ئامێدیێ، مەحمود نهێلی:

سەربەست لەزگین، بەرپرسێ مەكتەبا رێكخستنا پارێزگەها دهۆكێ یا یارتی، دوهی ل هاڤینگەها ئێنیشكێ ل ناوچەداریا سەرسنكێ و ب بەرهەڤبوونا بەرەڤان حەمدی بەرپرسێ لقێ هەژدە یێ پارتی و وارشین،سەلمان دەڤەردارێ ئامێدیێ ل گەل هژمارەكا موختار و ریهسپی و كەسایەتیێن دەڤەرێ بەحس ل رەوشا دەڤەرێ ب گشتی و قۆناغا داهاتی و پڕۆژە و خزمەتگوزارییان و كارنامەیا پارتی بۆ قۆناغێن د دووڤ د ل دەڤەرا ئامێدیێ كر.
ناڤهاتی گۆت: «د ڤان سالێن بۆری دا گەلەك پڕۆژە ل ڤێ دەڤەرێ هاتینە ئەنجامدان، لێ ل چاڤ خزمەت و بەرخودان و خوەراگریا خەلكێ دەڤەرێ یا كێمە، ژ بەر وێ یەكێ ئەم چاڤەرێ نە پڕۆژێن باشتر و ستراتیژی ل ڤێ دەڤەرێ ئەنجام بدەین».
ل دۆر پرۆسێسا هەلبژارتنان ژی سەربەست گۆت: «سەركەفتنا پارتی د هەلبژارتنان دا سەركەفتنا گەلێ كوردە و پاراستنا قەوارێ هەرێما كوردستانێ و ب دەستڤەئینانا دەستكەفتێن پترە».

زاخۆ، دلۆڤان هالۆ:

شڤان عەبدی، بەرپڕسێ ڕاگەهاندنا ئیدارەیا سەربخوە یا زاخۆ بۆ ڕۆژناما ئەڤرۆ دیار كر كو دوهی گوهدار شێخۆ، سەرپەرشتێ ئیدارەیا سەربەخوە یا زاخۆ، ب هەلكەفتا سێ سالییا راگەهاندنا ئیدارەیا سەربخوە یا زاخۆ، پێشوازی ل سێ كەسایەتیان كر.
بەرپڕسێ ڕاگەهاندنا ئیدارەیا سەربخوە یا زاخۆ، ئاماژە ب وێ چەندێ ژی كر كو د روونشتنێ دا، بەحس ل تەوەر و بابەتێن جودایێن د ڤان سێ سالێن دەرباز بووی دا هاتە كرن، كو زاخۆ ژ قۆناغەكێ بەرەڤ قۆناغەكا پری ئاڤەدانی ڤە چوویە، ل سەر راسپاردەیا مەسرور بارزانی، سەرۆكێ حوكمەتا هەرێما كوردستانێ، ئاڤەدانی و خزمەتگوزاریێن باش ل سنوورێ ئیدارەیا سەربخوە یا زاخۆ هاتینە ئەنجامدان.
ناڤهاتی گۆت: «ژ بەر كار و خزمەت و خەباتا وان یا بەرچاڤ د دبیاڤێن وان یێن جودا دا، رێز ل هونەرمەند بشار زاخۆیی و دەرهێنەرێ سینەماكار سەهیم عومەر خەلیفە و جۆتیارێ نموونە گورگیس رەشۆ هاتە گرتن».

د چارچوڤێ‌ بەردەوامیدان ب گەهاندنا پڕۆژەیێن خزمەتگوزاری دا بۆ وەلاتیان، د. عەلی تەتەر، پارێزگارێ دهۆكێ و ب ئامادەبوونا د. نەوزاد عەبدوللا، بەرپرسێ لقێ ئێك یێ‌ پارتی وئیسماعیل محەمەد ئەحمەد، دەڤەردارێ دهۆكێ و رێڤەبەرێن فەرمانگەهێن پەیوەندیدار دوهی 24/9/2024 بەرێ بنیاتی بۆ هەژمارەكا پڕۆژەیێن خزمەتگوزاری ل سەنتەرێ‌ باژێرێ‌ دهۆكێ‌ هاتە دانان.
ئەو پڕۆژەیێن دوهی ل سەنتەرێ‌ باژێرێ‌ دهۆكێ‌ بەرێ‌ بنیاتی بۆ هاتیە دانان ئەڤەنە:
1- بەرێ بنیاتی بۆ چێكرن و قێركرنا جاددەیێن ناڤخوەیی ل گوندێ قەسارا و چەندین جاددەیێن ناڤخوەیی ل سنوورێ باژێرڤانیا رۆژهەلات و چەندین جاددەیان ل تاخێ ئێتیتێ ب گوژمێ ملیارەك و 202 ملیۆن دیناران هاتە دانان.
2- بەرێ بنیاتی بۆ چێكرن و قێركرنا جاددەیێن ناڤخوەیی ل دەڤەرا پێشانگەهێن ترۆمبێلان ب گوژمێ ملیارەك و 237 ملیۆن دیناران هاتە دانان.
3- بەرێ بنیاتی بۆ چێكرن و قێركرنا جاددەیێن ناڤخوەیی ل تاخێ ئێتیتێ یێ‌ رۆژهەلاتێ باژێرێ دهۆكێ ب گوژمێ ملیارەك و 40 ملیۆن دیناران هاتە دانان.
پارێزگارێ دهۆكێ د كۆنگرەكێ‌ رۆژنامەڤانی دا دیار كر، ل دووڤ راسپاردێن سەرۆكێ حوكمەتا هەرێما كوردستانێ پڕۆژەیێن خزمەتگوزاری ب یەكسانی و بەردەوامی و بێ جوداهی بۆ هەموو دەڤەرداری و ناوچەداری و كۆمەلگەه و گوندان دێ هێنە دابینكرن.
هەژی گوتنێ یە د چار سالێن بۆری دا یێن كابینەیا نەهێ‌ یا حوكمەتا هەرێما كوردستانێ دا 213 پڕۆژە ب گوژمێ 475 ملیار دیناران ل سنوورێ دهۆكێ هاتینە ئەنجامدان.
دیسا هەر دوهی 24/9/2024 د. عەلی تەتەر، پارێزگارێ دهۆكێ چەند پڕۆژەیێن خزمەتگوزاری، وەكو: پڕۆژەیێن چێكرنا رێكا و سولینێن د گەل دا و چێكرن و سەخبێركرنا یاریگەهێن تەپاپێ یێن شەش پاریكەر و ١١ یاریكەر و چێكرنا باغچەیان بۆ سنوور و سەنتەرێن هەرسێ ناوچەداریێن مانگێشكێ و ڕوڤیا و زاویتە ب گوژمێ شەش ملیار و ٢٤٩ ملیۆن و ٤٠٠ هزار دیناران ڕەوانەی بجهـئینانێ كرن.
دیسا هەر دوهی د. عەلی تەتەر، پارێزگارێ دهۆكێ پێشوازیا تیمەكێ نوشدارێن ئیتالی ب سەرۆكاتیا دكتۆرە یولی پینتو و بەرپرسا رێكخراوا هیڤی نازدار كر و د هەڤدیتنەكێ دا بەحسێ بەرنامێ تیما نۆشداری یێ ئیتالی ژ بۆ ئەنجامدانا كۆمەكا نشتەرگەریێن دلی بۆ وان زارۆكان ئەوێن تووشی نەخوشیێن دلی بووین ب گشتی هاتە كرن.

دهۆك، زنار تۆڤی:

ئەڤرۆ رۆژا چارشەمبی، 25ی ئیلۆنا 2024ێ، زەنگا سالا نوو یا خواندنێ ل سەرانسەری هەرێما كوردستانێ هاتە لێدان و دەرگەهێن قوتابخانەیان ل پارێزگەها دهۆكێ ژی هاتنە ڤەكرن‌ و قوتابیان قەستا پۆلێن خواندنێ كر.
نەبیل شنگالی، رێڤەبەرێ پەیوەندی و راگەهاندنێ ل رێڤەبەریا گشتییا پەروەردا پارێزگەها دهۆكێ، بۆ رۆژناما ئەڤرۆ دیار كر، ئەڤرۆ زەنگا سالا نوو یا خواندنێ و هاتە لێدان و هەر ل رۆژا ئێكێ قوتابیان قەستا پۆلێن خواندنێ كر، هەروەسا ل سنوورێ رێڤەبەریا گشتییا پەروەردا پارێزگەها دهۆكێ نێزیكی 400 هزار قوتابی هەنە، هەر ژ قوونا ئێكێ بنەرەتی هەتا قووناغا 12 ئامادەیی، دیسا ل سنوورێ رێڤەبەریا گشتییا پەروەردا پارێزگەها دهۆكێ هزار و 474 قوتابخانە هەنە ل گەل پتری 33 هزار مامۆستایان.

لەزگین جوقی:

ڕێڤەبەرێ كۆچ و كۆچبەر و بەرسڤدانا قەیرانان ل پارێزگەها دهۆكێ بۆ ئەڤرۆ دیار كر، ئەڤ سالە قوتابخانەیێن ئاوارەیان ل هەرێما كوردستانێ ناهێنە دائێخستن و دەرگەهێ هەمی قوتابخانەیێن خواندنا كوردی و عەرەبی دێ دڤەكری بن.
پیر دەیان پیر جەعفەر، ڕێڤەبەرێ كۆچ و كۆچبەر و بەرسڤدانا قەیرانان ئاشكرا ژی كر، حوكمەتا ئیراقێ بڕیار دابوو ل رۆژا 31/7/2024ێ، دەرگەهێن كەمپان بهێنە گرتن و ئاوارە ڤەگەڕن، لێ بڕیارا حوكمەتا ئیراقێ هاتە پاشئێخستن، دەرگەهێن قوتابخانەیێن ئاوارەیان ژی دێ دڤەكری بن و ئەڤ سالە ناهێنە دائێخستن.
پیر دەیان گۆت: «ئەو قوتابخانەیێن ب زمانێ عەرەبی دخوینن، مەزاختیێن وان ل سەر حوكمەتا ئیراقێ نە، یێن خواندنا كوردی ژی ل سەر حوكمەتا هەرێما كوردستانێ نە، هەمی قوتابخانە ل كەمپان و ژ دەرڤەی كەمپان ژی دێ دڤەكری بن و ناهێنە گرتن».