ئەڤرۆ، زنار زوبێر:

یاریزانا پیشەکارا عیراقی و یانا ئافرەتێن دھۆک دیارکر خولا ھەرێما کوردستانێ یا فوتسالا کچان گەلەک ژ یا عیراقێ بھێزترە و رێزگرتنا خەلکێ دھۆک و پشتەڤانێن یانێ وەکر ب گیانێ خوەکوژیێ یاریێ بۆ ئافرەتێن دھۆکێ بکەم.

زێدەتر نادیە فازل د دیدارەکا تایبەت دا بۆ رۆژناما ئەڤرۆ گۆت: سەرکەفتی ترین وەرزێ ژیانا من یا وەرزشی ئەوبوو دگەل یانا ئافرەتێن دھۆک و شیام ھێزەکێ ل ھێلا بەرگریا ئافرەتێن دھۆک زێدەبکەم ل ڤی وەرزی و ناسناڤێ خولێ ژی مسوگەر بکەین و ئەو یاریزانێن ل ڤێ یانێ و حەژێکرنا وان بۆ یانێ وەکر زێدەتر خوە ماندی بکەین د یاریان دا زێدەباری سەرەدەریا پشتەڤان و حەژێکەرێن یانێ دگەل من کو من ھەست دکر ل مالا خوەمە و نەشێم ب چو پەیڤان پەسنا رولێ وان دگەل کارگێریا یانێ بکەم کو ژلایێ دەرونی ڤە ئارام بین و گیانێ خوەکوژیێ یاریێ بۆ ناڤێ یانا ئافرەتێن دھۆکێ بکەین و دەرئەنجام ناسناڤێ خولێ بۆ پارێزگەھا دھۆکێ ڤەگەرینین.

یاریزانا نافھاتی دەربارەی جوداھیا خولا فوتسالا کچێن کوردستانێ دگەل خولا عیراقێ گۆت: خولا فوتسالا ھەرێما کوردستانێ گەلەک بھێزترە ژ یا عیراقێ ژلایێ ھونەری و تەکتیکی ڤە زێدەباری رێکخستن و دیارکرنا ژڤانێ یاریان و بریارێن ئێکەتیا تەپاپێ وەکر زێدەتر ھێز و ھەڤرکی دخولێ دا ھەبیت بەروڤاژی خولا عیراقێ ل وی ئاستێ پێدڤی نینە.

ئەڤرۆ،

دھێتە چاڤەڕێکرن ئەڤرۆ دەمژمێر ٢:٤٥ پشتی نیڤرۆ و دێربیێ پارێزگەھا دھۆکێ دا تیما یانا ئاکرێ مێڤانداریا یانا گارە ژ چوارچووڤێ کۆما دوێ یا ھەڤڕکیێن گەڕا حەفتێ بۆ یانێن پلا ئێکا کوردستانێ بکەت، ھەردو یانە د یاریا بوری دا بیێ گۆل وەکھەڤبوون، خودانێن ئەردی ئەوا نەە خال کۆمکرین و رێزا سیێ دھێت پلانا وێ سەرکەفتنە بۆ پلا نایاب لەورا بتنێ سێ خال ئارمانجن، ژلایێ خوەڤە یانا گارە ئەوا ب پێنچ خالان رێزا پێنجێ دھێت دێ بزاڤێ کەت بتنێ مانا خوە پارێزیت و خوە ژ رێزێن مەترسیێ پارێزن و قەرەبوویا خالێن یاریێن بوری بکەن.

د داخویانیەکێ دا داخاز سالح راھێنەرێ تیما یانا گارە بۆ رۆژناما ئەڤرۆ گوت: بەرھەڤیێن مە د بەردەوامن و یاریەکا ب ھێزە و پری ھەڤڕکی یە تایبەت  دناڤبەرا دو یانێن پارێزگەھێ دا بن، ھەرچەندە د یاریا بوری دا و ناڤ یاریگەھا خوە دا وەکھەڤبووین لێ ئەرکێ مە ب سانەھی نابیت و من باوەری ب ھەموو یاریزانێن خوە یێن گەنچ کو دێ ب گیانێ کۆم و بۆ سێ خالان یاریێ کەن، یا گرنگ یاریەکا خووش بیت و ل ئاست بھێتە دیتن.

ژلایەکێ خوەڤە عامر سوسنا کاپیتنێ یانا ئاکرێ گوت: مە چو رێک نینن بتنێ  سەرکەفتن ئەگەر مە بڤێت بەردەوامیێ بدەینە ھەڤڕکیێ و ئارمانجا خوە بجھبینن بۆ دەربازبوونا پلا نایاب، گارە تیمەکا رێکوپێکە و یاریزانێن باش و شارەزا ھەنە ب ھیڤییا وێ یەکێ دێربیەکێ جوان و ھونەری بھێتە پێش.

زاخۆ،عەلی حاجی :

د داخویانیەکێ دا سکرتێرێ یانا زاخۆ یا وەرزشی بۆ رۆژناما ئەڤرۆ دیارکر ھاریکاریێن حوکمەتێ نەشیاینە ئاریشێن مە چارەسەر بکەت بتنێ مووچە و ھندەک گرێبەستێن یاریزانان ھاتنەدان لێ یێن ھندەک یاریزانێن خولا عێراقێ پارڤەنەکرینە .

زێدەتر ئیدریس کوچەر گۆت: ھاریکاریا حوکمەتێ بۆ یانێ ب کۆژمێ ٢١٧ ملیون دینارێن عێراقی بوون و بتنێ بۆ گرێبەست و مووچێ ھندەک یاریزانێن تیما خولا عێراقێ یا تەپاپیێ ھاتنە دان لێ ھەموو ژی ب ڤەبڕین بوون و دیسان مووچێ ھەیڤەکێ یێ یاریزانێن خولا کوردستانێ دا و قستەکێ ژ ھەڤبەستا یاریزانێن تیما باسکت بۆلێ ھاتنەدان، لەورا ل کۆمبوونا مە یا دووماھیێ ل گەل پارێزگەرێ دھوکێ و رێڤەبەرێ گشتیێ وەرزشێ ل کوردستانێ و رێڤەبەریا وەرزشێ یا پارێزگەھا دھوکێ داخاز ژ مە ھاتیەکرن ب رێیا ڤەدیتنەکێ ئەم رادەستی پارێزگەرێ دھوکێ بکەین کو ھەیڤانە پێدڤی ب چەند کوژمێ پارەیی ھەنە دا کو ھاریکاریا مە بھێتە کرن و ئەم بشێن بەردەوامیێ بدەینە خولێن عێراقێ و کوردستانێ .

ناڤھاتی ئەو چەندە ژی گۆت: د وێ کومبونێ دا پارێزگەرێ دھوکێ دیارکر ژی ئەو ناھێلن رەوشا زاخۆ خراب ببیت و دێ ژلایێ خوەڤە ھاریکاربن بۆ باشترکرنا رەوشا یانا زاخۆ و رێڤەبەرێ گشتیێ وەرزشێ و رێڤەبەرێ وەرزشێ تایێ دھوکێ پشتەڤانیا تەمام بۆ زاخۆ دیارکرن و دیسان بۆ ھەر رێیەکا یاسایی ھەبیت بۆ پشتەڤانیکرنیێ ئەو ئامادەنە.

ئەڤرۆ،

تیما یانا ھەولێرێ شیا خالەکا گرنگ ژ خودانێن ئەردی یانا زاخۆ وەربگریت و دێربیێ کوردستانێ ب گۆلەکێ و وەکھەڤیێ لێکڤەکر، د یاریا واندا ئەوا دوھی ژ چوارچووڤێ ھەڤڕکیێن گەڕا ٢١ێ ژ خولا پلا نایابا عیراقێ یا تەپاپیێ ئەوا ل یاریگەھا نێڤدەولەتی ل باژێرێ زاخۆ ھاتیەکرن کو دبیتە وەکھەڤیا ١٣ێ د خولێ دا بۆ خودانێن ئەردی و یا ئێکێ ل گەل راھێنەرێ نوو سامی بەحت.

گۆلا تیما زاخۆ ژلایێ یاریزانێ وێ ئەحمەد زێروی د خولەکا شەشێ ژ دەستپێکرنا یاریێ ب لێدانا سەری تۆمارکر، گۆلا وەکھەڤیێ یا ھەولێرێ ژلایێ یاریزان محەمەد سامی د خولەکا ٨٧ێ دا ھاتە تۆمارکرن، بڤێ ئەنجامی ھەردو یانێن کوردستانێ زاخۆ ب ٣٣ خالان ل رێزا شەشێ و ھەولێر ب ٢١ خالان رێزا ١٤ێ جھێن خوە ل سەر لیستا خولا عیراقێ پاراستن.

زیاد ئەحمەد ھێرشبەرێ تیما یانا زاخۆ بۆ رۆژناما ئەڤرۆ گوت: سەرکەفتنەکا گرنگ مە ژ دەستدا کو ئەم ژ ھەژی سێ خالێن یاریێ بووین، ژبەرکو  د ماوێ ھەردو نیڤان دا تیما مە باشتر بوو و گڤاشتن زێدەتر ھەبوون و گەلەک بزاڤێن گۆلکرنێ لسەر یانا ھەولێرێ دھاتنەکرن لێ لەزکرن و نەبوونا چەنسی بوو ئەگەر دو خالان ژ دەست بدەین، ئەڤە تەپاپیێ یە یانا ھەولێرێ مفا ژ خەلەتیەکێ وەرگرت و گۆلا وەکھەڤیێ تۆمارکر، د ماوێ ھەردو نیڤان دا مە مفا ژ دەلیڤێن خوە وەرنەگرتن، ب ھیڤیا وێ یەکێ یاریێن بھێت ئەم قەرەبوو بکەین.