ئامێدیێ، مەحمود نهێلی:

دكتۆر عەلی تەتەر، پارێزگارێ دهۆكێ ب هەڤالینیا شاندەكی دوهی 23/9/2024 سەرەدانا دەڤەرا ئامێدیێ‌ كر و بەرێ بنیاتی بۆ هەژمارەكا پڕۆژەیێن گرنگ و ستراتیژی ل سنوورێ ناوچەداریێن سەرسنكێ و شێلادزێ دانا، ژ وانا ژی: نووژەنكرنا جاەیا گەلیێ بالندا هەتا سیدان ل گەل راكێشنا هێلا كارەبێ و چێكرنا پرەكا ئاسنی ل سنوورێ ناوچەداریا شێلادزێ، دیسا چێكرنا مەلەڤانگەهەكا ئولومپی و هولەكا كۆنفرانسان و سینەمایی ل سەرسنكێ‌.
دكتۆر عەلی تەتەر، پارێزگارێ دهۆكێ د كۆنگرەكێ رۆژنامەڤانی دا دیار كر، پڕۆژەیێ چێكرنا جاددەیا گەلیێ بالندا هەتا سیدان، دێ بیتە جاددەیەكا ستراتیژی و خزمەتا خەلكێ شێلادزێ و سیریێ و خەلكێ دەڤەرێن رێكان و نێروە و دۆسكی ژووری و گەلەگ دەڤەرێن دیتر كەت، هەروەسا ئەڤ جاددەیە دێ دەربازی لایێ دێ یێ ئاڤێ بیت ل وەلاتێ ژێری ب رێیا پرەكا ئاسنی و پاشی بۆ دەڤەرا مزووری ژووری دێ‌ چیت و گۆت: «ئەڤە بۆ مە وەكو خەونەكێ بوو، كو بەرێ بنیاتی بۆ ئاڤەدانكرنا ڤێ دەڤەرێ، یا مە د بەرێ دا دگۆتێ دەڤەرا نێروە و رێكان دانین».
گۆتژی: «پشتی سەرهەلدانێ پتریا خەلكێ كوردستانێ ب دەڤەرێن خوە شادبوون، لێ خەلكێ‌ دەڤەرا نێروە و رێكان، كو ئەز ژی خەلكێ دەڤەرێ مە، ژ بەر چەندین ئەگەران ئەم نەشیاین قەستا دەڤەرێن خوە بكەین، ژ بەر وێ یەكێ ژی بۆ مە وەكو خەونەكێ یە، ئەم ژی ب دەڤەرا خوە شاد ببین».
پارێزگارێ‌ دهۆكێ‌ زێدەتر گۆت: «ل سەر راسپاردەیا سەرۆك بارزانی، دەمێ سالا چوویی سەرەدانا ڤێ دەڤەرێ كری، مەسرور بارزانی، سەرۆكێ حوكمەتا هەرێما هەرێما كوردستانێ رازیبوونا خوە دیاركر ل سەر هاڤێتنا ئێكەم پێنگاڤ بۆ ئاڤەدانكرنا ڤێ دەڤەرێ، كو ئەو ژی بەرفرەهكرنا جاددەیا گەلیێ بالندایە ل گەل دابینرنا ئێمناهیێ و كارەبێ بۆ وێ دەڤەرێ، ل گەل دانانا پرەكا ئاسنی، كو بەری نوكە هاتیە چێكرن، ئەڤە ژی دەسپێكا ئاڤەدانكرنا دەڤەرێ یە، دیسا مە لژنا گەشە پێدانا دەڤەرا ئامێدیێ هەیە، ژ بەركو هەموو دەمان شەر ل دەڤەرێ‌ هەیە، ئەم داخواز دكەین، ئەو هێزێن چەكدار دەڤەرێن مە چۆل بكەن، داكو خەلكێ مە ژی ب ئازادانە ڤەگەڕنە سەر جه و وارێن خوە و ئەڤ لژنەیە هاتیە راسپاردن بۆ ئاڤەدانكرن و گەشەپێدنا دەڤەرا ئامێدیێ وەكو پێنگاڤا ئێكێ ژی 25 ملیار و 828 ملیۆن دینارێن دی هاتینە تەرخانكرن، ژبلی ڤان پڕۆژەیەیان، كو ئەو ژی د ڤان دو حەفتیان دان دێ هێنە رەوانەكرن بۆ بجهئینانێ‌«.
پارێزگاری د وی كۆنگرێ‌ رۆژنامەڤانی دا گۆتژی: «د دەمەكێ نێزك دا بەرێ بنیاتێ بۆ هەژمارەكا دی یا پرۆژەیان ل دێرەلۆكێ و بامەرنێ و كانی ماسێ دێ‌ دانین، د ئەڤ سالە دا ب گوژمێ 57 ملیار دیناران پڕۆژە ل دەڤەرا ئامێدیێ ل ژێر بجهئینانێ نە و د ڤان رۆژان بەرێ بنیاتی بۆ هندەك پڕۆژەیێن دی دێ‌ هێتە دانان».

رەمەزان زەكەریا:

ب بڕیارا مەسرور بارزانی، سەرۆكێ‌ حوكمەتا هەرێما كوردستانێ‌ جۆتسایدێ بەردەڕەش بۆ كەلەكێ‌ ب گوژمێ 100 ملیار دیناران و ب درێژاهیا 37 كیلۆمەتران دێ هێتە چێكرن.
ئیسماعیل مستەفا، دەڤەردارێ بەردەڕەشێ‌ بۆ ئەڤرۆ گۆت: «دەست ب قۆناغا دیزاینێ جۆتسایدێ بەردەڕەش بۆ كەلەكێ‌ هاتیە كرن، كو ژ لایێ مەسرور بارزانی، سەرۆكێ حوكمەتا هەرێما كوردستانێ بریار ل سەر هاتبوودان و ب گوژمێ‌ 100 ملیار دیناران دێ‌ هێتە بجهئینان».
ناڤبری گۆتژی: «ل سەر راسپاردەیا سەرۆكێ حوكمەتا هەرێما كوردستانێ، مەسرور بارزانی و پارێزگارێ دهۆكێ، د. عەلی تەتەر داخواز ژ لایەنێن پەیوەندار و بجهئینەر كربوو، ب زووترین دەم كار بۆ تمامكرنا دیزاینا پڕۆژەی بكەن، بۆ هندێ ب زووترین دەم دەست ب پڕۆژەی بهێتە كرن».

سالار محەمەد دۆسكی:

بڕیارە ئەڤ شەڤە شاندەكێ لژنا دارایی و ئابووری یا پەرلەمانێ ئیراقێ دێ سەرەدانا هەرێما كوردستانێ كەت، بودجە و مووچەیێ‌ هەرێما كوردستانێ دێ بابەتێ سەرەكیێ كۆمبوونان بن.
د. خەلیل غازی دۆسكی، ئەندامێ جڤاتا نوونەرێن ئیراقێ بۆ ئەڤرۆ گۆت: «ئەڤ شەڤە شاندەكێ لژنا دارایی و ئابووری یا جڤاتا نوونەرێن ئیراقێ بگەهیتە هەرێما كوردستانێ، ئەز ژی ئێك ژ ئەندامێن شاندی مە، رۆژا جارشەمبی دێ‌ ل گەل وەزارەتا دارایی و ئابووری و وەزارەتێن پەیوەندار یێن هەرێما كوردستانێ‌ كۆمبین، مەرەم ژ كۆمبوونێ هایداربوونە ل سەر ئاریشێن د ناڤبەرا هەردو ئالیان دا و دیتنا رێكێن چارەسەریێ یە بۆ وان ئاریشان».
گۆتژی: «ئەم دخوازین مووچەیێن فەرمانبەرێن هەرێما كوردستانێ بەردەوام بهێنەدان و تێبینیێن ل سەر لیستێن مووچەیان بهێنە چارەسەركرن».

لەزگین جوقی:

ریڤەبەرێ‌ كۆچ و كۆچبەران و بەرسڤدانا قەیرانان ل دهۆكێ‌ راگەهاند؛ كرێیا ئەردێ كەمپێن ئاوارەیان ل سنوورێ پارێزگەها دهۆكێ ژ لایێ حوكمەتا هەرێما كوردستانێ ڤە دێ هێتە مەزاختن.
پیر دەیان جەعفەر، رێڤەبەرێ‌ كۆچ و كۆچبەران و بەرسڤدانا قەیرانان دیاركر، كرێیا ئەردێ كەمپان ل سنوورێ پارێزگەها دهۆكێ و ئیدارا سەربخوە یا زاخۆ ژ لایێ حوكمەتا ئیراقێ ڤە نەهاتیە مەزاختن، لەورا حوكمەتا هەرێما كوردستانێ خۆ ل ڤی بابەتی كریە خودان و نوكە ل پارێزگەها دهۆكێ رازیبوون هاتیە كرن و لیژنەیەك پێكئینایە بۆ تەرخانكرنا كرێیا ئەردێ كەمپان.
ناڤهاتی گۆت: «ل سنوورێ پارێزگەهێ 14 كەمپێن ئاوارەیان د ناڤا ئەردێن جۆتیاران دا هاتینە دروستكرن، دڤێت سالانە كرێیا وان بهێتە دان».

بەرواری بالا، زنار تۆڤی:

ب مەرەما پشتەڤانی و هاریكاریا قوتابیان بۆ دەستپێكا سالا نوو یا خواندنێ، وەكو كارەكێ خێرخوازی، چەندین پێدڤیێن قوتابخانەیێ‌ ل سەر قوتابیێن قووناغا بنەرەتی یێن قوتابخانەیێن دەڤەرا بەرواری بالا هاتنە بەلاڤكرن.
خێرخواز سەردار خەلیل بێتكاری بەرواری، برایێ شەهیدێ فەرماندە عەمید بژار خەلیل بێتكاری، كو ل شەڕێ دژی داعشێ شەهید بوویە، بۆ رۆژناما ئەڤرۆ گۆت: «وەكو بەرهەڤی بۆ سالا نوو یا خواندنێ، من 570 چانتە و پێدڤیێن دیتر یێن خواندنێ ل سەر قوتابیێن قووناغا بنەرەت و ئەو قۆتابیێن بۆ جارا ئێكێ دچنە قوتابخانێ ل گوندێن بەرواری بالا بەلاڤكرن».
ناڤهاتی گۆتژی: «ئەز ئەركێ ل سەر ملێن خۆ دبینم، خزمەتا قوتابیێن دەڤەرا خۆ بكەم و بۆ سالا نوویا خواندنێ، مە چانتە و پێدڤیێن خواندنێ بۆ قوتابیێن هەموو قوتابخانێن گوندێن دەڤەرا بەرواری بالا دابینكرن، داكو قوتابی ب دلخۆشی بچنە هولێن خواندنێ و دەست ب سالا نوو یا خواندنێ بكەن».