چاڤەڕێ‌ دهێتە كرن ئەڤرۆ ل دەمژمێر شەشێ‌ ئێڤاری تیما فوتبۆلا یانەیا دهۆك ل یاریگەها شەعب یا نێڤدەولەتی ببیتە مێڤانا یانەیا شورتە یا بەغدایی، ژ چارچووڤەیێ‌ یاریێن پاشئێخستی یێن گەڕا حەفتێ‌ ژ خولا ستێرێن ئیراقێ‌ ئەوا یانەیا جەوییە ژی د هەمان دێ‌ یارییا خوە بەرانبەر یانەیا نەفت میسان ئەنجامدەت.
تیما فوتبۆلا یانەیا دهۆك ئەوا ل حەفتییا بوری ل پایتەختێ‌ ئیراقێ‌ بەغدا شیای سەركەفتنەكا مەزن ل سەر مێڤاندارا خوە یانەیا حدود بینت ب چار گۆلان بەرانبەر گۆلەكێ‌ ئێك پێنگاڤ بۆ پێشڤە بەزاند ل رێزا 17ێ‌ ب كومكرنا 11 خالن ژ سێ‌ سەركەفتن، دو وەكهەڤی و سێ‌ خوسارەتی هەنە بەزینت، لێ‌ یارییا ئەڤرۆ دێ‌ جودا بیت بەرانبەر یانەیا شورتە ئێك ژ تیمێن ب هێز دناڤ خولێ‌ دا و خودانا ناسناڤێ‌ وەرزێ‌ بوری یە، هەرچەندە ل رێزا هەشتێ‌ دهێت ب 14 خالان، لێ‌ ڤێ‌ یانەیێ‌ ژی سێ‌ یاریێن پاشئێخستی هەنە، ئانكو دەلیڤەیا سەرێ‌ لیستێ‌ بەردەستە لەوما ژی بۆ ڤێ‌ یاریێ‌ دێ‌ ب هێز هێتە دناڤ یاریگەهێ‌ دا، ئەو دەنگۆیێ‌ دەست ژ كاركێشانا ڕاهێنەرێ‌ وێ‌ ئەحمەد سەلاح دبیت كارتیكرنەكا نەرێنی ل سەر نە هێتە كرن ژبەركو ئەوان دەنگۆیێ‌ بەلاڤەبوویی پرانییا یاریزانان ژ سەرەدەرییا راهێنەری بەرانبەر وان د رازی نەبوون، هەكە ڕاست بیت دێ‌ دڤێ‌ یاریێ‌ دا دیار بیت.
راهێنەر گەشبینە
د كۆنگرەیەكێ‌ رۆژنامەڤانی دا پشتی یارییا بەرانبەر دیالا مەسعۆد میرال ڕاهێنەرێ‌ تیما دهۆكێ‌ دیاركر بوو سەركەفتنا بەرانبەر دیالا پالدەرەكە بۆ یارییا بەرانبەر شورتە و خوەشحالییا خوە دیار كر كو سێ‌ خال ل سەر رێزبەندییا تیما خوە زێدەكرینە و دیاركر بوو ئاست و ئەنجامێن تیما وی یاری بۆ یاری باشتر لێهاتییە سەرباری گڤاشتنێن یارییان كو د ماوەیێ‌ سێ‌ بۆ چار رۆژان جارەكێ‌ یارییەكە دهێتە كرن و ئەڤچەندە ژی كارتیكرنا نەرێنی ل سەر جەستەیی یاریزانی دكەت و د بیتە ئەگەر نەشێت ئاستێ‌ پێدڤی نیشان بدەت و دیار كر یارییا شورتە ژی دێ‌ بزاڤێ كەن بەردەوامیێ‌ بدەنە ل سەر ئەنجامێن خوە یێن باش.
دو یاریێن پاشئێخستی ماینە
تیما دهۆكێ‌ دو یاریێن دی یێن پاشئێخستی ماینە ئەوژی بەرانبەر هەر ئێك ژ ئەلقاسم ل 21ێ‌ ڤێ‌ مەهێ‌ و نەورۆز 28ێ‌ هەر ڤێ‌ مەهێ‌ هێنە كرن، فدراسیۆنا فوتبۆلا ئیراقێ‌ ژی بڕیارا دایی یاریێن خولێ‌ نە هێنە ڕاوەستاندن، ئانكو دهێتە چاڤەڕێكرن یانەیا دهۆك رۆژا ئەینیا بهێت مێڤاندارییا یانەیا نەفت بەسرا بكەت.
هەلوەستێ‌ گشتی پشتی ب دووماهی هاتنا یاریێن ڤێ‌ گەڕێ‌.
1- ئەلنەفت 19 خال.
2- زاخۆ 19 خال.
3- زەورا 19 خال.
4- هەولێر 18 خال.
5- نەفت میسان 18 خال ژ دەهـ یارییان.
6- ئەلجەوییە 18 خال ژ هەشت یارییان.
7- ئەلشورتە 17 خال ژ هەشت یارییان.
8- نەجەف 17 خال.
9- ئەلتەلەبە 17 خال.
10- كارەبا 14 خال ژ دەهـ یارییان.
11- كەربەلا 14 خال.
12- ئەلكەرمە 14 خال.
13- ئەلمینا 12 خال ژ دەهـ یارییان.
14- ئەلكەرخ 11 خال.
15- نەفت ئەلبەسرا 11 خال.
16- ئەلقاسم 11 خال ژ دەهـ یارییان.
17- دهۆك 11 خال ژ هەشت یارییان.
18- نورۆز هەشت خال ژ نەهـ یارییان.
19- دیالا چار خال.
20- حدود سێ‌ خال ژ دەهـ یارییان.
گۆلكەرێن دهۆكێ‌ كینە
بۆ زانین شەش یاریزانان پشكداری د تۆماركرنا گۆلان دا بۆ یانەیا دهۆكێ‌ كرینە و بڤی ڕەنگی، پاشەنگ عەبدوللا چار گۆل، پیتەر گۆرگیس سێ‌ گۆل، هەر ئێك ژ بەیار ئەبۆ بەكر، شەرقی ئەلبەحری، یانیك زاكێری و كێلبرت كۆمسۆن گۆلەك تۆماركرینە.

شاهۆ فەرید:

تیما فوتبۆلا یانەیا سێمێلێ ئەوا پشكدار د خولا پلەیا ئێكا كوردستانێ بەرهەڤیێن باش كرینە بۆ وەرزێ نوو لێ دەمێن بوری دا تووشی كێشەیێن دارایی بوون و خوەش بەختانە شیان هەرزوو چارەسەربكەن.
ل دور نووترین بەرهەڤیێن تیما فوتبۆلێ‌ سەروكێ یانەیا سێمێل د. هاریوان عابد بۆ رۆژنامەیا ئەڤرۆ دا دیاركرن و گۆت: پشتی مە چەندیین هەولا بڕێكا چەندیێن بەرپرسێن شولەژێ مە گازندا خوە گەهاندە نڤێسینگەها سەروكێ حكومەتا هەرێما كوردستانێ رێزدار مەسرور بارزانی جەنابێ وی دێ پالپشتیێ ل مەكەت، پشتی مە زانی جەنابێ وی دێ پالپشتیێ‌ كەت مە ژی بەرهەڤیێن باشكرن، پێنگاڤا ئێگێ‌ گرێبەست دگەل سێ یاریزانێن پێشەكار گرێدایە دو ژ ئەوان ژ دەرڤەیی وەلاتی و ئێك ژ خەلكێ‌ باژێرێ‌ مووسلێ‌ مە ئینایە.
د. هاریوانی ئەوچەندە ژی گۆت: ئارمانجامە یا سەرەكی ئەوە تیمێ ڤەگەڕیتە پلا نایاب لڤی وەرزی پشتی دووركەفتنا نێزیكی 12 سالن، وەكۆ هەموو وەرزان هەڤڕكی بۆ دەستڤە ئینانا پلێتا دەربازبوونێ یا ب ساناهی نابیت، لێ مە باوەری ب تیما خوە هەیە ئەڤی وەرزی ئاستەكێ باش نیشان بدەین، داخوازیێ ژ جەماوەرێ یانەیا سێمێلێ دكەم بۆ ڤی وەرزی دل و گیانەكێ وەرزشی پالپشتێ تیمێ بكەن و دوور ژ توندوتیژیێ بن.
ناڤهاتی گۆت ژی: یاریگەها مە یا نوو رێژەكا باش هاتیە بجهیئنان رێژەیا 30ژ سەدێ و كار تێدا بەردەوامە دەمەكێ نێزیك دێ قوناغا ئێكێ دووماهییك هێت.

عەلی حاجی:

د داخویانیەکێ دا سەرپەرشتێ تیما باسکێت بۆلا یانه‌یا زاخۆ بۆ رۆژنامەیا ئەڤرۆ دیار کر ئەو ژ ئاستێ یاریزانێن تیمێ د رازینە و ئەو هزر د چ گوهۆڕینان دا ناکەن .
زێدەتر دلژار عەدنان گۆت: لدووف وێ پلانا دەستەکا کارگێریا یانەیا زاخۆ بۆ وەرزێ نوو یێ خولا پێشەکارێن ئیراقێ یا باسکێت بۆلێ دانایی، د قوناغا ئێکێ دا هەتا رادەیەکێ باش ب شێوەیەکێ سەرکەڤتیانە ب دوماهی هات، د قۆناغا دویێ دا چو گوهورینان دناڤ پێکهاتیێ تیما خوە دا ناکەن بەروڤاژی مە باوەرییەکا مەزن ب تیم و یاریزانێن خوە هەیە کو دێ شێن ئاست و ئەنجامێن باشتر ب دەستخوەڤە ئینن، یاریزانێن مە یێن نافخۆ و دگەل پێشەکاران شیاینە هەماهەنگیەکا باش پەیدا بکەن و دگەل بورینا دەمی ژی دێ ئەو هەماهەنگیە باشتر بیت، ژبەر هندێ دێ ب هەمان یاریزان بەردەوام بین د قوناغا دویێ دا.
ناڤبری گۆت ژی: د قوناغا دویێ دا پشت راستین دێ ئاست و ئەنجامێن تیما مە باشتر بن ژبەرکو پتر د ئێک د گەهن و پەیوەندییا وان ژی باشتر بوویە د دەمێ یاریێ دا.

د داخویانیەكێ‌ دا سەرۆكێ‌ یانەیا ئافرەتێن دهۆك یا وەرزشی دیار كر پشتی فدراسیۆنا فوتبۆلا ئیراقێ‌ بڕیارەكا توند دژی هەر یاریزانەكێ‌ پشكداری د قارەمانیەكا فدراسیۆنەكا دی دا بكەت ماف نابیت پشكداری هەر چالاكیەكا وان بكەت، لەوما مە ژی بۆ بەرژوەندییا پاشەرۆژا یاریزانێن خوە تایبەت ئەو هەر چار یاریزانێن مە دناڤ رێزێن هەلبژارتیێ‌ ئیراقێ‌ دا نە هێنە دووركرن.
زێدەتر سەردار سالح بۆ رۆژنامەیا ئەڤرۆ گۆت: هەرچەندە ل حەفتییا بۆری ب نڤێسارەكا فەرمی بۆ فدراسیۆنا تەپا بچووك- مینی فوتبۆل- ئاگەهداركربوو كو تیما مە ژی دێ‌ پشكداری قارەمانییا ئیراقێ‌ ل سەر ئاستێ‌ كچان كەن ئەوا بڕیار بوو ل دووماهییا ڤێ‌ حەفتیێ‌ باژێرێ‌ سلێمانیێ‌ مێڤاندارییا وێ‌ بكەت، هەروەسان كادرێ‌ راهێنانێ‌ و یاریزانێن مە یێن پێكهاتیێ‌ تیمێ‌ هاتبوونە ئاگەهداركرن ل حەفتییا بۆری دەست ب ڕاهێنانێن خوە كرن، هەرتشتەكێ‌ پێدڤی بۆ تیمێ‌ ژی هاتبوو بەرهەڤكرن پێخەمەت پشكدارییەكا سەرفەراز و هەڤڕكی بۆ ناسناڤی.
هەروەسان ناڤهاتی گۆت: ب مخابنی ڤە ژبەر هەبوونا ناكۆكیێن دناڤبەرا هەردو فدراسیۆنێن دیاركری دا، لژنەیا وەرزشڤانێن كچ ل فدراسیۆنا فوتبۆلا ئیراقێ‌ بڕیارەكا توند دا كو ئەو یاریزانا د وەرزەكی دا یاریێ‌ د چالاكیێن دو فدراسیۆنێن جودا بكەت دێ‌ هێتە دوور ئێخستن ژ چالاكیێن فدراسیۆنا فوتبۆلا ئیراقێ‌ و هەر چالاكییەكا گرێدایی ب هەلبژارتیێ ئیراقێ‌ یێ‌ كچان، ئەڤ بڕیارە نەرازیبوون پەیداكر لەوما ژی وەكو كارگێرییا یانەیێ‌ پشتی مە كۆمبوونا خوە كری ئەم گەهشتینە وێ‌ ئەنجامی كو بەرژوەندییا یاریزانێن خوە پارێزین و دەلیڤەیێ‌ بۆ بهێلین پشكداری د خول و قارەمانی و هەلبژارتیێ ئیراقێ‌ دا بكەن، تایبەت مە چار یاریزان هەنە دناڤ رێزێن هەلبژارتیێ‌ ئیراقێ‌ دا و هەكە مە پشكداری كر دێ‌ هێنە دوورئێخستن.
دهێتە چاڤەڕێ‌ كرن 13 یانەیێن هەرێما كوردستانێ‌ و دەڤەرێن دی یێن ئیراقێ‌ بەرهەڤی و پشكدارییا خوە بۆ قارەمانییا مینی فوتبۆلێ‌ دیار كربوو ژ وانا چار یانەیێن كوردستانی بوون ئەو ژی یانەیا ئافرەتێن دهۆك، قەرەقۆش، چەمچەمال و سیروانی هەلەبچە و بڕیار بوو ل 18ێ‌ ڤێ‌ مەهێ‌ دەستپێكەت.
بۆ زانین تیما فوتسالا یانەیا ئافرەتێن دهۆكێ‌ خودانا دو ناسناڤێن خولا كوردستانێ‌ یە و قارەمانا وەرزێ‌ بوری یە، ل وەرزێ‌ 2020-2021 و 2023-2024 بوویە قارەمان، بۆ وەرزێ‌ ئەڤ سالە ژی بەرهەڤییان دكەت ژبۆ پاراستنا ناسناڤێ‌ خوە.

فدرااسیۆنا فوتبۆلا كێشوەرێ‌ ئەفریقیا لیستا دووماهیێ‌ یا بەربژارێن بوو باشترینێن یاریزانێ‌ 2024ێ‌، ئەوا بڕیارە ئەڤرۆ د ڕێ و ڕەسمەكی دا ل مە وەلاتێ‌ مەغرب بهێنە خەلاتكرن.
ل دووڤ لیستا هاتییە هاتییە بەلاڤكرن بۆ باشترین یاریزانێن كوڕ هەرئێك ژ یە مەغربی ئەشرەف حەكیمی ژ پارێس سانجێرمان، یێ‌ كۆتیڤواری سیمۆن ئدینگرا ژ برایتۆن، یێ‌ كینیا سیرۆن گراسی ژ برۆسیا دۆرتمۆند، یێ‌ نێجیریا ئەدیمۆلا لۆكمان یێ‌ ئاتلانتا و یێ‌ ئەفریقیا باشۆر رۆنۆین وێلیامز ژ مامیلۆدی ساندۆنز.
بەربژارێن یاریزانێ‌ گەنج، كەریم كوناتی، كوتیڤوار- سالزبۆرگ و عومەر دیاكیتی، كوتیڤۆاری- ریمس و لامین كامارا، سینیگال، موناكۆ.
بەربژارێن ڕاهێنەران هەر ئێك ژ، هۆگۆ برۆس- ئەفریقیا باشۆر، ئیمرس فابی- كوتیڤۆار و سیباستیان دی سابر كۆنگۆیا دیموكراتی.
باشترین یاریزانا كچ، سەنا مەسعۆدی، مەغرب- جەیش ئەلمەلەكی، شیاما نادۆزی، نێجیریا- پاریس سانجێرمان و باربرا باندا، زامبیا- ئۆرلاندۆ براید.

كۆمەكا دادڤانێن یارییا فوتبۆلێ‌ ل سەر ئاستێ‌ پلێن ئێك، دو و نێڤدەولەتی گەڤێن خوە ڤەكێشانێ‌ بڕێڤەبرنا یاریێن خولا ستێران، پلا نایاب و ئێك یا وەرزێ‌ ئەڤ سالە كر، پشتی چەندین سۆزێن فدراسیۆنا فوتبۆلا ئیراقێ‌ بۆ دابینكرنا مووچەیێ‌ وان یێن شایستە بۆ نە هاتینە مەزاختن ئەوا د بوویە نیزیكی سالەك و شەش هەیڤە.
زییا جندەل ئێك ژ دادڤانێن بەرهەڤبووین دناڤ خوەپێشاندنا ئارام گۆت: ئەو دادڤانێن هاتینە بەغدا ژبۆ پرسیاركرن نە ڕازیبوون ل سەر گیرۆبوونا مووچەیێ‌ وان یێ‌ شایستە پرانییا وان نوونەرێن پارێزگەهـ و باژێرێن ئیراقێ‌ و كوردستانێ‌ نە، ئەوێن ئەڤە بۆ ماوەیێ‌ سالەك و شەش مەهە یاریێن خولێن ستێر، پلا نایاب و ئێكێ‌ بڕێڤە دبەن و ئێك دینارا ژی نە وەرگرتییە بەرانبەر زەحمەت و مافێ‌ وان، لەوما ژی هەموو دادڤانان دەلیڤەیا دووماهیێ‌ دایە فدراسیۆنێ‌ د ڤێ‌ حەفتیێ‌ دا هەموو شایستەیێن وان بهێنە دان.
هەروەسان گۆت: بەرپرسێ‌ لژنەیا دادڤانێن ئیراقێ‌ سەیاح عەبد گەشبینی دا مە و دیاركر سەرۆكێ‌ فدرایۆنێ‌ عەدنان درجال د پەیوەندیەكا تلەفۆنی دا دۆپاتكر كو هەتا پێنج شەمبییا بهێت ئەو شایستەیێن ماینە ل دەڤ فدراسیۆنێ‌ هەموو دێ‌ هێنە دان، زییا جندەل خویاركر هەكە د ڤێ‌ حەفتیێ‌ دا نە هاتە دان ئەو دێ‌ خوەپێشاندانێن دادڤانان بەرفرەهتر بن و دێ‌ چارەنڤیسێ‌ خوە ژی د ناڤ خولێ دا دیار كەن.