قەیس وەیس:

چاڤەڕێ‌ دهێتە كرن ئەڤرۆ و سوبەهی چار یاریێن مایی ژ هەڤڕكیێن گەڕا 11ێ‌ یا خولا ستێرێن ئیراقێ‌ یا فوتبۆلێ‌ بهێنە ئەنجامدان، هەردو هێزێن پارێزگەهێ‌ دهۆك و زاخۆ ل پایتەختێ‌ ئیراقێ‌ دێ‌ شەڕی بۆ دەستڤە ئینانا سێ‌ خالێن یاریێ‌ كەن.
تیما فوتبۆلا یانەیا دهۆك دێ‌ ل یاریگەها ئەلمەدینە یا پایتەختێ‌ ئیراقێ‌ بەغدا بیتە مێڤانا یانەیا حدود ئەوا دێ‌ ل دەمژمێر 2:30 پشتی نیڤرۆ هێتە كرن، ئەلهۆیێن چیا ژ سەركەفتنەكا باش چووینە بەغدا و گەشبینن بەردەوامیێ‌ بدەنە پێشڤەچوونێ‌ د خولێ‌ دا ئەوا نوكە ژ حەفت یارییان هەشت خال كۆمكرینە ل رێزا 17ێ‌ دهێت، ئەڤ رێزبەندییە یا دەمكییە ژبەركو ژبلی ڤێ‌ یاریێ‌ سێ‌ یاریێن دی یێن پاشئێخستی هەنە دگەل هەر ئێك ژ شورتە، ئەلقاسم و نەورۆز، د بەرانبەر دا یانەیا حدوود پشتی ئەنجامدانا نەهـ یارییان شیا ئێكەم سەركەفتن د گەڕا 10ێ‌ دا بەرانبەر یانەیا نەورۆز بینت پشتی هەشت خوسارەتیان و ب سێ‌ خالان ل رێزا 20ێ‌ و دووماهیێ‌ دهێت، دبیت وەكو ئەرك بهێـتە گۆتن یا ب سانەهی بیت بۆ تیما دهۆكێ‌ چو ژلایێ‌ ئەنجامان بیت یان ژی شیان و ئاستێ‌ یاریزانان لێ‌ سەركەفتنا حەفتییا بۆری یا حدوود ل سەر نەورۆز دێ‌ وەكە زاخەكا باشتر بهێنە دناڤ یارییا ئەڤرۆ دا.
ژلایێ‌ خوەڤە تیما یانەیا زاخۆ سوبەهی رۆژا ئەینی ل دەمژمێر 2:30 پشتی نیڤرۆ دێ‌ ل بەغدا بیتە مێڤانا یانەیا نەفت و چاڤێ‌ وێ‌ ل سەركەفتنێ‌ یە ژبۆ پاراستنا سەرێ‌ لیستا خولێ‌ ئەوا ب19 خالان ژ پێنج سەركەفتن، چار وەكهەڤی و خوسارەتیەكێ‌ بۆ حەفتییا دویێ‌ ل دووڤ ئێك ئێكەم جارە د دیرۆكا خوە دا سەرێ‌ لیستێ‌ دهێت، د بەرانبەر دا یانەیا نەفت ژی هەڤڕكەكا دژوارە ئەوا بتنێ‌ سێ‌ خالان كێمترە ب 16 خالان رێزا سێیێ‌ دهێت، یاری بۆ كوڕێن خابۆری ب سانەهی نابیت لێ‌ ب مورالەكا بلند و هاتنا جەماوەرێ‌ وێ‌ بۆ بەغدا دێ‌ بیتە پالدەر پێخەمەت ب دەستڤە ئینانا سەركەفتنێ‌ و پاراستنا جهێ‌ خوە.

عەلی حاجی:

د داخویانیەکێ دا سەرپەرشتێ تیما فوتبۆلا یانه‌یا زاخۆ بۆ رۆژنامەیا ئەڤرۆ دیار کر یاریا وان بەرامبەر یانه‌یا نەفت ژ گرنگترین یاریایە بۆ وانا و چاڤێ وان ژی ل پاراستنا سەرێ لیستا خولێ یه‌ ئه‌وا بڕیاره‌ سوبه‌هی ژ چارچووڤه‌یێ گه‌ڕا 11ێ یا خولا ستێرێن ئیراقێ بهێته‌ كرن.
زێدەتر حەمید ئیسماعیل گۆت : پشتی سەرکەڤتنا تیما مە دگەل شورتە قارەمانا وەرزێ بوری،ژ روویێ دەروونی ڤە چوویه‌ د قوناغەکا باش دا و ئاستەکێ باش دەرباز دبیت تایبەتی ژی نوکە دا هەموو یاریزان ڤەگەریاینە و چو کێشەیێن هنگاڤتنێ و بێ بەهر بوونێ نینن، بۆ یاریا دگه‌ل نەفت ئامادەینە كو ئێک ژ گرنگترین یاریێن ڤی وەرزی نە بۆ تیما مە ژبەرکو سەرکەڤتن دێ شێن رێزا ئێکێ مسوگەر کەین ئەڤە ژی ئارمانجا مەیە و نابیت سڤكاتیێ ب چ تیمان بكه‌ین، به‌رهه‌ڤی هاتینه‌كرن و ڕاهێنەرێ تیمێ کار ل سەر هێلێن لاوازییا تیما بەرامبەر کرینە.
ناڤبری گۆت: د نوکە دا ئەرکێ مە ب زەحمەت کەڤتییه‌ ژبەرکو هەموو تیمان دڤێت سەرکەڤتنێ ل سەر مە تومار بکەن چنكو ئەم رێزا ئێکێ د خولێ دا دهێن.

رەمەزان زەكەریا:
د داخویانیەكێ دا كاپتنێ یانەیا ئاكرێ ئاشكراكر پشتی بدەستڤەئینانا ناسناڤێ‌ خول و سۆپەڕا كوردستانێ‌ مۆرالەكا بلند بوو مە پەیداكرییە،بۆ وەرزێ‌ ئەڤ سالە ژی ب زاخەكا بلند بەرهەڤبووینە پێخەمەت پاراستنا ناسناڤێن خوە، خالا هێزێ‌ یا تیما مە دناڤ یاریگەها خوە دا سەركەفتینە
زێدەتر ئەركان مەنسۆر بۆ رۆژنامەیا ئەڤرۆ گۆت: د وەرزێ‌ نوو دا هژمارەكا یانەیان بەرهەڤیێن باش و بهێز هاتینە ناڤ خولا نایابا كوردستانێ دا، هەرچەندە ئەركێ‌ مە ب سانەهی نابیت لێ‌ بزاڤێن مە سەركەفتنە د هەموو یارییان دا و یا دشیاندا بیت دێ‌ كەین.
ناڤبری ل دۆر نەمانا وی دگەل یانەیا دهۆكێ‌ گۆت: ئێكەم خال دگەل راهێنەرێ یانەیێ بوو چ بڕیارێن دروست نەدان ل گۆر ئاستێ من بن، خواندنا من بۆ راهێنەری كری سەرەرای بیانی بوو یێ خولا ئیراقێ نەبوو، غەدر لمن هاتە كرن ژبەركو وی ئەو یاریزان هەلبژادن كو سیڤیێن وان ب هێز بوون لێ بێی ئەنجامدانا یارییەكێ بمن بكەت و ئاستێ من بزانیت یان یاریزانێن نوو بریار ل سەر سیڤی دا نەك یاریكرنێ، راهێنەری نەدڤیا ئاستێ من ببینیت و رێك نەدا چ یارییان بكەم لەورا ئەڤێ ب غەدرەكا مەزن دبینم، بێی ئەنجامدانا یاریان بریار ل سەر من هاتە دان و رۆژانە ل دەمێ راهێنانان ژی چاڤ ل سەر من نەبوو، من راستەوخۆ گۆتێ چەند داخوازیێن خولا ئیراقێ ژبەر یانەیا دهۆك ڕەدكرینە بۆچی بڤی رەنگی رەفتار گەل من بهێتە كرن، ئێكەم جار ڕاهێنەری و پاشان ئیدارێ غەدر لمن كر ژبەركو دەرفەت دا چەند یاریزانێن نوو بەرۆڤاژی چ دەرفەت نەدا من،ل دووماهیێ نەچار كرم گرێبەستا خوە هەلوەشینم.
هەروەسان ئەركانی گۆت :هەتا نوكە یانەیا ئاكرێ پێنج یاری ئەنجامداینە ب تنێ من شیایە دو یاریا پشكدار بم و هەردو یاریا دو گولا تۆمار بكەم، تووشی هنگاڤتنێ بوومە و نەشیامە سێ یاریا پشكدار ببم، من پلان هەیە بۆ باشترین یاریزان و گولكارێ خولێ دێ بەردەوام بم ل بزاڤێن خوە بۆ تۆماركرنا گولێن زێدەتر.
ل دووماهیێ‌ گۆت: یانەیا ئاكرێ هەموو دەما خۆدان جەماوەرەكێ زۆر و ب هێز بووە و ئەنجامێن باش یێن یانەیێ‌ وەكرییە جەماوەر دلگەرمتر ببیت و ببیتە پشتەڤانەكێ سەرەكی بۆ یانەیێ چەند سال بوو جەماوەر دلشكەستی ببوو لێ جەماوەر ب هێزڤە یێ دگەل یانەیێ ئاشبووی و پشتەڤانیا یانەیا خوە دكەن ل نافخۆیا ئاكرێ و دەرووبەر، ئەڤەژی هێزەكا مەزن ب یانەیێ دبەخشین ل دەمێ یاریكرنێ.

د داخویانیەكێ‌ دا ئەندامێ‌ فدراسیۆنا تێنسا ئەردی ل ئیراقێ‌ دیار كر سوبەهی ئەینی یاریگەهێن یانەیا دهۆك دێ‌ مێڤاندارییا قارەمانییا ئیراقێ‌ ل سەر ئاستێ‌ كچان یێن لاوان كەت، وەكو دووماهی چالاكییا وەرزێ‌ 2024ێ‌ و ژێگرتنا پێكهاتیەكی بۆ هەلبژارتیێ‌ ئیراقێ‌ خوە بەرهەڤكرن بۆ قارەمانیێن دەرڤە.
زێدەتر د هەمان دەمدا سەعید خەلیل كەسایەتیێ‌ وەرزشڤان ل پارێزگەها دهۆكێ‌ بۆ رۆژنامەیا ئەڤرۆ گۆت: ل دووڤ بەرنامەیێ‌ سالانە یێ‌ فدراسیۆنا تێنسا ئەرد یا ئیراقێ‌ بڕیارە دو قارەمانی ل سەر ئاستێ‌ كوڕان و كچان ل پارێزگەها دهۆكێ‌ و پایتەختێ‌ ئیراقێ‌ بەغدا بهێتە كرن، یا ئێكێ‌ ئەڤرۆ ل بەغدا ل سەر ئاستێ‌ یاریزانێن كوڕ بۆ ژیێ‌ ل بن 14 سالی دا بیت و قارەمانییا دویێ‌ ل سەر هەمان ژی بۆ ئاستێ‌ كچان یاریگەهێن یانەیا دهۆك سوبەهی ئەینی دێ‌ مێڤاندارییا وێ‌ كەت.
ژلایەكێ‌ دووڤە ناڤهاتی ئەوچەندە ژی خویا كر ئەڤ هەردو قارەمانییە دێ‌ وەكو ڤاڤارتنەكێ‌ بن بۆ یاریزانێن پیشەكار و یێن نوو ل سەر ئاستێ‌ ئیراقێ‌ پێخەمەت ژێگرتنا كۆمەكا باش بۆ هەلبژارتیێ ئیراقێ‌ یێ هەردو ئاستان خوە بەرهەڤكرن بۆ قارەمانییا رۆژئاڤا ئاسیا ئەوا بڕیارە ل سالا بهێت پارێزگەها دهۆكێ‌ مێڤاندارییا وێ‌ بكەت.
بۆ زانین ل سەر ئاستێ‌ تیما كچان هەردو یاریزانێن یانەیا دهۆك زەلال سەعید خەلیل و لارا ئاڤدەل حەسەن دناڤ ڕێزێن هەلبژارتیێ‌ ئیراقێ‌ دا نە ئەوێن بەری دو حەفتیان پشكداری د ڤاڤارتنێن كۆما چارێ‌ یا دەربازبوون بۆ كۆپا ئاسیا دا كری.