عەلی حاجی:

تیما فوتبۆلا یانه‌یا زاخۆ به‌رده‌وامه‌ ل سه‌ر به‌رهه‌ڤیێن خوه‌ بۆ یارییا بهێت ژ چارچوڤێ هه‌ڤڕكیێن گەڕا ١٣ ژ خولا ستێرێن ئیراقێ ئه‌وا بڕیاره‌ ل چارشه‌مبییا بهێت ببیته‌ مێهڤانا یانه‌یا دیالا ل یاریگەها شەعب یا نێڤده‌وله‌تی ل پایته‌ختێ ئیراقێ به‌غدا و چاڤێ وێ ل سه‌ركه‌فتنێ وپاراستنا رێزێن پێشیێ یه‌.
لدۆر گرنگییا ڤێ یاریێ حەمید ئیسماعیل سه‌رپه‌رشتێ تیما زاخۆ بۆ رۆژنامەیا ئەڤرۆ گۆت: ل دووڤ به‌رنامه‌یێ هاتییه‌ دانان و پشتی راوه‌ستیانا خولێ تیما مه‌ کەمپەکێ ڕاهێنانێ ل وەلاتێ تورکیا دانابوو و پشتی ڤه‌گه‌ڕیایی كه‌فته‌ دناڤ هه‌ڤركیێن خولێ دا و شیا ب ئاسته‌كێ باش سه‌ركه‌فتنێ ل سه‌ر ئه‌لكه‌رخ یا به‌غدایی بینت، ئه‌ڤچه‌نده‌ بوو ئه‌گه‌ر ئه‌م پێشڤه‌ بهێنه‌ ڕێزا سێیێ ل سه‌ر ئاستێ خولێ، له‌وما ژی بۆ یارییا بهێت كادرێ راهێنانێ و كارگێرییا یانه‌یێ هه‌موو بزاڤان دكه‌ن باشترین شێوه‌ تیم یا به‌رهه‌ڤ بیت به‌رانبه‌ر یانه‌یا دیالا ئێك ژ یاریێن گرنگ بوو مه‌.
هه‌روه‌سان ناڤهاتی گۆت: ماوەیەکێ درێژە مە چو یاریێن فەرمی دگەل یانه‌یا دیالا ئەنجام نەداینە و یارییەکا ب زەحمەتە بۆ تیما مە ب تایبەتی ژی یاری ل ژ دەرڤەیی یاریگەها مە دایە لێ ئارمانجا د وێ یاریێ دا سەرکەڤتنە ژبەرکو ئەو تاکە رێکە بشێن زێدەتر خوە نێزیکی سەرێ لیستا خولێ بکەین، تیما مە د قوناغەکا باش دا دەرباز دبیت و مە دڤێت ل سەر هەمان رێک بەردەوام بین و د ڤی وەرزی دا مە ئارمانجێن باش هەنە.
حه‌مید ئیسماعیلی ئه‌وچه‌نده‌ ژی نه‌ ڤه‌شارت كو ب چاڤەکێ مەزن سەحدکنە یاریا بەرامبەر دیالا و گۆت: نابیت ب چاڤەکێ کێم سەحکەینە ڤێ یاریێ و دێ ژ یاریێن ب زەحمەت ژی بیت بۆ تیما مە لێ مە باوەرییەکا مەزن ژی ب تیما خوە هەیە کو دێ شێن ئاست و ئەنجامەکێ باش ب دەست خوەڤەبینن، هه‌ر یارییه‌كا دكه‌ین بۆ مه‌ گرنگه‌ و بزاڤێن پاراستنا ڕێزبه‌ندییا خوه‌ دكه‌ین.
بۆ زانین تیما یانه‌یا زاخۆ ب كۆمكرنا 22 خالان رێزا سێیێ دهێت ب شه‌ش سه‌ركه‌فتن، چار وه‌كهه‌ڤی و دو خوساره‌تی هه‌نه‌ و شه‌ش یاریزانان پشكداری د 18 گۆلێن تیمێ دا كرینه‌ ئه‌وژی، ئه‌مجه‌د عتوان حه‌فت گۆل، كۆستاڤۆ هێنریك پێنج گۆل، ناسر محه‌مه‌دو سێ گۆل، هه‌ر ئێك ژ ئه‌یوب نناحی، موسێس، مه‌حمود فائیز ئه‌لئه‌سوه‌د گۆله‌ك تۆماركریه‌.

شاهۆ فەرید:

تیما فوتبۆلا یانەیا دهۆك ئەوا پشكدار دخولا ستێرێن ئیراقی دا ل بن ژیێ 21 سالیێ دا ئەنجامێن وێ د لاوازن و نە د چاڤەڕێ‌ كرینە، بوویە ئەگەر پشتەڤانێن یانەیێ‌ پسیار بكەن، رۆژنامەیا ئەڤرۆ داخویانیەك ژ راهێنەرێ تیمێ نێچیرڤان شوكری وەرگرتییە ئەوێ‌ بڤێ شێوەیی دیاردكەت.
ناڤبری گۆت: خولا ستێرێن ئیراقێ‌ ل بن ژیێ‌ 21 سالی دا ب سیستەم و شێوازێ‌ خوەڤە یا نوو یە بۆ مە وەكو راهێنەر و یاریزانان، ئێك ژ ئەگەرێن ئاستێ‌ لاواز رێژەیا یاریزانێن مە دكێمن كو دگەل گۆلپارێزان دبنە شازدە یاریزان ئەڤێ كارتێكرن ل سەر مە هەیە، لێ ئاستەكێ باش پێشكێش دكەین، یاریێن تێدا خوسارت بووین ئەم وەكو ئاست ژ هەژی نە بووینە لێ شارەزاهییا یاریزانان ژی كارتێكرن هەیە، جێوازیەكا مەزن د ناڤبەرا مە و تیمێن دی دا هەیە و ئەم ژ وان باشترین، بۆ قوناغا دویێ دێ كێماسێن خوە چارەسەركەین، ژێ پتری هەشت یاریزانێن مە د بچووكن و نەشێن پشكداریێ بكەن، یانەیێن دی یاریزانێن پێشەكار و خودان سەربوور هەنە لێ یێن مە هەموو ناڤخوەیی نە، ژیێ یاریزانێن مە دەرفەتێ دەتێ دو وەرزێن دی د خولێ دا پشكداربن.
هەروەسان نێچیرڤان شوكری گۆت: ئەم بێ هیڤی نەبووینە لێ تیم پێدڤی پالپشتیا دارایی و جەماوەری هەیە، دێ هەڤڕكیێ كەین بۆ دەستڤەئینانا پلێتا دەربازبوونێ، قوناغا دویێ ب هێز دێ ڤەگەڕین، هەولدەین دو یاریزانێن هەلبژارتیێ دهۆكێ بینە د ناڤ رێزێن تیمێ دا ئەگەر رازیبوون دێ كێماسیێن مە چارەسەربن و رێزێن مە ب هێز كەڤن لێ وەسا بمە هاتیە گوتن ئەوان دەم نینە، دادڤانی ژی كارتێكرنا خوە لسەر مە هەیە ژ سەرجەمێ شەش یاریا دادڤانەك سێ یارییا بوویە داڤانی مە دناڤ ئەردێ مە دا و پتری دوازدە كارتێن زەر داینە یاریزانێن مە.

د دیدارەكا كورت دا سەرمەد رافع یاریزانێ‌ یارییا ڤۆلیبۆلێ‌ ل پارێزگەها دهۆكێ‌ گازندە ل سەر یانەیێن وەرزشی یێن پارێزگەهێ‌ كرییە كو چو یانە پشتەڤانییا وان ناكەن بتنێ‌ بۆ قارەمانییان چەند رۆژەكا و دووڤدا پشتگۆهـ هاڤێژن و ئەڤچەندە بوویە ئەگەر ئەڤ یارییە پێش ناكەڤیت و داخوازێ‌ ژ جهێن پەیوەندیدار دكەت پشتەڤانییا گەنجێن كوڕ و كچ یێن ڤێ‌ یاریێ‌ بكەن.
زێدەتر ناڤهاتی بۆ رۆژنامەیا ئەڤرۆ گۆت: ئەم نزانین بۆچی یانەیێن پارێزگەهێ‌ د بێدەنگن بتنێ‌ دەمێ‌ قارەمانیەك دهێتە كرن دێ‌ ژ نوو تلەفۆنێن مە كەن، لڤێرە ئاریشە پەیدا دبیت تایبەت لایەنێ‌ چەستەیی، ژبەركو نە بەرعاقلە كێمتر ژ حەفتیەكێ‌ بەرهەڤی بۆ قارەمانیەكێ‌ بكەین و ئێكسەر پشكداری قارەمانیێ‌ بین و بشێن رێزێن پێشیێ‌ بینن، بەرۆڤاژی یانەیێن هەولێر و سلێمانیێ‌ بەرنامە و پلانێن ڕاهێنانێ‌ هەنە نا هێلین ئەڤ یارییە ب كەڤیت یان لاواز بیت، د بەرانبەر دا هەموو یانەیێن مە هزرا وان ب تنێ‌ فوتبۆلە و یارییا ڤۆلیبۆلێ‌ پشتگۆهـ هاڤێژتیە، هەكە گرێبەستا ئێك یاریزانێ‌ فوتبۆلێ‌ بۆ ڤۆلیبۆلێ‌ بهێتە بەرهەڤكرن دێ‌ تیمەكێ‌ بهێزترین شێوە ئاڤابیت.
هەروەسان سەرمەد رافع گۆت: د دەمەكی دا پشت گەرمییا مە ب یانەیا گارە بوو و دەرگەهێ‌ خوە بۆ ڤی یاریێ‌ ڤەكر لێ‌ پشتی قارەمانی ب دووماهی هاتی ئەم ڤەگەڕاندینە خالا دەستپێكی ئانكو هەر وەكو چ ڤۆلیبۆل نە بوویە، سەرباری هەبوونا زێدەتری 20 یاریزانێن خودان شیان یێن ڤێ‌ یاریێ‌ ل باژێرێ‌ دهۆكێ‌ ژبلی باژێرێن دی یێن پارێزگەهێ‌، سەرباری نەبوونا پشتەڤانیێ‌ ئەم نەچارین ئەڤ یاریزانە هندەك جاران خرڤەبین بێ‌ یانە و پشتەڤانی، بۆ زانین چەندی یاریزان هەنە ل كۆلیژی و پەیمانگەهێن وەرزشی نە و شیانێن باش هەنە.
ل دووماهیێ‌ ناڤهاتی گۆت: سەرباری بزاڤێن مە كو ئێك پشتەڤانیا مە بكەت لێ‌ كەس خوە ل مە ناكەتە خودان، ژبلی یاریزانێن كور یێن كچ ژی یێن هەین، ئەم نزانین پەیاما خوە بگەهینە كیش لایەنی، ئەم نڤشەكێ‌ گەنجین و خودان شیانین ، لژنەیا ئۆلمپی و یانەیێن وەرزشی ل سەر وان پێدڤییە پشتەڤانییا مە بكەن و ڕێكێ‌ بۆ مە ڤەكەن، هەرچەندە یانەیێن دەرڤەیێ پارێزگەهێ‌ هندەك جاران داخوازیا چەند یاریزانان كرینە لێ‌ ژبەر كاودانێن تایبەت نە شیاینە و ئەم هەموو گەنجین.

پەیچێ‌ Pravda یێ‌ ئۆكرانی ئەو خەلاتێ‌ بۆ ستێرێ‌ ئوكرانی و قارەمانێ‌ جیهانی یێ‌ بۆكسانێ‌ ئەلیكسەندەر ئۆسێك د ئێك یاری دا هاتییە گەهشتییە104.5 ملیۆن دۆلار، پشتی شیایی د یارییا خوە یا بەری حەفتیەكێ‌ سەركەفتن ل سەر هەڤڕكێ‌ خوە یێ‌ بریتانی تایسۆن ڤیۆری بینت ئەوێ‌ ب 84.5 ملیۆن دۆلاران هاتیە خەلاتكرن.
ل دووڤ پەیجێ‌ ناڤهاتی پشتی ب سەركەفتنا بۆكسڤانێ‌ ئۆكرانی ئەلیكسەندەر ئۆسێك ل سەر یێ‌ بریتانی تایسۆن ڤیۆری ب 116- 112 خالان سەرجەمێ‌ 189 ملیۆن بۆ هەردو یاریزانان هاتبوونە كۆمڤەكرن ئەو ژی ژ داهاتێ‌ ئەوان كەنالێن پشكداری د ڤەگۆهاستنا یاریێ‌ دا كرین و ئەو كەسێن ل یاریگەهێ‌ بەرهەڤبووین دگەل سەرئێك زێدەكرنا پارەیی ژ ئەنجامێ‌ یاریێ‌.
هەروەسان دیاركر پترییا داهاتی ژ كەسێن دەولەمەند، خودان كۆمپانیێن ڕاگەهاندنێ‌ وەكو سكای سپۆرت Sky Sports Box Office ، بی ئێن بۆكس ئۆفیس beIN BOXOFFICE3، دازن پی, پی، ڤی DAZN PPV و تی ئێن تی سپۆرت بۆكس ئۆڤیس TNT Sports Box Officeبوون ئەوێن پشكداری د كۆمڤەكرنێ‌ دا كری.

ڕاپۆرتێن رۆژنامەڤانی ئاماژە دایە ب هەبوونا سێ‌ بژاردەیێن ستێرێ‌ پۆرتۆگالی و یانەیا نەسر یا سعۆدیێ‌ كرێستیانۆ رۆنالدۆ ژبۆ نووكرن یان ژی چوونا وی بۆ یانەیەكا دی د ڤەگۆهاستنێن هاڤینا بهێت دا ئەوا بڕیارە گرێبەستا وی د خزیرانا ئەڤ سالە دا ب دووماهی بهێت.
ل دووڤ پەیچێ‌ teamtalk یێ‌ بریتانی كرێستیانۆ رۆنالدۆی سێ‌ بژارە هەنە ژبۆ ئێكلاكرنا مان یا چوونا خوە ژ یانەیا نەسر یا سعۆدیێ‌، هەرچەندە یانەیا نەسر حەزەكا مەزن هەیە گرێبەستا وی بهێتە نوو كرن لێ‌ رۆنالدۆیی ئێك مەرج هەیە ژبۆ نووكرنێ‌ ئەو ژی دڤێت چار باشترین یاریزانێن دی بۆ ناڤ رێزێن تیما خوە زێدە بكەن و دبیت ئەڤ مەرجە ب سانەهی بیت لێ‌ د بەرانبەر دا ئەو یاریزانێن دئینن ل سەر ڕازیبوونا رۆنالدۆیی بن.
هەروەسان دیاركر هەكە ئەڤ بژاردە بجهـ نەهات یانەیا سپۆرتینگ لەشبۆنە یا پۆرتۆگالی هەموو بەرهەڤی كرینە بۆ ڤەگۆهاستنا وی ئەوێ‌ ئەڤ بژاردە ب دوور نە دانایە، لێ‌ بژاردەیا سێیێ‌ دوور نینە رۆنالدۆ بڕیارا ب دووماهی ئینانا كاروانێ‌ خوە یێ‌ وەرزشی بكەت، رۆژانێن بهێت دێ‌ ئەڤ بابەتە هێتە ئێكلاكرن.