چاڤەڕێ دهێتە كرن ئەڤرۆ و سوبەهی حەفت یاریێن گەڕا 10ێ ژ خولا پلا نایابا كوردستانێ یا فوتبۆلێ بهێنە ئەنجامدان، هەردو نوونەرێن پارێزگەها دهۆكێ یانەیا ئاكرێ و زاخۆ یا ئیدارا سەربەخوەیا زاخۆ بەرانبەر هەڤڕكێن دژوار یێن نوونەرێن پارێزگەها سلێمانیێ بن ئەوا بڕیارە هەموو یاری ل دەمژمێر دو یێ پشتی نیڤرۆ بهێنە ئەنجامدان و یانەیا هەولێر د ڤێ گەڕێ دا یا چاڤەڕێ كر بیت.
ئاكرێ دێ بزاڤێن ڕاوەستاندنا خودانا سەرێ لیستێ كەت
بڕیارە سوبەهی چارشەمبی تیما یانەیا ئاكرێ ل باژێرێ كەلار ببیتە مێڤانا یانەیا شێروانە كو دهێتە هژمارتن یارییەكا گەلەك گرنگ بۆ هەردو تیمان تایبەت یانەیا ئاكرێ قارەمانا وەرزێ بۆری ئەوا ب تنێ هزر بۆ سەركەفتنێ دكەت پێخەمەت هێدی پێشڤە بهێتە سەرێ لیستا خولێ ئەوا د نوكە دا ژ سەرجەمێ 10 یارییان بتنێ حەفت یاری كرینە، چار سەركەفتن، ئێك وەكهەڤی و دو خوسارەتی هەنە و 13 خال كۆمكرینە ل رێزا پێنجێ دهێت، د بەرانبەر دا یانەیا شێروانە سەرێ لیستێ دهێت ب 19 خالان، سرۆشتییە تیما كەلارێ شەری بۆ سێ خالان بكەت پێخەمەت پاراستنا رێزبەندییا خوە.
زاخۆ هیڤیێن خوە ژ دەست نەداینە و دێ بۆ سێ خالان یاریێ كەت
ژلایێ خوە تیما یانەیا زاخۆ هەر سوبەهی دێ ل یاریگەها خوە و دناڤ ئەرد و جەماوەرێ خوە دا مێڤاندارییا یانەیا دەربەندیخان كەت ئەوا ژ پارێزگەها سلێمانیێ هاتی، كوڕێن خابووری هێشتا هیڤیێن خوە ژ دەست نەداینە بۆ رێزێن پێشیێ و سەرێ لیستێ ئەوا ژ چار سەركەفتن، سێ وەكهەڤی و دو خوسارەتی هەین ل رێزا سێیێ دهێت ب كۆمكرنا 15 خالان، لێ یانەیا دەربەندیخان ژی هەڤڕكەكا ب سانەهی نابیت ئەوا 11 خال كۆمكرین ل رێزا نەهێ دهێت.
ژ یاریێن دی یێن گەڕا دەهێ ، ئەڤرۆ سێ شەمبی رزگاری- ڕانیە، هندرین- شەقلاوە، پیشەسازی- سەیدسادق، یاریێن سوبەهی، برایەتی- سیروانی نوو، پێشمەرگەیا هەولێر- چوارقۆرنە.
لیستا گشتی یا خولێ بڤی ڕەنگی یە.
1- شێروانە 19 خال.
2- پێشمەرگەیا هەولێر 18 خال.
3- زاخۆ 15 خال.
4- پبیشەسازی 14 خال ژ هەشت یارییان.
5- ئاكرێ 13 خال ژ حەفت یارییان.
6- ڕزگاری 13 خال ژهەشت یارییان.
7- سیروانی نوو 12 خال ژهەشت یارییان.
8- برایەتی 12 خال.
9- دەربەندیخان 11 خال.
10- هەولێر 10 خال ژ هەشت یارییان.
11- شەقلاوە نەهـ خال ژهەشت یارییان.
12- ڕانیە نەهـ خال ژ هەشت یارییان.
13- چوارقۆرنە چار خال ژ هەشت یارییان.
14- هندرین چار خال ژ هەشت یارییان.
15- سەیدسادق سێ خال ژ هەشت یارییان.
نوونەرێن پارێزگەهێ بەرانبەر هەڤڕكێن دژوار
نيشاندان