چاڤه‌ڕێ دهێته‌ كرن ئه‌ڤرۆ ژی چار یاریێن دی ژ هه‌ڤڕكیێن گه‌ڕا 13ێ یا خولا ستێرێن ئیراقێ یا فوتبۆلێ ل یاریگه‌هێن جودا بهێنه‌ ئه‌نجامدانا، هه‌ردو یانه‌یێن كوردستانی زاخۆ و نه‌ورۆز دێ ژ ده‌رڤه‌یی یاریگه‌ها خوه‌ مێڤانێن یانه‌یێن دیالا و نه‌فت ئه‌لبه‌سرا بن، بڕیاره‌ سوبه‌هی چار یاریێن دی ژی بهێنه‌ كرن.
زاخۆ چاڤ ل سه‌ركه‌فتنا حه‌فتێ و پێشڤه‌چوونێ یه‌
تیما یانه‌یا زاخۆ كوڕێن خابووری دێ ل ده‌مژمێر 7:30 شه‌ڤ یاریگه‌ها شه‌عب یا نێڤده‌وله‌تی ل پایته‌ختێ ئیراقێ به‌غدا بیته‌ مێڤانا یانه‌یا دیالایه‌ د یارییه‌كا گرنگ دا بۆ زاخۆییان پێخه‌مه‌ت به‌رده‌وامی دا به‌ر ب پێشڤه‌ بۆ رێزبه‌ندییا باشتر ئه‌وێن ب كۆمكرنا 22 خالان ژ شه‌ش سه‌ركه‌فتن، چار وه‌كهه‌ڤی و خودانا بتنێ دو خوساره‌تیانه‌ وه‌كو ئێكانه‌یانه‌یا كوردستانی ل رێزا سێیێ دهێت، ژلایێ خوه‌ یانه‌یا دیالا بتنێ چار خال كۆمكرینه‌ ل رێزا 19ێ و به‌ری دووماهیێ دهێت، لێ دوور نینه‌ تیمه‌ك بیت سۆپرایزه‌كێ بۆ زاخۆ چێكه‌ت و ئه‌نجامه‌كێ نه‌ پێشبینیكری په‌یدا بكه‌ت وه‌كو دگه‌ل خودانا سه‌رێ لیستێ جه‌وییه‌ كو ب گۆله‌كێ وه‌كهه‌ڤی ئینابوو.
ئامار د به‌رژوه‌ندییا زاخۆ دایه‌
ل دووڤ ئه‌نجامێن ئه‌وان یاریێن دناڤبه‌را هه‌ردو یانه‌یان هاتیه‌ ئه‌نجامدان ئامار د به‌رژوه‌ندییا تیما زاخۆ دانه‌، چار جاران د خولا ئیراقێ دا نه‌رانبه‌ری ئیك بووینه‌، زاخۆ شیایه‌ سێ سه‌ركه‌فتنان و ئێك وه‌كهه‌ڤی بینت، د دو یاریێن ژێكچوودا دا كوڕێن خابووری سێ گۆل تۆماركرینه‌، ئێكه‌م جار به‌رانبه‌ر ئێك یاری كریه‌ ل وه‌رزێ 2009-2010ێ بوو زاخۆ ب سێ گۆلان بێ به‌رانبه‌ر سه‌ركه‌فتن ئینابوو، دووماهی جارا ل نیسانا سالا 2011ێ یاری كرینه‌ و زاخۆ ب گۆلا یاریزانێ خوه‌ ئه‌حمه‌د ئیبراهیم سه‌ركه‌فتن ئینابوو، پشتی بۆرینا 14 سالان ئه‌ڤ یارییه‌ بیته‌ یا ئێكێ.
ڕێڤه‌به‌رێ تیمێ تیمێ گه‌شبینه‌ ب ده‌ستڤه‌ ئینانا سێ خالان
ل دۆر ڤێ یاریێ حەمید ئیسماعیل رێڤه‌به‌رێ تیما زاخۆ بۆ رۆژنامەیا ئەڤرۆ گۆت: بۆ یارییا ئه‌ڤرۆ ستاڤێ راهێنه‌ران و كارگێرییا یانه‌یێ ئه‌ڤ یارییه‌ ب گرنگی دایه‌ زانین و ده‌ستڤه‌ ئینانا سێ خالان هه‌روه‌كو شه‌ش خالانه‌ ژبه‌ر پاراستنا ڕێزبه‌ندییا خوه‌ یان ژی پێشڤه‌چوون بۆ رێزا دویێ، له‌وما ژی دێ بزاڤان دكه‌ین باشترین شێوه‌ تیم یا به‌رهه‌ڤ بیت به‌رانبه‌ر یانه‌یا دیالا كو ئێك ژ یاریێن گرنگ بوو مه، راسته‌ تیمه‌كه‌ ل رێزێن دووماهیێ بتنێ ئێك سه‌ركه‌فتن هه‌یه،‌ لێ نابیت ب چاڤەکێ کێم سەحکەینە ڤێ یاریێ و سڤكاتی وه‌ربگرین، دێ ژ یاریێن ب زەحمەت ژی بیت بۆ تیما مە لێ مە باوەرییەکا مەزن ژی ب تیما خوە هەیە کو دێ شێن ئاست و ئەنجامەکێ باش ب دەستخوەڤەبینن.‌
ژلایه‌كێ دووڤه‌ ناڤهاتی دیاركر: ماوەیەکێ درێژە مە چو یاریێن فەرمی دگەل یانه‌یا دیالا ئەنجام نەداینە و یارییەکا ب زەحمەتە بۆ تیما مە ب تایبەتی ژی یاری ل ژ دەرڤەیی یاریگەها مە دایە لێ ئارمانجا د وێ یاریێ دا سەرکەڤتنە ژبەرکو ئەو تاکە رێکە بشێن زێدەتر خوە نێزیکی سەرێ لیستا خولێ بکەین، تیما مە د قوناغەکا باش دا دەرباز دبیت و مە دڤێت ل سەر هەمان رێک بەردەوام بین و د ڤی وەرزی دا مە ئارمانجێن باش هەنە.
بۆ زانین شه‌ش یاریزانان پشكداری د 18 گۆلێن تیمێ دا كرینه‌ ئه‌وژی، ئه‌مجه‌د عتوان حه‌فت گۆل، كۆستاڤۆ هێنریك پێنج گۆل، ناسر محه‌مه‌دو سێ گۆل، هه‌ر ئێك ژ ئه‌یوب نناحی، موسێس، مه‌حمود فائیز ئه‌لئه‌سوه‌د گۆله‌ك تۆماركریه‌.
ژلایێ خوه‌ڤه‌ یانه‌یا نه‌ورۆز خودانا رێزا 16ێ ب 14 خالان دێ بیته‌ مێڤانا یانه‌یا نه‌فت ئه‌لبه‌سرا ئه‌وا 11 خال كۆمكرین رێزا 17ێ دهێت، یانه‌یا كه‌رخ ئه‌وا 11 خال هه‌ین رێزا 12ێ دێ مێڤاندارییا یانه‌یا ئه‌لقاسم كه‌ت خودانا 14 خالان رێزا 15ێ دهێت، تیما حدود دووماهی یانه‌یا رێزبه‌ندیێ ب سێ خالان دێ ل به‌سرا بیته‌ مێڤانا نه‌فت ئه‌لمیسان ئه‌وا 18 خال كۆمكرین رێزا هه‌شتێ دهێت.

عەلی حاجی:

چاڤه‌ڕێ یه‌ ئه‌ڤرۆ ل ده‌مژمێر چارێ ئیڤاری تیما یانه‌یا زاخۆ ل هۆلا گرتییا بنگه‌هێ وه‌رزش و لاوان مێڤاندارییا یانه‌یا كه‌رخ یا به‌غدایی بكه‌ت ژ چارچووڤه‌یێ یاریێن گه‌ڕا 14ێ و دبیته‌ یا پێنجێ ژ خولا دویێ یا خولا پیشه‌كارێن ئیراقێ یا باسكێت بۆلێ، ئه‌وا دهێته‌ پێشبینیكرن رێژه‌كا ئێكجار زوور یا پشته‌ڤانێن زاخۆ ل هۆلێ به‌رهه‌ڤبن
كوڕێن خابووری ب كۆمكرنا 20 خالان ژ حه‌فت سه‌ركه‌فتن و شه‌ش خوساره‌تیان ل رێزا شه‌شێ دهێت، د به‌رانبه‌ر دا تیما كه‌رخێ ب22 خالان رێزا پێنجێ دهێت، بۆ ڤێ یاریێ تیما زاخۆ پێدڤی ب سه‌ركه‌فتنێ یه‌ ژبۆ به‌رده‌وامی دا ل سه‌ر ئارمانجا خوه‌
عەبدولستار عەلی رێڤه‌به‌رێ تیمێ بۆ رۆژنامه‌یا ئه‌ڤرۆ گۆت: د قۆناغا دویێ دا ئاستێ هه‌موو تیما د هێنه‌ گوهۆڕین و هه‌ڤڕكی ب هێزتر دكه‌ڤیت، پشتی سه‌ركه‌فتنا تیما مه‌ یا گه‌ڕا بوری ب سه‌ر غاز ئه‌لشیمال هیڤیێن مه‌ گه‌شتر لێهاتینه‌ بۆ رێزێن باشترو ئارمانجا مه‌ دناڤبه‌را رێزێن ئێکێ هەتا یا چارێ یە د رێزبەندیا خولێ دا، ژبه‌ركو لدووڤ ڕێنمایێن فدراسیۆنا باسکێت بۆلا ئیراقێ ئەو تیمێن هەتا رێزبەندیا چارێ بهێت دێ دەربازبنه‌ قۆناغا داهاتی و ئەنجامێن.
ژلایه‌كێ دووڤه‌ ناڤهاتی گۆت: بۆ مه‌ گه‌له‌ك گرنگه‌ به‌رده‌وامیێ بده‌ینه‌ ئاست و ئه‌نجامێن خوه‌ و هه‌موو یاریزان ژی بۆ ڤێ چه‌ندێ د ڕژدن هه‌تا بگەهینە ئارمانجا خوە یا سەرەکی و د قۆناغا دویێ دا سەرکەڤتن و ده‌ستكه‌فته‌كێ بۆ هه‌رێمێ و باژێرێ خوه‌ بینن.
بۆ زانین تیما دیفاع ئه‌لجه‌وی ب25 خالان سه‌رێ لیستێ دهێت، دیجله‌ ئه‌لجامعه و حه‌شد ئه‌لشه‌عبی‌ ب23 خالان رێزێن دویێ و سێیێ دهێن، شورته‌ ب22 خالان رێزا چارێ دهێت، 10 یانه‌ پشكدارن پشتی خوه‌ڤه‌كێشانا یانه‌یا ده‌ربه‌ندیخان.

قەیس وەیس:

ل حەفتییا بۆری و دگەل دەستپێكرنا ڤەگۆهاستنێن زڤستانێ‌ بزاڤ دهاتنە كرن یاریزانێ‌ یانەیا شورتە و كوڕێ‌ باژێرێ‌ سێمێلێ‌ و ڕەڤەندا كورد ل هولەندا ڕێوان ئەمین بۆ یانەیا دهۆك بهێتە ڤەگۆهاستن لێ‌ یانەیا شورتە بوو ڕێگر، ژلایەكێ‌ دووڤە كوڕێ‌ باژێرێ‌ شێخانی ئەحمەد زێرۆ ژی داخوازا دەست بەردانێ‌ كربوو پێخەمەت یاریێ‌ بۆ یانەیان دهۆكێ‌ بكەت، یاریزانێ‌ سێیێ‌ هێران ئەحمەد خەلكێ‌ باژێرێ‌ سلێمانیێ‌ و یانەیا جەوییە ژبەر نەدانا مولەتا سەرێ‌ سالێ‌ خوە ژ یانەیێ‌ دووركربوو.
ل دووڤ ژێدەرێن رۆژنامەڤانی كو یاریزان ڕێوان ئەمین ژلایێ‌ ڕاهێنەرێ‌ تیما فوتبۆلا یانەیا دهۆك مەسعۆد میرال هاتبوو داخوازگرن بۆ ناڤ رێزێن تیما خوە دا بۆ یاریێن مایی ژ هەڤڕكیێن خولا ستێرێن ئیراقێ‌، دانۆستاندن هاتبوونە كرن لێ‌ یانەیا شورتە ب هیچ ڕەنگەكی نە دەست بەرداری وی نەبوو، سەرباری بزاڤێن یانەیا دهۆك بۆ ئینانا وی.
ژلایەكێ‌ دووڤە ژبەركو یاریزان ڕێوان ئەمین تووشی هنگاڤتنێ‌ بوویە، ئەڤە بۆ چەند یارییە نە شیاییە پشكداریێ‌ دگەل تیما خوە بكەت، ل دووڤ دەنگۆباسێن هاتینە بەلاڤكرن كو بۆ حەفتییا بهێت ژی ژ گەڕا 13 یا خولا ستێرێن ئیراقێ‌ بەرهەڤ نابیت لێ‌ بۆ گەڕا 14ێ‌ دێ‌ بەرهەڤ بیت.
بۆ زانین ڕێوان ئەمین ل وەرزێ‌ بۆری ب جوانترین شێوە و ئاستەكێ‌ نایاب دگەل یانەیا دهۆك هاتبوو دیتن، هەروەسان دەستپێكا وی دگەل یانەیا هێرنڤین یا هۆلەندی بوو هەروەسان یاریزانێ‌ هەلبژارتیێ‌ هولەندا ل سەر ئاستێ‌ تازەپێگەهشتیان و لاوان بوو، دیسان یاری بوو یانەیێن دالكۆر و ئۆسترسۆند یێن سویدی كریە، ل وەرزێ‌ 2023-2024ێ‌ یاریزانێ‌ یانەیا دهۆكێ‌ بوو
ژلایەكێ‌ دووڤە یانەیا شورتە یا بەغدا ڕاگەهاند بوو ئەو دەستان ژ هەردو یاریزانێن خوە یێن كوردستانی رێوان ئەمین و ئەحمەد زێرۆ بەر نادەن و هەتا وەرزێ‌ ئەڤ سالە ب دووماهی دهێت، د كۆمبوونەكێ‌ دا دێ‌ بڕیارا ئێكلا كەر بۆ هەردو یاریزانان هێتە دەركرن.
یاریزانێ‌ سێیێ‌ و كوڕێ‌ باژێرێ‌ سلێمانیێ‌ هێران ئەحمەد بەری سالا 2024ێ‌ ب دووماهی بهێت داخواز ژ یانەیا خوە كربوو مولەتا سەرێ‌ سالێ‌ پێ‌ بدەن لێ‌ یانەیا جەوییە ب بوهانا ڕاهێنانان و یاریێن مایی ژ خولا ستێرێن ئیراقێ‌ رازی نەبوون، بۆ ئەگەر ژ نشكەكێ‌ ڤە و تۆرەیی هێران ئەحمەد بەغدا بجهـ بهێلیت و بەر وەلاتێ‌ ئۆرۆپا بچیت، ل دەستپێكا سالا نوو 2025ێ‌ و پشتی ڕێكەفتن دناڤبەرا وان دا پەیدابوو دۆبارە هێران ڤەگەریا دناڤ رێزێن تیما جەوییە، دەنگۆباس هوسا دیاركەن كو یانەیا جەوییە دێ‌ ب كۆژمەكێ‌ پارەیی سزادەت.

ستێرێ‌ هۆلەندی و یانەیا مانچستەر یۆنایتد یا ئنگلتەرایێ‌ دۆپاتی ل سەر بۆچوونا خوە كر و زێدەتر گۆمان ل سەر چوونا خوە بۆ یانەكا دی دیاركر، پشتی دووماهی داخویانییا خوە دا ئاماژە پێ‌ دایی كو چ دانۆستاندن بۆ نووكرنا گرێبەستا وی نە هاتینە كرن و دەرگەهێ‌ گرتییە، ئەێ‌ دێ‌ گرێبەستا وی ل هاڤینا ئەڤ سالە ب دووماهی هێت.
زێدەتر فێرگێل ڤان دایك كاپتنێ‌ مانچستەر یۆنایتدێ‌ بۆ تۆمار سكای سپۆرت گۆت: گەلەك پسیار هاتینە كرن ژبۆ ئێكلا كرنا بابەتێ‌ گرێبەستا خوە، لێ‌ چو دەرگەهـ د ڤەكری نینن، پێشوەخت من مەرجێن خوە بۆ یانەیێ‌ دیاركرینە، د نوكە دا بۆ من گرنگە یارییا ئەڤرۆ بەرانبەر توتنهام ژ كۆپا ئنگلتەرا، دێ‌ چاڤەڕێ‌ بەرسڤا یانەیێ‌ بین، بۆ هەر روودانەكێ‌ دێ‌ گۆتنا خوە هەبیت.
ل دۆر دەنگۆیێ‌ بزاڤێن ڕیال مەدرید بۆ گرێبەستەكێ‌ گۆت: یانەیەكا مەزن داخوازا گرێبەستێ‌ ژ من بكەت نیشانا ئاست بلندیێ‌ یە و دێ‌ كەیفخوەشبم ببمە یاریزانێ‌ وێ‌ لێ‌ هێشتا چاڤەڕێ‌ بەرسڤا یانەیا خوە مە.

ئەندامێ‌ دەستەیا كارگێری یا یانەیا بایرن میۆنخ یا ئەلمانی بۆ كارۆبارێن فوتبۆلێ‌ دیار كر دەلیڤە دایە هەردو یاریزانێن خوە جواشۆا كێمتچ و جەمال مۆسیالایی ئەو هزرا خوە بكەن ژبۆ ئێكلاكرنا بابەتێ‌ نووكرنا گێربەستا خوە.
ماكس ئیپرێل بۆ دەزگەهێن ڕاگەهاندنێ‌ گۆت: هەرچەندە هەردو یاریزان دگەل مە ب كەیفخوەشن و چو ئاریشەیێن دارایی و جودا نین نلێ‌ بۆ دۆپاتكرنا هەر كریارەكێ‌ مە دەلیڤە دایە هەردو یاریزانێن خوە كێمێتچ و مۆسیالای ئەو هزرێن خوە بكەن و بڕیارا خوە یا ئێكلا كەر بدەن، بۆ مە هەردو یاریزان هێلا سۆر نینن، هەردەمێ‌ وان بڤێت ڕێكێ‌ لێ ناگرین و دەمەك بۆ وان هاتییە دەستنیشانكرن ئەو بەرسڤا مە بدەن، مانا وان دگەل بایرن میۆنخێ‌ زێدەتر د بەرژوەندیا وان دایە ژ هەر یانەیەكا دی، لێ‌ ئەو دێ‌ د ئازابن ل سەر هەلبژارتنا هەر یانەیەكا بڤێت.