هەولێر، قائید میرۆ:

ئەندامەكێ لژنا نەفت و غازێ ل پەرلەمانێ ئیراقێ ئاشكرا كر، ل سەر داخوازا هەرێما كوردستانێ زێدەتری 15 ملیۆن لیترێن گازا سپی ل سەر وەلاتیێن هەژار دێ هێنە بەلاڤكرن و دبێژیت: ئەو گازا بێ بەرامبەر ب رێیا پارێزگەهان دێ هێتە بەلاڤكرن.
دكتۆر سەباح سوبحی، ئەندامێ لژنا نەفت و غازێ ل پەرلەمانێ ئیراقێ بۆ رۆژناما ئەڤرۆ دیار كر، شاندێ وەزارەتا سامانێن سرۆشتی سەرەدانا بەغدا كریە و من ژی نڤیسارەك دایە وەزارەتا نەفتا ئیراقێ رازیبوون هاتیە كرن 15 ملیۆن لیترێن گازا سپی بۆ هەرێما كوردستانێ بهێنە هنارتن و ل سەر وەلاتیێن هەژار دێ‌ هێنە بەلاڤكرن و گۆت: «ب رێیا پارێزگەهان و بێ بەرامبەر ئەو گازە ل سەر وەلاتیان دێ هێتە بەلاڤكرن، ئەڤە ژ دەرڤەی پشكا هەرێما كوردستانێیە».
دكتۆر سەباح سوبحی گۆتژی: «بەری نوكە وەزارەتا نەفتا ئیراقێ بڕیار دابوو 50 ملیۆن لیترێن گازا سپی بۆ هەرێما كوردستانێ بهێنە هنارتن و هەتا نوكە نێزیكی 40 ملیۆن لیتر گەهشتینە و بڕیارە ئەو 10 ملیۆن لیترێن مایی ژی بگەهنە هەرێمێ بۆ بەلاڤكرنێ‌، كو بهایێ ئێك بەرمیل 60 هزار دینارن، بزاڤێن مە دێ بەردەوام بن بۆ دابینكرنا گازا سپی، چونكی سەقایێ هەرێما كوردستانێ ل وەرزێ زڤستانێ هەڤبەركرن ل گەل دەڤەرێن ناڤەڕاست و باشوورێ ئیراقێ گەلەك سارترە».

زاخۆ، دلۆڤان هالۆ:

عەبدولسەلام نەجمەددین، بەرپڕسێ سەنتەرێ زاخۆ بۆ ڤەكۆلینێن كوردی ل كۆلیژا زانستێن مرۆڤایەتی یا زانكۆیا زاخۆ، بۆ ڕۆژناما ئەڤرۆ دیار كر كو ب هەلكەفتا ڕۆژا زمانێ دایكێ‌ 15 هەلبەستڤانێن دەڤەرا بەهدینان ژ لایێ سەنتەرێ زاخۆ بۆ ڤەكۆلینێن كوردی هاتنە خەلاتكرن.
بەرپڕسێ سەنتەرێ زاخۆ بۆ ڤەكۆلینێن كوردی، ئاماژە ب وێ چەندێ ژی كر كو ب ئامادەبوونا سەرۆكێ زانكۆیا زاخۆ دكتۆر نازم سلێمان و دكتۆر دیندار شەمسەددین، ڕێڤەبەرێ گشتی یێ سەنتەرێ ڤەكۆلینێن زانستی و ڕاگرێ كۆلیژا زانستێن مرۆڤایەتی دكتۆر فاخر حەسەن و مشیر محەمەد، دەڤەردارێ زاخۆ، سەنتەرێ زاخۆ بۆ ڤەكۆلینێن كوردی، د ڕێورەسمەكێ ژ هەژی دا ب هەلكەفتا ڕۆژا زمانێ دایكێ، ل هۆلا خەلیل خەیالی ڕێز ل خەبات و پێنووسێ كۆمەكا نڤیسەرێن دەڤەرا بەهدینان گرت، ئەوێن پتریا تەمەنێ خوە بۆ خزمەتكرنا زمان و كەلتۆر و مێژوویا مللەتێ كورد تەرخانكرین.
ناڤهاتی گوت: «ئەو نڤیسەرێن ڕێز لێ هاتیە گرتن، ئەڤە بوون: (حەبیب كەلەش، فەیسەل مستەفا، عەبدولرەحمان مزیری، خەلیل دهۆكی، محسن قۆچان، كەمال ئاكرەیی، مستەفا حسێن، موئەیەد تەیب، ژارۆ دهۆكی، هزرڤانێ عەبدوللایی، ناجی تەها بەرواری، سەلام بالایی، بەیار باڤی، شەمال ئاكرەیی، دكتۆر عارف حیتۆ)».

ئامێدیێ، مەحمود نهێلی:

پڕۆژەیێ كەڤنێ ئاڤێ یێ گوندێ گوهەرز ل دەڤەرا نهێلێ یا سەر ب سنوورێ ناوچەداریا دێرەلۆكێ‌ ڤە ژ لایێ فڕۆكەیێن سۆپایێ توركیا ڤە هاتە بوردۆمانكرن و ژناڤبرن.
ئەحمەد گوهەرزی، هەلبژێرێ گوندێ ناڤهاتی بۆ رۆژناما ئەڤرۆ دیار كر، ئەڤ پڕۆژەیە بەری نوكە ب مەرەما دابیكرنا ئاڤا ڤەخوارنێ بۆ گوندێ گوهەرز و بلاڤە هاتبوو چێكرن و گۆت: «پشتی پڕۆژەیێ ستراتیژیێ ئاڤا ئامێدیێ كەفتیە كاری، كار ب ڤی پڕۆژەیێ كەڤن نەدهاتە كرن بۆ ئاڤا ڤەخوارنێ، ب تنێ بۆ مەرەما ئاڤدانا تەرش و كەوالی مفا ژێ دهاتە وەرگرتن، ژ بەر كو ئاڤا ڤەخوارنێ ل پڕۆژەیێ ستراتیژی بۆ گوندی دهاتە دابینكرن».
ناڤهاتی دیار كر، ئەڤ پڕۆژەیە ژ بیرەكا ئیرتیوازی یا ئاڤێ و ماتۆرەك و بۆڕیێن ئاڤێ پێك دهات، بەری دو رۆژان كەفتیە بەر هێرشا فڕۆكەیێن توركیا و ب ئێكجاری هاتیە ژناڤبرن و ئێدی ئەو نەشێن مفای ژێ وەربگرن و گۆت: «هەر د ڤان بوردۆمانان دا پارچەكا جۆیا ئاڤدانا چەمێ مە ژی هاتیە ژناڤبرن و هەكە نەهێتە چێكرن، ئەم نەشێین مفای ژێ وەربگرین و بێستانێن خوە ئاڤ بدەین».

ئاكرێ‌، رەمەزان زەكەریا:

ب گوژمێ 22 ملیۆن دۆلاران دەست ب دروستكرنا گۆمرگەكا مەزن و پێشكەفتی بۆ بەرهەمێن چاندنێ ل سنوورێ‌ دەڤەرداریا ئاكرێ‌ هاتیە كرن و پڕۆژە یێ‌ وەبەرهێنانێ‌ یە.
د. دلاوەر بۆزۆ، دەڤەردارێ ئاكرێ بۆ ئەڤرۆ گۆت: «ل نێزیك دەڤەرداریا ئاكرێ جهەكێ باش هاتیە بەرهەڤكرن و دەست ب دروستكرنا باشترین گۆمرگ هاتیە كرن بۆ كۆمكرنا بەرهەمێن چاندنێ ل دەڤەرێ‌، هەتا نوكە كار ب رێژا 25% هاتیە كرن و بەردەوامە و دڤێت پڕۆژە د دەمێ سێ سالان دا تەمام ببیت».
ناڤبری گۆتژی: «پڕۆژە ژ گۆمرگ، عەلاف و بەرادە و عمباران پێك دهێت، هەموو ژی پێكڤە دهێنە گرێدان، پڕۆژە ل سەر رووبەرێ 97 دۆنەمێن ئەردی و ب گوژمێ‌ 22 ملیۆن دۆلاران دهێتە بجهئینان، ل سەر ئاستێ كوردستان و ئیراقێ دبیتە دوەم مەزنترین گۆمرگ بۆ بەرهەمێن چاندنێ دهێتە دروستكرن «.

لەزگین جوقی:

هاریكارێ‌ رێڤەبەرێ‌ گشتیێ‌ رێك و پر و ئاڤەدانكرن و ئاكنجیبوونێ‌ ل پارێزگەها دهۆكێ‌ دیاركر، كابینا نەهێ‌ یا حوكمەتا هەرێما كوردستانێ‌ گرنگیەكا مەزن بجهئینانا پرۆژەیێن خزمەتگوزارێ‌ هاتیە دان، ب تایبەتی ژی د وارێ‌ جادەیان دا گەلەك جادەیێن هاتینە چێكرن هەتا 150 گوندان ل دهۆكێ‌ ژ پرۆژان مفاداربووینە.

رێدیر سلێمان خەمۆ، هاریكارێ‌ رێڤەبەرێ‌ گشتیێ‌ رێك و پر و ئاڤەدانكرن و ئاكنجیبوونێ‌ ل پارێزگەها دهۆكێ‌ بۆ رۆژنامەیا ئەڤرۆ راگەهاند، هژمارەكا مەزن یا پرۆژەیان د سالا بووری هاتینە ئەنجامدان، ئەڤ سالە ژی رازەمەندی ل سەر هژمارەكا پرۆژەیان هاتیە دان، هندەك ژی د قوناغێن راگەهاندن و تەندەری دانە و بریارە بهێنە بجهئینان، پرۆژە ل سەر بۆدجەیا پارێزگەها دهۆكێ‌ و بۆدجەیا ئاسایی هاتینە بجهئینان ل سەر بۆدجەیا ئاسایی 11 پرۆژە هاتینە بجهئینان، ژ وانا ژی هەشت پرۆژە تەمامبووینە و كار ل سەر پرۆژەیێن دی بەردەوامە، ئەڤ 11 پرۆژە ب كوژمێ‌ ملیارەك و 400 ملیۆن دیناران دهێنە بجهئینان ل سەر بۆدجەیا پارێزگەها دهۆكێ‌ ژی 72 پرۆژە بووینە پتر ژ 150 گوندان مفاداربووینە، ئەڤ پرۆژە ب گوژمێ‌ پتر ژ 27 ملیار دیناران هاتینە بجهئینان و كار ل سەر بەردەوامیا پرۆژان یێ‌ بەردەوامە».
خۆیا كر، ل سالە 2023ێ‌ چوار پرۆژەیێن گەلەك مەزن و گرنگ هەبوون هەر چوار پرۆژە تەمامبووینە و كەفتینە د خزمەتا وەلاتیان دا، ئەڤ پرۆژە ب گوژمێ‌ 40 ملیار دیناران هاتینە بجهئینان ل سەر پێشنیەیا رێڤەبەریێ‌ بەردەوام جادە هێنە سەخبیركرن و چێكرن».
رێدیر سلێمان خەمۆ گۆت: پشتی جەنابێ‌ سەرۆك بارزانی سەرەدانا پارێزگەها دهۆكێ‌ كری و گۆهداریا خەلكی كری، هژمارەكا پرۆژە پێشنیاز دانە حوكمەتێ‌ و رازەمەندی ل سەر هاتیە كرن، هندەك پرۆژە دەستبكاربووینە و هندەك ژی د قوناغا تەندەری دانە، ئەڤ پرۆژە د وارێ‌ رێك و پر و ئاڤەدانكرن و نیشتەجیبوونێ‌ دا، ژ وانا ژی پێنچ پرۆژە یێن وارێ‌ ئاڤەدانكرن و نشتەجیبوونێ‌ دا، ئەڤ پرۆژە دگرنگن، ئەو ژی هۆلەكا رەوشەنبیری ل بەردەرش و یاریگەهەك ل قەزا سێمێلێ‌ و ئاڤاهیەك بۆ دادگەها ئامێدیێ‌ و ئاڤاهیەك بۆ كولیژا پەروەردا بنیات ل ئامێدیێ‌، ئەڤ پرۆژە دێ‌ ب گوژمێ‌ 24 ملیار دیناران هێنە بجهئینان و پرۆژەیێ‌ هۆلا رەوشەنبیری دەست بكاربوویە و یاریگەها سێمێلێ‌ ژی ل نێزیك دێ‌ هێتە بجهئینان».
تەكەز كر، جادەیا پارێزگەها دهۆكێ‌ هەتا هەولێر دێ‌ بیتە جووتساید، ئەڤە ئێكە ژ پرۆژەیێن گەلەك گرنگ، دێ‌ ئەو ژی د ئایندەكێ‌ نێزیكدا كەفتە د وارێ‌ بجهئینانێدا و رێیا باعەدرێ‌ هەتا دهۆك دێ‌ بیتە جووت ساید كو ئەڤ سالە دێ‌ ب گوژمێ‌ 150 ملیار دیناران پرۆژە هێنە بجهئینان د وارێ‌ رێك و پر دێ‌ گەلەك گوند و كۆمەلگەه و ناحیا مفاداربن و بەردەوام كار بۆ بجهئینانا پرۆژەیان دهێتەكرن».
خویاژی كر، 14 پرۆژەیێن ستراتیجی ب گوژمێ‌ 175 ملیار دیناران دهێنە بجهئینان، ئەڤە ئەو پرۆژەنە یێن رازیبوون ل سەر هاتیە كرن و هندەك پرۆژە د قوناغا بجهئینانێدانە و هندەك پرۆژە ژی د قوناغا تەندەری دانە، پشتی دهێنە راگەهاندن، ئەو ژی دێ‌ هێنە بجهئینان».