قەیس وەیس:

ل ئەینییا بۆری یاریێن گەڕا 13ێ‌ یا خولا ستێرێن ئیراقێ‌ یا فوتبۆلێ‌ ب دووماهی هاتین ئەوا گوهۆڕینێن بەرچاڤ د ئەنجام و ڕێزبەندیا یانەیان دا پەیدا كری، ئەنجامێن یانەیێن كوردستانێ‌ بڤی شێوەیی بوون هەردو یانەیێن دهۆك و زاخۆ سەركەفتن ئینابوون و هەولێر وەكهەڤی ئینا و نەورۆز تووشی خوسارەتیەكا نە چاڤەڕێ‌ كربوو.
دهۆك ژ كەربەلا دەربازبوو و جهێ‌ خوە خوەشتر لێكر
تیما فوتبۆلا یانەیا دهۆك بەردەوامی دا ئەنجامێن خوە یێن باش پشتی شیایی سەركەفتنەكا گرنگ ژ دەرڤەی یاریگەها خوە ل سەر خودانێن ئەردی یانەیا كەربەلا بینت ب دۆ گۆلان بەرانبەر گۆلەكێ‌، هەردو گۆلێن ئەلهۆیێن چیا ژلایێ‌ یاریزانان پاشەنگ عەبدوللا و پیتەر گۆرگیس ڤە هاتنە تۆماركرن، هەرچەندە نێزیكی هەشت خولەكان یێن دەمێ‌ زێدەتر ل سەر یاریێ‌ مابوون لێ‌ ژبەر روودانا توند یا ئێك ژ پشتەڤانێن یانەیا كەلاربەلا د خولەكا 90+3 دا دەمێ‌ پارچەكا بەری ل سەرێ‌ دادڤانێ‌ هاریكار حسێن فەلاح دایی و بوویە ئەگەر دادڤانێ‌ ئێكێ‌ محەمەد سەلمان ب فیركا خوە یاریێ‌ ب دووماهی بینت.
ڕێنمایێن فدراسیۆنێ‌ د دیارن
ل دووڤ ڕێنمایێن فدراسیۆنا فوتبۆلا ئیراقێ‌ هەكە دادڤانێ‌ یاریێ‌ یاری ژبەر ئەگەرێ‌ توندوتیژیێ‌ دژی دادڤانەكی دێ‌ یاری هێتە ئێكلاكرن بۆ تیما دی 3-چنە، هەروەسان ئەو لایەنێ‌ توندوتیژی كر چ پشتەڤان بیت، یان ئەندامەكێ‌ تیكێ‌ یان وێ‌ یانەیێ‌ دێ‌ هێتە سزادان و هەروەسان یانەیا وی ب 50 ملیۆن دیناران، لێ‌ هەرروودانەكا ئەنجامێ‌ یاریێ‌ ئەوێن گۆل كرین دێ‌ ب ناڤێ‌ وان مینن، هەروەسان كارتێن سۆر و زەر نا هێنە ژێبرن.
ڕاهێنەرێ‌ دهۆكێ‌ بۆ هەر یاریەكێ‌ پلانا خوە هەیە
د كۆنگرەیەكێ‌ ڕۆژنامەڤانی یا پشتی یاریێ‌ دا ڕاهێنەرێ‌ دهۆكێ‌ یێ‌ سویدی ڕەكەز كوردستانی گۆت: بۆ مە گرنگ سەركەفتنە د هەر یاریەكێ‌ دا ژبۆ زێدەتر پێشڤەچوون بۆ رێزێن باشتر، هەرچەندە د نیڤا ئێكێ‌ دا تیما مە ئاستێ‌ چاڤەڕێ‌ كری نیشان نەدا لێ‌ ئەم شیایین پلانەكا ڕێكخستی ب دانین د نیڤا دویێ‌ دا ئاست و ئەنجامان ب دەستڤە بینن، ئەم ڕێزێ‌ ل هەر تیمەكێ‌ دگرین و بۆ هەر یاریەكێ‌ پلانێن خوە یێن هەین، هەموو یاریزانان ل دووڤ ئەوا بۆ هاتینە ڕاسپاردن كار پێ‌ كرن.
گۆلكەرێن تیما دهۆكێ‌ كینە؟
بۆ زانین حەفت یاریزانان پشكداری د تۆمار كرنا 17 گۆلان دا هەیە بۆ یانەیا دهۆكێ‌ و بڤی ڕەنگی، پاشەنگ عەبدوللا چپێنج گۆل، پیتەر گۆرگیس چار گۆل، هەر ئێك ژ كەریم دەرویش و شەرقی ئەلبەحری دو گۆل هەنە، هەروەسان هەر ئێك ژ بەیار ئەبۆ بەكر، یانیك زاكێری، و كێلبرت كۆمسۆن گۆلەك تۆماركرینە، گۆلەك بۆ یاریزانەكێ‌ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
گەشتا شەمەندەفڕا زاخۆ یا سەركەفتنان بەردەوامە
تیما یانەیا زاخۆ بەردەوامە ل سەر ئاست و ئەنجامێن خوە یێن سەركەفتی ب سەركێشییا ڕاهێنەرێ‌ خوە یێ‌ قەتەری تەلال ئەلبلۆشی ئەوێن بۆ یارییا پێنجێ‌ ل دووڤ ئێك و هەشتێ‌ د خولێ‌ دا بەردەوامە ل سەر سەركەفتنێن خوە، پشتی د ڤێ‌ گەڕێ‌ دا شیایی سەركەفتنەكا مەزن ل سەر یانەیا دیالا بینت ب چار گۆلان بەرانبەر گۆلەكێ‌، د یارییا واندا ئەوا ل پێنج شەمبییا بۆری ل یاریگەها شەعب یا نێڤدەولەتی هاتییە كرن، هەر چار گۆلێن زاخۆ ژلایێ‌ یاریزانێن وێ‌، محەمەد عەلی عەبۆد، ناسر محەمەدو، گۆستاڤۆ هێنریك دۆ گۆل تۆماركرن كۆ دبیتە دوەمین سەركەفتنێن مەزن بۆ كوڕێن خابۆری د وەرزێ‌ ئەڤ سالە دا.
ئەمجەد عتوان و گۆستاڤۆ سەرێ‌ لیستا گۆلكەران دهێن
هەردو ستێرێن یانەیا زاخۆ یێ‌ بەرازیلی گۆستاڤۆ هێنریك یاریزانێ‌ هەلبژارتیێ‌ ئیراقێ‌ ئەمجەد عتوان سەرێ‌ لیستا گۆلكەرێن خولێ‌ دهێتن ب حەفت گۆلان، سێ‌ یاریزان ب پێنج گۆلان رێزێن دویێ‌ هەتا شەشێ‌ دهێن ئەو ژی شێركۆ كەریم ژ هەولێرێ‌، موهەنەد عەلی ژ شورتە و جۆن ئۆكێلی ژ ئەلكەرمە، لوكاس سانتۆس ژ شورتە و محەمەد ئەلقاسم ژ جەوییە.
هاریكارێ‌ ڕاهێنەرێ‌ زاخۆ پیرۆزباهیێ‌ ل جەماوەرێ‌ دلسۆز كر
د كۆنگرەیێ‌ رۆژنامەڤانی یێ‌ پشتی یاریێ‌ ئیگۆر تێكالا هاریكارێ‌ ڕاهێنەرێ‌ زاخۆ كەیفخوەشییا خوە دیاركر كو تیما وی بەردەوامە ل سەر ئەنجامێن باش و ئەڤچەندە ژی بۆ چەند ئەگەران ڤەگەڕان و گۆت: پشتەڤانییا كارگێرییا یانەیێ‌، جەماوەرێ‌ دلسۆز و پێگیرییا یاریزانان بۆ هەر پلانەكا دهێتە دانان و یارییا ب كۆم و ئارمانجا سەركەفتنان، تیما دیالا ژی یا ب سانەهی نەبوو لێ‌ ئەم شیاین مفای ژ خالێ، لاوازی وەربگرین و سەركەفتنەكا مەزن بینن، ئارمانجا مە ژی رێزێن پێشیێ‌ یە و هێشتا ئەم یێ‌ د كاروانێ‌ هەڤڕكیان دا.
یاریزانێن زاخۆ چەند گۆل هەنە
پشتی ئەمەجد عتوانی و گۆستاڤۆ هێنریكی خودانێن حەفت گۆلان هەر ئێك، ناسر محەمەدو چار گۆل، هەر ئێك ژ ئەیۆب نناحی گۆلەك، محەمەد عەلی عەبۆد گۆلەك و موسێس گۆلەك، مەحمود فائیز گۆلەك تۆماركرینە.
هەولێرێ‌ دو خال ژ دەستدان و نەورۆز خوسارەت بوو
تیما یانەیا هەولێر نەشیا سەركەفتنا خوە پارێزیت پشتی دگەل مێڤانا خوە یانەیا ئەلكەرمە یا باژێرێ‌ ئەنبار ب گۆلەكێ‌ وەكهەڤ بووی، د یارییا واندا ئەوا ل ئەینیا بۆری یاریگەها شەهید فرانسۆ حەریری هاتیە كرن، یوسف بن سودە تیما هەولێرێ‌ د خولەكا 52ێ‌ دا پێشئێخست بوو لێ‌ بتنێ‌ پشتی بۆرینا شەش خولەكان پیشەكارێ‌ ئەلكەرمە فرانك سێدرێك گۆلا وەكهەڤیێ‌ ئینا، ژلایێ‌ خوەڤە یانەیا نەورۆز تووشی خوسارەتیەكا نە چاڤەڕێ‌ كربوو ب دو گۆلێن پاقژ.
ژ ئەنجامێن یاریێن دی، نەفت 1-0 ئەلمینا گۆلا نەفتێ‌ ژلایێ‌ كوڕێ‌ باژێرێ‌ سێمێلێ‌ ئەحمەد سەبری ڤە هاتە تۆماركرن، كەرخ چنە-چنە ئەلقاسم، نەفت میسان 3-1 ئەلحدود، كارەبا چنە-1 زەورا، نەجەف 0-0 شورتە، جەویە 1-0 تەلەبە.
هەلوەستێ‌ گشتی یێ‌ رێزبەندییا خولێ‌ پشتی ب دووماهی هاتنا یاریێن گەڕا 13ێ‌ بڤی رەنگی یە.
1- جەوییە 27 خال.
2- شورتە 26 خال.
3- زاخۆ 25 خال.
4- زەورا 25 خال.
5- نەفت 23 خال.
6- دهۆك 21 خال.
7- تەلەبە 21 خال.
8- نەفت ئەلمیسان 21 خال.
9- هەولێر 19 خال.
10- نەجەف 18 خال.
11- ئەلكەرمە 16 خال.
12- ئەلمینا 16 خال.
13- كارەبا 15 خال.
14- ئەلقاسم 15 خال.
15- كەربەلا 15 خال.
16- نەفت ئەلبەسرا 14 خال.
17- نەورۆز 14 خال.
18- ئەلكەرخ 12 خال.
19- دیالا چار خال.
20- ئەلحدود سێ‌ خال.
لیستا 10 گۆلكەرێن پێشیێ‌ بڤی شێوەی نە.
1- موهەنەد عەلی 8 گۆل ژ یانەیا شورتە.
2- عەلا عەباس 8 گۆل ژ یانەیا جەوییە.
3- گۆستاڤۆ هێنریك 7 گۆل ژ یانەیا زاخۆ.
4- ئەمجەد عتوان 7 گۆل ژ یانەیا زاخۆ.
5- لۆكاس سانتۆس 6 گۆل ژ یانەیا شورتە.
6- ئەلحارس حاتم 5 گۆل ژ یانەیا ئەلقاسم.
7- پاشەنگ عەبدوللا 5 گۆل ژ یانەیا دهۆك.
8- شێركۆ كەریم 5 گۆل ژ یانەیا هەولێر.
9- محەمەد قاسم 5 گۆل ژ یانەیا نەجەف.
10- جۆن ئۆكۆلی 5 گۆل ژ یانەیا ئەلكەرمە.

بڕیارە ئەڤرۆ ل دەمژمێر 10 شەڤ پشتەڤانێن وەرزشی چاڤەڕێ‌ ئێكەم یارییا كلاسیكۆیا ئەردی یا سالا 2025ێ‌ بن كو دبیتە یارییا دووماهییا كۆپا سۆپەرا ئیسپانیا ئەوا دێ‌ دناڤبەرا هەردو هێزێن جیهانێ‌ یێن یارییا فوتبۆلێ‌ ریال مەدرید و بەرشەلۆنا بن ئەوا دێ‌ یاریگەها ئەلجەوهەرە ل پایتەختێ‌ سعۆدیێ‌ ئەلریاز مێڤاندارییا وێ‌ كەت.
چاوا دەربازبوون و پاداشت چەندە ؟
ل دووڤ سیستەمێ‌ سۆپەرا ئسپانیا چار یانە دەربازبنە قارەمانیێ‌ و بڤی شێوەی، قارەمانێ‌ خولێ‌ و خودانا رێزا دویێ‌، قارەمانا كۆپا ئسپانیا و خودانا رێزا دویێ‌، ئێكەم جار ل سالا 1982ێ‌ هاتییە كرن، بۆ جارا پێنجێ‌ یە وەلاتێ‌ سعۆدیێ‌ مێڤاندارییا قارەمانیێ‌ دگەل مەزاختنا پرانیا پێدڤیان ب خوەڤە دگریت دگەل دانا 40 ملیۆن یۆرۆیان بۆ فدراسیۆنا ئسپانیا كو ئەڤ ڕێكەفتنە سالا 2023ێ‌ هاتیە كرن، ل دووڤ رێنمایێن قارەمانیێ‌ ئەو یانەیا پێش دووماهیێ‌ ب سەركەڤیت و دەربازبیتە یارییا دووماهیێ‌ دێ‌ ئێك ملیۆن یۆرۆ وەرگریت، ئەو یانەیا ناسناڤێ‌ سۆپەر ببەت دێ‌ دو ملیۆنێن دی ژی وەرگریت.
دیدارێن ئاگرین بەردەوامن
یارییا ئەڤ شەڤە دبیتە یا سێیێ‌ ل دووڤ ئێك هەردو یانە بكەڤنە بەرانبەر ئیك، لێ‌ دیدارێن وان پرانییا ب سەركەڤتنا ڕیالێ‌ بووینە ب 77 سەركەفتن بەرانبەر 62 سەركەفتن بۆ بەرشەلۆنا و 36 وەكهەڤی هەبووینە، لێ‌ بەرشەلۆنا خودان زوورترین ناسناڤانە ب14 جاران و ڕیالێ‌ 13 ناسناڤ هەنە.
ئۆلمۆ دێ‌ یاریێ‌ كەت
فدراسیۆنا فوتبۆلا ئسپانیا ڕێ ب پشكدارییا ستێرێ‌ بەرشەلۆنا دانی ئۆلمۆ و هەڤالێ‌ وی پاۆ ڤیكتۆر دا بۆ یارییا ئەڤ شەڤە ژ سۆپەرێ‌ بكەت لێ‌ د خولا ئسپانیا دا هێشتا ماف نینە یاریێ‌ بكەن