هەولێر، قائید میرۆ

پەیڤدارێ ئێكەتیا وەبەرهێنەرێن كوردستانێ ئاشكراكر، پێداچوونەكا تەمام ل پڕۆژێن ئاكنجیبوونێ دێ هێتەكرن و نوكە بازاڕ نەمایە و ب سەرمایێ 10 ملیار دۆلاران شوقە و ڤلا ل بازاڕی هەنە و كڕیار نینە هەروەسا دبێژیت: ئەم گەشبینین دێ ئەڤ سالە بازاڕ خۆشبیت و نوكە پێڤە دێ زێدەتر مۆلەت ب ڤان پڕۆژەیان هێتەدان یێن د بەرژەوەندیا تەخا هەژاردا بن.

مەلا یاسین، پەیڤدارێ ئێكەتیا وەبەرهێنەرێن كوردستانێ بۆ رۆژناما ئەڤرۆ دیار كر «ل سەر دەمێ كابینا نەهێ گرنگیەكا زۆر ب كەرتێ ئاكنجیبوونێ هاتیەدان یێن د چوارچوڤێ وەبەرهێنانێ هاتینە ئاڤاكرن، هندەك پیڤەرێن باش هاتینە دیاركرن بۆ بجهئینانا پڕۆژێن ئاكنجیبوونێ، مخابن هندەك پڕۆژە بووینە سەر ئێش و پارەیەكێ زۆرێ وەلاتیان ب رێیا پڕۆژێن وەبەرهێنانێ ئاسێ بوویە.
زێدەتر گۆت: ل چەند سالێن بۆری هژمارەكا بەرچاف یا مۆلەتێن پڕۆژێن ئاكنجیبوونێ هاتینەدان ل هەموو پارێزگەهان و ئیدارەیێن سەربخۆ، راگرتنا مۆلەتا پڕۆژێن ئاكنجیبوونێ ژلایێ حوكمەتا هەرێما كوردستانێ مەرەم ئەڤە جارەكا دی پێداچوون د كەرتێ ئاكنجیبوونێ دا بهێتەكرن و نوكە پێڤە زێدەتر مۆلەتێ بدەنە وان پڕۆژەیان یێن د بەرژەوەندیا وەلاتیێن هەژار دا، چونكە سالێن بۆری زێدەتر ئەو پڕۆژە هاتینە بجهئینان یێن د بەرژەوەندیا خەلكێ زەنگین و زێدەتر ئەو مفاداربووینە نەك خەلكێ هەژار و كرێدار، چەندین قەیرانان هەرێما كوردستانێ ڤەگرتیە و كاریگەری ل سەر بازاڕێ خانووبەران پەیداكریە.
پەیڤدارێ ئێكەتیا وەبەرهێنەران گۆت «سەرۆكایەتیا جڤاتا بلندا وەبەرهێنانێ بڕیارا راگرتنا پڕۆژەیان دەركریە و ل هەرێما كوردستانێ ب سەرمایێ 20 ملیار دۆلاران وەبەرهێنان هاتیە ئەنجامدان، ب تنێ د بیاڤێ ئاكنجیبوونێ دا و د دەمێ نوكەدا ب سەرمایێ 10 ملیار دۆلاران پڕۆژە ل بازاڕی هەنە و بكڕ نینن، چونكە خواست نینە ل سەر كڕینا یەكەیێن ئاكنجیوونێ، ئەركێ حوكمەتا هەرێما كوردستانێ یە پارێزگاریێ ل سەرمایێ وەبەرهێنەرا بكەت و رێكێ نەدەت وەبەرهێنەر سەرمایێ بكەڤیتە مەترسیێ دا، لەوڕا بڕیارا راگرتنا پڕۆژێن ئاكنجیبوونێ بڕیارەكا گرنگە بۆ قۆناغا نوكەیا ئەم تێداینە، ئەو پڕۆژەیێن نوكە ل هەولێر و دهۆك و سلێمانیێ هەنە بكڕ نەبن و نەهێنە فرۆتن باژێڕێن دێ نە شیرین بن و هەموو بووینە هەیكەل ئەڤە ژی دیمەنێن نە شارستانینە.
مەلا یاسین ئاماژە كر «هەتا بازاڕ بەرەف باشتر بچیت دێ مۆلەتێن نوو هێنەدان، پێشبینی دكەین پشتی پێداچوونێ بازاڕێ هەرێما كوردستانێ بەرەف باشتر بچیت، چونكە چەندین ئەگەر هەنە بۆ ڤەژینا بازاڕێ خانیان ل هەرێما كوردستانێ ژ وانێ ل توركیا بازاڕ نەمایە و ل ئیراقێ ژی مفا چوویە سەر هندەك پارەیێن دەنە وەلاتیان، هەروەسا رەوشا ئیرانێ و سووریێ ژی بەرەف ئالۆزیان دچیت و زێدەتر دێ كاریگەریێن باش ل سەر بازاڕێ هەرێما كوردستانێ هەبیت، بازاڕێ هەرێما كوردستانێ دێ زۆر باشتر بیت، ئەو ژی هەتا پڕۆژەیێن نوكە ل بازاڕی هەنە بهێنە ئێكلاكرن، ژبەركو مە وەبەرهێنەر هەیە ب گوژمێ 400 ملیۆن دۆلاران یەكە هەنە و بازاڕ نینە، ئەگەر حوكمەتا فیدڕال یا پێگیربیت ل سەر سۆزێن خوە بۆ هنارتنا مووچێ فەرمانبەرێن هەرێما كوردستانێ ئەڤە دێ كاریگەری ل سەر بازاڕی هەبن و ئەز زۆرێ گەشبینم كو بازاڕ دێ زۆر باشتربیت و ژ ڤێ قەیرانێ رزگاربین.

مەحموود نهێلی:

ب بەرهەڤبوونا وارشین سەلمان دەڤەردارێ ئامێدیێ و ویان برایم كونسولێ گشتی یێ فرەنسا ل هەێما كوردستانێ یاداشتەك بۆ نووژەنكرنا شەش جهێن شوونواری ل دەڤەرا ئامێدیێ هاتە ئیمزا كرن. دەڤەردارێ ئامێدیێ زێدەتر دیار كر كو ئەو جهێن شوونواری یێن دێ ژلایێ وەلاتێ فرنسا ڤە هێنە نووژەنكرن پێك دهێن ژ زانینگەها قوبەهان، منارا ئامێدیێ، گورستانا میرا، كنیشتا جوهیان، كەنیسا كلدانیا و كورا سێریجێ.

وارشین سلمان دەڤەردارێ ئامێدیێ بۆ ئەڤرۆ نیوز دیار كر، ب بەرهەڤبوون كەیفی مستەفا رێڤەبــەرێ گشتی یێ شوونوارین هەرێما كوردستانێ و بێكەس جمال بریفكانی رێڤەبـەرێ شوونوارین پارێزگەها دهوكێ و رێڤەبەرێن دام و دەزگەهێن میری پێشوازی ل یان برایم كونسلێ گشتی یێ كومارا فەرەنسا ل هەرێما كوردستانێ و شاندەكێ دگەل دا كریە كو پێكهاتبوون ژ ڤالێری فریلاند رێڤەبەرێ جێ بەجێكار ژ دەزگەهێ « ئەلیف « و خانم « سێڤیرین پیترز « رێڤەبەرا بەشێ ئابووری ل دەزگەهێ ئێكسپێرتیز فرانس و گۆت: ل هۆلا سمینارا مە كومبوونەك ل سەر نووژەنكرنا هند جهێن شوونواری ئەنجامدا.
دەڤەردارێ ئامێدیێ سوپاسیا پشتەڤانیا بەردەواما گەل و حوكمەتا فەرەنسا كر بۆ وێ گرنگیدانا ئەو دەنە دەڤەرا ئامێدیێ ب تایبەت گرنگیدانا وان بۆ جهێن شوونواری و هیڤی خواستن ئەڤ رەنگە هاریكاریە د بەردەوامبن.
هەر د ڤێ كۆمبوونێ دا كونسلێ گشتی یێ فەرەنسا پەیڤەك پێشكێشكر و تێدا بەحسێ نووژەنكرنا وان هەر « شەش « جهێن شوونواری یێن ئامێدیێ كر و پاشان یاداشتا نووژەنكرنا ڤان جهێن شینواری ژلایێ دەزگەهێ ئەلیف یێ فەرەنسی و شوونوارێن كوردستانێ ڤە هاتە ئیمزاكرن كو دێ ب گۆژمێ ملیونەك و چار سەد هزار یۆرویان ژلایێ ڤی دەزگەهی ڤە هێنە نووژەنكرن.
دەڤەردارێ ئامێدیێ زێدەتر دیار كر كو ئەو جهێن شوونواری یێن دێ ژ لایێ وەلاتێ فرنسا ڤە هێنە نوژەنكرن پێك دهێن ژ زانینگەها قوبەهان، منارا ئامێدیێ، گورستانا میرا، كنیشتا جوهیان، كەنیسا كلدانیا و كورا سێریجێ.