ئەڤرۆ رۆژا دووشەمبی بەرێز د. عەلی تەتەر، پارێزگارێ دهۆكێ دوهی 19/2/2024 پێشوازی ل خێزانا شەهیدێ قەهرەمان گەردی ئێكمالەی كر و د هەڤدیتنەكێ دا ب ئامادەبوونا هەڤژین و كورێ شەهیدی ئاگەهداری رەوشا خێزانا وان و كەسوكاران بوو.
دیسا هەر دوهی د. عەلی تەتەر، پارێزگارێ دهۆكێ پێشوازی ل ئەندازیار یونس جانۆ، رێڤەبەرێ سۆلینێن پارێزگەها دهۆكێ كر و د روونشتنەكێ دا دەستخۆشی ل كارێ رێڤەبەریا سۆلینێن پارێزگەها دهۆكێ و هەمی تیمێن وان هەر ژ دەستپێكا وەرزێ زڤستانێ هەتا بارانێن ڤان رۆژان كر، كو بەردەوام د كار و سەخبێریا سۆلین و ئاڤرێژان دا بوون، داكو لەهی پەیدا نەبن و هەروەسا پارێزگارێ دهۆكێ سوپاسی و دەستخۆشی ل هەمی رێڤەبەریێن پەیوەندیدار و هەماهەنگی و هەڤكاریا د ناڤبەرا وان دا كر.
دیسا هەر دوهی د. عەلی تەتەر، پارێزگارێ دهۆكێ ب بەرهەڤبوونا عەمید ئیبراهیم عەگید، رێڤەبەرێ پۆلیسێن هاتنووچوونا پارێزگەها دهۆكێ ، پۆلیسێ هاتنوچوونێ ”ئەیاز نازم” پشتی وی كارێ جوانێ پاقژكرنا ئاڤرێژان ژ بەرمایكان د دەمێ بارانێن چەند رۆژێن بۆری دا زێدەباری كارێ خوە كری، داكو جاددە نەهێنە گرتن خەلاتكر.
د پەیڤەكێ دا پارێزگارێ دهۆكێ دەستخۆشی ل پۆلیسێ ناڤبری كر و راگەهاند: ئەڤە هەستكرنە ب بەرپرسایەتیێ و سوپاسیا وی و هەمی پۆلیسێن هاتنوچوونێ یێن د ئەركی دا كر و گوت: «هیڤیدارین ئەڤ كارێ تە و هەركەسێ كارەكێ خێرێ دكەت زێدەباری ئەركێ خوە، نموونێن وەكی هەوە دزۆربن و پاشی پۆلیسێ ناڤبری خەلاتكر.

هەولێر، قائید میرۆ:

جێگرا سەرۆكێ لیژنا چاندنێ ل پەرلەمانێ ئیراقێ ئاشكرا كر، پێشبینی دهێتە كرن ئەڤ سالە ل پارێزگەها دهۆكێ نێزیكی ملیۆن تەنێن گەنمی بهێنە بەرهەمئینان و دبێژیت: سالا بۆری نەدادپەروەری د وەرگرتنا گەنمی دا هەبوو و ئەڤ سالە ل گورەی پلانەكا نوو بەرهەمێ‌ گەنمێ‌ جۆتیاران دێ هێتە وەرگرتن.
زۆزان كۆچەر، جێگرا سەرۆكێ لیژنا چاندنێ ل پەرلەمانێ ئیراقێ بۆ رۆژناما ئەڤرۆ دیار كر، سالا بۆری نەدادپەروەری د پلانا وەرگرتنا بەرهەمێ گەنمێ جۆتیاران دا هەبوو و نێزیكی 60 تەنێن گەنمێ جۆتیارێن پارێزگەها دهۆكێ ژ لایێ بەغداڤە نەهاتنە وەرگرتن و گۆت: «ل گورەی پلانا ئەڤ سالە دێ بەرهەمێ گەنمی ل گورەی وان داتایێن وەزارەتا چاندنێ هێتە وەرگرتن یێن بەری نوكە، ناڤ و رووبەرێ ئەردێ چاندنێ هاتینە تۆماركرن».
زۆزان كۆچەر گۆتژی: «بڕیارە رۆژا چارشەمبی 21/2/2024 لیژنەكا وەزارەتێن پلاندانان و چاندنا بەغدا سەرەدانا هەرێما كوردستانێ بكەت و دێ سەرەدانا پارێزگەها دهۆكێ ژی كەت، هەتا ژ نێزیكڤە ئاگەهداری پلانا وەرگرتنا گەنمێ جۆتیاران ببیت، چونكی ل سەر ئاستێ ئیراقێ پارێزگەها دهۆكێ‌ پارێزگەها ئێكێیە و سالا بۆری ب نەدادپەروەری پارێزگەها نەینەوا كربوو پارێزگەها ئێكێ، ئەم پێشبینی دكەین ئەڤ سالە ژ بەر بارانێن بارین 800 هەتا ملیۆن تەنێن گەنمی ل سنوورێ‌ پارێزگەها دهۆكێ بهێنە بەرهەمئینان».

دهۆك، لەزگین جوقی:

ل دەڤەرداریا شێخان كارگەهەكا تەحینێ‌ ژ لایێ‌ رێكخراوەكا خێرخوازی ڤە هاتیە دانان و داهاتێ‌ وێ‌ كارگەهێ‌ ل سەر زارۆكێن بێ‌ سەمیان و ئاوارەیان دهێتە بەلاڤكرن.
ئاودی سلێمان، بەرپرسێ‌ رێكخراوا ئێسڤنێ‌ بۆ گەشەپێدانا جڤاكی بۆ رۆژناما ئەڤرۆ ئاشكرا كر، رێكخراوەكا دەولەتا فەرەنسا پشتەڤانیا دامەزراندنا كارگەها تەحینێ‌ ل ئێسڤنێ‌ كریە و گۆت: «نوكە ئەم سەرپەرشتیا كارگەها تەحینێ‌ دكەین، هەمی داهاتێ‌ كارگەهێ‌ بۆ زارۆكێن بێ‌ سەمیان دهێتە مەزاختن، ل دەستپێكێ‌ 50 زارۆكێن بێ‌ سەمیان ژ داهاتێ‌ كارگەها تەحینێ‌ ل شێخان مفاداربوون، لێ‌ نوكە 20 زارۆك مفادار دبن، هەمی جەژن و هەلكەفتان پشتەڤانیا زارۆكێن بێ‌ سەمیان دهێتە كرن».
بەرپرسێ‌ رێكخراوا ئێسڤنێ‌ بۆ گەشەپێدانا جڤاكی گۆتژی: «هندەك جاران ژ داهاتێ‌ كارگەها تەحینێ‌ پشتەڤانی بۆ ڤەكرنا خۆلێن هەمەجۆر د ناڤ كەمپێن ئاوارەیان ژی دا دهێتە كرن، چار كەس د ناڤ كارگەهێ‌ دا خۆبەخش كار دكەن، ئەڤە زێدەتر ژ پێنج سالانە كارگەه هاتیە دانان و پشتەڤانیا كەسێن بێ‌ سەمیان ل شێخان دكەت».

دەستەیا پاراستن و چاككرنا ژینگەهێ‌ ل هەرێما كوردستانێ‌ رێنمایێن نوو بۆ خودانێن پانزینخان دیار دكەت و راگەهاندیە: هەر پانزینخانەكا پێگیر نەبیت ب وان رێنمایان دێ‌ هێتە سزادان.
ئەو رێنمایێن دەستەیا پاراستن و چاككرنا ژینگەهێ‌ ل هەرێما كوردستانێ‌ دیاركرین، ئەڤەنە:
1- هەر پانزینخانەكا مۆهلەتا ژینگەهێ نەبیت ب گوژمێ دو هەتا چار ملیۆن دیناران دێ هێتە سزادان.
2- هەر پانزینخانەكا موەلیدا كارەبێ هەبیت و دووكێلێ بكەت، ب گوژمێ ملیۆن هەتا سێ ملیۆن دیناران دێ هێتە سزادان.
3- هەر پانزینخانەكا موەلیدا كارەبێ هەبیت و دەنگی بكەت، ب گوژمێ ملیۆن بۆ سێ ملیۆن دینار دێ هێتە سزادان.
4- هەر پانزینخانەكا ماددەیێن شل یێن وەكو گاز، نەفت، پانزین و رۆهن رژیایی ل ئەردێ پانزینخانێ هەبیت ب گوژمێ ملیۆن دیناران دێ هێتە سزادان.
5- هەر پانزینخانەكا جهێ شووشتنا ترۆمبێلان هەبیت و یەكەیا چارەسەریا ئاڤێ نەبیت ب گوژمێ سێ ملیۆن دیناران دێ هێتە سزادان.
6- هەر پانزینخانەكا كەسكاتی وەكو پارك و باخچە و داروبار نەبیت، ب گوژمێ سێ ملیۆن دیناران دێ هێتە سزادان.
7- هەر پانزینخانەكا جهێ موەلیدا وان یا كارەبێ یا پاقژ نەبیت ب گوژمێ ملیۆن دیناران دێ هێتە سزادان
8 – ژبلی هەموو وان سزایێن بەری نوكە، كو ئەو ژی دێ هەبن، ل دەمێ هەبوونا سەرپێچیان.

ئامێدیێ، مەحمود نهێلی:

ب مەرەما چارەسەركرنا ئاریشەیێن چاندنێ و جۆتیارێن سنوورێ ناوچەداریا بامەرنێ و ئەنجامدانا پڕۆژەیێن چاندنێ، رێڤەبەرێ چاندنا ئامێدیێ ل گەل میران عەبدولرەحمان رێڤەبەرا ناوچەداریا بامەرنێ و بەرپرسێ هۆبا چاندنێ كۆمبوو.
ئەندازیار هەكار حەمید، رێڤەبەرێ چاندنا ئامێدیێ بۆ رۆژناما ئەڤرۆ دیار كر، ب مەرەما چارەسەركرنا ئاریشەیێن چاندنێ وان سەرەدانا ناچەداریا بامەرنێ كر و ل گەل رێڤەبەرێ ناوچەداریێ و بەرپرسێ هۆبا چاندنێ دانوستاندن ل سەر هەژمارەكا مژارێن گرێدایی ب ئاریشەیێن جۆتیاران كرن و گۆت: «مە دانوستاندن ل سەر وان ئاریشەیێن چاندنێ كرن یێن دبنە رێگر د رێیا جۆتیاران دا و چاوانیا دیتنا رێكێن چارەسەریێ هاتنە گۆتۆبێژ كرن».
گۆتژی: «مە دانوستاندن ل سەر وان پڕۆژەیان ژی كر یێن كو پێدڤی نە ل دەڤەرێ بهێنە بجهئینان و ئەو پڕۆژەیێن چاندنێ یێن ل ژێر بجهئینانێ و لەزكرن د كاری دا بۆ وێ یەكێ ئەڤ پڕۆژە بكەڤنە د خزمەتا خەلكێ دەڤەرێ و جۆتیاران دا».