NO IORG
Authors Posts by naci bedel

naci bedel

15011 POSTS 0 COMMENTS

10

ئاكرێ‌، رەمەزان زەكەریا:

‎بۆ تەمامكرنا پڕۆژەیێ سترتیژیێ ئاڤا ئاكرێ، نوكە ل سێ جهان كار ل سەر پڕۆژەی دهێتە كرن، بۆ راكێشانا ئاڤێ ژ زێیێ مەزن بۆ ناڤ سەنتەرێ ئاكرێ.
‎ئەندازیار زرار ئەحمەد، رێڤەبەرێ ئاڤا ئاكرێ بۆ ئەڤرۆ گۆت: «كار ل سەر پڕۆژەیێ ستراتیژی یێ ئاڤا ئاكرێ دهێتە كرن ب رەنگەكێ باشتر و بلەزتر، ب تایبەت پشتی هاتنا مەسرور بارزانی، سەرۆكێ حكومەتا هەرێما كوردستانێ بۆ ئاكرێ، كار ل سەر پڕۆژەی ب شێوەیەكێ باشتر و بلەزتر دهێتە كرن».
گۆتژی: «نوكە كار ل سەر سێ جهێن پڕۆژەی دهێتە كرن، بۆ راكێشانا ئاڤێ ژ زێیێ مەزن بۆ ناڤ سەنتەرێ ئاكرێ، ئەڤ پڕۆژە ب گوژمێ 109 ملیار دیناران و ل سەر بودجا حكومەتا هەرێما كورستانێ دهێتە بجهئینان».

11

سیاسەتمەدارەکێ رۆژئاڤایێ کوردستانێ دیار دکەت، د ڤێ قۆناغێ دا گەلەک یا گرنگە هێزێن کوردی ل سووریێ و رۆژئاڤایێ کوردستانێ پێکڤە کار بکەن و سەرۆک بارزانی دەمەکە کار بۆ ئێکەتیا هەموو هێز و ئالیێن سیاسی یێن رۆژئاڤایێ کوردستانێ دکەت.

نوری بریمو سیاسەتمەدار و ئەندامێ سەرکردایەتیا پارتی دیموکراتی کوردستان سووریێ ل دۆر رەوشا نوکە یا رۆژئاڤایێ کوردستانێ و سووریێ بۆ ئەڤرۆ دیار کر، روودانێن مەزن ل سووریێ روودان ب رەنگەکی کو کەلها ٦١ سالییا رژێما بەعس ل سووریێ هاتە هەرفاندن، لێ هێشتا ژی دەستێن هێزێن هەرێمی ل سووریێ هەنە و دەستێوەردانێ د کاروبارێن سووریێ دا دکەن و هەتا ڤێ گاڤێ ژی نێرینا دەستهەلاتا نوو یا سووریێ یا ئاشکرا نینە و گۆت: ( بەلێ بەحسێ رێزگرتن و مافێن مرۆڤی دکەن هەر چەوا بیت دێ ژ رژێما بەعس یا کو ئینکارا هەبوونا کوردان و کوردایەتیێ دکر باشتر بیت ژ بەر کو رژێما بۆری گەلەک ستەم و زۆرداری ل گەلێ کورد دکر).
سەبارەت ب ئێکەتیا د ناڤبەرا هێزێن کوردی دا بریمۆی دیار کر ژ رۆژا دامەزراندنا پارتیا دیموکراتا کوردستان/ سووریێ وان رێبازا پیرۆز یا بارزانی کرینە رێک و ئارمانج و هەردەم ل گەل ئێکگرتن و ئێک هەلوەستیێ دا بووینە د ناڤبەرا کوردان دا و ئەم ل وێ باوەرێی نە دەمێ کورد ئێکگرتی بن دێ گەهنە مافێن خوە و گۆت: (مە گەلەک بزاف کرن کو د ئەنجوومەنێ نشتیمانی یێ کوردی ل سووریێ دا هەمی ئالیێن سیاسی هەبن، بەلێ پەیەدە نەهاتە د ناڤ ڤێ جڤاتێ دا و مە چەندین کۆمبوون ل هەولێر و دهۆکێ ژی ل گەل وان کر لێ مخابن دەست ژ هەلوەستێ خوە یێ شاش بەرنەدان).
ناڤهاتی سەبارەت ب پاشەروژا رۆژئاڤایێ کوردستانێ ژی دیارکر کو گرنگە مفا ژ ئەزموونا هەرێما کوردستانێ ل گەل بەغدا بهێتە وەرگرتن کو پێدڤیە پێکڤە بین، لەوما گرنگە دانوستاندن ل سەر بابەتان بهێنە کرن نەک شەر و پەڤچوون و گۆت: (مە گەلەک جاران داخواز ژ پەیەدێ کریە کو خوە ژ پەکەکێ‌ دوور بکەت و بهێتە د ناڤ ئەنجوومەنێ نشتیمانی یێ کوردی ل سووریی دا، لێ مخابن هەتا نها وان تشتەک وەسا نەکرینە و ئەو یەک ژی نها بوویە ئاریشەکا گەلەک مەزن ل هەمبەر ئێکەتیا هێزێن کوردی ل سووریێ و رۆژئاڤایێ کوردستانێ).
ل دۆر رۆلێ سەرۆک بارزانی ل رۆژئاڤایێ کوردستانێ و سووریێ ژی نوری بریمو دیار کر، رۆلێ سەرۆک بارزانی ب بلند و گرنگ دهێتە نڕخاندن بۆ ئێکەتیا کوردان و هەڤکاریکرنا خەلکێ رۆژئاڤایێ کوردستانێ و ئازادیا کۆبانێ کو ژ ئەنجامێ سیاسەتا حەکیمانە یا سەرۆک بارزانی بوو، سەرۆک بارزانی د هەموو کۆمبوونێن ل گەل ئالیێن سیاسی ل رۆژئاڤایێ کوردستانێ بەردەوام داخوازا ئێکگرتن و ئێک هەلوەستیا هێزێن کوردی کریە.

10

سەرۆک وەزیرێن بەرێ یێ تورکیا دیار دکەت، هەکە تورکیا بڤێت بهێز کەڤیت و ببیتە وەلاتەکێ هەری کاریگەر ل دەڤەرێ نابیت دوژمناتیا کوردان ل سووریێ بکەت و هەکە هەرێمەک بۆ کوردان ل سووریێ هاتە ئاڤاکرن دڤێت تورکیا ژ ڤێ یەکێ دلگران نەبیت.
ئەحمەد داوود ئۆغلۆ سەرۆک وەزیرێن بەرێ یێ تورکیا و سەرۆکێ پارتا پاشەرۆژێ د داخۆیانیەکێ دا بۆ دەزگەهێن راگەهاندنا تورکیا دیار کر، ل سووریێ قۆناغەکا نوو هاتیە پێش، لێ مخابن هەلوەستێ نها یێ دەستهەلاتێ ل هەمبەر کوردان ل سووریێ گەلەک شاشە و گۆت: (دڤێت تورکیا هەلوەستێ خوە ل هەمبەر کوردان ل سووریێ بگوهۆڕیت، نابیت تورکیا دوژمناتیا کوردێن سووریێ بکەت، کورد ل سووریێ ب سالانە ل سەر ئاخا خوە دژین، هەموو کوردێن ل سووریێ ژی سەر ب پەکەکێ و یەپەگێ نینن، نابیت تورکیا وەسا بەرێ خوە بدەتە کوردان، بەلکو دڤێت تورکیا بزاڤا ڤێ یەکێ بکەت پەیوەندیێن خوە ل گەل کوردێن سووریێ باش بکەت، هەکە تورکیا بڤێت ببیتە وەلاتەک بهێز و گرنگ ل دەڤەرێ دڤێت دەستێ براتیێ درێژی کوردێن سووریێ بکەت).
ناڤهاتی ئەو یەک ژی دیار کر، د سەردەمێ دەستهەلاتا ئەسەدی دا هەری زێدە زۆرداری ل کوردان هاتیە کرن، دڤێت کورد ژی وەکو هەموو نەتەوەیێن دی یێن ل سووریێ بگەهنە مافێن خوە، دڤێت د سیستەمێ نوو یێ سووریێ دا کورد ژی جهێ خوە بگرن، نابیت کورد دەرڤەیی سیستەمێ نوو یێ سووریێ بمینن و گۆت: (دڤێت سیاسەتا تورکیا ژی ل سەر بنەمایەکێ دروست بیت، نابیت دەستهەلاتا نها کوردێن سووریێ وەکو دوژمنێن تورکیا ببینیت، ئەو یەک سیاسەتەک گەلەک شاشە و دێ زیانێن خوە یێن مەزن بۆ تورکیا هەبیت).
سەبارەت ب ئەگەرێ ئاڤابوونا هەرێمەکێ بۆ کوردان ل سووریێ ژی سەرۆک وەزیرێن بەرێ یێ تورکیا دیار کر، دڤێت تورکیا خوە بۆ هەر پێشهاتەکێ بەرهەڤ بکەت، ئاڤابوونا هەرێمەکا کوردی ل سووریێ نابیت ببیتە ئەگەرێ دلگرانیا تورکیا یان ژی ئالۆزیێن مەزن، چونکی کوردێن سووریێ وەکو ئێک ژ پێکهاتەیێن سەرەکی ل وی وەلاتی مافێ هەی بریارا خوە بدەن و دڤێت ئەو یەک ب رێیا شامێ بهێتە چارەسەرکرن و گۆت: (دڤێت کوردێن سووریێ ب رێیا شامێ بریارێ ل دۆر پاشەرۆژا خوە بدەن، هەر بریارەک ژی کورد و شام بدەن دڤێت تورکیا رێزێ لێ بگریت، نابیت تورکیا ب رەنگەکێ دی سەرەدەریێ بکەت، ب تایبەتی ژی د دەمەکێ وەسا هەستیار دا نابیت تورکیا سیاسەتەکا مەزهەبی برێڤە ببەت، ئەو یەک دێ ئەنجامێن خوە یێن گەلەک خراب بۆ تورکیا هەبن).
ئەحمە داوود ئۆغلۆ د دووماهیا ئاخڤتنا خوە دا سەبارەت ب پاشەرۆژا سووریێ ژی دیار کر، ئەمریکا، ئسرائیل و وەلاتێن ئێکەتیا ئۆرۆپا دخوازن سووریایەک نوو بهێتە ئاڤاکرن، بێگومان کاریگەریا ئەمریکا و ئسرائیلێ ل سەر سووریێ کەس نەشێت ئینکار بکەت، راستە نها تورکیا وەسا دبینیت کو وێ هەری زێدە کاریگەری ل سەر سووریا نوو هەیە، لێ تورکیا بێی رازیبوونا ئەمریکا، ئێکەتیا ئۆرۆپا، ئسرائیل و وەلاتێن عەرەبی نەشێت چو بریاران بدەت و گۆت: (ئەز باوەر ناکەم دەستهەلاتا نوو یا سووریێ ژی هەموو داخوازیێن تورکیا قەبوول بکەت، چونکی ئەو دێ بریارا خوە دەن و دڤێت تورکیا ژی رێزێ ل بریارا وان بگریت).

19

هەولێر، قائید میرۆ

سەرۆك بارزانی، پەیامەك ئاراستەی فەستیڤال دویێ یا رامان كر كو ژ ئالیێ مەحموود محەمەد نوونەرێ سەرۆك بارزانی بۆ فیستەڤالێ هاتە خواندن.
سەرۆك بارزانی، د پەیاما خوە دا بۆ فیستەڤالێ دبێژیت» ب بزاڤێن هەژمارەكا رەوشنبیر و نڤیسەرێن گەلێ مە یێن كو خەمێ ژ كەلتوور و ئەدەبیاتا كوردی دخۆن د كاودانێن گەلەك دژوار دا ئێكەم هژمارا كۆڤارا رامان هاتە بەلاڤكرن، ب درێژاهییا وان سالێن رامان تێدا هاتیە بەلاڤكرن، بزاڤ هاتینەكرن رامان كۆڤارا هەموویان بیت و سنوران دەرباز بكەت و بەرهەمێ هەموویان بێی جوداهی بەلاڤ بكەت، سەكۆیەكا ئازادبیت ژبۆ نڤیسەران هەتا بشێن بەرهەمێن خوە بگەهینن خوینەران و خزمەتا رەوشنبیرێن گەلێ خوە بكەن».
فەستیڤال دویێ یا رامان ل بن ناڤێ (كلتوور و ئەدەبیات، نوكە داهاتی) ب بەرهەڤبوونا مەحموود محەمەد، نوونەرێ سەرۆك بارزانی و هەژمارەكا ئەندامێن مەكتەبا سیاسییا پارتی و د. سالار عوسمان ئەندامێ كۆمیتەیا ناڤەندی و بەرپرسێ پشكا رەوشەنبیری و راگەهاندنێ وهەژمارەكا بەرپرس و رەوشنبیر و نڤیسەران هاتە ئەنجامدان.
ل دەستپێكا فیستەڤالێ ئازاد عەبدولواحد، سەرپەرشتیارێ فیستەڤالێ پەیڤا ب خێرهاتنێ پێشكێش كر و د دووڤدا پەیڤەك ژئالیێ د. سالار عوسمان، ئەندامێ كۆمیتەیا ناڤەندی و بەرپرسێ پشكا رەوشنبیری و راگەهاندنا پارتی هاتە خواندن و تێدا ئاماژەكر، ژ بەر كو كۆڤارا رامان ئەڤە 28 سالە كاروانێ پەیڤ و رستە و دەق و پەرەگراف و هۆزان و تورە و ڤەكۆلین و هزرێن كوردی یا بەردەوامە و ئەڤرۆ فەستیڤال دویێ یا رامان ب ڕێڤەدچیت.
ئومێد خۆشناو پارێزگارێ هەولێرێ د رۆژا ئێكێ فەستیڤال رامان دیاركر» پیرۆزباهی ئاراستەی سەرنڤیسەر و دەستەكا نڤیسەرێن گۆڤارا رامان كر هەمبەر ئەڤێ خزمەتا ب رێیا گۆڤارا رامان دهێتە پێشكەش كرن، كو شیاینە ب درێژاهیا سالێن دەرچوونا گۆڤارا رامان خزمەتەكا هەژی د بیاڤێ رەوشنبیری و تورەیا كوردی پێشكەش بكەت و رۆلەكێ بەرچاف هەبوویە د پێشڤەبرنا بزاڤا ئەدەبی و هزری دا.
هەر د چوارچوڤەیێ فەستیڤال راماندا دیكۆمێنتارییەك ل دۆر كەلتوور و ئەدەبییاتا كوردی ل سەردەمێ تەكنەلۆژیایێ هاتە نیشادان و ددووڤدا پیشەنگەهەكا فۆتۆگرافەری ب ناڤێ كوردستانا من ژ بەرهەڤكرنا چاوان بەختیار هاتە ڤەكرن، هەروەسا رێز ل زانایێ بیاڤێ دیرۆك و شوونواران عەبدولڕەقیب یوسف هاتە گرتن.
ئێك ژ بڕگەهێن فیستەڤالێ یا تایبەت بوو ب هۆزانێ كو ئالیێ هەژمارەكا هۆزانڤانێن كورد و عەرەب و فارس و تورك هۆزان هاتنە خواندن، هەروەسا هەژمارەكا پەنەلان هاتبوونە بەرهەڤكرن پەنەلێ ئێكێ یێ تایبەت بوو ب كەلتوور و ئاشتییا جڤاكی ژلایێ شنۆ ئەحمەد غەفوور هاتە پێشكەش كرن و سەعید جردۆ سەرۆكێ بنگەهێ لالش یێ رەوشنبیری و جڤاكی باسێ رۆلێ ئەدەبێ كوردی د پێشڤەچوونا جڤاكی دا ژئالیێ هزری و سیاسی ڤە كر، هەیاس كاكەیی ژی باسێ پێكڤە ژیانێ و لێبۆرینی كر وەك ئەركەكێ نیشتیمانی، د پەنەلێ دویێ یێ فەستیڤال رامان دا لبن ناڤێ كەلتوور و زیرەكییا دەستكرد بوو و تێدا د. بەیان عەزیزی باسێ تەكنەلۆژیا سەردەم و چارەنڤیسێ دەقا ئەدەبی و مافێ نڤیسەری هەمبەر ژیرییا دەستكرد كر، هەروەسا د. ئیبراهیم حەمەڕەش باسێ نڤیسینا دەقێ كر ل سەر دەمێ ژیرییا دەستكرد، چەندین شارەزا و بسپۆرێن دی ژی پشكداری پەنەلێ رامان بوون.
ل رۆژا دویێ یا فەستیڤال رامان چەندین بابەت هاتنە پێشكێش كرن و د دووڤدا راسپاردەیێن فەستیڤال دویێ هاتنە بەلاڤكرن.
كۆڤارا رامان مەهانە دەردكەڤیت و ئێكەم هەژمار ل سالا 1996ێ هاتیە بەلاڤكرن و نڤیسەرێن كورد ب رێكا بەرهەمێ خوە شیاینە خزمەتا بیاڤێ ئەدەب و رەوشنبیریا كوردی بكەن.

24

زاخۆ، دلۆڤان هالۆ:

بەرپرسێ سەنتەرێ جڤاكی یێ خێزانێ و پاراستنا زاڕۆكان ل زاخۆ د دیدارەكێ دا بۆ ڕۆژناما ئەڤرۆ دیار كر كو پێدڤییە پشتەڤانیا دەروونی و جڤاكی ژلایێ خێزانێ و قوتابخانێ و سەنتەر و ڕێكخراوان ل زاڕۆكی بهێتە كرن و گۆت: ئەڤجا چ ئەڤ پشتەڤانیە ب شێوەیێ تاكەكەسی یان ژی ب گڕۆپ بیت.

محەمەد سالح، ڤەكۆلەرێ دەروونی و بەرپڕسێ سەنتەرێ جڤاكی یێ خێزانێ و پاراستنا زاڕۆكان گۆت: (ب دیتنا من پشتەڤانیا ب شێوەیێ گڕۆپ ڕەنگڤەدانەكا ئەرێنی یا باشتر ل سەر زاڕۆكی هەیە، وەكو ڕوونشتنێن دەروونی و چالاكیێن جڤاكی، چونكی د ڤان گڕۆپان دا ڕاهێنانێن زیندی یێن گەلەك باش یێن هەین كو ڕەنگڤەدانێ ژ ڕەفتار و ژیانا زاڕۆكی یا ڕۆژانە دكەن و كاریگەریێ ل دەروون و پەروەردەیا زاڕۆكی دكەن).
ڤەكۆلەرێ دەروونی ئاماژە ب وێ چەندێ ژی كر كو زاڕۆك ل پێنج سالێن دەستپێكا ژیێ خۆ ئامادەیە بۆ ئاڤاكرنا كەسایەتیا خۆ، لەوما هەكە خێزان د ڤی ژیێ زاڕۆكی دا پشتەڤانیەكا دەروونی و جڤاكی یا بهێز ل زاڕۆكی بكەت و ب پەروەردەیەكا درست و جوان مەزن بكەت و هەست و سۆزێن وی ل بەرچاڤ وەرگرن و ڕێز ل هزر و بۆچوون و بڕیار و هەلبژارتنێن وی بهێنە گرتن، ل پاشەڕۆژێ دێ بیتە خودان كەسایەتیەكا بهێز دناڤ خێزانێ و ل قوتابخانێ و ل گەل هەڤالان و د جڤاكی دا.
محەمەد سالح دیار كر ژی كو بەرۆڤاژی ڤێ چەندێ هەكە خێزان ب تایبەت كەسێن ئێكێ یێن خێزانێ وەكو دایك و باب زاڕۆكی ب پەروەردەیەكا شاش خودان بكەن و سەرەدەریەكا نە جوان و دكتاتۆرانە ل گەل زاڕۆكی بكەن وەكو وان دڤێت زاڕۆك بتنێ گۆهداریا وان بكەن و ل دووڤ حەز و خواستا وان بیت و بۆچوونا خۆ یا كەسایەتی نەبیت و حەز بكەن زاڕۆكی وەكو خۆ و ژیانا خۆ پەروەردە بكەن، بێگۆمان دێ ڤی زاڕۆكی كەسایەتیەكا لاواز هەبیت و گۆت: (دوور نینە ل پاشەڕۆژێ ئەڤ زاڕۆكە تۆلڤەكرنێ لگەل خێزانێ و جڤاكی بكاربینیت و خۆ دووری جڤاكی بكەت، لەوما پەروەردەیا زاڕۆكی زەحمەتترین تشتە، دڤێت خێزان گەلەك قۆربانیان بۆ پەروەردەكرنا زاڕۆكێن خۆ بدەن).
بەرپڕسێ سەنتەرێ جڤاكی ئەو چەندە ژی دیار كر، پشتەڤانیا دەروونی یا درست ئەوە دایك و باب وەكو دیتنا زاڕۆكی ڕەفتارێ ل گەل بكەن و هەكە زاڕۆكی هندەك ڕەفتارێن شاش ئەنجامدان، وان ڕەفتارێن وی ڕاستڤەكەن نەك زاڕۆكی سزا بدەن و گۆت: (لەوما نابیت دایك و باب وەكو دیتنا خۆ ڕەفتارێ لگەل زاڕۆكی بكەن كا ئەو چ هزر دكەن و چاوا ڕەفتاران دكەن زاڕۆكی بكەنە كۆپیا خۆ).
ڤەكۆلەرێ دەروونی دیار كر كو ل قۆتابخانێ ژی دڤێت مامۆستایان هشیاری و ڕەوشەنبیریا لایەنێن دەروونی و جڤاكی و پەروەردەیی و وەرزشی ل دوور زاڕۆكی هەبیت، داكو ب شێوەیەكێ درست ڕەفتارێ لگەل زاڕۆكی بكەن و پشتەڤانیێ لێ بكەن و هێزێ بدەنێ و گۆت: (دڤێت مامۆستا هەر قۆتابیەكێ ل دووڤ كەسایەتیا وی سەرەدەریێ ل گەل بكەت، چونكی هەر زاڕۆكەك پێدڤی ب شێوەیەكێ پەروەردە و ڕەفتارا جیاواز هەیە).
محەمەد سالح دا زانین كو ل كورستانێ كێم سەنتەر و ڕێكخراوێن گرێدایی زاڕۆكان هەنە، ئەڤێن هەین ژی چالاكیێن وان سنووردارن و پێدڤیە چالاكیێن وان بەرفرەهـتر بن داكو خەلكی پتر باوەری ب ڤان سەنتەر و ڕێكخراوان هەبیت و وێ باوەریێ بۆ خێزانان چێكەن كو ئەڤ چالاكییە د باشن و د بەرژەوەندیا زاڕۆكێن وان دانە و ل پاشەڕۆژێ دێ مفایی ژێ وەرگرن و گۆت: (پێدڤیە خێزانێ ژی ئەو ڕەوشەنبیرییە هەبیت كو زاڕۆكێن خۆ فڕێكەنە ڤان سەنتەر و ڕێكخڕاوان).
محەمەد سالح، ڤەكۆلەرێ دەروونی و بەرپڕسێ سەنتەرێ جڤاكی یێ خێزانێ و پاراستنا زاڕۆكان د بەردەوامیا ئاخفتنێن خۆدا دیار كر كوئەو ئاهەنگ و چالاكیێن سنووردار یێن كو بتنێ وەكو ڕۆتینەك هندەك جاران دهێنە ئەنجامدان چ مفایی ناگەهینیتە زاڕۆكان و گۆت: (لەوما هەكە ب شێوەیەكێ باشتر چالاكیێن هەمەجۆر ل سەر ئاستێ تاكەكەسی و گڕۆپان ل سەنتەر و ڕێكخراوان بهێنە ئەنجامدان، ئەڤە دێ بیتە دەرگەهەك كو ئەم بشێین ئەو بەربەستێن هەتا نوكە ل پێشیا مە بشكێنین و هێزەكا دی بدەینە زاڕۆكی و پشتەڤانیەكا مەزن یا دەروونی و جڤاكی ل زاڕۆكی بكەین، داكو ل پاشەڕۆژێ ئەم نڤشەكێ پێگەهشتی و بهێز و خودان كەسایەتی ئاراستەیی جڤاك و وەلاتێ خۆ بكەین).

6

سندس سالح سلێڤانەیی:

ئەیوب كۆچەر، كو ئێك ژ ئەكتەرێن دهۆكێ‌ یە، د دیدارەكێ‌ دا بۆ رۆژنامەیا ئەڤرۆ دیاركر كو ئەڤە (32) سالن ئەو دوارێ‌ هونەری دا كاردكەت و هەتا نوكە وەك ئەكتەر پشكداری د هژمارەكا فلم و درامایان دا كریە و ب گۆتنا وی ئەو یێ‌ هاتیە ژبیركرن.
ناڤهاتی، گۆت: ل سالا 1993 من دەست ب كارێ‌ ئەكتەریێ‌ كریە و ل وی دەمی پارەیەكێ‌ كێم بەرامبەر كارێ‌ من د دامن، لێ‌ حەزا من ژوێ‌ چەندێ‌ مەزنتر بوو، لەورا من دەست نەداهێلان و هەتا نوكە یێ‌ بەردەوامم، بۆ زانین من پشكداری د هژمارەكا زۆرا فلم و درامایان داكریە و پشتی (32) سالێن خزمەتا بەردەوام ئەز هەست پێدكەم كو یێ‌ هاتیمە ژبیركرن.

17

شاهۆ فەرید:

وێنەگر (كاروان سیسن) د دیدارەكێ دا بۆ رۆژنامەیا ئەڤرۆ گۆت: ئەز هەتا رادەیەكێ زێدە ب كارێ خوە ڤە ماندی دكەم دا خەلكەك جوانی و رازی بوونا خوە سەر بدەن، ئەڤ كارێ تۆ زەحمەتێ پێڤە دبینی ل گەل ئەنجامێن وی ئەو ماندی بۆ دهێتە ژبیركرن، من لسەر گەلەك ئامیرێن وێنەگریێ كاركریە بەلێ فلایی كام بۆ من ژ هەموویان جوداتر بوویە، ئەڤ ئامیرە هەر جهەكێ ڤەكری جوانی نیشا ددەت، سروشتێ كوردستانێ ژی ب خەمل و جوانیا خوە پتر ئەز پالدایمە ئەڤی كاری بكەم، جوانترین وێنە و ڤیدیۆ ناڤا سروشتێ وەلاتێ من دهێنەگرتن.
هەروەسا گۆت: ئەو ئامیرێن نوكە بەردەست و ناڤ بازاری كوالێتیا وانا هەرە باشە وەكو هەموو جیهانێ، ئەز دبینم هەر وێنەگرەك سەرڤی كارێ خوە باشی كاردكەت و حەز دكەم پتر گرنگی ب وێنەگران بهێتە دان چونكۆ ئەو پەیام و ناما وێنەگر دناڤا وێنەیی دا دیاردكەت هیچ پێنوس و لاپەرەكێ دا ناهێتە دیاركرن.

19

عەزیز هەورامی:

سترانبێژ(ئاریان كەریم) د دیدارەكێ‌ دا بۆ رۆژنامەیا ئەڤرۆ گۆت: جهێ‌ داخێ‌ یە كو نوكە هندەك كەس هەنە خوە ب سترانبێژ د دەنە نیاسین، لێ‌ نە سترانبێژن و نەژی كارێ‌ وان ستران گۆتنە، چنكو سترانێن ئەو دبێژن پری لاوازی نە و یا ژوێ‌ خراپتر ئەوە هندەك كەڤال بۆ بەلاڤ ژی دكەن، زێدەباری سۆشیال مەدیایێ‌ كو بێی سانسۆر هەر تشتەكێ‌ وان بڤێت بەلاڤ دكەن و ئەڤ چەندە زیانێ‌ دگەهینتە هونەرێ‌ كوردی.
هەروەسا گۆت: دووماهی كارێ‌ من نوكە مژوولی چێكرنا چار كلیپامە و هیڤیا من ئەوە ل نێزیك بەلاڤ بكەم ‌‌‌‌‌‌‌.

15

بەهزاد بەهرام

پشتی سۆزەك ژ دایكا خوە وەرگرتی، بەرامبەر دەرچوون و سەركەفتنێ‌ ژ پۆلا شەشێ‌ بنەرەت، داكو ببیتە خودان تێلەفۆن، دایكا جەگەرحیز و دلنازك هەر زوی پشتی ئەنجامێن دوماهیا سالێ‌ دیار بووی، ل رۆژا جەژنەبوونا كچا خوە تێلەفۆنەك بۆ كرە دیاری، ئێدی نە بتنێ‌ بۆ خودان تێلەفون بەلكو ژ ئەڤرۆ پێڤە تێكەلی سوشیال میدیایا سەردەم بوو، سناپجات و تیكتۆك بوونە خوینبەرێن دلێ‌ وێ‌.. ئەڤرۆ قوتابییا پۆلا حەفتێ‌ یە و شانازیێ‌ ب تێلەفۆن و ئەكوانتێن خوە دبەت، رۆژەكێ‌ هەڤالێن خوە لدۆر خوە كۆمكرن و ژڤانەك دانا، داكو ترێندەكێ‌ دگەل مامۆستایێ‌ بابەتێ‌ كۆمەلایەتیێ‌ سازبكەن، پشتی ترێندا مامۆستایێ‌ كۆمەلایەتیێ‌ ب سەركەفتیانە ئەنجام دای، ئێدی بریار دان ل هەر حەفتییەكێ‌ دو ترێندا دگەل ماموستایان، رێڤەبەر و هاریكارێن قوتابخانێ‌ ئەنجام بدەن. رۆژهاتن و رۆژچوون، بابێ‌ ئیك ژ قوتابیان ل دەمژمێر دەهێ‌ سپێدێ‌ دەرگەهێ‌ رێڤەبەرێ‌ قوتابخانێ‌ لێدا و ب ژۆر كەفت، پشتی زەنگ هاتیە لێدان بەرەف ژۆرا مامۆستایان چوون، پرسیار ژ هەر مامۆستایەكی هاتە كرن سەبارەت رەوشت و ئاستێ‌ زانستی، هەرمامۆستایەكی لدویف بابەت و بسپۆریا خوە ئاستێ‌ خواندنێ‌ و رەوشتێ‌ قوتابی دا دیار كرن، هەرچەندە نە لدویف خواست و ڤیانبلندیا سەمیانی بوو، بەلێ‌ ددلێ‌ خوەدا گۆت رەوش ب ڤی ئاواییە، بۆ چەند چركەكان بێ‌ دەنگیێ‌ ژۆر نخافت، لێ‌ سەمیانێ‌ قوتابی ئەو بێ‌ دەنگی شكاند، ب دەنگەكێ‌ بلند گۆت: من مامۆستایەك نەدیت. دهەمان دەمدا رێڤەبەرێ‌ قوتابخانێ‌ بەرسڤ دا و گۆت ماموستا هەمی دئامادەنە و هەمیان رەوشت و ئاستێ‌ زانین و خواندنێ‌ دا دیار و ئاشكەراكرن، لێ‌ سەمیانێ‌ قوتابی بەرسڤ دا گۆت: كچا من ل بابەتێ‌ ترێندێ‌ چەند وەرگرتییە؟ مامۆستایێ‌ بابەتێ‌ تریندێ‌ كییە؟ پشتی سەمیانێ‌ قوتابی ئەڤ پرسیارە كری، هەمی مامۆستا ب رێڤەبەر و هاریكارڤە مت و بێ‌ دەنگ بوون، ئێدی كەس نەشیا ڤێ‌ بێ‌ دەنگیێ‌ ب دەنگ بێخیت.

8

نوژدار ئەیوب

ئەی پاییزا
دناڤ گێلەشۆكا
وەرزاندا وەریای
نە ل بەر قیڕیێن عەوران
سەمایێ بكە
نە ژی دخەما
رۆندكێن وێ دا ب وەریێ
چونكو ئەو دێ
رۆندكێن خۆ
ب بەژنا بوهارەكا
نوی وەركەت
و ب گازیێن خۆ
تە ژبۆ هاتنا وێ وەرینیت.

website security
WP Facebook Auto Publish Powered By : XYZScripts.com