۆژهه‌لاتێ كوردستانێ ل ده‌ڤه‌رێن سنوری یێن هه‌رێما كوردستانێ هه‌نه و ب سالانه ئیران داخواز ژ هه‌رێما كوردستانێ دكه‌ت كو نه‌هێلیت پارتێن رۆژهه‌لات ئاخا هه‌رێما كوردستانێ بۆ چالاكیان ل دژی ئیرانێ بكار بینن، ره‌نگه نها ئیران داخوازا هندێ ژی ژ هه‌رێما كوردستانێ بكه‌ت كو رێ نه‌ده‌ن پارتێن رۆژهه‌لات ل هه‌رێما كوردستانێ چو چالاكیان بكه‌ن.
ل ئالیێ دی نها ره‌وشا ناڤخوه‌یی یا ئیرانێ ژ هه‌ر ده‌مه‌كێ خرابتره، قه‌یرانا ئابووری ژیانا وه‌لاتیان ل ئیرانێ گه‌له‌ك خراب كریه، خوه‌نیشادانێن چه‌ند رۆژێن بۆری ل باشور و هنده‌ك ده‌ڤه‌رێن دی یێن ئیرانێ نیشا دده‌ن كو وه‌لاتی ژ سیسته‌مێ نها بێزار بووینه، دهێته پێشبینی كرن كو خوه‌نیشادان به‌رفره‌هتر لێ بهێن، د ده‌مه‌كێ وه‌سا دا ئیران هه‌ر زێده ژ كوردان دترسیت، هه‌كه كورد ل رۆژهه‌لاتێ كوردستانێ ژی وه‌كو باشورێ ئیرانێ ده‌ست ب خوه‌نیشادان بكه‌ن ره‌نگه ره‌وش ب ته‌مامی بهێته گوهۆرین، به‌رپرسێن ئیرانێ ژی باش دزانن كو كورد پتر ژ هه‌ر نه‌ته‌وه‌یێن دی یێن ل ئیرانێ خوه بۆ هه‌ر گوهۆرینه‌كێ به‌رهه‌ڤ كرینه و هه‌بوونا پارتێن سیاسی و پێشمه‌رگێن رۆژهه‌لاتێ كوردستانێ ژی هه‌رده‌م بۆ ئیرانێ جهێ مه‌ترسیێ یه، ژ به‌ر هندێ ژی ئاسایی یه كو ئیران داخواز ژ هه‌رێما كوردستانێ بكه‌ت كو نه‌هێلیت سنورێن وێ بۆ تێكدانا ره‌وشا ناڤخوه‌یی یا ئیرانێ بهێته بكار ئینان.
ئه‌ڤرۆ: روودانێن ئه‌ڤغانستان په‌یوه‌ندی ب ڤێ ره‌وشێ ڤه هه‌یه؟
هۆشه‌نگ تاجر: ئێك ژ خالێن دی یێن گرنگ كو نها بۆ ئیرانێ بوویه جهێ مه‌ترسیێ روودانێن ل ئه‌فغانستانێ نه، ئیران ژ بهێزبوونا تالیبانێ گه‌له‌ك دترسیت و سه‌رۆك كۆمارێ به‌رێ یێ ئیرانێ مه‌حمود ئه‌حمه‌دی نه‌ژاد حه‌فتیا بۆری راگه‌هاند كو دڤێت به‌رپرسێن ئیرانێ گه‌له‌ك هشیار بن، چونكو تالیبان وه‌كو رێكخراوه‌كا هشكباوه‌ر یا سوننه دشێت گه‌له‌ك ئالۆزیێن ناڤخوه‌یی بۆ ئیرانێ دروست بكه‌ت و دڤێت ئیران خوه ژ تالیبانێ دوور بكه‌ت و ل هه‌مبه‌ر بزاڤێن وێ د هشیار بیت، ئه‌و یه‌ك ژی نیشا دده‌ت كو پشتی ڤه‌كێشانا هێزێن ئه‌مریكا ره‌وشا نها ل ئه‌فغانستانێ ب دلێ ئیرانێ نینه و ره‌نگه هه‌مان تشت ب ره‌نگه‌كێ دی ل عیراقێ ژی روو بده‌ت، ئانكۆ پشتی ڤه‌كێشانا هێزێن ئه‌مریكا ژ عیراقێ ره‌نگه گه‌له‌ك گوهۆرین روو بده‌ن كو ب دلێ ئیرانێ نه‌بیت، ژ به‌ر هندێ ژی ئیرانێ دڤێت په‌یوه‌ندیێن خوه ل گه‌ل هه‌رێما كوردستانێ باشتر لێ بكه‌ت دا هه‌رێما كوردستانێ چو ده‌مه‌كێ نه‌بیته مه‌ترسی.
ئه‌ڤرۆ: تو دبینی كو چاره‌نڤیسێ به‌رزه یێ به‌غدا ژی ئه‌گه‌ره‌ك بیت؟
هۆشنگ تاجر: به‌ری ده‌مه‌كێ چه‌ندین سیاسه‌تمه‌دارێن ئیرانێ د بابه‌تێن جودا جودا دا دیار كربوون كو دڤێت ته‌هران په‌یوه‌ندیێن خوه ل گه‌ل هه‌ولێرێ باشتر لێ بكه‌ت، چونكو دیار نینه كا دێ د چه‌ند سالێن داهاتی دا ل به‌غدا چ روو ده‌ت، ئانكۆ بۆ ئیرانێ دیار نینه دێ پشتی چه‌ند سالێن دی كێ ل به‌غدا حوكمێ كه‌ت، ره‌نگه هێزه‌كا سیاسی یا كو ل دژی ئیرانێ بیت ببیته ده‌ستهه‌لاتدار وی ده‌می هه‌بوونا هه‌رێما كوردستانێ بۆ ئیرانێ دێ گه‌له‌ك گرنگ بیت، ئیران دشێت ب رێیا هه‌رێما كوردستانێ كاریگه‌ریێ ل به‌غدا بكه‌ت و ده‌ستهه‌لاتا به‌غدا ته‌نگاڤ بكه‌ت، ژ به‌ر هندێ ژی چه‌ند سالن ئیران وه‌كو به‌رێ كار بۆ لاوازكرنا هه‌رێما كوردستانێ ناكه‌ت، لێ د هه‌مان ده‌می دا ئیرانێ نه‌ڤێت هه‌رێما كوردستانێ گه‌له‌ك بهێز ژی كه‌ڤیت، چونكو ژ به‌ر پرسا كوردی ل ئیرانێ به‌رپرسێن وی وه‌لاتی ناخوازن هه‌رێما كوردستانێ گه‌له‌ك بهێز ژی كه‌ڤیت كو بشێت كاریگه‌ریێ ل كوردێن رۆژهه‌لاتێ كوردستانێ بكه‌ت یان ژی هاریكاریا وان بكه‌ت كو ئه‌و ببنه مه‌ترسی بۆ ته‌هرانێ.
ئاشكرایه كو باشبوونا په‌یوه‌ندیێن هه‌رێما كوردستانێ و ئیرانێ د ره‌وشا نها دا د به‌رژوه‌ندیا هه‌رێما كوردستانێ دایه، چونكو چه‌ند سالن هه‌رێما كوردستانێ تووشی قه‌یرانا ئابووری بوویه و نها تا راده‌یه‌كێ ره‌وش باشتره لێ هاتیه، هه‌كه په‌یوه‌ندیێن هه‌رێما كوردستانێ و ئیرانێ باش بن به‌غدا دێ به‌رده‌وام گوژمه‌كێ پاره‌ی وه‌كو موچه بۆ هه‌رێما كوردستانێ هنێریت و ئه‌و یه‌ك بۆ هه‌رێما كوردستانێ ژی گه‌له‌ك گرنگه، دڤێت ژبیر نه‌كه‌ین كو چه‌ندین جاران شاندێ هه‌رێمێ چوونه به‌غدا دا رێككه‌فتنا ئابووری سه‌ر بگریت و دڤێت ب چو ره‌نگه‌كێ رۆلێ ئیرانێ ژبیر نه‌كه‌ین، ژ به‌ر هندێ ژی ئه‌ز دبێژم بۆ هه‌رێما كوردستانێ ژی گه‌له‌ك گرنگه كو مفای ژ گوهۆرینا هه‌لوه‌ستێ سیاسی یێ ئیرانێ وه‌ربگریت، وی ده‌می توركیا ژی دێ نه‌چار بیت پتر به‌رێ خوه بده‌ته هه‌رێما كوردستانێ و هه‌كه سه‌ركردایه‌تیا سیاسی یا هه‌رێما كوردستانێ شاره‌زا بن دشێن مفایه‌كا باش ژ هه‌ڤڕكیا توركیا و ئیرانێ ببینن.
ئه‌ڤرۆ: راسته ئیرانێ دڤێت هه‌رێما كوردستانێ ژ ئه‌مریكا و وه‌لاتێن رۆژئاڤا دوور بكه‌ت؟
هۆشه‌نگ تاجر: به‌لێ، ئیرانێ دڤێت هه‌رێما كوردستانێ ژ ئه‌مریكا و وه‌لاتێن رۆژئاڤا دوور بكه‌ت، به‌ری نها ژی بۆ هندێ فشار ل هه‌رێما كوردستانێ كریه، لێ هه‌رێما كوردستانێ شیایه رێگریێ ل گه‌له‌ك پیلانێن ئیرانێ بكه‌ت، هێرشێن ڤێ دووماهیێ یێن سه‌ر فرۆكه‌خانا هه‌ولێرێ هه‌موو بۆ هندێ بوون دا هه‌ولێر خوه ژ ئه‌مریكا و وه‌لاتێن رۆژئاڤایی دوور بكه‌ت، ئه‌مریكا دێ مه‌زنترین قونسلخانا خوه ل هه‌ولێرێ ئاڤا كه‌ت و دیاره دێ هێزه‌كا مه‌زن یا سه‌ربازی ژی بۆ پاراستنا قونسلخانا ئه‌مریكا ل هه‌ولێرێ مینن، ئه‌و یه‌ك ژی د به‌رژه‌وه‌ندیا ئیرانێ دا نینه و ژ به‌ر هندێ ژی ئیرانێ دڤێت ب جهێ دژبه‌ریێ ب رێیێن دی بگه‌هیته مه‌ره‌ما خوه و كوردان ژی به‌رژه‌وه‌ندیێن باش ل گه‌ل ئیرانێ هه‌نه كو ئه‌و یه‌ك دێ بنه ئه‌گه‌رێ بهێزبوونا پێگه‌هێ هه‌رێما كوردستانێ.
ئه‌ڤرۆ
ستێرا ته‌پاپێی یا یانا دهۆك ئه‌حمه‌د سه‌بری بۆ رۆژناما ئه‌ڤرۆ دیاركر كو ئه‌و یێ هاتیه داخازكرن ژلایێ یانا دالكۆرد یا سویدی ئێك ژ یانێن نێزك بۆ ره‌ڤه‌ندا كوڕد یا هه‌رچار پارچێن كوردستانێ ل ئۆرۆپا و هیڤی خواست ئه‌ڤ ئۆمێده وه‌كو یاریزانه‌ك بجه بینیت.
زێده‌تر ناڤهاتی گوت: یانا دالكۆرد یا سویدی داخازا ژ من كریه ئه‌ز بۆ وه‌رزێ بهێت یاریێ ل گه‌ل تیما وان یا ته‌پا پێی د خولا پلا دو یا سویدێ دا بكه‌م، هه‌لبه‌ت ئه‌ڤه ئێك ژ پێنگاڤێن گه‌له‌ك باشه بۆ پاشه‌رۆژا من كو هیڤی و ئۆمێدا من ئه‌وه یاریێ د خولێن ئۆرۆپا دا بكه‌م، له‌ورا من ژی داخاز ژ كارگێریا یانا خوه كریه رێكێ ب ده‌نه‌م ئه‌ز یاریێ بكه‌م، ئه‌وێن به‌رهه‌ڤیا خوه دیاركری بۆ ده‌رڤه بكه‌م لێ ژبه‌ركو خولا سوید دێ ل ناڤه‌راست هه‌تا دووماهیا ئادارا سالا 2022ێ یا بهێت ده‌ستپێكه‌ت من ده‌مێ مایی ئه‌ز باشترین به‌رهه‌ڤیا بكه‌م و هه‌روه‌سا كارگێریا یانێ داخاز ژ من كریه بۆ وه‌رزێ ئه‌ڤ ساله یێ خولا پلا ئێكا ئیراقێ به‌رده‌وامبم، له‌ورا دێ رۆژێن بهێت دا دیڤچوونا بابه‌تێ خوه كه‌م دناڤبه‌را هه‌ردو یانا دا كو بگه‌هینه رێكه‌فته‌كێ زیان ب چو لایه‌نا نه‌كه‌ڤیت.
ژلایه‌كێ دیڤه ئه‌حمه‌د سه‌بری دیاركر كو ئه‌و د ژیه‌كێ بچووك دایه و هه‌موو بزاڤا دكه‌ت ئاست و شیانێن خوه پێشبێخیت ب گه‌هیته ئاستێن بلند و گۆت: دێ هه‌موو بزاڤا كه‌م هیڤی و ئارمانجێن خوه بجهبینم بڕێیا رژدیا راهێنانان و بلندكرنا ئاستێ خوه یێ هونه‌ری و له‌ش سڤكی.
نيشاندان