قەیس وەیس:

د ڕێورەسمەكێ‌ فەرمی دا ل سەر بڕیارا مەسرۆر بارزانی سەرۆكێ‌ حوكمەتا هەرێما كوردستانێ‌ رێڤەبەرییا گشتی یا وەرزشی ل هەرێمێ‌ ب هەڤكاری دگەل فدراسیۆنا فوتبۆلێ‌ خەلاتێ‌ سەرۆك وەزیران بۆ قارەمانێن وەرزێ‌ 2023-2024ی یێن كوردستانێ‌ و ل سەر ئاستێ‌ نێڤدەولەتی، ئەوا دوهی ل هەولێرا پایتەخت ب ئامادەبوونا وەزیرێ‌ رەوشەنبیر و لاوان، رێڤەبەرێ‌ گشتی یێ‌ وەرزشی، سەرۆكێ‌ فدراسیۆنا فوتبۆلا كوردستانێ‌ و یانەیێن خەلاتكرنی.
سەرجەمێ‌ نەهـ یانەیێن وەرزشی هاتبوونە خەلاتكرن ژ وانا هەر سێ‌ یانەیێن پارێزگەها دهۆكێ‌، ئاكرێ‌ قارەمانا وەرزێ‌ بۆری و خودانا ناسناڤێ‌ سۆپەرا كوردستانێ‌، یانەیا ئافرەتێن دهۆك قارەمانا فوتسالا كوردستانێ‌، تیما فوتسالا كچێن یانەیا زاخۆ خودانا رێزا دویێ‌.
د گۆتارا خوە یا ڕێورەسمێن خەلاتكرنێ‌ دا سەردار ئیسماعیل رێڤەبەرێ‌ گشتی یێ‌ وەرزشی ل هەرێما كوردستانێ‌ سۆپاسیا سەرۆكێ‌ حوكمەتێ‌ كر و گۆت: بەردەوامی دان ل سەر پشتەڤانییا رێزدار مەسرۆر بارزانی بۆ كەرتێ‌ وەرزشی ب هەموو یاریێن خوە ڤە، ئەڤرۆ خەلات ل سەر قارەمانێن كوردستانێ‌ هاتنە بەلاڤكرن و ئەڤ خەلاتە دێ‌ بەردەوامبن بۆ هەموو یاریێن دی ژی هێتە دان، سۆپاسییا سەرۆكێ‌ حوكمەتێ‌ دكەین كو پێشنیارا مە وەرگرتی، هەروەسان گەشبینیێ‌ ددەینە فدراسیۆنا فوتبۆلا ئیراقێ‌ بۆ ڕێڤەبرنا كارۆچالاكیێن خوە بەردەوامبن، مەرەما مە هەموویان ژی پێشئێخستنا ئاستێ‌ وەرزشا كوردستانێ‌ یە.
لدۆر ڤێ‌ یەكێ‌ پرژین جیهاد سەرپەرشتا تیما فوتسالا یانەیا دهۆكێ‌ بۆ رۆژنامەیا ئەڤرۆ گۆت: بناڤێ‌ كارگێریا یانەیێ‌ ئەم سۆپاسییا رێزدار مەسرۆر بارزانی سەرۆكێ‌ حوكمەتا هەرێما كوردستانێ‌ دكەین كو رێز ل ئەوان یانەیێن قارەمان یێن وەرزشی بۆری گرتی ویانەیا مە ئێك ژ ئەوان قارەمانێن وەرزێ‌ بوری یا فوتسالا كوردستانێ‌ یە، ئەڤ پێنگاڤە گەلەك یا گرنگ بوو تایبەت بۆ یاریزانێن كچ كو دبیتە خەلاتەكێ‌ مەعنەوی یێ‌ بهێز زێدەتر یاریزانێن كچ باوەری ب خوە هەبیت.

عەلی حاجی:

د داخویانیەکێ دا سکرتێرێ یانەیا زاخۆ بۆ رۆژنامەیا ئەڤرۆ دیار کر بڕیارە ئەڤرۆ رۆژا دوشەمبێ یاریزان ئەحمەد یاسین بگەهیتە باژێرێ زاخۆ و گرێبەستا خوە ئیمزابكه‌ت.
زێدەتر هشیار شەهباز گۆت: پێخەمەت باشتر کرنا رێزێن تیما مە یا فوتبۆلێ ئه‌وا پشکدار د خولا ستێرێن ئیراقێ دا مە شیا کارەکێ باش بکەین و گرێبەستا دو یاریزانان ژبەریا ڤەبوونا دەرگەهێ ڤەگوهاستنێن زڤستانی دا ئیمزا بکەین، ئەم دگەل ئەحمەد یاسینی رێکەڤتینە کو ئەڤرۆ رۆژا دوشەمبێ بگەهیتە باژێرێ زاخۆ و بشێوەیەکێ فەرمی دێ بیته‌ یاریزانێ تیما مه‌، ئەم بەردەوام چاڤدێریا یاریزانان دکەین و هەر جهەکێ ئەم بزانین مە کێماسی لێ هەنە دێ پر کەین،هەتا نوکە تیما مە شیایە ئاست و ئەنجامێن باش ب دەستڤە بینن و ئەڤە ژی وەدکەت بۆ قوناغا دویێ باشتر خوە بەرهەڤ بکەین و زاخۆ ژ هەژی هندێ یە ل رێزێن پێشێی بیت د خولێ دا.
ناڤبری گۆت ژی: پشتەڤانیا بەردەوام یا گوهدار شێخۆ سەرپەرشتێ ئیدارەیا سەربەخویا زاخۆ وەکریە ئەم بشێن ئاستەنگێن د رێیا مە دا لادەین و ڤێ تیما نوکە دروست بکەین.

عەلی حاجی:

د دیدارەکێ دا موراد عەلی یاریزانێ تیما باسکێت بۆلا زاخۆ و هەلبژارتیێ ئیراقێ بۆ رۆژنامەیا ئەڤرۆ دیار کر ئاستێ وی د وەرزێ ئەڤ سالە دا باشتر بوویە و وی دڤێت باشترین ئاست پێشکێش کەت.
زێدەتر موراد عەلی گۆت : د وەرزێ ئەڤ سالە دا ل دەستپێکا ڤی وەرزی ل سەر شێوەیەکێ ڕاست و دروست مە شیا ئاستێ خوە بلندتر بکەین ژبەرکو تیما مە د قوناغا ئاڤاکرنێ دا بوو و ئەم پێدڤی دەمی بووین هەتا کو مە شیایی هەماهەنگیێ دناڤبەرا یاریزانێن نوو و یێن کەڤن دا دروست بکەین،هەر دیسان ڕاهێنەرێ مە ژی یێ نوو بوو ژبەر هندێ مە پێدڤی ب دەمی هەبوو،د نوکە دا تیما مە ل سەر ڕێیەکا دروست دچیت و من شیا ڤێ چەندێ ب دەلیڤە ببینم و زێدەتر ئاستێ خوە بلندتر بکەم و ئەڤ چەندە ژی هاریکارە بۆ من دگەل هەلبژارتیێ ئیراقێ یێ باسکتبولێ.
ناڤبری گۆت ژی: د وەرزێ ئەڤ سالە دا مە دڤێت کارەکێ باش بکەین و هەڤرکیێ ل سەر ناسناڤێ خولێ بکەین ژبەرکو ئەو شیانە لدەف تیما مە هەنە کو بشێن شەری بۆ ناسناڤی بکەین.
بۆ زانین تیما یانه‌یا زاخۆ ب كۆمكرنا 22 خالان ژ 13 یارییان رێزا چارێ دهێت ب هه‌شت سه‌ركه‌فتن و شه‌ش خوساره‌تییان، ده‌لیڤه‌یا ده‌ربازبوونێ بۆ قۆناغا چارێك دووماهیێ به‌رده‌سته‌.

د ئێكەم دەركەفتنا خوە دا ستێرێ‌ هەلبژارتیێ‌ ئیراقێ‌ و ڕەڤەندا كوردستانی مێرخاس غازی دۆسكی وەكو كاپتنێ‌ تیما یانەیا ڤیكتۆر بلزن یا چیكی یارییا خوە یا ئێكێ بەرانبەر یانەیا بادربۆن یا ئەلمانی كر خوە بەرهەڤكرن بۆ چامپیۆنز لیگ یا ئۆرۆپایێ‌ و خولا چیكی.
مێرخاس دۆسكی كوڕێ‌ باژێرێ‌ زاخۆ د ژیێ‌ 25 سالی دا یاریزانێ‌ بەرێ‌ یێ‌ یانەیا سلۆڤاكۆ یا چیكی بوو لێ‌ ژبەر ئاست و شیانێن یانەیا ڤیكتۆر بلزن ئێك ژ یانەیێن ب هێز ل چیكێ‌ و پشكدارە د چامپیۆنز لیگ شیا بۆ سێ‌ وەرزان كرێبەستێ‌ دگەل ئیمزا بكەت كو دگەهیتە 500 هزار یۆرۆیان بۆ ئێك وەرز، ل دووڤ ژێدەرێن رۆژنامەڤانی بوهایێ‌ بازاركرنێ‌ یا یاریزان مێرخاس دۆسكی د بازارێ‌ كرین و فرۆتنان دا دگەهیتە 42 ملیۆن یۆرۆیان كو دبیتە ئێكەم یاریزانێ‌ كوردستانی خودان بلندترین بازاركرن.
د داخویانیەكا رۆژنامەڤانی دا مێرخاس دۆسكی گۆت: پێخوەشحالم پێنگاڤەكا نوو د كاروانێ‌ خوە یێ‌ وەرزشی دا هاڤێژتی، بۆ من هەڤڕكییەكا دی یە ل خولا چیكێ‌ لێ‌ دێ‌ یا نوو بیت د خولا ئۆرۆپا دا، یا د شیانێن من دا بیت دێ‌ پێشكێشكەم، پێنەڤێت ئەڤچەندە پێدڤی ب وەستیانەكا بەردەوامە و پێشئێخستنا ئاستێ‌ خوەیە.
بۆ زانین یانەیا ڤیكتۆریا بلزن د خولا نایابا چیكێ‌ دا ل رێزا دویێ‌ دهێت، هەروەسان د خولا یانەیێن ئۆرۆپا یۆرۆ لیگ ل رێزا 17ێ‌ ب نەهـ خالان ل سەر جەمێ‌ گشتی یێ‌ 36 یانەیا پشتی بۆرینا شەش یارییان بتنێ‌ و هەتا نوكە 20 یاری دگەل هەلبژارتیێ‌ ئیراقێ‌ كرینە و 63 یاری دگەل یانەیا خوە یا بەرێ‌ سلۆڤۆكۆ یا چیكی كرینە.

د كۆمبوونا خوە یا ئاسایی دا فدراسیۆنا فوتبۆلا كوردستانێ‌ چەند بڕیار و ڕاسپاردەیێن نوو دەركرن ژ وانا دەستنیشانكرنا وەرزێ‌ نوو یا خولا پلا دو دیسان سزادانا چەند یاریزان و كارگێریێن تیما یانەیا ئاكرێ‌ و دانانا ژڤانەكی بۆ خولێن ڕاهێنانێ‌.
د داخویانیەكێ‌ دا ئازاد محەمە ئەندامێ‌ فدراسیۆنا فوتبۆلا كوردستانێ‌ بۆ رۆژنامەیا ئەڤرۆ گۆت: ل سەر ڕاپۆرتێن جودا یێن سەرپەرشتیار و دادڤانێن یاریێن خولا پلا نایاب و پلا ئێك حەفتییانە كۆمبوونێن ئاسایی دهێنە كرن ژبۆ دۆڤچوونا هەر بابەتەكی و وەرگرتنا پێرابوونان، كۆمبوونا مە یا ڤێ‌ حەفتیێ‌ گەنگەشە ل سەر چەندین بابەتێن جودا د هاتنە كرن دەرئەنجامێ‌ وێ‌ كۆمەكا بڕیاران هاتنە دەركرن.
هەروەسان ناڤهاتی گرنگترین بڕیارێن وێ‌ بۆ مە دیاركرن و گۆت: پشتی گەنگەشەیەكا درێژ بڕیار هاتە دان ل 15ێ‌ ئادارا بهێت ببیتە دەستپێكا وەرزێ‌ نوو 2025 خولا پلا دو دەستپێبكەت ئەوا دێ‌ ب شێوەیی كۆمان بیت و دەربازبوون بۆ قۆناغا دویێ‌، دێ‌ چاڤەڕێ‌ هژمارەیا یانەیان بین ژبۆ دانانا سیستەمێ‌ شێوازێ‌ خولێ‌ و دیار كر ل 24ێ‌ ڤێ‌ مەهێ‌ دێ‌ وەرزێ‌ نوو یا خزولا فوتسالا كچان ژی هێتە كرن.
ئازاد محەمەد ئەوچەندە ژی گۆت: دەرئەنجامێ‌ روودانێن یارییا یانەیا ئاكرێ‌ بەرانبەر یانەیا دەربەندیخان ژ گەڕا 12ێ‌ بڕیار هاتە دان یانەیا دەربەندیخان ب كۆژمەیێ‌ 500 هزار دیناران بهێتە سزادان، هەروەسان خزمەت گوزارێ‌ تیما ئاكرێ‌ وەلید سەدیق بۆ چار یارییان هاتە دووركرن و كۆژمەیێ‌ 250 هزار دیناران هاتە سزادان، دیسان دەرئەنجامێ‌ روودانێن یارییا شەقلاوە و ئاكرێ‌ ژ گەرا 13ێ‌، یاریزانێ‌ ئاكرێ‌ هەمزە سابر بۆ پێنج یارییان هاتە دووركرن دگەل سزادانا ب 500 هزار دیناران ژبەر دووركەڤتن ژ گیانێ‌ وەرزشی، هەروەسان یاریزانێ‌ شەقلاوە ستار سابر ب دو یارییان و 250 هزار دیناران هاتە سزادان.
ژلایەكێ‌ دووڤە ناڤهاتی گۆت: فدراسیۆنا فوتبۆلا كوردستانێ‌ هەردم بزاڤ كرینە ب شێوەكێ‌ جوان و ڕێكخستی هەڤڕكیێن خولان بهێنە كرن و هاندانا هەموو یانەیان كرینە كو تیمێن وان ب گیانێ‌ وەرزشی یاریان بكەن، پێخەمەت خولا كوردستانێ‌ ب جوانترین شێوە و هەڤڕكییەكا ئاسایی بڕێڤە بچیت.