تیما یانەیا ئافرەتێن دهۆك یا وەرزشی بۆ جار دویێ‌ د دیرۆكا خوە دا ناسناڤێ‌ خولا فوتسالا كوردستانێ‌ ب دسەتڤە ئینا پشتی د یارییا دووماهیێ‌ دا ب سەركەفتی ل سەر كچێن یانەیا زاخۆ ب ئەنجامێ‌ شەش گۆلان بەرانبەر گۆلەكێ‌، د یارییا واندا ئەوا ل پێنج شەمبییا بۆری هۆلا زانكویا زاخۆ ل باژێرێ‌ زاخۆ مێڤانداریا وێ‌ كر.
هەر شەش گۆلێن ئافرەتێن دهۆكێ‌ ژلایێ‌ یاریزانان سیپەل شوكر چار گۆل سۆپەر هاتریك، یوسرا ئیبراهیم و ئاواز یونس، گۆلا ئێكانە یا كچێن زاخۆ ژلایێ‌ دێرین محەمەد هاتنە تۆماركرن، بڤێ‌ سەركەفتنێ‌ تیما فوتسالا ئافرەتێن دهۆك ناسناڤێ‌ خوە یێ‌ دویێ‌ ب دەستڤە ئینا پشتی یێ‌ ئێكێ‌ ل وەرزێ‌ 2020-2021ێ‌ ئینایی و خەونێن كچێن زاخۆ بۆ وەرزەكێ‌ دی پاشڤە بر ئەوا ئەڤە دبیتە وەرزێ‌ دویێ‌ ل دووڤ ئێك دەربازدبیتە یارییا دووماهیێ‌ و ناگەهیتە ناسناڤێ‌ ئێكێ‌، هەروەسان هێرشبەرا دهۆكێ‌ سیپەل شوكر ب تۆماركرنا 19 گۆلان بوو گۆلكەرا قارەمانیێ‌.
ل دور ڤێ‌ دەستكەفتێ‌ سەردار سالح سەرۆكێ‌ یانەیا ئافرەتێن دهۆكێ‌ بۆ رۆژنامەیا ئەڤرۆ گۆت: سۆپاس بۆ خودێ‌ ئەم شیایین د ماوەیەكێ‌ كێم دا دەست ب كاربوونا خوە كو بتنێ‌ سێ‌ هەیڤان دا تیما فوتسالا كچان پێكبینن و پشكداریێ‌ د خولا كوردستانێ‌ دا بكەین و سەرفەرازی ناسناڤی ب دەستخوە بینن، سۆپاسییا پارێزگارێ‌ دهۆكێ‌ د. عەلی تەتەر دكەین كو هەر ژ رۆژا ئێكێ‌ پشتەڤانێ‌ كارگێریێ‌ و وەرزشا كچان ل پارێزگەهێ‌ بوویە كو ئێك ژ ئەگەرێن سەرەكی یێ‌ دەستڤە ئینانا ناسناڤی بوو.
هەروەسان ناڤهاتی گۆت: مە وەكو كارگێری رژدی و سۆزدابوو پێنگاڤ و پشكدارییا مە یا ئێكێ‌ ب سەرفەرزای و ناسناڤ بیت، ئەم دێ‌ بەردەوامبیت ب پشتەڤانییا پارێزگارێ‌ دهۆكێ‌ وەرزشا یانەیا ئافرەتێن دهۆكێ‌ بەر ب پێشڤە ببەین و كچێن پارێزگەهێ‌ زێدەتر روولێ‌ خوە بینن، نەبتنێ‌ یارییا فوتسالێ‌ بەلكو بۆ هەر یارییەكا وەرزشی بیت و پشتەڤانی ل مە بهێتە كرن.
بۆ زانین تیما ئافرەتێن دهۆكێ‌ وەكو قارەمانا كۆما ئێكێ‌ دەربازبوو قۆناغا چارگۆشەیا زێرین ب شەش سەركەفتنێن ل دووڤ ئێك و كۆمكرنا 18 خالان، ژلایێ‌ خوە تیما كچێن یانەیا زاخۆ وەكو قارەمانا كۆما دویێ‌ دەربازبوو چارگۆشەیا زێرین پشتی ب كۆمكرنا 12 خالان، د ڤێ‌ قۆناغێ‌ دا ئافرەتێن دهۆكێ‌ ل سەر ئەردێ‌ خوە ب چار گۆلێن پاقژ سەركەفتن ل سەر كچێن سیروانی هەلەبچە ئینا ول یاریگەها وێ‌ ب سێ‌ گۆلان وەكهەڤبوو، ژلایێ‌ خوەڤە زاخۆ ب 3-1 گۆلان سەركەفتن ل سەر كچێن سۆران ئینا و یارییا دویێ‌ دا ب4-2 تووشی خوسارەتیێ‌ بوو لێ‌ دەربازبوونا خوە بۆ یارییا دووماهیێ‌ مسۆگەر كربوو.

عەلی حاجی:

تیما باسكێت بۆلا یانه‌یا زاخۆ ناسناڤێ خولا پلا نایابا ئیراقێ ل سه‌ر ئاستێ لاوان ژ ده‌ست داپشتی دگه‌ل یانه‌یا حلله‌ ب ئه‌نجامێ ژ چارچوڤێ یاریا گەرا دوماهیێ ژ خولا نایابا لاوێن 61 – 50 خالان، د یارییا واندا ئه‌وا دوهی ل باژێرێ حلله‌ ژ چارچووڤه‌یێ گه‌ڕا 12ێ و دووماهیێ ژ خولێ هاتییه‌ كرن.
د داخویانیه‌كێ دا دلژار عەدنان ئەندامێ کارگێریا یانه‌یا زاخۆ بۆ رۆژنامه‌یا ئەڤرۆ دیار کر تیما مە یا لاوان د وەرزێ ئەڤ سالە دا شیا بوو ئاستەکێ باش پێشکێش بکەت و دووماهی یاری بەرامبەر لاوێن حللە بوو، لێ مە نەشیا سەرکەڤتنێ تومار بکەین ب جووداهییا ١١ خالان تیما مە تووشی خوسارەتیێ بوو ب ٥٠ خالان بەرامبەر ٦١ خالان و ب وێ خوسارەتیێ ژی مە ناسناڤێ خولا نایابا لاوێن ئیراقێ یا باسکێت بولێ ژ دەستدا و بووینه‌ خودانا رێزا دویێ د خولێ دا، لی دێ ب ڕێیا تیما لاوان دێ خال ل سه‌ر تیما مە یا پێشکەڤتیان زێدە بن و خال ب تیما مە هێنە دان، گه‌شبینن ب تیما خوه‌ یا لاوان ژبه‌ركو یا ڕێک و پێکە و دێ پاشەرۆژێ دا مفایەکێ باش ژێ هێتە دیتن و ئەم دێ شین پشت بەستنەکا باش ل سەر یاریزانێن خوە یێن زاخۆ کەن.
زێدەتر ناڤبری گۆت ژی: ئەوا پێدڤی بوو ل سەر کارگێریا یانێ و دەستەیا راهێنەران و یاریزانان ئەنجامدان و رێزا دویێ ژی د خولێ دا یا باشە و ژ دەستکەڤتێن گرنگە و رۆژ بۆ رۆژێ ئاستێ تیما مە بەرەڤ پێش ڤە دچیت

تیما تەپا پێی یا یانەیا دهۆك وەكهەڤییا دویێ‌ ل دووڤ ئێك و پێنجێ‌ د خولا ستێرێن ئیراقێ‌ دا، پشتی د یارییا دێربیێ‌ كوردستانێ‌ دگەل خودانێن ئەردی یانەیا هەولێر ب گۆلەكێ‌ وەكهەڤبوویی، ئەوا ل ئەینییا بۆری ژ چارچووڤەیێ‌ گەڕا 16ێ‌ ل یاریگەها شەهید فرانسۆ حەریری هاتیە كرن.
پشتی ب دووماهی هاتنا یاریێ‌ ئەحمەد خەلەف راهێنەرێ‌ تیما دهۆكێ‌ بۆ دەزگەهێن راگەهاندنێ‌ گۆت: ئەز ژ ئاستێ‌ یاریزانێن خوە د رازیمە و ئەڤ ئەنجامە ژی هەر ئەم یێن هێلاینە رێزێن پێشیێ‌ د ناڤ مەزنە یانەیێن خولێ‌ دا، لێ‌ یا سەیر ئەوا د دێربیێ‌ كوردستانێ‌ دا ژ خولا ئیراقێ‌ گڤاشتنێن دەرۆنی و هەستیاری د ناڤبەرا وان یانەیان دا پەیدا دبیت، ئەوا د دێربیێن دناڤبەرا یانەیێن كوردستانێ‌ د خولا ئیراقێ‌ دا چێدبیت یێن پایتەختێ‌ ئیراقێ‌ و پارێزگەهێن دی نا چێبن، هەكە سەركەفتن د دێربیەكێ‌ كوردستانێ‌ دا هات دبیت توندوتیژی دناڤبەرا جەماوەرێ‌ هەردو یانەیان دا دهێتە دیتن، هەر وەسان جەماوەر زێدەتر حەز دكەت سەركەفتنا تیما وان گرنگترە ژ هەڤڕكیێ‌.
بۆ زانین پشتی ب دووماهی هاتنا یاریێن گەڕا 19ێ‌ ژ خولا ستێرێن ئیراقێ‌ كو دبیتە دووماهی هاتنا قۆناغا ئێكێ‌ ژ خولێ‌ بڕیارە هەڤڕكیێن گەڕا 20 بۆ 31ێ‌ ئەڤێ‌ مەهێ‌ بهێتە پاشئێخستن، ژبەر پشكدارییا هەلبژارتیێن ئیراقێ‌ د ڤارڤارتنێن دەربازبوونێ‌ بۆ مۆندیالا جیهانی 2026ێ‌ و دووڤدا دێ‌ یانەیا دهۆك ل یاریگەها خوە یانەیا جەوییە مێڤان كەت.

قەیس وەیس:

فیدراسیۆنا فوتبۆلا كوردستانێ‌ د دووماهی كۆمبوونا خوە یا حەفتیانە دا چەند بڕیار و راسپاردە یێن نوو دەركرن پشتی وەرگرتنا راپۆرتێن سەرپەرشتیار و دادڤانێن یاریێن خولا پلا نایاب و ئێكا كوردستانێ‌، بۆ جارا ئێكێ‌ د وەرزێ‌ ئەڤ سالە دا زوورترین سزایێن دارایی كو دگەهنە 15 ملیۆن و 400 هزار دینار، كێمترین سزا 150 هزار بوون و زووترین پێنج ملیۆن دینار بوون، دیسان یێن كارگێری بەرانبەر شەش یانە، سێ‌ راهێنەر، دو هاریكارێن وان و هەشت یاریزانان دگەل چار سەرپەرشتێن تیمان و ئێك كارگێرێ‌ تیمێ‌ و راگەهاندكارە دهێنە دان.
د گرنترین بڕیارێن سزایان كو ژبەر توندوتیژیێ‌ و دوور ژ گیانێ‌ وەرزشی هاتیە كرن بڤی رەنگی بووینە، راگرتنا ئەندامێ‌ فیدراسیونا فوتبۆلا كوردستانێ‌ كرێكار زرار هەتا كێشەیا یانەیا كویە دگەل خاك بهێـتە چارەسەركرن، دیسان راگرتنا راهێنەرێ‌ كۆیە زرار كرێكار بۆ سێ‌ وەرزان و دو ملیۆن دیناران هەتا یزادان، هەروەسان راگرتنا هاریكارێ‌ وی رێكار كرێكار بۆ ئێك سال و ئێك ملیۆن سزادا، دیسان یانەیا كۆیە ب كێمكرنا حەفت خالان ل وەرزێ‌ بهێت و پێنج ملیۆن دیناران هاتە سزادان.
هەر ژ ئەوان بڕیارێن سزاییان یاریزانێ‌ هێلا ناڤین یێ‌ یانەیا ئاكرێ‌ د خولا پلا نایاب دا دلۆڤان سالح بۆ دۆ یارییان هاتە دووركرن و دو 250 هزار دیناران سزادا، دیسان راگرتنا سەرپەرشتێ‌ تیما یانەیا زاخۆ سەردار عومەر بۆ دو یارییان و ب پێنج سەد هزار دیناران هاتە سزادان، دیسان چەندین بڕیار و راسپاردێن دی ژی هەبوون.

چاڤەڕێ‌ دهێتە كرن ئەڤرۆ و سوبەهی ل دەمژمێر 2:30 پشتی نیڤرۆ هەڤڕكیێن گەڕا 24ێ‌ ژ خولا پلا نایابا كوردستانێ‌ ب ئەنجامدانا هەشت یارییان، ئاكرێ‌ چاڤ ل سەرێ‌ لیستێ‌ یە، دهۆك و زاخۆ دێ‌ بزاڤێن شكەستنا وەكهەڤییا بۆری ب سەركەفتنێ‌ و پێشڤەچوونێ‌ د رێزبەندیا خولێ‌ دا كەن. بڕیارە هەرسێ‌ یانەیێن پارێزگەهێ‌ و ئیدارا سەربەخوەیا زاخۆ یاریێن خوە سوبەهی ئەنجامبدەت و بڤی رەنگی خوارێ‌.
تیما یانەیا دهۆك دێ‌ ل پارێزگەها سلێمانیێ‌ بیتە مێڤانا یانەیا دەربەندیخان د دتاقیكرنەكا دی یا بزحمەت بۆ قوتابیێن رابین هاشم و ئەلهۆیێن چیا ئەوا ب28 خالان رێزا 11ێ‌ دهێت ژ حەفت سەركەفتن و حەفت وەكهەڤییان، خودانێن ئەردی 30 خال هەنە و رێزا هەشتێ‌ دهێت، د یارییا وان یا قۆناغا ئێكێ‌ دا ئەوا ل یاریگەها دهۆكێ‌ هاتبوو كرن هەردو تیم ب دو گۆلان وەكەهەڤبوون، ئەڤ یارییە بۆ ئەلهۆیێن چیا دەلیڤەیە چەند رێزەكێن دی ژی پێشڤە بهێت و هێدی خوە ژ رێزبەندییا داكەفتنێ‌ دووربێخیت.
ژلایەكێ‌ دووڤە تیما یانەیا زاخۆ دێ‌ بەرانبەر زەحمەترین ئەركێ‌ خوە دا بیت، دەمێ‌ ل باژێرێ‌ پیرمام دبیتە مێڤانا یانەیا پێشمەرگەیا هەولێرێ‌، كوڕێن خابووری ئەوێن 31 خال كۆمكرین رێزا حەفتێ‌ دهێت ژ شەش سەركەفتن و 13 وەكهەڤییان ئێك ژوان یاریێن وەكهەڤی دگەل تیما پێشمەرگەیا هەولێرێ‌ بوو د قۆناغا ئێكێ‌ دا ئەوا ل یاریگەها دەلال بێ‌ گۆل ب دووماهی هاتی، لێ‌ قۆناغا دویێ‌ ئاست و ئەنجام هاتینە گوهۆڕین و نوكە پێشمەرگە خودانا سەرێ‌ لیستێ‌ یە ب 40 خالان و دێ‌ شەڕەكێ‌ دژوار بۆ سێ‌ خالێن یاریێ‌ هێتە كرن.
ژلایێ‌ خوە ڤە تیما یانەیا ئاكرێ‌ دێ‌ دناڤ ئەرد و جەماوەرێ‌ خوە دا مێڤاندارییا یانەیا سەید سادق كەت، یانەیا ئاكرێ‌ 37 خال كۆمكرینە ژ 10 سەركەفتن و حەفت وەكهەڤییان و چاڤ ل سەرێ‌ لیستێ‌ یە و بهیڤی یە سەركەفتنا خوە یا قۆناغا ئێكێ‌ د یارییا ئەڤرۆ دا دۆبارەبكەتەڤە، سەیدسادق خودانا 27 خالانە رێزا 12 دهێت.
بۆ زانین چار یاری دێ‌ ئەڤرۆ هێنە كرن، شەقلاوە- رانیە، برایەتی- ئارارات، سیروانی نوو- شێروانە، هەولێر- هندرین، سوبەهی، سۆران- چوارقۆرنە.
هەلوەستێ‌ گشتی بڤی رەنگی یە.
1- پێشمەرگەیا هەولێر 40 خال
2- شێروانە 40 خال.
3- ئاكرێ‌ 37 خال.
4- سیروانی نوو 35 خال.
5- رانیە 35 خال.
6- هندرین 31 خال.
7- زاخۆ 31 خال.
8- دەربەندیخان 30 خال.
9- چوارقۆرنە 30 خال.
10- برایەتی 28 خال.
11- دهۆك 28 خال.
12- سەیدسادق 27 خال.
13- هەولێر 26 خال.
14- ئارارات 24 خال.
15- سۆران 24 خال.
16- شەقلاوە 23 خال.