قەیس وەیس:

بڕیارە ئەڤرۆ چار یاریێن مایی ژ هەڤڕكیێن گەڕا 13ێ‌ یا خولا پلا نایابا كوردستانێ‌ یا فوتبۆلێ‌ ل یاریگەهێن جودا یێن هەرێمێ‌ بهێنە ئەنجامدان، یانەیا ئاكرێ‌ ل بن گڤاشتنێن جەماوەرێ‌ خوە دێ‌ مێڤاندارییا شەقلاوە كەت و چاڤ ل سەركەفتنێ‌ یە، د ڤێ‌ گەڕێ‌ دا یانەیا زاخۆ دێ‌ یا چاڤەڕێ‌ كری بیت.
جەماوەرێ‌ وەرزشی یێ‌ یانەیا ئاكرێ‌ ب ژڤانن ل دەمژمێر 2:15 پشتی نیڤرۆ بۆ پشتەڤانییا تیما خوە یا فوتبۆلێ‌ بەرانبەر یانەیا شەقلاوە د یارییەكا گرن گدا بۆ كوڕێن پایتەختێ‌ نەورۆزێ‌ ئەوێن دەستپێكەكا باش هاتینە دناڤ خولێ‌ دا لێ‌ د ڤێ‌ً دووماهیێ‌ دا تایبەت د هەردو یاریێن بۆری دا تووشی خوسارەتیان بوو، بوویە ئەگەر ڕاهێنەر وەلید محەمەد و دەستنیشانكرنا كوڕێ‌ باژێرێ‌ ئاكرێ‌ و هەلگرێ‌ ناسناڤێ‌ وەرزێ‌ بوری هەژار سابر ب هیڤیێن ڤەگەڕاندنا ئاست و ئەنجامێن جاران، هەروەسان وەكو پێنگاڤ بۆ بهێزكرنا رێزێن تیمێ‌ گرێبەست دگەل هێرشبەرەكی و پیشەكارەكێ‌ بەرازیلی ئیمزا كرییە.
تیما ئاكرێ‌ ژ سەرجەمێ‌ 10 یارییان بتنێ‌ چار سەركەفتن و ئێك وەكهەڤی هەیە لێ‌ د پێنج یارییان دا تووشی خوسارەتیێ‌ بوویە و پاشڤە هاتییە ڕێزا 10ێ‌ ب 13 خالان ب جوواهییا نیڤا خالێن خوە ژ خودانا سەرێ‌ لیستی شێروانە دوورە ئەوا 26 خال كۆمكرین، ژلایێ‌ خوەڤە یانەیا شەقلاوە خودانا 11 خالانە ژ 11 یارییان ل رێزا 11ێ‌ دهێت، یارییا ئەڤرۆ بۆ ئاكرەییان گەلەك گرنگە پێخەمەت خوە دووركرن ژ مەترسییا ژ دەستدانا هەڤڕكیێ‌ بۆ رێزێن پێشیێ‌ و ژ دەستدانا هیڤی و ئارمانجێن خوە.
سیروانی نوو دێ‌ یانەیا دەربەندیخان مێڤان كەت، ڕانیە دێ‌ بیتە مێڤانا سەید سادق، شێروانە دێ‌ بزاڤێن پاراستنا سەرێ‌ لیستێ‌ كەت و بیتە مێڤانا یانەیا چوارقۆرنە، بۆ زانین هەموو یاری دێ‌ ل دەمژمێر 2:15 پشتی نیڤرۆ هێنە كرن.
د دیدارەكا پێشتر دا بۆ رۆژنامەیا ئەڤرۆ سوبەهیب عەلی پەیڤدارێ‌ یانەیا ئاكرێ‌ بۆ رۆژنامەیا ئەڤرۆ گۆت: ب بۆرینا یازدە گەڕا یاریزانێن مە ئەو ئاست و ئەنجامێن ئەم چاڤەڕێ‌ پێشكێش نەكرینە دیسان نە ل خواستا كارگێریا یانەیێ و جەماوەریێ یانەیێ دبیت ئێك ژ ئەگەرێن وێ‌ ڤەدگەریت كو هنگافتنا چار یاریزانێن سەرەكی یێن تیمێ بووە، هەرچەندە ئەڤ پێنج یاریێن دووماهیێ ئەنجام نە دباشن و خولا یا درێژە و گەشبینن دێ ئەنجامێن داهاتی دباشن بن و دێ ڕكابەرێن ناسناڤی بین كو بەرەڤانیێ لێ بكەین بۆ جارا دویێ.

عەلی حاجی:

د داخویانیەکێ دا سکرتێرێ یانەیا زاخۆ یا وەرزشی بۆ رۆژنامەیا ئەڤرۆ دیار کر ئەو دانوستاندنێن دووماهیێ دانە دگەل دو یاریزانێن نوو .
زێدەتر هشیار شەهباز گۆت: دگەل چوونا شاندێ یانەیا زاخۆ بۆ باژێرێ بەغدا و ئەنجامدانا یارییا خوە به‌رانبه‌ر یانەیا دیالا، ژ نێزیک ڤە ئەم دگەل رێڤەبەرێ کاروبارێن یاریزانێ هەلبژارتیێ ئیراقێ ئەحمەد یاسینی ئەنجامدان و هندەک بابەت هەبوون دگەل رێڤەبەرێ کاروبارێن وی یاریزانی هاتنە چارەسەر کرن و ئەم یێن د قۆناغا دانوستاندنێن دووماهیێ دانە و د نوکە دا چاڤەرێی بڕیارا دووماهیێ یا یاریزانینه‌، ئەوا پێدڤی مە بۆ یاریزانی ئەنجامدایە و هەتا رادەیەکێ باش ژی مە گرێبەستەکا ژ هەژی پێشکێشی وی یاریزانی کریە،هەر دیسان ئەم بەردەوامن د دانوستاندنێ داینە دگەل یاریزانێن دیتر پێخەمەتی هندێ بشێن زووترین دەم دا گرێبەستێ دگەل دا گرێ بدەین.
ناڤبری گۆت ژی: مە دڤێت بۆ قوناغا دویێ تیمەکا باشتر و هێزتر بۆ تیما خوە دروست بکەین، ژ هەژی هندێ یە ل رێزێن پێشیێ بیت.

عەلی حاجی:

د داخویانیەکێ دا سەرپەرشتێ تیما زاخۆ یا پشکدار د خولا نایابا کوردستانێ یا تەپاپێی دا بۆ رۆژنامەیا ئەڤرۆ دیار کر د ماوەیێ ڤەگوهاستنێن زڤستانی دا دێ ئەو چەند گوهورینەکان دناڤ پێکهاتەیێ تیمێ دا کەن.
زێدەتر نەدیار عەلی گۆت: د قوناغا ئێکێ دا هەتا رادەیەکێ باش تیما مە شیا ئاستەکێ باش پێشکێش بکەت و هەر ژ دەستپێکا خولێ هەتا نوکە جهێ خوە ل رێزێن پێشیێ هێلایە و ئارمانجا مە یا سەرەکی ژی هەڤرکی یە ل سەر ناسناڤێ وەرزێ ئەڤ سالە یێ خولا نایابا کوردستانێ یا تەپاپێی، لێ ل هندەک جهان مە کێماسی هەنە و دڤێت وان کێماسیان چارەسەر بکەین، دگەل دەستەیا کارگێریا یانەیا زاخۆ و راهێنەرێ مە ئەو کێماسی هاتینە بەرچاڤ کرن و بۆ وان جهان ژی هندەک یاریزان دەست نیشان کرینە و ئەم چاڤەرێ ڤەبوونا ڤەگوهاستنا یاریزاناینە د وەرزێ زڤستانێ دا ژ بۆ هندێ بشێن یاریزانان ڤەگوهێزینە دناڤ رێزێن تیما خوە دا.
ناڤبری گۆت ژی : مە باوەرییەکا مەزن ب تیما مە خوە هەیە کو دێ شێن هەڤرکیێ ل سەر ناسناڤێ خولێ کەن و دەستەیا کارگێریا یانەیا زاخۆ پشتەڤانیەکا باش ل تیما مە دکەت .

رەمەزان زەكەریا:

د داخویانیەكێ دا سەرۆكێ یانەیا ئاكرێ یا وەرزشی ئاشكراكر بۆ بهێزكرنا رێزێن تیما خوە یا فوتبۆلێ‌ ئەوا پشكدار د خولا پلا نایابا كوردستانێ‌ دا، دێ هژمارەكا یاریزانێن نوو گرێبەستێ دگەل كەین بۆ رێزێن یانەیێ بۆ وێ چەندێ ئاستێ یانەیێ باشتر ببیت ژبەر كو ل چەند یاریێن بۆری ئەنجام د باش نەبوون.
زێدەتر سەلاح ئیبراهیم بۆ ئەڤرۆ گۆت: یانەیا ئاكرێ گرێبەست دگەل ویلكەر سانتوس یێ بەرازیلی و یاریزانێ پێشتر یێ یانەیا نەجما بەحرەینی ل خولا نایابا بەحڕەینی پەیوەندی ب یانا ئاكرێ یا وەرزشی كر بو خولا نایابا كوردستانێ و جاما كوردستانێ .
ژلایەكێ دیڤە یانەیا ئاكرێ راگەهاندیە: یاریزانێ هێرشبەر عمار شعلان یاریزانێ پیشتر یانەیا مەسافی جنوب پەیوەندی ب یانا ئاكرێ یا وەرزشی كر بۆ یاریێن خولا نایابا كوردستانێ و جاما كوردستانێ و یانە دێ بەردەوام بیت ل سەر بهێزكرنا تیمێ و ئینانا یاریزانێن ئاست بلند و گهورینان بۆ یاریێن بهێت .

د داخویانیەكا رۆژنامەڤانی دا گۆلپارێزێ‌ تیما فوتبۆلا یانەیا دهۆك محەمەد سالح دانپێدان ب خەلەتییا خوە كر كو بوویە ئەگەرێ‌ تۆماركرنا گۆلا وەكهەڤیێ‌ ل سەر تیما خوە، د یارییا واندا ئەوا بەرانبەر خودانێن ئەردی یانەیا كەربەلا ب دو گۆلان بەرانبەر گۆلەكێ‌ سەركەفتن ئیناین و هەشت خولەك مابوون دادڤانێ‌ یاریێ‌ ژبەر ڕوودانا توندوتیژییا ئێك ژ جەماوەرێ‌ كەربلا دژی هاریكارێ‌ دادڤانێ‌ یاریێ‌، ئەوا ژ چارچووڤەیی هەڤڕكیێن گەڕا 13ێ‌ یا خولا ستێرێن ئیراقێ‌ هاتییە كرن.
محەمەد سالحی د كۆنگرەیێ‌ رۆژنامەڤانی یا یاریێ‌ دا گۆت: شانازیێ‌ ب تیما خوە دبەم و ئەنجامێ یاریێ‌ یا سەركەفتی، داخوازا سلامەتیێ‌ بۆ دادڤانێ‌ یاریێ‌ دكەین، ئەو گۆلا ل سەر مە هاتییە تۆماركرن ئەز ئەگەر بووم و دانپێدانێ‌ ب خەلەتییا خوە دكەم، هەر زوو یاریزانێن مە شیان هێزا تیمێ‌ ڤەگەڕینین و گۆلا سەركەفتنێ‌ و پێشكەفتنێ‌ بینن، بۆ مە گرنگ سێ‌ خالێن یاریێ‌ نە و ئەڤە ئەركێ‌ مەیە هەموو كار بكەین بۆ سەركەفتنان.
هەروەسان ناڤهاتی گۆت: ئەركێ‌ ل سەر مللێن من ئەز پاراستنا گۆلا خوە بكەم و ببمە هاریكار بۆ هەڤالێن خوە یێن یاریزان ئارمانجا مە هەموویان پێكڤە ئەوە سەرئێخێستنا ناڤێ‌ دهۆكێ‌ یە، بۆ یاریێن داهاتی ژی دێ‌ هەموو بزاڤان كەم ئەڤ خەلەتییە نە مینن و زێدەتر خوە زەحمەت بدەم پێخەمەت پاراستنا گۆلا خوە و ڤەگەڕیمە دناڤ رێزێن هەلبژارتیێ‌ ئیراقێ‌ دا.
بۆ زانین دڤێ‌ یاریێ‌ دا یاریزانێ‌ دهۆكێ‌ پاشەنگ عەبدوللا گۆلا ئێكێ‌ د خولەكا نەهێ‌ دا ئینابوو، لێ‌ یاریزانێ‌ كەربەلا دیایین شیابوو گۆلا وەكهەڤیێ‌ بینت، د نیڤا دویێ‌ دا ژ پەنەلتیەكێ‌ پیتەر گۆرگیس شیا گۆلا دویێ‌ و سەركەفتنێ‌ بینت، پیشەكارێ‌ كۆتیڤواری یێ‌ دهۆكێ‌ یانیك زاكێری دخولەكا 90ێ‌ دا ب كارتا سۆر هاتە دوورئێخستن، دادڤانێ‌ یاریێ‌ محەمەد سەلمان یاری د خولەكا 90+5 ڕاوەستاندن پشتی دادڤانێ‌ هاریكاری حسێن فەلاح تووشی دربەكێ‌ كەفتنا بەری بووی ل سەرێ‌ وی ژلایێ‌ ئێك ژ پشتەڤانێن كەربەلا.

فدراسیۆنا یاریێن گۆرەپانێ‌ ستێرا یاریێن بەریكانەیان كێلی هۆدگێنسۆن قارەمانا یاریێن ئۆلمپیادا وەكو باشترین یاریزان ل سەر ئاستێ‌ كچ و كوڕان بۆ سالا 2024ێ‌ ل وەلاتێ‌ بریتانیا دەستنیشان كر.
ل دووڤ تۆرا بی بی سی كو ڕاوەرگرتن ژلایێ‌ وانڤە ژی هاتیە دانان ستێرا یاریێن گۆرەپانێ‌ و قارەمانا جیهانێ‌ بۆ بەریكانەیا 800م یا ئۆلمپیا كێلی هۆدگێنسۆن وەكو باشترین یاریزان ل سەر ئاستێ‌ كچ و كوڕان هاتە دەستنیشانكرن و پێشكەڤت ل سەر هەڤڕكێ‌ خوە یێ‌ كو و یاریزانا یاریێن هاڤێتنا تیری لۆك لێتر ئەوێ‌ رێزا دویێ‌ هاتی و یێ‌ یارییا كرێكێت یێ‌ ئنگلتەرایێ‌ جۆ رۆت ئەوێ‌ ل رێزا سێیێ‌ هاتی.
بۆ زانین كێلی هۆدگێنسۆن یا 22 سالی، د ئۆلمپیادا 2024ێ‌ پاریس ناسناڤێ‌ بەریكانەیا 800م ب دەستڤە ئینا دیسان بۆ قارەمانا ئۆلمپیادا ئۆرۆپا 2024ێ‌ بۆ هەمان یاری و ڕێكۆرەكێ‌ نوو بۆ بریتانیا ب دەستڤە ئینا كو دگەهیتە ئێك خولەك، 61 چرە و 54 پشك ژ چركەكێ‌ وەكو شەشەمین كچ د دیرۆكا بریتانا بۆ وەرزێ‌ هاتیە دەستنیشانكرن