NO IORG
Authors Posts by naci bedel

naci bedel

15011 POSTS 0 COMMENTS

25

هنده‌ك كه‌س پشكه‌ك ژ كه‌لوپه‌لێن خوه‌ دداننه‌ دسه‌رشوویێ ڤه‌ و هزردكه‌ن جهه‌كێ گونجایه‌، به‌لێ به‌رۆڤاژی سه‌رشوو جهه‌كێ باش نینه‌ بۆ هه‌لگرتنا پشكه‌ك ژ كه‌لوپه‌لان، هه‌كه‌ هه‌تا نوكه‌ ته‌ ئه‌و پێدڤیێن خوه‌ ل وێرێ هه‌لگرتبن، باشتره‌ دووربێخی.
-1 سابوونا ب كارنه‌هاتی، رێژەیه‌كا زۆر ل شهێ ب خوه‌ڤه‌ دگریت، ئه‌ڤه‌ژی وه‌دكه‌ت نه‌رم ببیت و پیس ببیت، باشتره‌ ب تنێ ئه‌و سابوون ل وێرێ بهێنه‌ دانان یێن دهێنه‌ ب كارئینان.
-2 خاولیێن ته‌ڕ، دانانا خاولیێن ته‌ڕ د سه‌رشوویێ ڤه‌ و ژ ئه‌گه‌رێ بلندیا رێژا شه‌هێ وه‌دكه‌ت كه‌ڕو ل سه‌ر دروست ببن.
-3 به‌رهه‌مێن جوانكاریێ، كه‌ره‌سته‌یێن ماكیاژ و جوانكاریێ دڤێت ل جهێن هشك بهێنه‌ هه‌لگرتن نه‌ ل جهێن شهدار، هه‌روه‌سا دڤێت پلا گه‌رمیێ یا ناڤنجی بیت، ئه‌گه‌ر نه‌ دێ تێكچن و زیان بۆ پیستی دێ هه‌بن.
-4 بۆیاغا نینۆكان، ب بوورینا ده‌می و ژ ئه‌گه‌رێ شهداریا جهی تێكدچن.
-5 شه‌فرێن ریهتڕاشینێ، ئه‌گه‌رن بۆ وێ چه‌ندێ رێژەیه‌كا زۆر ژ به‌كتریا ل سه‌ر گه‌شه‌ بكه‌ن و تووشی هه‌ودانا پیستی ببی.
-6 ئێكسسوارات، ره‌نگێن وان دهێنه‌ گۆهورین و ته‌یسینا خوه‌ ژ ده‌ست دده‌ن، پێدڤیه‌ ل جهه‌كێ هشك بهێنه‌ هه‌لگرتن.
-7 بێهنخۆشكه‌ر، ل جهێن گه‌رم و شهدار تێكدچن و بێهنا وان وه‌كو خوه‌ نامینیت.

19

-1 ب شه‌ڤێ ل ده‌مێ نڤستنێ هیته‌رێ كاره‌بێ ڤه‌مرینه‌، چونكو ب تنێ نزمی و بلندیا كاره‌بێ و شۆرته‌ك به‌سه‌ بۆ دروستبوونا ئاگری.
-2 چ جار ب شه‌ڤێ مۆبایلێ د شه‌حنێ را نه‌هێله‌ و ل ته‌نشت خوه‌ و بن بالیفكا خوه‌ نه‌دانه‌، چونكه‌ ل هه‌ر ده‌مه‌كی دا ئه‌گه‌رێ په‌قینێ هه‌یه‌ و دێ زیان به‌خش بیت بۆته‌,. دبیت ببیته‌ ئه‌گه‌رێ دروستبوونا ئاگری.
-3 دووربكه‌ڤه‌ ژ ب كارئینانا شاحینه‌ و پلاكێن كو كوالێتیا وان یان نزم یان ئه‌سلی نه‌بیت، چونكو پشكه‌كا زۆر ژوان هۆكارن بۆ دروستبوونا ئاگرتێكه‌فتنێ.
-4 شه‌ڤێ ل ده‌مێ نڤستنێ گلۆپا هه‌لكری نه‌هێله‌، چونكو دده‌مێن ڕابردوودا چه‌ند ماله‌ك تووشی ئاگربه‌ربوونێ بووینه‌ ژئه‌گه‌رێ په‌قینا گلۆپان.
-5 ل وه‌رزێ باران بارارینێ دا، پشتی شوولێ ته‌ ب پلاكا خلاس دبیت ڤه‌مرینه‌، چونكو پتریا ده‌مان ژئه‌گه‌رێ بریسییان شۆرت یێن دروست بووین و پتریا ئامیرێن كاره‌بێ بووینه‌ ئه‌گه‌رێ سۆتنا مالان.
-6 دووربكه‌ڤه‌ ژ ب كارئینانا ته‌قسیمێن كاره‌بێ، چونكو ده‌مێ بوارێ هه‌ر پلاكه‌كی گران دبیت دبیته‌ ئه‌گه‌رێ شورت و سۆتنێ.

13

شاهۆ فەرید:

پشتی ب دووماهی هاتنا یاریێن گەڕا دویێ‌ یا خولا پلا ئێكا كوردستانێ‌ ئەوا تیما فوتبۆلا یانەیا سێمێلێ‌ یا چاڤەڕكری بوو ل دووڤ سیستەمێ‌ خولێ‌، د یارییا ئێكێ‌ دا تووشی خوسارەتیێ‌ بوو بەرانبەر چەمچەمال ب گۆلەكێ‌ بێ‌ بەرانبەر
ل دۆر ئەگەرێن دەستپێكا لاواز ڕاهێنەرێ‌ تیمێ‌ ئاشتی موستەفا د داخویانیەكێ دا بۆ رۆژنامەیا ئەڤرۆ دیار كر پێنەڤێت یارییا ئێكێ‌ نا هێتە هەلسەنگاندن ئاستێ‌ تیمێ‌ تایبەت هەكە ژ دەرڤەیی یاریگەها خوە بكەین ژبەركو یارییەكا بزەحمەت دهێتە دیتن، سەرەرایی مە ئاستەكێ باش پێشكێشكر، ئەم هەژی خوسارەتیێ نە بووین و دڤیابا یاری بەر ب وەكهەڤیێ‌ چووبا، لێ‌ چانس گەل مە نە راوەستیا، ئەز ژ ئاستێ تیمێ رازیمە و گەلەكێ باشە تا رادەكێ و ئەم پشت گەرمیێ‌ ب پشتەڤانێن یانەیا سێمێل دكەین ئەوێن هەردەم پشتەڤانن.
ڕاهێنەرێ‌ تیمێ‌ ئەوچەندە ژی گۆت: رژدین بۆ بەردەوامییا هەڤڕكیێ و هەر یارییەكا دكەین بتنێ‌ هزرا مە سەركەفتنە و هەتا دووماهیك یاریی بۆ دەستڤەئینانا پلێتا دەربازبوونێ نا ڕاوەستیێن، هەرچەندە كێماسی هێشتا ماینە د ناڤ رێزێن تیمێ‌ دا و هێدی دێ‌ ئەو ژی چارەسەربن و ئەویێن مە ڤیان چارەسەربكەین نە ئاستێ پێدڤی بوون، هێرشبەرێ مە كێماسی هەنە هێشتا و هنگاڤتی ژی مە هەبوون كارتێكرن لمە كر، بەرهەڤیا باشی دكەین بۆ یاریا بهێت راستە ئەم گەڕا بهێت یاریێ نا كەین و دێ چاڤەرێ كەین، یاریا بهێت دیێ یاریی و ئاستەكێ باش نیشاندەین، مە باوەری یاریزانێن خوە هەیە.
بۆ زانین تیما یانەیا سێمێل ل وەرزێ‌ 2012ی دناڤ رێزێن خولا پلا نایابا كوردستانێ‌ دا بوو و ئەڤە چەندین سالە بزاڤێن ڤەگەڕیانێ‌ دكەت.

10

قەیس وەیس:

چاڤەڕێ‌ دهێتە كرن ئەڤرۆ هەلبژارتیێ‌ ئیراقێ‌ پێنگاڤا خوە یا ئێكێ‌ د قارەمانییا كۆپا كەنداڤی یا 26ێ‌ ب پشكدارییا پێنج یاریزانێن كوردستانی پاڤێژیت دەمێ‌ یارییا ئێكێ‌ ژ چارچووڤەیێ‌ كۆما دویێ‌ بەرانبەر هەلبژارتیێ‌ یەمەن یاریێ‌ دكەت ئەوا دێ‌ هەڤڕكیێن وێ‌ ل وەلاتێ‌ كوێتێ‌ ب پشكدارییا هەشت هەلبژارتییان هێتە كرن و هاتینە بەلاڤكرن ل سەر دو كۆمان، هەر د كۆما دویێ‌ دا سعۆدیە دێ‌ بەرانبەر بەحرێن بیت.
ڕاهێنەرێ‌ هەلبژارتیێ‌ ئیراقێ‌ یێ‌ ئسپانی خیسۆس كاساس پێكهاتیێ‌ تیما خوە بۆ یارییا كۆپا كەنداڤی ڕاگەهاند بو. ئەوا د ناڤا یاریزانێن داخواز كری بۆ كۆپا كەنداڤی پێنج یاریزانێن كوردستانی نە ئەو ژی رێبین سۆلاقا، محەمەد حەسەن، ئەحمەد یاسین، ماركۆ فەرەج و یۆسف ئەمین، ژلایەكێ‌ دووڤە هەر ئێك ژ یاریزانێ‌ یانەیا زاخۆ ئەمجەد عتوان و پیتەر گۆرگیس یاریزانێ‌ یانەیا دهۆك ژی هاتینە داخواز كرن بۆ ناڤ پێكهاتیێ‌ تیما ئیراق.
ژلایەكێ‌ دووڤە ژبەر ئیمزاكرنا گرێبەستا خوە و پەیوەندی ب یانەیا نوو یاریزانێ‌ ڕەڤەندا كوردستانی ل ئۆرۆپا مێرخاس دۆسكی دناڤ پێكهاتیێ‌ كاساسی دا نەبوویە ئەوێ‌ گرێبەستا ڤیكتۆریا بلزن ئیمزاكری و دوور نینە ڤەگەڕیتە دناڤ هەلبژارتیێ‌ ئیراقی دا، لێ‌ ژ نشكەكێ‌ ڤە راهێنەرێ‌ هەلبژارتیێ‌ ئیراقێ‌ ناڤێ‌ یاریزانێ‌ كوردستانی هەلۆ فائێق دناڤ لیستێ‌ دا نە هێلایە، ل دووڤ دەنگۆیێن بەلاڤبووی ژبەر هەبوونا هنگاڤتنێ‌.
هەلبژارتیێ‌ ئیراقێ‌ دێ‌ یاریێن خوە بڤی ڕەنگی كەت، ئەڤرۆ ئیراقی- یەمەن دەمژمێر 5:25 مەغرەب، چارشەمبییا بهێت بەحرەین- ئیراق دەمژمێر 8:30 شەڤ، ل 28ێ‌ ڤێ‌ مەهێ‌ ئیراق- سعۆدیە ل دەمژمێر 5:30 مەغرب هێتە كرن.

13

ب فەرمی كوڕێ‌ باژێرێ‌ زاخۆ و یاریزانێ‌ ڕەڤەندا كورد ل ئۆرۆپا مێرخان غازی دوسكی گرێبەستا یانەیا ڤیكتۆریا بلزن یا چیكی ئیمزا كرن ئەوا دێ‌ بۆ ماوەیێ‌ سێ‌ وەرزان دگەل یانەیا ناڤهاتی بیت ب كۆژمەیێ‌ 500 هزار یۆرۆیان بۆ هەر وەرزەكی.
مێرخاس دۆسكی یاریزانێ‌ هەلبژارتیێ‌ ئیراقێ‌ و یانەیا سلۆڤۆكۆ یا چیكی ل هێلا بەرەڤانیێ‌ لایێ‌ چەپێ‌ دكەت، ژبەر شیانێن وی یانەیا ڤیكتۆریا بلز نئێك ژ یانەیێن د نوكە دا پشكدار د قارەمانییا ئۆرۆپا بۆ یانەیان یۆرۆ لیگ بزاڤێن گرێبەستێ‌ دكەل كرن، دەرئەنجامێ‌ دانۆستاندنان مێرخاس دۆسكی كەمپێ‌ هەلبژارتیێ‌ ئیراقێ‌ یێ‌ حەفتییا بۆری هێلابوو پێخەمەت ئیمزاكرنا گرێبەستا خوە، بوو ئەگەر ڕاهێنەرێ‌ هەلبژارتیێ‌ ئیراقێ‌ خسیۆس كاساس ل جهێ‌ وی یاریزانەكێ‌ دی داخواز بكەت و دوور نینە دوبارە یاریزان ڤەگەڕیتە دناڤ رێزێن هەلبژارتیێ‌ ئیراقێ‌ دا.
د داخویانیەكا رۆژنامەڤانی دا مێرخاس دۆسكی گۆت: پێخوەشحالم پێنگاڤەكا نوو د كاروانێ‌ خوە یێ‌ وەرزشی دا هاڤێژتی، بۆ من هەڤڕكییەكا دی یە ل خولا چیكێ‌ لێ‌ دێ‌ یا نوو بیت د خولا ئۆرۆپا دا، یا د شیانێن من دا بیت دێ‌ پێشكێشكەم، پێنەڤێت ئەڤچەندە پێدڤی ب وەستیانەكا بەردەوامە و پێشئێخستنا ئاستێ‌ خوەیە
بۆ زانین یانەیا ڤیكتۆریا بلزن د خولا نایابا چیكێ‌ دا ل رێزا دویێ‌ دهێت، هەروەسان د خولا یانەیێن ئۆرۆپا یۆرۆ لیگ ل رێزا 17ێ‌ ب نەهـ خالان ل سەر جەمێ‌ گشتی یێ‌ 36 یانەیا پشتی بۆرینا شەش یارییان بتنێ‌ و هەتا نوكە 20 یاری دگەل هەلبژارتیێ‌ ئیراقێ‌ كرینە و 63 یاری دگەل یانەیا خوە یا بەرێ‌ سلۆڤۆكۆ یا چیكی كرینە.

12

ستێرێ‌ بەرازیلی و یانەیا بەرشەلۆنا یا ئسپانی ڕاڤینا دیاز بوویە جهێ‌ پووتەدانێ‌ ژلایێ‌ یێ‌ سێ‌ یانەیێن ئنگلتەرایێ و هەموو بزاڤان دكەت د ڤەگۆهاستنێن زڤستانێ‌ دا ئەوی یاریزانی ب دەستخوەڤە بینن.
د راپۆرتەكێ‌ دا رۆژنامەیا سپۆرت یا كاتەلۆنی دۆپاتی ل سەر هەبوونا بزاڤێن هەرسێ‌ یانەیێن ئینگلتەر ئارسنال، مانچستەر ستی و لیڤەرپۆل هەنە ژبۆ ڕازیكرنا ستێرێ‌ بەرازیلی و یانەیا بەرشەلۆنا یا ئسپانی ب هەر شێوەكی گرێبەستێ‌ دگەا ئیمزابكەن، سەرباری گرێبەستا وی دگەل بەرشەلۆنا هەتا 2027ێ‌ یە، لێ‌ ئەو ناكۆكیێن كارگێری و داخوازییا وی بۆ زێدەكرنا مووچەی بوویە ئەگەر ئەڤ دەرگەهە بهێتە قۆتان.
هەروەسان دیار كرییە پشتی بۆرینا چار حەفتیێن ئێكێ‌ یا خولا ئسپانیا دا یانەیا بەرشەلۆنا و بریكارێ‌ ڕاڤینای گەهشتبوونە وێ‌ چەندێ‌ كو هەتا زڤستانا ئەڤ سالە یان هاڤینا سالا بهێت گرێبەستا یاریزانێ‌ بەرازیلی بهێتە هەلوەشاندن، لێ‌ پشت ئاستێ‌ وی یێ‌ بلند هەردولا چ داخویانی نە داینە، ئەڤەژی نەبوویە ڕێگر كو هەرسێ‌ یانەیێن ئینگلتەرا خوە نێزیكی ڕاڤینیای بكەن، رۆژانێن بهێت دێ‌ بابەتێ‌ وی ئێكلابیت دناڤبەرا مان و چوونێ‌ بۆ یانەكا ئنگلتەرایی

6

راپۆرتێن رۆژنامەڤانی دناڤا دەزگەهێن ڕاگەهاندنێ‌ دا دیاركرینە كو دانۆستاندنێن باش دناڤبەرا ڕاهێنەرێ‌ بەرێ‌ یێ‌ یانەیا بەرشەلۆنا چاڤی هێرناندێز دگەل كارگێرییا یانەیا ئەی سی میلان یا ئیتالی ژبۆ وەرگرتنا ئەركێ‌ ڕاهێنەراتیێ‌ ل جهێ‌ پاولۆ ڤۆنسیكا.
دەزگەهێ‌ فوتبۆل ئیتالیا دیاركر هاتنا ڕاهێنەرێ‌ ئسپانی چاڤی بۆ یانەیا مێلان ب تنێ‌ چەند پێنگاڤەكێن كێم ماینە و دوور نینە یانەیا میلان گرێبەستا فەرمی ڕابگەهینت، پشتی ل سەر چەند ناڤان ڕێك نەكەڤتین تایبەت یانەیا میلان دڤێت فەلسەفا یاریكرنا تیمێ‌ ب گوهۆڕیت، ژلایێ‌ خوەڤە رۆژنامەیا ئێل ناشیۆنال یا كەتەلۆنی ژی ئەڤ دەنگۆباسە دۆپاتكر و گۆت: دبیت د دەمەكێ‌ نێزیك دا چاڤی ببیتە ڕاهێنەرێ‌ ئەی سی میلان، پشتی ڕازیبوون ل سەر هەموو بەندێن گرێبەستی هاتینە كرن.
هەردو سایتێن مەزن ل ئیتالیا TMW وMilannews دیاركرن، دبیت یانەیا میلان دەلیڤەكا دووماهیێ‌ دابیتە ڕاهێنەرێ‌ خوە پاولۆ ڤۆنسیكا و چەند یاریێن دی بچن، لێ‌ هاتنا چاڤی بۆ سەركێشییا كادرێ‌ ڕاهێنانێ‌ تا ڕادەیەكێ‌ مەزن ئێكلا كرییە و دێ‌ پشت گەڕمیێ‌ پێ‌ كەن، تایبەت تیما میلان د نوكە دا رێزبەندیا هەشتێ‌ دهێت ب 14 خالان و ئەڤ رێزە پشتەڤان و كارگێریا یانەیێ‌ پێ‌ خوەش نینە، پسیار ئەوە كەنگی دێ‌ چاڤی بیتە ڕاهێنەر؟

22

دلدارحەجی جەعفەر

ئاخا وەلات ئاخا وەلات
هەردەم دێ كەم بۆ تە خەبات
هەر دارەكا شینبووی لوارا
یائاڤا بووی بخوینا لاوان
دلوپێن خوینا شەهیدان یا گەشكری
ژیان و مانخەندەك و چەكێ دوژمنان
ناهێلین لسەر ئاخا كوردان
ئێكگرتنا گەلێ كوردان شكەستنە
بۆ دوژمنان
ئێكرێزییا گەلێ كوردان ئاڤا دكەت
چوار سنووران
ئاخا وەلات، ئاخا وەلات
وەك شیرێ شرینێ دایكان
دێ ئاڤاكەم ب روح وجان
و نەخشینم ب ڤان دەستان
شەرڤان و جانفیدامە
چاڤنەترس و ئەژدەهامە
دوژمن دڕەویت و پاشی دڕەڤیت
جاشا لپشت ناهەلگریت
تۆلا مەیا گرانە
هندی بزانی یا دژوارە
ئالا كوردان یا دیارە
ڕوژا تێدا ئاشكرایە
ئاشتی وئازادی بارا مەیە
كوردستان ژی هەر بۆ مەیە

16

سالار محەمەد دۆسكی:

2 – 4

هویروی گۆت: ئەمینی یا گۆتییە من، دێ‌ بۆ مە چییە فیشەكا، مە فیشەك نەماینە. پاشی گۆت؛ بلا سەعۆ ژی ل گەل من بهێت.
من گۆتێ‌: ما ئەز دێ‌ هێمە چ؟ ئەز ناهێم.
بابێ‌ من گۆت: بەلێ‌ دێ‌ ل گەل هویروی چییە دەف حسۆی ل ئەترویش دا فیشەكا بۆ مە بینن، مەرەما بابێ‌ من ئەو بوو ئەز نەمینمە ل وێرێ‌ و چونكو ئەز هێشتا یێ‌ بچویك بووم.
وێ‌ شەڤێ‌ ئەم چووینە باڵەتە. بەرێ‌ سپێدێ‌ مە دوو دەوار برن و ئەم چووینە ئەترویش. ئەم چووینە دەف حسۆی و مە گۆتێ‌ ئەم یێن هاتینە فیشەكا. حسۆی چوار سندووقێن فیشەكا دانە مە. ئەم جارەكا دی زڤڕینەڤە باڵەتە. هینگێ‌ ماڵێن مە ل وی نزارێ‌ ل پشتا گوندی بوون.
ل وێرێ‌ گوندییا گۆتە مە شیڤێدی دوژمنی هێڕشەكا دی یا كری و یێن گەهشتینە گوندێ‌ بۆزا، ئیسڤێ‌ مامێ‌ هویروی ژی یێ‌ بریندار بووی. تڤەنگەك ل پێ‌ وی دابوو و بریندار كربوو.
پێشمەرگا ژی بۆزا بەر دابوو و چوو بوونە چیایێ‌ پشتا گوندی. حیتۆ ژی ل گوندی بوو و گۆتە مە: زوی ڤان فیشەكا بگەهیننە بەروكێن شەڕی. ئەم چووینە دارا شیدی. مە بابێ‌ من و دەه هەتا پازدە پێشمەرگا ل وێرێ‌ دیتن. ئەو ل بن دارێ‌ د ڕوینشتی بوون.
گۆتە مە: هووین هاتن؟
مە گۆتێ‌: بەلێ‌.
گۆت: هنگۆ فیشەك ئینان؟
مە گۆتێ‌: بەلێ‌ مە ئینان.
پاشی بابێ‌ من گۆت ئەمینێ‌ پشوی یێ‌ ل سەر كانیزەركێ‌ فیشەكا ببەنە دەف وان. ئەز و هویرۆ نەچووین. دوو پێشمەرگێن دی فیشەك گەهاندنە دەف ئەمینی. پاشی ئەو دوو پێشمەرگە زڤڕینەڤە دەف مە و گۆتن: ئەمینی یا گۆتی: هووین ل وێرێ‌ بن هەتا سپێدێ‌. چونكو دبیت دوژمن ژ وی ڕەخی ڤە هێڕشێ‌ بكەن و بەرەف ڕەخێ‌ مەڤە بهێن.
هەتا سپێدێ‌ ئەم ماینە هشیار و چاڤەڕێ‌، بەلێ‌ دوژمنی چ لڤین نەكرن. پاشی بابێ‌ من گۆتە مە: ئەز دێ‌ چمە دەف ئەمینی وان دێ‌ تێشتێ‌ خۆم و دێ‌ هندەك پێشمەرگا فڕێكەینە جهێ‌ هنگۆ دا هووین ژی بهێن تێشتێ‌ بخۆن.
بابێ‌ من و ڕەشیدێ‌ كۆڕێ‌ عەبدولڕەحمانێ‌ خۆركێ‌ چوون. هندی بابێ‌ من گۆتە ڕەشیدی: تۆ ژ ڤان جحێلا مەزنتری، تو ل ڤێرە بمینە و نەهێ‌. لێ‌ وی گۆت: ئەز دێ‌ ل گەل تە هێم و ڕەشید ژی ل گەل بابێ‌ من چوو.
بابێ‌ من گۆت: ئەم چووینە دەف ئەمینی وان ئەو ل سەر تێشتێ‌ بوون. مە ژی دەست هاڤێتێ‌ دا تێشتێ‌ بخۆین، دەنگێ‌ تۆپا هات و تۆپ هاڤێتنە مە.
بابێ‌ من گۆت: سی تۆپ هاڤێتن. ئێك چوو ژ مە پێهەل ب وی سەرێ‌ ژووری كەت و زێدە كر، یا دوویێ‌ ژی ژ مە پێدا كەت و كێم كر.
دیسان بابێ‌ من گۆت: ئەم ل بن دارەكا كەزانێ‌ بووین، تۆپا سیێ‌ هات ب ناڤ گۆهێن كەزانی كەت و ل هنداڤی سەرێ‌ مە پەقی.
ئەو ڕەشیدێ‌ ل گەل بابێ‌ من چووی شەهید بوو و عەبوشێ‌ كۆڕێ‌ شێخ سەعیدێ‌ بریفكی شەهید بوو. نۆزدە ژی ژێ‌ بریندار بوون. هینگێ‌ بابێ‌ من ئێك ژ وان بریندارا بوو. ساچمەك ل ڕاستا دلی ب ناڤملێن وی كەفتبوو، هەكە پیچەكا دی ژووركەتبا دا گەهیتە دلێ‌ وی.
پاشی مە دیت پێشمەرگەیەك هاتە وێ‌ ملا ژ مە پێهەل گۆت: بلەز وەرن تۆپەك یا دناڤ هەڤاڵێن مەدا پەقیی و كەس ژێ‌ نەمایە ساخ. ئەم بلەز چووین، بەلێ‌ پا مە چ دیت. هیچ پێشمەرگەیەك نەمایە ساخ، هەمی دسۆرن ژ خۆینێ‌.
ئەم چەند پێشمەرگەیەك چووینە گوندێ‌ خۆڕزا و مە هندەك دەوار ئینان، هندەك بریندار شیان ب پیا بچن، ئەوێن دی ژی مە ل دەوارا سیاركرن و گەهاندنە گوندێ‌ شێخ هەسن، بۆ مەغرەب مە گەهاندنە باڵەتە. هینگێ‌ خالێ‌ من حوسێنی ترومبێلەك هەبوو. ترومبێلەكا شوفرلێتێن حەرەس حدودا بوو، ژ ئەترویش هات، بریندار سیاركرن و برنە شكەفتێ‌.
چاڵاكیا دی یا من پشكداری تێدا كری ل سەرێ‌ تاڤە ڕەشێ‌ بوو. ل ڕاستا گوندێ‌ نزاركێ‌ دوژمن هاتە پێش، هینگێ‌ هێزێن پێشمەگەیێن مەسیحی ل وێ‌ زنجیرا چیایێ‌ زاوا بوون. بەتەلیونا شەعیەی ل وان چەپەرا بوون. ئەو زەلامەكێ‌ مێرخاس و ب شەرت بوو. داودێ‌ عەلیێ‌ حەجی سلێمانی جێگرێ‌ حیتۆی بوو. ئەم ل نزارێ‌ گوندی ل ماڵ بووین، ئەم نەه دەه پێشمەرگە ل گەل داودی د هانا شەڕی چووین. ئەم چووینە سەرێ‌ تاڤە ڕەشێ‌، دوژمن ب هێزەكا مەزن یا عەسكەری و جاشا ل ڕۆژئاڤایێ‌ چیایێ‌ زاوا ب سەركەفتن و بەرەف ڕۆژهەلاتی هاتن. ل وێ ڕۆژێ‌ هەتا ڕۆژا پاشتر شەڕەكێ‌ مەزن و دژوار ڕویدا. هێزێن دوژمنی ژ ڕەخێ‌ گوندێ‌ نزاركێ‌ ژی هاتن و فیشەكێن مە ژی خلاس ببوون، ئینا مە چیایێ‌ زاوا و هەتا تاڤە ڕەشێ‌ بەردا. ئەو بەتەلیونا مەسیحیا ژی چوون ئەو چیایێ‌ پشتا ئەڤریكێ‌ گرت و ئەم ژی زڤڕینەڤە ماڵ. زیانێن پێشمەرگەی ل وە شەڕی، هندەك پێشمەرگێن بەتەلیونا مەسیحیا ب سڤكی بریندار ببوون. هەروەسا من پشكدارییا شەڕی ل باعەدرێ‌ ژی كربوو.
پێشمەرگێن گوندێ‌ باڵەتە ل سەردەمێ‌ شۆڕەشا ئەیلۆلێ‌:
١- محەمەد سەلیم عەبدولڕەحمان (حیتۆ باڵەتەیی).
٢- ئەمین عەبدولڕەحمان.
٣- محەمەد عەبدولڕەحمان.
٤- عەلی عەبدولڕەحمان.
٥- عەبدی عەبدولڕەحمان.
٦- محەمەد سالح سەلیم.
٧- عادل سەلیم.
٨- جەعفەر سەلیم.
٩- عابد سەلیم.
١٠- عەلی سەلیم.
١١- مەحمود عەبدی.
١٢- سالح عەبدی.
١٣- حامد عەبدی.
١٤- محەمەد قەنجو.
١٥- حەجی محەمەد قەنجو.
١٦- جەمیل نجو.
١٧- مامەل سیتو.
١٨- ئەحمەد سالح (ئەحمەدێ‌ بەیبینێ‌).
١٩- سلێمان قادر.
٢٠- فەتاح یوسف محەمەد.
٢١- عەلی سلێمان
٢٢- داود عەلی سلێمان.
٢٣- محەمەد عەلی سلێمان.
٢٤- كەمال حەسەن محەمەد.
٢٥- جەلال حەسەن محەمەد.
٢٦- محەمەد سالح عەلی سەلیم.
٢٧- محەمەد خالد مەحمود.
٢٨- سەعید ئەحمەد مەحمود
٢٩- سالح ئەحمەد مەحمود.
٣٠- عەلی یونس عەلی.ش

15

بێوارحەمدی:

سترانبێژ و ئەكتەرا بەرنیاس (مهاباد ئیبراهیم) د دیدارەكێ‌ دا بۆ رۆژناما ئەڤرۆ گۆت: دژیەكێ‌ بچووكدا من حەزا ئەكتەریێ‌ و سترانگۆتنێ‌ هەبوو و (25) سالان ئەز ل دەرڤەی وەلاتی دژیام من بەردەوامی ب حەزا خوە دا و سترانێن كوردی دگۆتن.
هەروەسا گۆت: ل سالا 2016 من دەست ب ئەكتەریێ‌ كر و پشكداری د چەند كارێن هونەری دا كر، ژوانا ( دراما تەحل و شرین و چایخانە و چەند فلمەك ل گەل هەردو هونەرمەندێن كۆمێدی (خەلیل قەدشی و جەلال عەبدوللا) هەروەسا هندەك فلمێن سینەمایی و ب مخابنی ڤە نوكە مالا من ژ دەرڤەی دهۆكێ‌ و من ترۆمبێل ژی نینە، لەورا هاتن و چوون بۆ من یا ب زەحمەتە، لێ‌ بۆ دەمێ‌ بهێت چەند كارێن نوو وەك ستران و دراما دڕێ‌ دا هەنە و هیڤیا من ئەوە ئەم هەموو پێكڤە بشێین خزمەتا هونەرێ‌ كوردی بكەین.

.

website security
WP Facebook Auto Publish Powered By : XYZScripts.com