ئامێدیێ‌، مه‌حمود نهێلی:

میدیاكار (دلشاد به‌رچی) د دیداره‌كێ‌ دا بۆ رۆژناما ئه‌ڤرۆ دبێژیت: بۆ جارا ئێكێ‌ ل سالا 1996 من ده‌ست ب ئاماده‌كرن و پێشكێشكرنا به‌رنامه‌كێ‌ حه‌فتیانه‌ كر بۆ دووڤچوون و خرڤه‌كرنا كلتۆرێ‌ زاره‌كی یێ‌ ده‌ڤه‌را ئامێدیێ‌ بتایبه‌ت كو گرنگترین كارێ‌ من بوو، هه‌روه‌سا دووڤچوونا گله‌ و گازندێن خه‌لكی و كومكرنا ڤه‌كولینان ل سه‌ر سترانێن فولكلۆری كو راستگۆترین خۆدیكا دیرۆك و زمان و ژیانا كوردایه‌، بۆ زانین ژی پتریا مرۆڤان حه‌زژ به‌رنیاس بوونێ‌ دكه‌ن و بۆ من ژی بوو كومه‌كا گه‌وهه‌رێن نخافتی ژی ڤه‌رێژا ڤان سالێن كارێ‌ منن ژ وان ژی هژماره‌كا وێنێن رۆژنامه‌ڤانی، دیدارێن ل گه‌ل 300 پێشمه‌رگان و نیڤا وێ‌ ژمارێ‌ ژی سترانێن مللی نه‌ كو هه‌ر ئێك ژ وان گه‌نجینه‌كه‌، بۆ زانین جاره‌كا ئه‌ز تووشی هه‌لویسته‌كێ‌ نه‌خۆش بوویمه‌ كو راپورته‌كا من ل سه‌ر روودانه‌كا خوینداریێ‌ بوو و ژلایێ‌ به‌رپرسێ‌ لاپه‌ری ڤه‌ ده‌ستكاری تێدا هاته‌كرن و ل سه‌ر ناڤێ‌ من هاته‌ به‌لاڤكرن و تووشی گه‌فێن كوشتنێ‌ بووم

هه‌روه‌سا گۆت: ئه‌ڤ رۆژنامه‌ڤانیا سه‌ربه‌ردای بتایبه‌ت د تورێن جڤاكی دا دلساری ل جه‌م من چێكریه‌، به‌لێ‌ نه‌گه‌هشتیه‌ وێ‌ راده‌ی كو ده‌ست ژ كارێ‌ راگه‌هاندنێ‌ به‌رده‌م و ده‌ربارێ‌ راگه‌هاندنا ده‌ڤه‌را ئامێدیێ‌ ئه‌ز دبێژم ده‌ڤه‌را ئامێدیێ‌ وه‌كو په‌یمانگه‌هه‌كا پێگه‌هاندنا راگه‌هاندكارایه‌ و وه‌سا دبینم چ ده‌زگه‌هێن ل ده‌ڤه‌را به‌هدینان نینن كو كادرێن مه‌ لێ‌ كار نه‌كه‌ن ، و ئێكه‌مین رادیۆیا نافخۆی ژی ل كوردستانێ‌ وه‌ك گرۆڤێ‌ بزاڤا خورت و سه‌ركێش و به‌رینه‌ كو رادیۆیا سیلاڤه‌ و حه‌ز دكه‌م ل شوونا گه‌له‌ك ده‌زگه‌هێن راگه‌هاندنێ‌ یێن ژێك به‌لاڤ ده‌زگه‌هه‌كی مه‌زن و ئێكگرتی یێ‌ ل كار د هه‌موو وارێن میدیایێ‌ دا بهێته‌ ئاڤاكرن.

زاخۆ، عه‌لی حاجی:

شڤان حه‌داد، ئێك ژ وان گه‌نجایه‌ ل باژێرێ‌ زاخۆ یێ‌ كو ب كارێ‌ چێكرنا كێران رادبیت، د دیداره‌كێ‌ دا بۆ رۆژناما ئه‌ڤرۆ دیاركر كو چێكرنا كێر و بڤران به‌ر ب كێم بوونێ‌ ڤه‌ چوویه‌ و ئێدی كه‌س گرنگیێ‌ ب چێكرنا وان ناده‌ت.

شڤان گۆت: به‌ری دوسالان من ده‌ست ب چێكرنا كێر و بڤران كری یه‌ و هنده‌ك كێران هه‌تا سێ‌ رۆژان مایمه‌ پێڤه‌ هه‌تا كو شیایم چێكه‌م، ژبه‌ر كو كارێ‌ وان یێ‌ ب زه‌حمه‌ته‌ و گه‌له‌ك گرنگه‌ گرنگی ب كارێ‌ ده‌ستیێ‌ كێران بهێته‌ دان ژبه‌ركو ئه‌و ژی هونه‌ره‌كه‌، به‌لێ‌ یا كو دبیته‌ ئاسته‌نگ د رێیا مه‌دا ئه‌و كه‌ره‌ستێن ئه‌م ب كار دئینن ب ده‌ست مه‌ ناكه‌ڤن و هه‌تا نوكه‌ من چو به‌رهه‌مێن خوه‌ نه‌كرینه‌ د بازاری دا ژبه‌ركو دخازم زێده‌تر كاربكه‌م ژنوو دێ‌ به‌مه‌ بازاری و گه‌له‌كا گرنگه‌ ب رێیا پێشانگه‌هێن تایبه‌ت ئه‌م به‌رهه‌مێن خوه‌ به‌لاڤ بكه‌ین و نوكه‌ دا من لوگۆیه‌كێ‌ تایبه‌ت ب خوه‌ ڤه‌ چێكریه‌ كو هه‌ر كێره‌ك یان بڤره‌كێ‌ ئه‌ز چێدكه‌م وی لوگۆی دانمه‌ سه‌ر، چنكو ئه‌و مافێ‌ منه‌، هه‌روه‌سا ئه‌و كارێ‌ ئه‌ز دكه‌م كاره‌كێ‌ تایبه‌ت و ب زه‌حمه‌ته‌ ژی.

دهۆك، هه‌رهین محه‌مه‌د:

سترانبێژ (به‌همه‌ن كه‌مال) د دیداره‌كێ‌ دا بۆ رۆژناما ئه‌ڤرۆ گۆت: نوكه‌ مژوولی چێكرنا دو كلیپا مه‌ و كاری هه‌ردو كلیپان ژی ل ستودیۆیا چار ده‌نگ، كاك ئومێد و كه‌یوان پێ‌ رابووینه‌ ل رۆژهه‌لاتێ‌ كوردستانێ‌ و ئاواز  و ئاره‌نجور هه‌ر وان بخوه‌ دانایه‌ و ئه‌ڤ كاره‌ ژ هه‌موو كارێن من یێن دی جوودانه‌ و ل نێزیك دێ‌ به‌لاڤ كه‌م.

ناڤهاتی گۆت: راسته‌ ده‌مه‌كه‌ ژ كارێن هونه‌ری وچێكرنا كلیپان دوور كه‌فتیم، چونكو مژوول بووم ب هنده‌ك كار و چالاكیان ڤه‌ و چوونا هنده‌ك به‌رنامێن ته‌له‌ڤزیۆنی و ب ئانه‌هیا خودێ‌ دێ‌ ب ستایله‌كێ‌ نووڤه‌  ڤه‌گه‌رم و كلیپان چێكه‌م و هه‌تا نوكه‌ من چ مفا ژ چێكرنا ئه‌لبۆم و كلیپان نه‌ دیتیه‌، به‌لكو بتنێ‌ بۆ حه‌زژێكه‌رن بوویه‌ داكو ژ بینه‌رو حه‌زژێكه‌رێن خوه‌ دوور نه‌كه‌ڤین و به‌رده‌وام بین ل سه‌ر ڤێ‌ رێكێ‌، چونكو ل ده‌مه‌كی هاتین كه‌یفخۆش بووین ل گه‌ل خه‌لكی ب چێكرنا به‌رهه‌م و كلیپان و من شیا ب سترانگۆتنێ‌ پره‌كێ‌ د ناڤبه‌را خوه‌ خه‌لكی دا چێكه‌م.

دهۆك، زنار تۆڤی:

خانما شێوه‌كار هندیڤان شه‌وكه‌ت گولی، یا ناسیار ب هند ئارت، كو نوكه‌ ل پۆلا ده‌هێ‌ زانستی دخوینیت، د دیداره‌كێ دا بۆ رۆژناما ئه‌ڤرۆ گۆت: د زارۆكاتیا خوه‌ دا من حه‌ز ژ هونه‌ری كریه‌ وه‌كی مۆزیك و وێنه‌ و ستران و ڤه‌هاندنا هوزانان، دیسان ده‌مێ ئه‌ز گه‌هشتیمه‌ ژیه‌كێ پێگه‌هشتی من زانی ئه‌و وارێ ئه‌ز خوه‌ تێدا د بینم هونه‌ره‌، له‌وما من ده‌ست ب هونه‌رێ شێوه‌كاری كر و هژماره‌كا كه‌ڤالان چێكرینه‌، لێ‌ هه‌تا نوكه‌ من پشكداری د چو پێشانگه‌هێن شێوه‌كاری دا نه‌كریه‌.

ناڤهاتییێ گۆت: به‌ری ئه‌ز بهێمه‌ دناڤا سۆشیال میدیایێ دا من نێزیكی پێنجی وێنه‌ و كه‌ڤالێن ئاشۆپی بۆ هه‌ڤال و براده‌رێن خوه‌  چێكرینه‌، دیسان ئه‌ڤه‌ ساله‌ك و نیڤه‌ ژی من ده‌رگه‌هێ سۆشیال میدیایێ ڤه‌كریه‌ و ب ڤێ رێكێ كه‌ڤالێن خوه‌ دفرۆشم، هه‌روه‌سا هه‌تا نوكه‌ چو ئاسته‌نگێن ب زه‌حمه‌ت نه‌ هاتینه‌ د رێیا كارێ من دا، چونكو خێزانا من ئێكه‌م و مه‌زنترین پشته‌ڤانن بۆ منو ب دیتنا من د نوكه‌ دا هونه‌رێ شێوه‌كاری ل باژێرێ زاخۆ د ئاسته‌كێ باش دایه‌ و یێ به‌ر ب پێشڤه‌ چوونێ دچیت، هه‌روه‌سا ئه‌ز كه‌ڤال و وێنه‌یێن خوه‌ دفرۆشم و هه‌تا راده‌كێ بازارێ فرۆتنا كه‌ڤالان یێ باشه‌ و نوكه‌ داخوازی پتر یا ل سه‌ر وێنێن ئاشۆپی و سروشتێ مرۆڤی هه‌ین، دیسان ناڤه‌روكا وێنێن من ژی ل سه‌ر ئاشۆپی و سروشتێ مرۆڤی نه‌، هه‌روه‌سا هه‌ر كه‌سه‌كێ خودان ئارمانج بیت، دێ گه‌له‌ك وه‌ستیانێ بینیت، لێ نابیت مرۆڤ خوه‌ راده‌ستی لاوازیه‌كا ده‌مكی بكه‌ت.