د داخویانیەكێ‌ دا ئەندامێ‌ فیدراسیۆنا تەپا پێی یا كوردستانێ‌ دیار كر ژبۆ دەستنیشانكرنا كادرێ‌ نوو یێ‌ هەلبژارتیێ‌ ئیراقێ‌ و بەرهەڤ بۆ قارەمانییا جیهانێ‌ یا هەرێمان كۆنیفا، بڕیارە ل دەستپێكا حەفتییا بهێت د كۆمبوونا خوە یا ئاسایی دا راهێنەر و كادرێ‌ وی بهێتە دیاركر.
زێدەتر ئازاد محەمەد بۆ رۆژنامەیا ئەڤرۆ گۆت: ژبۆ خوە بەرهەڤكرن بۆ مۆندیالا هەرێمان، كوردستان 2024 ئەوا بڕیارە هەڤڕكیێن وێ‌ ب پشكدارییا 14 هەلبژارتییان ل 26ێ‌ خزیرانا بهێت ل چار یاریگەهێن هەرێمێ‌ بهێتە كرن، دێ‌ حەفتییا بهێت كۆمبوونا خوە یا ئاسایی ئەنجامدەین چەندین تەوەرێن جودا هێنە بەحسكرن ژ وانا بابەتێ‌ ژێگرتنا كادرێ‌ نوو یێ‌ راهێنانێ‌ بۆ هەلبژارتیێ‌ كوردستانێ‌ پێخەمەت دەلیڤە دان بۆ ئەوی كادری ژبۆ پێكئینانا هەلبژارتیێ‌ وەلاتێ‌ مە و دانانا پلان و بەرنامە بەری ب كەڤنە د هەڤڕكیێن قارەمانیێ‌ دا، هەروەسان دێ‌ هاریكارێ‌ راهێنەری، دیسان راهێنەرێ‌ جەستەیی و یێ‌ گۆلپارێزان ژی هێتە دیاركرن پشتی راهێنەر دهێتە دەستنیشانكرن.
ل دووڤ زانیاریێن هاتینە بەلاڤكرن هەردو راهێنەرێن بەرنیاس ل سەر ئاستێ‌ كوردستانێ‌، سلێمان رەمەزان خودانێ‌ باوەرنامەیا ئەی پرۆ و راهێنەرێ‌ بەرێ‌ یێ‌ یانەیا دهۆك دیسان سەمیر بابۆ راهێنەرێ‌ تیما یانەیا پێشەرگەیا هەولێرێ‌ بەربژارن.
ل دۆر یارییا دووماهیێ‌ یا خولا فوتسالێ‌ ل سەر ئاستێ‌ كچان ناڤهاتی گۆت: پشتی دەربازبوونا هەردو تیمێن فوتسالا یانەیا ئافرەتێن دهۆكێ‌ و كچێن یانەیا زاخۆ ل حەفتییا بهێت دێ‌ دەم و ژڤان و جهێ‌ یاریێ‌ هێتە ئێكلاكرن، پێنەڤێت دێ‌ پشتی رازیبوونا هەردو یانەیان جهەك بۆ هێتە دەستنیشانكرن كو یارییەكا خوەش و هەڤڕكی ب گیانێ‌ وەرزشی بهێتە ئەنجامدان.

چاڤەڕێ‌ دهێتە كرن ئەڤرۆ سێ‌ یاریێن دی ژ هەڤڕكیێن گەڕا 15ێ‌ یا خولا ستێرێن ئیراقێ‌ یا فوتبۆلێ‌ ل یاریگەهێن جودا بهێنە ئەنجامدان، تیما یانەیا دهۆك ژ دەرڤەیی یاریگەها خوە دێ‌ بزاڤێن قەرەبوویا سێ‌ خالێن یارییا بۆری كەت و ڤەگەڕاندنا رێزبەندییا خوە د خولێ‌ دا.
بڕیارە ئەڤرۆ ل دەمژمێر دویێ‌ پشتی نیڤرۆ ل باژێرێ‌ میسان تیما یانەیا دهۆك ببیتە مێڤانا یانەیا نەفت ئەلمیسان د یارییەكا پڕی هەڤڕكی دا ژبەركو هەردو یانە د یاریێن خوە یێن گەڕا 14ێ‌ دا تووشی خوسارەتیێ‌ بووینە، تیما دهۆك دگەل نەفت ئەلبەسرا ل یاریگەها وێ‌ ب دو گۆلان تووشی خوسارەتیێ‌ بوو و رێزبەندییا خوە یا چارێ‌ ژدەستبدەت پاشڤە بچیتە رێزا پێنجێ‌ ب 21 خالان ب شەش سەركەفتن، سێ‌ وەكهەڤی و پێنج خوسارەتیان، ئەحمەد خەلەف راهێنەر و یاریزانێن تیما دهۆكێ‌ ژلایێ‌ جەماوەرێ‌ ئەلهۆیێن چیا داخوازكرینە بۆ دەستڤە ئینانا سەركەفتنێ‌ و ڤەگەڕیان ب سێ‌ خالان ژبۆ قەرەبوویا یارییا بۆری، لێ‌ خودانێن ئەردی ئێك ژ تیمێن هەڤڕكە ئەوا 19 خال كۆمكرین و رێزا نەهێ‌ دهێت، دیارییا بۆری دا دگەل جەوییە خوسارەتییەكا مەزن دا ب چار گۆلێن پاقژ، سرۆشتییە دناڤ ئەرد و جەماوەرێ‌ خوە دا شەری بۆ سێ‌ خالێن یاریی و قەرەبوویا یارییا بۆری بكەت.
ژلایێ‌ خوە ڤە تیما یانەیا نەورۆز دێ‌ ل یاریگەها كەربەلا دەمژمێر 9:30 شەڤ بیتە مێڤانا یانەیا ئەلقاسم، تیما پارێزگەها سلێمانیێ‌ ب 20 خالان رێزا هەشتێ‌ دهێت و دێ‌ شەڕی بۆ سێ‌ خالان كەت پێخەمەت پێشڤەچوون بۆ رێزبەندییا پێشیێ‌، خودانێن ئەرد ئەلقاسم ب14 خالان رێزا 14ێ‌ دهێت.
ژ یاریێن دی یێن ئەڤرۆ، كەرخ- نەفت ئەلوەسەت، نەفت- نەفت ئەلبەسرا، زەورا و جەوییە كۆپیتكا یاریێن ئەڤرۆ یێن تیمێن جەماوەری ل دەمژمێر 8:30 شەڤ هێتە كرن.

شاهۆ فەرید:

بڕیارە ئەڤرۆ ل دەمژمێر 11 شەڤ دو یاریێن دی ژ قوناغا 16ێ و چۆنێ یا قارەمانیا یانەیێن ئۆرۆپا قارەمانێن خولا چامپیۆنز لیگ ب هێز ڤەگەریت كو جەماوەرێ وەرزشی و حەز ژێكەرێن فوتبۆلێ‌ چاڤەڕێ هەردو دیدارێن پری خوەشی و ئاستن دێ‌ هێنە ئەنجامدان دوو هەلبژارتنێن زەحمەتن بۆ بەرێ خوەدانێ هێز و ئاستێن وان یێن جوان.
ئەنتەرێ‌ شیان هەنە زنجیرەیا سەركەفتنێن خوە پارێزیت!
خودانا رێزا دویێ یا وەرزێ بوری یانەیا ئەنتەرمیلانا ئیتالی ئەڤە دو وەرزە د ناڤا ئەردێ خوە دا تووشی خوسارەتیێ‌ نەبوویە ئەوا دێ‌ ئەڤ شەڤە د ناڤا یاریگەها خوە جوزێبی میاتزا مێڤاندارییا هەڤركەكا ب هێزكەت ئەوژ ژی ئەتلتیكۆ مەدرید یا ئسپانی یە كو هژمارەكا ب زەحمەتە د ناڤا چامپیۆنزێ دا، سەركێشا خولا ئیتالی ب 63 خالان و هەشت خالان ژ هەڤڕكاخوە یا دیرۆكی ئەی سی میلان دوورە ئەوا ل رێزا دویێ دهێت، راهێنەرێ ئەنتر ئێنزاكی دێ پشتگەرمیا وی ل سەر لۆتارۆی و تۆرام و دێ ماركۆ و بارێلایی بیتن، لێ ژلایێ خوە ڤە یانەیا ئەتلەتیكۆ بێ بەهربیت ژ سێ‌ یاریزانێن خوە ژبەر هنگاڤتنێ ئەو ژی مۆراتایی و باولێسا و ئەزبلێكویتا دبیت كاریگەریێ ل سەر ئاستێ وێ بكەت دێ هەمی بزاڤان كەن ئەنجامەكێ پشتراستكەر ڤەگەریتە ئیسپانیا و هەتا یاریا هاتنێ‌ د ناڤا یاریگەها خوە دا بكەت.
دیدارێن د ناڤبەرا هەردو یانەیان هاتیە كرن
هەرچەندە د چامپیۆنزێ‌ دا چو یاری بەرانبەر ئێك نە كرییە لێ‌ د قارەمانیێن جودا دا كەفتینە ل بەر ئێك، ئێكەم جار ل سالا 1977ێ‌ د كۆپا رامۆن دی كانزا ب سەركەفتنا ئەتلەتیكو بوو ب دو گۆلێن پاقژ، دووڤدا ئەتلەتیكویێ‌ سەركەفتنا دویێ‌ ئینا د كۆپا سۆپەرا ئۆرۆپا دا و ناسناڤ ل سەر كیستێ‌ ئەنتەرێ‌ دەستڤە ئینابوو ب دو گۆلان بێ‌ بەرانبەر ئەوا ل 2010ێ‌ هاتیە كرن، یارییا سێیێ‌ هەلكەفتا كۆپا نێڤدەولەتی یا قارەمانان بوو ئەوا ل 2018ێ‌ هاتییە كرن ئەنتەرێ‌ تۆلێن خوە ڤەكرن ب گۆلەكێ‌ بێ‌ بەرانبەر سەركەفتن ئینابوو، بۆ یارییا ئەڤ شەڤە ئەرێ‌ ئەنتەر دێ‌ شێت مفایی ژ یاریگەها خوە بینت و پێنگاڤا ئێكێ‌ بۆ قۆناغا هەشتێ‌ ب سەركەفتیانە هاڤێژیت یان ئەتلەتیكۆ دێ‌ بەرسڤەكا دی هەبیت!.
پێكهاتیێ‌ پێشبینیكری یێ‌ هەردو تیمان.
راهێنەرێ ئەرجەنتینی سێمیونی دێ بزاڤێن رێگریێ بەرانبەر ئەنتەر كەت تایبەت ژلایێ راستێ و چەپێ كو كنترولەكا تەمام لسەر بكەت و پێشبینی دهێتە كرن پێكهاتیێ‌ وێ‌ بڤی شێوەیی بیت، 4-3-3 بیت، گۆلپارێز سومێر، هێلا بەرەڤانیێ‌ باڤارد، دی فریچ، باستۆنی، دۆمفرێس، هێلا ناڤین بارێلا، هاكان ئۆغلۆ، موختیاریان، هێلا هێرشبەریێ‌ كارلۆس، تۆرام، لاۆتارۆ مارتینێز.
ژلایێ خوەڤە ئەنتەرمیلان ب هێزا خوە دێ بزاڤێن سەركەفتنێ و ئەنجامەكێ جۆدا پتری دو گولا ب دووماهی بینیت و پێشبینی دهێتە كرن پلانا دیێگۆ سیمیۆنی ب 3-5-2 بیت، گۆلپارێز ئۆبلاك، هێلا بەرەڤانیێ‌ رینیلدۆ، خیمینێز، ساڤێچ، هێلا ناڤین كۆكی، مۆلینا، لینۆ، سائۆل، بابلۆ باریۆس، هێلا هێرشبرنێ‌ گرێزمان و لۆرینتی.
ئەنتەر دێ‌ شەڕی كەت بۆ سەركەفتنێ‌ د یاریا ئیكێ دا چونكۆ د یارییا دویێ‌ دا ئەتلتیكۆ د ناڤا ئەردێ خوە دا یا ئاسێ‌ یە و ب زەحمەتە و ب زاخەكا مەزن دهێتە دناڤا یاریگەها خوە دا كو یانەیا بەرانبەر هزرەكێ و ترسەكێ ژێ دبینیت و گەلەك جاران ریمونتادا ژی توماركرینە خوە گەهاندیە قۆناغا دووڤدا.
دۆرتمۆند بەرانبەری ئاستەنگا ئایندهۆڤن
پشتی یانەیا بۆرۆسیا دۆرتمۆند یا ئەلمانی ژ كۆما ئاگری ب دەستڤە ئینانا سەرێ لیستێ دەربازبووی د ناڤا پشككێشانێ كەتە بەرانبەری ئێك ژ یانەیێن ئەڤی وەرزێ چامپیونس لیگێ ئاستەكێ هەرێ باش پێشكێشكری ئەو ژی یانەیا پی ئێس ڤی ئایندهۆڤن یا هولەندیە، ئایندهۆڤن دێ‌ یارییا ئەڤ شەڤە دا د ناڤا یاریگەها خوە فێلیپس مهێڤانداریا دۆرتمۆند كەت ب هیڤییا وێ‌ یەكێ‌ سەركەفتنێ‌ بینت و جەماوەرێ‌ خوە رازیكەت، ژلایێ خوە دۆرتمۆند ب هێز دێ هێتە دناڤا یاریێ دا و ئاگەهی ئاست و ئەنجامێن هەڤڕكا خوە هەیە دێ شەڕی بۆ سەركەفتنێ‌ كەت و ئەنجامێ یارییا ئێكی بۆ بەرژەوەندیا خوە ئێكلاكەت دا بەری یارییا دویێ‌ یا دناڤا یاریگەها خوە دا و بشێت ئەركێ خوە پتر ساناهی بێخیت بۆ دەستڤە ئینانا پلێتا دەربازبوون بۆ قۆناغاهەشتێ‌.
كێ‌ شیانێن سەركەفتنێ‌ هەنە؟
د ناڤا خولا هولەندی دا ئایندهۆڤن سەرێ لیستێ دهێت ب جۆداهییا 10 خالان ژ نێزیكترین هەڤڕكا خوە فاینۆرد ئەڤ خال و ئەنجامە ئاستێ وێ هەری باش دیاردكەن كو هیڤیێن گەش هەنە بۆ قۆناغێن بهێت و مۆرالا یاریزانێن وان بۆ یارییا ئەڤ شەڤە بلندتر كەت، ژلایی خوە ڤە یانەیا دۆرتمۆند ل رێزا چارێ د خولا بۆندسلیگا یا ئەلمانیا دهێت ب 41 خالان، هەردەم ژی ئاستێن بلند و هێز د ناڤ پێكهاتەیێ دۆرتموند هەنە، چێدبیت جوداهییا خولان كارتێكرنا خوە ل سەر ئاستی وێ‌ بكەت لێ د خولا چامپیونز لیگێ ئاستێن نە چاڤەرێ كری دهێنە دیتن خوەشی و تامەكا دی ژ یاریێن وێ دهێتە دیتن ستێریێن نوو دیاردبن گەلەك جاران یانەیێن بەربژار هەر ژ قۆناغا كۆمان خاترا خوە خاستیە.
دیدارێن بەری نوكە و پێكهاتیێ‌ پێشبینیكری
ل دووڤ دیرۆكا دیدارێن هەردو یانەیان سێ‌ جاران بەرانبەر ئێك بووینە، د وەرزێ‌ 2002 ژ چامپیۆنز لیگ یا قۆناغا كۆمان دا ل یاریگەها ئایندهۆڤن بۆرۆسیا شیابوو ب3-1 سەركەفتنێ‌ بینت، د یارییا دویێ‌ دا ل هۆلەندا هەردو یانە ب گۆلەكێ‌ وەكهەڤبوون، یارییا سێیێ‌ یا هەڤالینی بوو ئەوا ب چار گۆلان بەرانبەر گۆلەكێ‌ بۆ بەرژەوەندییا یانەیا ئەلمانی ب دووماهی هاتی، پێكهاتیێ‌ پێشبینیكری یێ‌ دۆرتمۆندێ‌ دبیت ب4-3-3 بیت، كۆبێل گۆلپارێز، ل هێلا بەرەڤانیێ‌ ماتسین، زۆلە، رایسۆن، شلۆتربیك، هێلا ناڤین ئیمری كان، براندنت، سابیتزێر، هێلا هێرشبەریێ‌ سانچۆ، فۆلكرۆچ و رۆیس.

رەمەزان زەكەریا:

د داخویانیەكێدا راهێنەرێ تیما فوتبۆلا یانەیا شێخان ئاشكرا كر بەهرا پتر یا پێكهاتیێ‌ تیما وان ژ كوڕێن دەڤەرێ‌ و یاریزانێن نافخوەیی و ژ دەورۆبەران دهێن تایبەت ل باژێرێ‌ ئاكرێ و بەردەڕەشێ‌ كو یاریێ بۆ تیما شێخان دكەن، مە دو یاریزانێن باش هەبووینەئەو ژی فەلاح و یوسف، لێ‌ دەلیڤەكا باش بۆ پەیدابوو و پەیوەندی ب یانەیا دهۆكێ‌ د خولا كوردستانێ‌ دا كرینە، دیسان ستاف و هەمی یاریزان خەلكێ دەڤەرێ نە.
زێدەتر مەنهەل ئەلعنزی بۆ رۆژنامەیا ئەڤرۆ گۆت: هەتا نوكە ئاست و بەرهەڤیێن تیما مە د باشن، وەكو وەرزێ بووریە كو پشكداری د خولاپلە دو یا كوردستانێ كربوو، ئەم ب هیڤیینە ئەڤ سالە ئاستەكێ باشتر پێشكێش بكەن هەڤڕكێن ب هێز بین دخولا پلە دو یا كوردستانێ دا.
هەروەسان ناڤبری گۆتژی: ئاریشەیا سەرەكی یا یانەیا شێخان خرابیا رەوشا دارایی یە ب تنێ ڤێ چەندێ ئاستێ یانەیێ خراب كرییە تایبەت نوكە دا بۆ ڤەگوهاستنا یاریزانا مە مووچە نینن وەك هاریكارییەك بۆ پێدڤیێن وان هەروەسان هاتنۆچوونێ بۆ دابین دكەین.
ژلایەكێ‌ دووڤە راهێنەرێ‌ یانەیا شێخان گۆت: ئەڤسالە دێ هەڤڕكیێ بۆ سەركەفتنێ كەین، سالێن بوری یانەیا شێخان گەهشتە پلە ئێك لێ ژبەر خرابیا رەوشا دارایی نەشیایێن سالێن بەردەوام بین و زڤرینەڤە پلە دو، مە دڤێت ب هێز ڤە بچینە پلە ئێك و دۆبارە نە ڤەگەڕێنە پلە دو و ئەگەر ببیتە ژبەر خرابیا رەوشا ئابۆری.

قەیس وەیس:

بڕیارە ئەڤرۆ ل دەمژمێر 2:30 پشتی نیڤرۆ تیما یانەیا ئاكرێ‌ ل یاریگەها خوە مێڤاندارییا یانەیا هەولێركەن ژ چارچووڤەیێ‌ قۆناغا هەشتێ‌ یا قارەمانییا كۆپا كوردستانێ‌، هەروەسان یانەیا سیرۆانی نوو دێ‌ بیتە مێڤانا یانەیا سەید سادق.
تیما یانەیا ئاكرێ‌ د قۆناغا 16ێ‌ دا شیابوو ل سەر كیستێ‌ یانەیا شێروانە دەربازبیتە قۆناغا هەشتێ‌ پشتی ب دو گۆلان بەرانبەر گۆلەكێ‌ سەركەفتن ل سەر تۆماركری، ژلایێ‌ خوەڤە یانەیا هەولێر ب لێدانێن پەنەلتیان 5-4 ل سەر كیستێ‌ یانەیا برایەتی دەربازبوو هەمان قۆناغ پشتی یاری بێ‌ گۆل وەكهەڤی ب دووماهی هاتی.
ل دوور دووماهی بەرهەڤیێن ئاكرێ‌ هۆزەڤان زاهد سەرپەرشتێ‌ تیمێ‌ بۆ رۆژنامەیا ئەڤرۆ گۆت: یارییا بەرانبەر هەولێر تاقیكرنەكا دی یا بزحمەتە بەرانبەر تیما مە و هیڤیێن مە یێن ناسناڤی، دێ‌ شەڕی كەین هەتا دووماهی چڕكە ژبۆ ب دەستڤە ئینانا سەركەفتنێ‌، وەرزێ‌ ئەڤ سالە حەز و ڤیانا مە بۆ هەردو ناسناڤێن خولا و كۆپا كوردستانێ‌ نە، مە كار و پلان ل سەر كرینە و رژدین ب گەهینە ئەوێ‌ ئارمانجا مە دڤێت، یارییا ئەڤرۆ دێ‌ دناڤ ئەرد و جەماوەرێ‌ مە دا بیت ئەڤە ژی پالدەرەكێ‌ سەرەكی یە یاریزانێن مە ئاستەكێ‌ باش نیشان بدەن و بەردەوامیێ‌ بدەنە هیڤیێن خوە.
ژلایەكێ‌ دووڤە ناڤهاتی دیار كر یارییا وان دگەل هەولێرێ‌ ب سانەهی نابیت ژبەركو یاریێن كۆپا وەكو یێن خولێ‌ نینن، لێ‌ راهێنەرێ‌ تیمێ‌ ژی پلان و تەكتیكا خوە هەیە كو بشێن ب گەهینە ناڤ دەڤەرا پەنەلتییا تیما مێڤان و گۆلان تۆماربكەین و رژدین ب هەمی رەنگەكی بشێن وەرزێ‌ ئەڤ سالە ب ناسناڤەكی ژ خول یا كۆپایێ‌ بینن