قەیس وەیس:

د داخویانیەكێ‌ دا سكرتیرێ‌ یانەیا دهۆك گەشبینیا خوە دیار كر بۆ یاریێن داهاتی تیما وان ب ئاست و ئەنجامێن سەرفەراز ب دەستڤە بینن، ل دووڤ پلانێن كادرێ‌ راهێنانێ‌ مفا ژ ڕاوەستیانا خولێ‌ هاتیە كرن و یاریزانێن مە د بەرهەڤن.
زێدەتر جاسم محەمەد حاجی بۆ رۆژنامەیا ئەڤرۆ گۆت: راوەستیانا خولا ئیراقێ‌ مفایەكێ‌ باش ژێ‌ هاتە وەرگرتن تایبەت ژلایێ‌ تەكتیكی ڤە ژبەركو پرانییا یاریزانێن مە یێن وەرزێ‌ بۆری نەمابوونە دگەل تیمێ‌ و هەروەسان راهێنەرێ‌ نوو یە و شیا بەرنامەكێ‌ تایبەت شێوازێ‌ خوە یێ‌ هونەری دگەل یاریزانان بجهبینت و نێزكبوونەكا باشتر پەیدا بكەت و چارەسەرییا ئەوان خەلەتیێن یاریێن بۆری ژی دا بكەت و ئاستێ‌ تیمێ‌ باشتر بكەت، هەرچەندە ئاستێ‌ تیما مە یێ‌ باشە سەرباری خوسارەتییا مە دگەل زەورا و هەولێر و دووڤدا دگەل نەجەف ڤەگەڕیاینە سەركەفتنان، لێ‌ وەكو ئاست تیمە یا باشە بتنێ‌ زێدەتر نێزكبوون پێدڤییا و د ماوەیێ‌ بۆری یێ‌ راوەستیانا خولێ‌ كادرێ‌ راهێنانێ‌ كار ل سەر كرییە.
هەروەسان ناڤهاتی گۆت: ل دووڤ پلانێن مە و كادرێ‌ راهێنانێ‌ بزاڤێن مە دێ‌ بۆ رێزبەندیێن پێشیێ‌ بیت و راهێنەر حەزا رێزێن باش دكەت و هەروەسان حەز دكەت دەستكەفتەكێ‌ د كۆپا كەنداڤی دا بینت و هیڤی و ئارمانجێن مە بۆ یارییا ئێكێ‌ یا كۆپایێ‌ سێ‌ خالێن یاریێ‌ نە ژبەركو دێ‌ بیتە كلیلكا سەركەفتنا بۆ یاریێن دووڤدا لەوما ژی مۆرالا یاریزانا، كادرێ‌ راهێنانێ‌ و كارگێرییا یانەیێ‌ یا بلندە و دێ‌ هەموو بزاڤان كەین بۆ سەركەفتنێ‌ و یارییا ئێكێ‌ گەلەك یا گرنگە، هەكە تیما مە 50% ژ ئاستێ‌ خوە یێ‌ دگەل نەجەف بۆ یارییا كۆپا كەنداڤی پێشكێش بكەت گەشبینم دێ‌ سەركەفتنێ‌ تۆمار كەین و هەموو یاریزان بەرهەڤن ب پشتەڤانییا جەماوەرێ‌ خوە دێ‌ گەهینە ئارمانجا خوە.
بۆ زانین بڕیارە ل 22ێ‌ ڤێ‌ مەهێ‌ تیما فوتبۆلا یانەیا دهۆك ئێكەم یارییا خوە ژ كۆپا كەنداڤی بكەت دەمێ‌ ل یاریگەها خوە مێڤاندارییا یانەیا ئەهلی سەنعا یا یەمەنی ل یاریگەها خوە بكەت، دووڤدا د خولا ستێرێن ئیراقێ‌ دا ل 26ێ‌ ڤێ‌ مەهێ‌ دێ‌ مێڤاندارییا یانەیا كارەبا كەت.

عەلی حاجی:

د داخویانیەکێ دا سەرپەرشتێ تیما باسکێت بۆلا یانه‌یا زاخۆ بۆ رۆژنامەیا ئەڤرۆ دیار کر چاڤێ وان ل ناسناڤێ خولا نایابا کوردستانێ یە و نابیت ناسناڤ ژ دەڤەرا بەهدینان دەربکەڤیت.
زێدەتر دلژار عەدنان گۆت: ژ بۆ وەرزێ نوو یێ خولا نایابا کوردستانێ یا باسکێت بۆلێ مە بەرهەڤیێن باش کرینە د هەردو یاریێن دەستپێکێ ژی دا مە شیایە دو سەرکەڤتنان تومار بکەین، ب شێوەیەکێ گشتی ژ روویێ ئاستی ڤە تیما مە گەلەک باشە و رێک و پێکە ژبەرکو دەمەکێ درێژە یاریزانێن مە پێکڤە یاری و ڕاهێنانان ئەمجامدەن و هەماهەنگیەکا باش ژی دناڤبەرا وان دا پەیدابوویە، ژبەرکو مە تیمەکا ژ هەژی هەیە له‌وما چاڤێ مە ل ناسناڤێ خولێ یە و نابیت ئەڤ ناسناڤە ژ دەست مە بچیت و تیما مە یا بەربژاره‌ ژی بۆ ب دەستڤەئینانا خولێ.
ناڤبری گۆت ژی: دەستەیا کارگێریا یانێ ژی پشتەڤانیەکا باش ل تیمێ دکەت و یاریزانێن مە ژی برسیێن دەست ڤەئینانا ناسناڤەکێ نه‌.
بۆ زانین تیما باسكێت بۆلا یانه‌یا زاخۆ وه‌كو نوونه‌را ئێكانه‌ دناڤ خولا كوردستانێ دایه‌ و شیایه‌ د دو یاریێن بۆری دا ب سه‌ركه‌ڤیت ل سه‌ر هه‌ر ئێك ژ سۆلاڤا نوو ب 70-48 خالان و ل سه‌ر زانكۆیا سلێمانی 20-چنه‌، پشتی نه‌ ئاماده‌بوونا تیما سلێمانیێ ل ده‌م و جهێ ده‌ستنیشانكری یێ یاریێ.

داخویانیەكێ‌ دا عادل سەدیق، یاریزانێ‌ دیرین و سەرۆكێ‌ فدراسیۆنا ڤۆلی بۆلا پارێزگەها دهۆكێ‌ بۆ ئەڤرۆ گۆت: هەتا سالا 2010 ڤولی بولا دهۆكی دگوپیتكا خوە دابوو و زێدەتر هەشت یانە بۆ ڤێ‌ یاریێ‌ هەبوون.
زێدەتر ناڤهاتی گۆت: هەكە مەقارەمانیەك ژی ڤەكربا چ ل سەر ئاستێ‌ پارێزگەهێ‌، یان ڤاڤارتنێن خولا هەرێما كوردستانێ‌ با دا بینین هەتا هەشت بۆ نەه یانە پشكداری دكرن و خوە ل ئەڤێ‌ یاریێ‌ دكرنە خودان وەكو ئەنجام ژی گەلەك دباش بوون، وەكو یا دیار یانەیا سێمێلێ‌ و یا مەتین بووینە قارەمانێن خولا ئیراقێ‌ هەروەسا ل سالا 2022 یانەیا شنگالێ‌ پشكدارییا خولا ئیراقێ‌ بوون و دبینم بتنێ‌ ئەڤ یاریە ل پارێزگەها دهۆكێ‌ لاواز بوویە، چونكو یانەیێن هەولێر و سلێمانیێ‌ هەموو دەمان پشكداری قارەمانیان دبن، بۆ یاریا ڤولی بولێ‌ مە راهێنەرێن بیانی هەبوون و گەلەك یارێن مە بینەر ب پلێت دهاتنە پێش، ئەگەرێن لاوازبوونا یاریا ڤولی بولێ‌ بۆ وێ‌ چەندێ‌ ڤەدگەڕیت كو هەرێما كوردستانێ‌ تووشی قەیرانێن ئابوری و شەری دژی تیرۆرستێن داعشێ‌ و هاتنا پەتایێ كۆرۆنایێ‌ و هەروەسان یانەیان ژی خوە ل ڤێ‌ یاریێ‌ نەكرە خودان.
هەروەسان ناڤهاتی گۆت: ئەگەرێ‌ سەرەكی بتنێ‌ یانەیێن مە یێن ماینە ب یاریا فوتبۆلێ‌ ڤە، گرنگە خوە ل هەموو یاریان بكەنە خودان یانەیا دهۆك یاوەرزشی نە كو یانەیا دهۆك یا فوتبۆلێ‌ یە لەوما دڤێت ب تنێ‌ یارییا فوتبۆلێ‌ نەبیت، هەرچەندە ڕاستە یاریا فوتبۆلێ‌ جەماوەرەكێ‌ مەزن هەیە و ل سالێن هەشتێیان ئاڤاهیەك لنك قوتابخانەیا شورەش بتنێ‌ سێ‌ ژور بوون د ئەوان ژوران ڤە هەتا سێدزدە چاردە جورێن وەرزشان دناڤ دا دهاتنە ئەنجامدان و نوكە ژی ئاریشەیا سەرەكی یا هەریانەكێ‌ جهە بۆ ئەنجامدانا یارییان.

ستێرا هەلبژارتیێ‌ ئیراقێ‌ و یانەیا خۆر یا قەتری ئەیمەن حسێن شیایە هەتا نوكە ببیتە ئێك ژ باشترین هێرشبەرێن ئیراقێ‌ د سالا 2024ێ‌ دا، د ماوەیێ‌ 14 یارییان 15 گۆل بۆ هەلبژارتیێ‌ خوە تۆماربكەت.
ئەیمەن حسێن دەستپێكا وی یا دیاربوونێ‌ دگەل یانەیا دهۆكێ‌ بوو ل وەرزێ‌ 2013ێ‌ دەمێ‌ ژ یانەیا شرگات هاتییە دناڤ رێزێن یانەیا دهۆكێ‌ دا ب كۆژمەیێ‌ 18 ملیۆن دیناران، دووڤدا بۆ یانەیێن نەفت، شورتە، جەوییە یێن ئیراقی، سفاقس یا تۆنسی، ئۆم سلال، مەریخیە یێن قەتەری، جەزیرە یا ئیماراتی، رەجا یا مەغربی و دنوكە دا خۆر یا قەتەری یاریێ‌ دكەت.
ل دووڤ ژێدەرێ‌ سۆفا سكۆر یا تایبەت بۆ ئامارێن وەرزشی ل جیهانێ‌ دیاركرییە كو ل وەرزێ‌ 2024ێ‌ ئەیمەن حسێنی دگەل هەلبژارتیێ‌ ئیراقێ‌ یێ‌ نشتیمانی 13 گۆل د 11 یارییان دا ئیناینە، شەش د كۆپا ئاسیا 2024ێ‌ و حەفت گۆل د ڤاڤارتنێن كۆپا جیهانی بۆ مۆندیالا 2024ێ‌، هەروەسان د ئۆلمپیادا پاریس 2024ێ‌ د سێ‌ یاریێن پشكداربوویی دو گۆل تۆماركرینە دگەل هەرئێك ژئوكراین و ئەرجەنتین ئیناینە.
بۆ زانین ئەیمەن حسێن هەتا نوكە ب گشتی 72 یاریێن نێڤدەولەتی دگەل هەلبژارتیێ‌ ئیراقێ‌ ئەنجامداینە، 27 گۆل تۆماركرینە هەر ژ رۆژا ئێكێ‌ یا داخوازكرنا وی بۆ ناڤ رێزێن هەلبژارتیێ‌ ئیراقێ‌ ئەوا ل 2015ێ‌ بوو.

راپۆرتێن رۆژنامەڤانی ل ئیسپانیا دۆپاتكرینە كو سەرۆكێ‌ یانەیا بەرشەلۆنا هەموو بزاڤان دكەت بەری ب دووماهی هاتنا ئەركێ‌ وی دگەل یانەیا كاتەلۆنی ستێرێ‌ نەرویجی و یانەیا مانچستەر ستی یا ئنگلتەرایێ‌ ئیرلینگ هالاند بینتە دناڤ رێزێن تیما خوە دا.
رۆژنامەیا سپۆرت یا كاتەلۆنی دیار كر ئێك ژ خەونێن سەرۆكێ‌ یانەیا بەرشەلۆنا و هەردەم دۆبارە دكەت ئینانا ستێرێ‌ نەرویجی و مان ستی ئیرلینگ هالاند بۆ یاریگەها كامپ بو و د دووماهی ئاخڤتنا خوە دا گۆتییە، هەر پێنگاڤەكا د شیان دا دێ‌ بۆ ڤەگۆهاستنا هالاندی بیت بەری ب دووماهی هاتنا دەمێ‌ سەرۆكاتییا وی ئەوا دێ‌ سالا بهێت بیت و ئەڤ خەونە هەر ژ 2021ێ‌ وەرە تایبەت پشتی چوونا مێسی ژ بەرشەلۆنا، هەروەسان وەكو پلان دانایە لێ‌ پێرابوونێن دارایی ڕێگر بووینە و گەشبینە دێ‌ دەستڤە هێت تایبەت پەیوەندیێن وی دگەل بریكارێ‌ هالاندی گەلەك د خوەشن و یانەیا مانچستەر ژی هاریكارە، لێ‌ یانەیا بەرشەلۆنا پێدڤییە زێدەتری 200 ملیۆن یۆرۆیان بەرهەڤبكەت وەكو مەرجێ‌ جەزائی یێ‌ گرێبەستێ‌، ژبەركو گرێبەستا وی هێشتا یا مایی.
بۆ زانین ئیرلینگ هالان ژ یانەیا برۆسیا دۆرتمۆند یا ئەلمانی ب كۆژمەیێ‌ 60 ملیۆن یۆرۆیان گرێبەست دگەل یانەیا مانچستەر ستی ئیمزاكریە ئەوا دێ‌ هەتا خزیرانا 2027 یا بەردەوامبیت و شیاینە د 108 یارییان دگەل یانەیا ئنگلتەرایێ‌ 115 گۆلان بینت.