چاڤەڕێ‌ دهێتە كرن ئەڤرۆ تیما یانەیا زاخۆ پەردێ‌ ب دانیە ل سەر هەڤڕكیێن گەڕا 15ێ‌ یا خولا ستێرێن ئیراقێ‌ دا، دەمێ‌ ل باژێرێ‌ بەسرا دبتیتە مێڤانا یانەیا مینا د یارییەكا پڕی هەڤڕكی دا.
تیما یانەیا زاخۆ ئەوا جەماوەرێ‌ وێ‌ ب لەشكەرێ‌ كەلها سۆر ناڤ كرییە دێ‌ ب سەركێشییا راهێنەرێ‌ قەتەری تەلال ئەلبلۆشی بزاڤێ‌ كەت سێ‌ خالێن گرنگ ژ خودانێن ئەردی وەربگریت پێخەمەت دەستڤە ئینانا رێزەكا باشتر و دێ‌ پشت گەرمییا ستێرێ‌ خوە ئەمجەد عتۆان، رەمەزان سەدیق، بەیار محەمەد و پیشەكارێن خوە، داروین گۆلێرمۆ، موسێس، یوسف رائید، كابی رۆدرێگر، پاتریك مارسێلۆ، كوڕێن خابووری د نوكە دا 19 خال كۆمكرینە رێزا 11ێ‌ دهێت ب شێوەیێ‌ بەروەخت، بەرانبەر دا تیما مینا ئەوا دیارییا خوە یا بۆری دا وەكهەڤبوو 16 خال كۆمكرینە و رێزا 13ێ‌ بەروەخت دهێت، ل دووڤ ئامارێن یارییان دناڤبەرا هەردو تیما ندا زاخۆ سێ‌ سەركەفتن هەبووینە، مینا شەش سەركەفتن بەرانبەر وێ‌ هەشت وەكهەڤی هاتینە.
ل دۆر دووماهی بەرهەڤیێن زاخۆ حەمید ئیسماعیل سەرپەرشتێ‌ تیمێ‌ بۆ رۆژنامەیا ئەڤرۆ گۆت: یاریێن مە ژ دەرڤەیی یاریگەها مە زەحمەترن ژ یێن نافخوە دا لێ‌ ب پلانێن راهێنەری و زاخا بلند یا یاریزانان مە ئێك ئارمانج هەیە ئەوژی سەركەفتن و دەستڤە ئینانا ئەنجامەكێ‌ باش بەری ڤەگەڕێنە باژێرێ‌ خوە، گەشبینین یاری بۆ یاری ئاستێ‌ تیما مە باشتر بوویە و ب هیڤی نە بەر ب رێزبەندیێن باشتر بچین.

قەیس وەیس:

ل بۆدابیست پایته‌ختێ هنگارییا پشككێشانا قاره‌مانییا جیهانێ یا هه‌رێمان كۆنیفا 2024ێ هاته‌ كرن، ئه‌وا دهێته‌ چاڤه‌ڕێ كرن هه‌ڤڕكیێن وێ ل 26ێ خزیرانا هه‌تا شه‌شی ته‌مووزا ئه‌ڤ ساله‌ ل چار یاریگه‌هێن باژێرێن كوردستانێ بهێنه‌ ئه‌نجامدان، ئه‌وا دێ ب پشكدارییا 14 هه‌لبژارتیێن هه‌رێمێن جیهانێ بن و هاتینه‌ به‌لاڤكرن ل سه‌ر چار كۆمان و بڤی ره‌نگێ خوارێ:
كۆما ئێكێ: كوردستان، كیرنۆ بریتانیا-، كه‌شمیر-پاكستان، تامیل ئیلام- سریلانكا.
كۆما دویێ: په‌نجاب- هندستان، رایپا نویی- بۆلیڤیا، ئۆستیتا یا باشۆر- جورجیا و رۆسیا، تایكینۆ-سویسرا.
كۆما سێیێ: كاربالتاجا-هنگاریا و ئۆكراینا، كابیلییا-جه‌زائیر، تبت-هندستان.
كۆما چارێ: سیکلێر سیزنا- ئیتالیا، ئەبخازیا- رۆسیا، باسچێت- رۆمانیا.
ئه‌و یاریگه‌هێن دێ پێشوازییا قاره‌مانیێ كه‌ن
ل دووڤ به‌رنامه‌یێ هاتیه‌ راگه‌هاندن ژلایێ فیدراسیۆنا تەپا پێی یا كوردستانێ پشتی سەرۆكێ‌ فیدراسیۆنا كۆنیفایێ‌ یێ‌ سویدی پێر ئەندرێس بیلند و هەردو جێگرێن وی یێ‌ هنگاری كریستۆف ڤێنیزێل و یێ‌ رۆسیایێ‌ دیمێتری پاگاڤا ل دەستپێكا ئادارا سالا 2023ێ‌ سەرەدانا پارێزگەهێن دهۆك، هەولێر، سلێمانی و ئیدارا سەربەخوەیا زاخۆ كربوون ژبۆ دیتن و دووڤچوونا هەر پێنچ یاریگەهێن وەرزشی ل سەر ئاستێ‌ هەرێمێ‌ دگەل ژێرخانەیا وەرزشی، ئۆتێل وجهێن پێدڤی وەكو بادەكا هەرێما كوردستانێ‌ و بریار دا یاریگه‌هێن، دهۆك، شه‌هید قرانسۆ حه‌ریری، زاخۆ یا نێڤده‌وله‌تی و سلێمانیێ یاری لێ بهێنه‌ ئه‌نجامدان.
سەرۆكێ‌ حوكمەتا هەرێمێ‌ پشتەڤانێ‌ سەرەكی بوو
ئازاد محەمەد ئه‌ندامێ فیدراسیۆنا فۆتبۆلا كوردستانێ بۆ رۆژنامه‌یا ئه‌ڤرۆ دیار كر مەسرۆر بارزانی سەرۆكێ‌ حوكمەتا هەرێما كوردستانێ‌ پشتەڤانیا خوە یا تەمام بۆ مێڤانداریا قارەمانیێ‌ دیار كری بوو و ئەڤچەندە ژی بوو ئەگەرێ‌ سەرەكی قاره‌مانی ل كوردستانێ بهێته‌ ئه‌نجامدان و مەرەم ژی زێدەتر ناساندنا هەرێما كوردستانێ‌ ب كەلەتۆر و دیرۆكا خوە بۆ هەموو هەرێمێن جیهانێ‌ بهێتە دیاركرن و كوردستان ژی حەز و ڤیانا وەرزشێ‌ هەیە.
چەند هەلبژارتی دێ‌ پشكداربن؟
ل دووڤ لیستەیا بەلاڤبوویی ژ فیدراسیۆنا كۆنیفایێ‌ 48 هەلبژارتی هەڤڕكیێ‌ بۆ 13 پلێتنێن دەربازبوونێ‌ بەر ب قارمانییا كۆنیفایی كربوون، دگەل هەلبژارتیێ‌ مێڤاندار دێ‌ بنە 14 هەلبژارتیی كو دووڤ هژمارا تیما بۆ هەموو كێشوەران هاتینە بەلاڤكرن بڤی رەنگی: ژ ئۆرۆپا چار هەلبژارتی، ئەمریكا باشۆر دو، ئاسیا دو، ئەمریكا باكۆر ژی دو و هەر ئێك ژ كێشوەرێ‌ ئەفریقیا، ئۆقیانۆس دێ‌ پشكداربن، دگەل هەلبژارتیێ‌ مێڤان، هەرچەندە ل كێشوەریێن ئۆرۆپا، ئاسیا، ئەمریكا باشۆر و باكۆر دگەل ئەفریقا رێژا هەلبژارتیان زێدەترن لێ‌ لدووڤ سیستەمێ‌ هاتیە دیاركرن دێ‌ ئەو دناڤبەرا خوە دا ڤاڤارتنان كەن ژبۆ وەرگرتنا پلێتێن دەربازبوونێ‌.
بۆ زانین قارەمانیا كۆنیفا یا هەرێما ل سالا 2014ێ‌ دەستپێكر بوو، ئەوا هەر دو سالان جارەكێ‌ ل هەرێمەكا وەلاتێن جیهانێ‌ دهێتە رێكخستن، ئەڤ قارەمانیە دبیتە یا پێنجێ‌ پشتی دووماهی قارەمانی ل 2020 ژبەر كۆرۆنایێ‌ بۆ ماوەیێ‌ چار سالە هاتیە راوەستاندن.

شاهۆ فەرید:

چاڤەڕێ‌ دهێتە كرن ئەڤرۆ ل دەمژمێر 11 شەڤ دو یاریێن دی ژ گەڕا چارێ یا قۆناغا 16ێ‌ ژ قارەمانییا یانەیێن ئۆرۆپا قارەمانێن خولا چامپیونز لیگێ یارییا ئێكێ‌ ژ قۆناغا چوونێ‌ بهێنە ئەنجامدان، حەز ژێكەریێن وەرزشێ ب تایبەت تەپاپێی چاڤەرێ دیتنا یاریێن ئاگرین و بهێزبن.
كی دێ ماناخوە پارێزیت و دەربازبوونێ‌ مسۆگەركەت؟
وەكو دیار یانەیا بەشەرلونا ل دو وەرزێن بوری ژ چارچووڤەیێ‌ قۆناغا كومان دەركەڤتبوو لێ ئەڤ سالە سەركێش بوو و ئەو قۆناغ ژی دەربازكرییە و هاتییە قۆناغا 16 لێ پشكێكشانێ ئەركێ وێ زەحمەتر لێكر و كەڤتە بەرانبەری یانەیا ناپولی یا ئیتالی قارەمانا وەرزێ بوری یا خولا ئیتالی، ئەڤ سالە ئاست و ئەنجامێن بەرشەلونا دلاوازن و سەركەفتنێن بزەحمەت د خولا ئیسپانی دا دئینت و نوكە ل رێزا سێیێ‌ دهێت، ژلایەكێ دووڤە و ژ نشكەكێ‌ ڤە یانەیا ناپۆلی بەری یاریێ ب 48 دەمژمێرا راهێنەرێ خوە گوهۆڕی و ل جهێ‌ وی فرانشێسكۆ كالزونا هاتیە دەستنیشانكرن، د نوكە ناپۆلی ل رێزا نەهێ‌ دهێـت ب 37 خالان د خولا ئیتالیا دا، پشتی هاتنا راهێنەرێ نوو خوە نێزیكی رێزبەندین دەستپێكی بكەت و سالا بهێت پشكداری ئێك ژ سێ خولێن ئۆرۆپی بیت.
دیرۆكا بەرشەلونا یا پرە ب سەركەڤتن و گۆلان.
هەردو یانە هەشت جاران كەڤتینە بەرانبەری ئێك، پێنج یارییان بەرشەلونا سەركەفتن ئینایە و 22 گۆل تۆماركرینە، د بەرانبەردا ناپۆلی سەركەفتنەك هەیە و حەفت گۆل تۆماركرنیە، وەكهەڤی دو جارا هاتیە، ئێكەم یاریا وان ل سالا 2011 بۆ د یارییەكا هەڤالینی دا تێدا بەشەلونا پێنج گولێن پاقژ سەركەفتن ئینابوو و ئێكەم یاریا وانا چامپیونز لیگایێ ل سالا 2020 بۆ یاریا چوونێ وەكهەڤیا گۆلەكێ ب دووماهی هاتبوو و یاریا هاتنی بەرشلونا سەركەفتن بۆ ئەنجامێ 3-1 و دەربازبوو قۆناغا هەشتێ‌، هەمی ژمارە د بەرژەوەندیا یانەیا كەتەلونی دانە لێ دووڤ گوتنا چەندین رۆژنامە و دەنگ و باسا وەسا دیاركریە كو ناپۆلی بۆ سەركەفتنێ نێزیكترە ژ بەرشەلونا، دبیت هەر ژ یاریا ئێكێ دناڤا یاریگەها خوە دیێگو ئەرماندو مارەدونا هاتنا راهێنەرێ نوو بەرژەوەندیا خوەدا دوماهیك بینیت.
پێكهاتیێ پێشبینیكری یێ هەردو تیمان
راهێنەرێ ئسپانی چاڤی هێرناندز دێ بزاڤێ كەت هەمی لایەكێ هێرشبەریێ بكەت و پێشبینی دهێتەكرن پێكهاتێ وی بڤی شێوەیی بیت 4-3-3 گولپارێز تیرشتێگن هێلا بەرگریێ كوندی، كوبارسی، مارتینێز و كانسیلو، هێلا ناڤین دی یونگ، كرێستێنسن و گوندوگان، هێلا هێرشبەریێ یامال، لێڤاندوڤێسكی و پێدری، ژلایێ خوەڤە راهێنەرێ نوو یێ ناپۆلی دێ بزاڤێن باش كەت دئێكەم یاریا خوەدا سەركەفتنێ بینیت پێكهاتێ پێشبینی دهێتەكرن گوهۆڕینان گەلەك نەكەتن، گولپارێز گولینی، هێلا بەرگریی، دی لورینزۆ، رەحمانی، جێسوس و روی، هێلا ناڤین، ئاجوسیبا، لۆبتكا و زێلێنسكی، هێلا هێرشبەریێ، بولیتانۆ، ئۆسیمێن و خڤێتچا كڤاراتسخێلیا. ئارسنال ب هێز ڤەگەریایە و چاڤ ل ناسناڤی یە
پشتی شەش وەرزان یانەیا ئارسنال یا ئنگلتەرا ژ هەڤركیێن خولا چامپیونز لیگا دووركەڤتی بڕیارە ئەڤ شەڤە ل قۆناغا 16ێ‌ بەرانبەر ئاستەنگا پۆرتۆ یا پۆرتۆگالی بیت و بیتە مێڤانا وێ‌ ل یاریگەها دراگاو، ئەڤە جارا حەفتێ یە هەردو یانە بەرانبەری ئێك دبن، ئارسنال سێ‌ سەركەفتن و 12 گۆل توماركرینە د بەرانبەردا پورتو دو سەركەفتن و چار گۆل توماركرینە و جارەكێ وەكهەڤ بووینە بێ گۆل، هەردو یانە رێزبەندیا سێیێ‌ دهێن ناڤا خولێن خوە دا ئارسنال بەروەخت ل رێزا دویێ یە 55 خالا، پۆرتۆ رێزا سیێ یە 48 خالان، راهێنەرێ ئارسنال ئەرتێتا هیڤیێن گەش هەنە بۆ دەربازبوونێ بۆ قوناغێن بهێن و بۆ جارا ئێكێ دیرۆكا یانەیا ئارسنال ناسناڤی بینت و بەربژێرە بۆ دەستڤە ئینانا جاما خولێ دناڤا دیرۆكێ خوە چامپیونس لیگێ توماركەت.
پۆرتۆ گەشبینە مفایی ژ ئەرد و جەماوەرێ‌ خوە وەربگریت
یانەیا پۆرتۆ ل سالا 2004 ب سەرپەرشتیا راهێنەر سپێشەل وەن جوزێ مۆرینۆیی ناسناڤێ خولا ئۆرۆپی دەستڤەئینا، دیرۆكا یاریێن پۆرتۆ بەرانبەری یانەیێن ئنگلتەرایێ‌ یا شەرمینە و هیشتا چو سەركەفتن تومارنەكرینە دناڤ ئەردێ خوە یان دەرڤە دا، پۆرتۆ قۆناغا كومان دا وەكی بەرشلونا هەمان خال و چار سەركەفتن و دو خوسارەتیان ل رێزا دویێ دەربازبوو، هیڤیا وی چەندێ یە دووبارە ڤەگەریتە ناسناڤێن ئۆرۆپی دیروكەكا نوو توماربكەت و ناسناڤی بۆ جارا سێیێ بینیت لێ تیمێن هەڤڕك گەلەك بهێزن و دبیت پۆرتۆ هێزا هند یا وان نەبیت راهێنەرێ وێ سێرجو كونسێنساو گۆت: هەمی یاریێن خولا چامپیۆنزێ زەحمەتن لێ ئەم هەڤڕكێ خوە نیاسین، شروڤە دكەین و هێزا وان دیاردكەین ئەم بگەهینە ڤی قۆناغا دەستكەفتە چونكۆ دهێتە هژمارتن مەزنترین خولا پشكداریا یانەیێن مەزنە هەریانەكا دەربازبیتە هەر قۆناغەكێ ژی خوشی تامەكا دییە.
پێكهاتێ هەردو یانەیان دێ بڤی شێوەی بیت
پێكهاتیێ پێشبنیكری یێ راهێنەرێ ئارسنال یێ ئسپانی ئارتێنایی 4-3-3 بیت، گۆلپارێز، رایا، هێلا بەرگیریێ، وایت، سالیبا، گابریێل و زێنشینگۆ، هێلا ناڤین، ئۆدیگارد، رایس و هاڤێرتز هێلا هێرشبەریێ، ساكا، جێسوس و مارتێنلی، ژلایێ خوەڤە راهێنەرێ پۆرتۆ كونسێساوی دێ 4-4-2 بیت پتر دێ هێرشیێ یاریێ كەت و شێوازێ ڤەكری بیت، پێكهاتێ پێشبینی كری، گولپارێز، كۆستا، هێلا بەرگیریێ، ماریو، كاردۆسو، پێپێ و سنوسی هێلا ناڤین، جواو پێدرو پێپێ، نیكۆلاس، ئیوستاكویو و گالینۆ و هێلا هێرشبەریێ، مارتینَز و ئیڤانێلسون، ژبەرهنگاڤتنێ‌ هەردو یاریزانێن پۆرتۆ ئیڤان ماركانو و مەهدی تارمی یاریێ‌ ناكەن.

تیما باسكێت بۆلا یانەیا زاخۆ گەشبینە پلێتا دەربازبوونێ‌ بۆ قۆناغا پلەی ئۆف یا خولا پلا نایابا ئیراقێ‌ ب دەستڤە بینت و ب تنێ‌ دو یاری ماینە دێ‌ هیڤیێن خوە ئێكلاكەت، ئەوا بڕیارە هەردو یاری ل دەستپێكا ئادارا بهێت دەستپێبكەن.
تیما زاخۆ د نوكە دا ب كۆمكرنا 25 خالان زێدەباری خالەكا تازەپێگەهشتییان ل رێزا حەفتێ‌ دهێت پشتی بۆرینا 18 یارییان ئەوا 11 یانە شەڕی بۆ هەشت رێزێن ئێكێ‌ دەربازبوون بۆ قۆناغا پلەیی ئۆف دكەن، ئەوا تیما دیفا ئەلجەوی ب34 خالان سەرێ‌ لیستێ‌ دهێت، كەرخ ب33 خالان، نەفت ب32 خال، شورتە ب28 خال، حەشد ئەلشەعبی ب28 خال، دیجلە ئەلجامعە ب26 خالان رێزێن دویێ‌ هەتا شەشێ‌ دهێن، زاخۆ ب25 خالان رێزا حەفتێ‌، كارەبا ب هەمان خال لێ‌ چو خالێن تازپێگەهتشیان نینە رێزا هەشتێ‌ دهێت، حللە ب24 خالان، نەفت ئەلشیمال و غاز ئەلشیمال ب23 و ب22 خالان رێزێن نەهێ‌ هەتا 11ێ‌ دهێن.
ل دۆر یاریێن تیما زاخۆ جوتیار عەلی هاریكارێ‌ راهێنەرێ‌ زاخۆ دیاركر تیما وان بەردەوام بەرهەڤییان دكەن و چاڤەڕێ‌ ڤەگەڕیانا هەلبژارتیێ‌ ئیراقێ‌ نە ژبەركو هەردو ستێرێن وان موراد عەلی و محەمەد محسن وەكو یاریزان و راهێنەرێ‌ وان یێ‌ كرواتی میلان نسیج وەكو راهێنەرێ‌ هەلبژارتیێ‌ ئیراقێ‌ دگەل دانە و گۆت: تیما مە دو یاری ماینە ل دووڤ خشتەیی هاتیە بەلاڤكرن دێ‌ ل پێنجێ‌ ئادارا بهێت بیتە مێڤانا یانەیا حللە، دیسان ل نەهێ‌ ئادارێ‌ دێ‌ یانەیا غاز ئەلشیمال مێڤان كەین، گەشبینن پلێتا دەربازبوونێ‌ بەر ب قۆناغا هەشتێ‌ پلەیی ئۆف دەستخوە ڤەبینن.

د دیدارەكێ‌ دا نەوزاد مستەفا كوڕێ‌ باژێرێ‌ دهۆكێ‌ و یاریزانێ‌ هەلبژارتیێ‌ ئیراقێ‌ بۆ یارییا پایسكلان دیار كر ئەو بەردەوامە ل سەر راهێنانێن خوە و گەهشتن بەر ب ئارمانجێن مەزنتر ئەوژی ل سەر ئاستێ‌ نێڤدەولەتی ژی ئێكەم بیت.
زێدەتر ناڤهاتی بۆ رۆژنامەیا ئەڤرۆ گۆت: ب سۆپاس ڤە دگەل پشتەڤانییا راهێنەرێ‌ خوە تارق سەعید و خێزانا خوە هەتا نوكە شیاییمە چەندین ناسناڤێن ل سەر ئاستێ‌ كوردستانێ‌، ئیراقێ‌ و عەرەبی هەر ژ 2020 و هەتا سالا بوری میدالیێن زێری ل ئیماراتێ‌ و سعۆدیێ‌ دەستڤە ئیناینە ئەڤە ژی ب راهێنانێن زەحمەت و رژدییا من بۆ بلندكرنا ئاستێ‌ و هێشتا گەنجم و خوون گەرمم دێ‌ بزاڤێ‌ كەم هیڤیێن خوە یێن نێڤدەولەتی ژ دەست نەدەم تایبەت د وەرزێ‌ ئەڤ سالەدا من پشكداریێن مەزن هەنە.
ژلایەكێ‌ دووڤە ناڤهاتی ل دۆر گرێبەستا خوە دگەل كۆیە گۆت: بەری سێ‌ رۆژە فەرمی من گرێبەست دگەل یانەیا كۆیە ئیمزاكر، ئەوژی پشتی چو یانەیان خوە ل مە نەكرییە خودان نەچاربووم، هەكە یانەكا پارێزگەهێ‌ نیڤ مووچەیی یانەیا كۆیە دابا من ئەز نە دچووم و دا خزمەتا پارێزگەها خوە كەم لێ‌ دێ‌ بەردەوامبم ل سەر پێشێخستن و دەستڤە ئینانا ناسناڤان وەكو كوڕەكێ‌ دهۆكێ‌ و كوردستانی، هەرچەندە خەونا من یا مەزن ب ناڤێ‌ هەلبژارتیێ‌ كوردستانێ‌ پشكداری قارەمانیێن دەرڤەبم لێ‌ ل سەر ئاستێ‌ یانەیان هەكە چو پشتەڤانی نە هێتە كرن دێ‌ نە چاربین بۆ یانەیێن دەرڤە ژی یاریێ‌ بكەین.
ل دووماهیێ‌ نەوزاد مستافی گۆت: مخابن هەتا نوكە چو پشتەڤانییا یارییا پایسكلان ناهێتە كرن ل دووڤ شیانێن خوە یانەیا دهۆك ژی هاریكاربوویە، ب هیڤی نە پشتەڤانییا یاریزانان بهێتە كرن تایبەت تازەپێگەهشتی ژبەركو كۆمەكا باش یێن هەین و هەكە پشتەڤانی بۆ بهێتە كرن دێ‌ دەستكەفت و ئەنجامێن وان ژ مە باشتر بن.