قەیس وەیس:
تیما فوتبۆلا یانەیا دهۆك ئەلهۆیێن چیا بەردەوامن ل سەر پێشڤەچوونا خوە بۆ ڕێزبەندیێن باشتر و بۆ سێ ڕێزێن دی پێشڤە هاتە رێزبەندییا خولا ستێرێن ئیراقێ، پشتی شیایی د یاریا خوە یا دویێ یا پاشئێخستی دا بەرانبەر مێڤانا خوە یانەیا ئەلقاسم یا پارێزگەها ئەلبابل ب سەركەڤیت ب دو گۆلێن پاقژ ژ چارچووڤەیێ هەڤڕكیێن گەڕا هەشتێ یا خولا ستێرێن ئیراقێ یە ئەوا ل یاریگەها یانەیا دهۆك ب حازربوونا رێژەیەكا باش یا پشتەڤانێن دهۆكێ.
هەرچەندە تیما دهۆكێ ئاستەكێ باش نیشان دا لێ د نیڤا ئێكێ دا یاری بێ گۆل وەكهەڤی ب دووماهی هات، د نیڤا دویێ دا پشتی بۆرینا دەهـ خولەكان ئانكو ل خولەكا 55ێ شەرقی ئەلبەحری شیا گۆلا ئێكێ ب شێوەیەكێ جوان تۆمار بكەت، ئەلهۆیێن چیا ل سەر ڤێ گۆلێ نە ڕاوەستیان هەتا شیایین گۆلا دویێ ژی ب شێوەكێ جوان بینن ئەوا ژلایێ یاریزان كەریم دەرویش د خولەكا 72ێ دا تۆمار كری، هەرچەندە تیما ئەلقاسم بزاڤێن ڕاستڤەكرنا ئەنجامی دكر، ل خولەكا 90 دا گۆلەك هاتبوو تۆماركرن لێ پشتی دادڤانێ یاریێ ڤەگەڕیایە ڤاڕێ ئەو گۆل هاتە ڕەدكرن، ئەنجامێ یاریێ ب دو گۆلێن پاقژ بۆ ئەلهۆیێن چیا ب دووماهی هات.
بڤێ ئەنجامی تیما یانەیا دهۆك ژ رێزا 13 سێ رێزێن دی د سەر لیستا خولا ستێرێن ئیراقێ پێشڤە هاتە ڕێزا 10ێ ب كۆمكرنا 15 خالان ژ چار سەركەفتن، سێ وەكهەڤی و سێ خوسارەتی، یاریزانێن وێ 13 گۆل تۆماركرینە د بەرانبەر دا نەهـ گۆل ل سەر هاتینە تۆمار كرن.
دهۆكێ دەلیڤەیا ڕێزا باشتر هەیە
پشتی تیما دهۆكێ یارییا خوە بەرانبەر یانەیا ئەلقاسم ب سەركەفتیانە ئەنجامدایی، بڕیارە ل یارییا خوە یا سێیێ و دووماهیێ ژ چارچووڤەیێ یاریێن پاشئێخستی ل 28ێ ڤێ مەهێ بكەت و بەر ب باژێرێ سلێمانیێ بچیت و ببیتە مێڤانا یانەیا نەورۆز كو ژ چارچووڤەیێ گەڕا نەهێ یا خولا ستێرێن ئیراقێ یە، دووڤدا ئەوا هاتییە ڕاگەهاندن ژلایێ فدراسیۆنا فوتبۆلا ئیراقێ دێ دەست ب هەڤڕكیێن گەڕا 12ێ هێنە كرن، دهێتە پێشبینیكرن ل 26 و 27ێ ڤێ مەهێ یانەیێن كوردستانی بڤی شێوەیی یاریێن خوە بكەن دهۆك مێڤاندارییا یانەیا نەفت ئەلبەسرا بكەت و زاخۆ ئەلكەرەخ مێڤان بكەت، هەولێر ببیتە مێڤانا ئەلشورتە و نەورۆز مێڤاندارییا دیالا بكەت.
مەسعۆد میرال: هێدی ئەم یێ ئاست و ئەنجامێن باش د ئینن
د كۆنگرەیەكێ ڕۆژنامەڤانی دا ڕاهێنەرێ تیما یانەیا دهۆك یێ سویدی و ڕەكەز كوردێ باكۆر مەسعۆد میرال گۆت: ل دەسپێكێ پیرۆزە بۆ پشتەڤان و هەموو حەز ژێكەرێن یانەیا دهۆك، پێخوەشحالین ئەم ل سەر ڕێكا باش ل دووڤ پلانێن خوە ب سەركەفتیانە د چین، هیدی ئەم یێ ئاست و ئەنجامێن باش دئینن پشتی ڕاوەستیانەكا درێژ ژبەر پشكدارییا مە د كۆپا كەنداڤی دا، د چار یارییان دا ئەم شیاین ئەنجام و ئاستەكێ دلخوەشكەر بینن تایبەت دلێ جەماوەرێ خوە خوەشبكەین.
كینە گۆلكەرێن تیما یانەیا دهۆك د خولێ دا؟
بۆ زانین حەفت یاریزانان پشكداری د تۆمار كرنا گۆلان دا هەیە بۆ یانەیا دهۆكێ و بڤی ڕەنگی، پاشەنگ عەبدوللا چار گۆل، پیتەر گۆرگیس سێ گۆل شەرقی ئەلبەحری دو گۆل، هەر ئێك ژ بەیار ئەبۆ بەكر، یانیك زاكێری، كەریم دەرویش و كێلبرت كۆمسۆن گۆلەك تۆماركرینە.
هەلوەستێ گشتی پشتی ئەنجامدانا یاریێن پاشئێخستی، بۆ زانین ئەڤ لیستە پشتی ب دووماهی هاتنا یاریێن گەڕا 11ێ بوویە.
1- جەوییە 24 خال ژ دەهـ یارییان.
2- شورتە 21 خال ژ دەهـ یارییان.
3- نەفت 19 خال.
4- زاخۆ 19 خال.
5- زەورا 19 خال.
6- نەفت میسان 18 خال.
7- هەولێر 18 خال.
8- نەجەف 17 خال.
9- تەلەبە 17 خال.
10- دهۆك 15 خال ژدەهـ یارییان.
11- كارەبا 14 كارەبا
12- كەربەلا 14 خال.
13- كەرمە 14 خال.
14- مینا 12 خال ژ دەهـ یارییان.
15- نەفت ئەلبەسرا 11 خال.
16- ئەلقاسم 11 خال.
17- كەرخ 11 خال.
18- نەورۆز هەشت خال ژ دەهـ یارییان.
19- دیالا چار خال.
20- حدود سێ خال ژ دەهـ یارییان.
نيشاندان