شاكر ئەتروشی:

هونەرمەندێ‌ بەرنیاسێ‌ باژێرێ‌ زاخۆ (وەلید یوسف) د دیدارەكێ‌ دا بۆ رۆژناما ئەڤرۆ گۆت: ل دەستپێكا سالا 1980 من دەست ب ژەنینا تەمبیرێ‌ كر، پشتی باش شارەزا بوویم ئەزچوومە هندەك ئاهەنگان و من بۆ گەلەك هونەرمەندان، ژوانا هونەرمەندێ‌ خودێ‌ ژێ‌ رازی (ئەردەوان زاخۆیی و ئەیاز زاخۆیی) تەمبیر ژەنینە و هەتا نوكە من ستران بۆ پتر ژ پازدە سترانبێژان چێكرینە.
ناڤبری گۆت: ل سالا 1984 ئەز هاتمە (دار المعلمین) ل دهۆكێ‌ و بوومە قوتابی و دەلیڤە بۆ من چێبوو بچمە ل گەل تیپەكا مۆزیكێ‌ كو سەر ب ئێكەتیا لاوان ڤە بوو، ل وی دەمی هەر ئاهەنگەكا ل دهۆكێ‌ چێدبوو من پشكداری تێدا دكر و هندەك جاران ژی دهاتمە زاخۆ، هەتا سالا 1992 من چوونا ئاهەنگ و دەواتان هێلا و ئێدی دەست ب نڤیسینا هەلبەستان و ئاوازكرنا وانكر و هەتا نوكە پتری پازدە سترانبێژان پەیڤ و ئاوازێن من گۆتینە، ژوانا (سەلام یوسف، عەدنان سالح، رێكێش سەیرانی، عەبدولقەهار زاخۆیی، ئیسلام زاخۆیی، ئەرشەد زاخۆیی، دلشاد زاخۆیی، بزاڤ زاخۆیی) و گەلەك سترانبێژێن دی، دووماهی كار ژی من بۆ دلشاد زاخۆیی و بزاڤ زاخۆیی كریە و ئەز شانازیێ‌ ب هەموو وان سترانان دكەم یێن من چێكرین و داینە سترانبێژان، لێ‌ یا ژ هەموویێ‌ خۆشتر بۆ من سترانا هونەرمەند (عەدنان زاخۆیی) یە ئەوا ب ناڤێ‌ (دەمێ‌ دئینم بیرا خوە) و ب راستی گەلەك باش و ب دلێ‌ من یا گۆتی.

عەزیز هەورامی:

هەلالە شەكەت لهۆنی، بەرپرسا گرۆپێ‌ مالا ژنێن هەورامان بۆ كلتۆری و هونەری، د دیدارەكێ‌ دا بۆ رۆژناما ئەڤرۆ گۆت: بەری دامەزراندنا ڤێ‌ مالێ‌ من بەرنامەیەكێ‌ تەلەفزیۆنی هەبوو كو گرنگی ب كارێ‌ دەستڕەنگینی و هونەری یێن ژنان ددا، ل وێرێ‌ ئەو هزرە بۆمە چێبوو كو ئەم ڤێ‌ مالێ‌ دامەزرینین، بەری وی دەمی مە ئەڤ مالە ل باژێرێ‌ مەریوان ل رۆژهەلاتێ‌ كوردستانێ‌ ڤەكربوو، نوكە مە (300) ئەندام هەنە و مە دڤێت هونەر و كلتۆر و دەستڕەنگینیا ژنێن دەڤەرا هەورامان بدەینە نیشادان و بەرچاڤ بكەین.
هەروەسا گۆت: مە دڤێت فەرهەنگ و كلتۆرێ‌ هەرێما كوردستانێ‌ و رۆژهەلاتێ‌ كوردستانێ‌ ب پارێزین و دەلیڤێ‌ نەدەینە چو كەس و لایەنان كو ژناڤ ببەن، چنكو ژلایێ‌ دۆژمنان ڤە بەرنامە بۆ هاتیە دارشتن و هونەرمەند مەزهەرێ‌ خالقی پشتەڤانیا خوە بۆ گرۆپێ‌ مە دیاركریە كو بهێن رۆلێ‌ خوە دبۆارێ‌ سترانگۆتنێ‌ ژی دا ببینن، لێ‌ شەهیدكرنا (ژینا ئەمینی) كارێ‌ مە پاشخست.

موسا خالد:

شیلان محەمەد، رێڤەبەر و راهێنەر ل نڤیسینگەها سیڤا یا فێركرنا شۆفێریێ‌ ل دهۆكێ‌، د دیدارەكێ‌ دا بۆ رۆژناما ئەڤرۆ گۆت: دژیەكێ‌ بچووكدا من حەزژ هاژۆتنا ترۆمبێلێ‌ دكر و بەری سێ‌ سالان چوومە خۆلەكا فێركرنێ‌ و ئەڤە دو سالن ئەز بوویمە راهێنەر و دڤی ماوەی دا نێزیكێ‌ (400) كچ و ژنان من فێری هاژۆتنا ترۆمبێلێ‌ كرینە و پتریا وان موولەت ژی وەرگرتینە.
هەروەسا گۆت: دەمێ‌ خۆلێن مە دەه رۆژن و هەر كەسەكا دهێت ب شێوێ‌ وانەگۆتن و مەیدانی وان فێری هاژۆتنا ترۆمبێلێ‌ دكەم و هەردەم كچ زووتر ژ ژنان فێردبن، چنكو مێشكێ‌ وان ڤەكری ترە و هزرا ژنێ‌ پتر ل سەر مال و زارۆیێن وێ‌ یە، بۆ هەر كەسەكێ‌ ئەم (150) هزار دیناران ژێ‌ وەردگرین و هەبووینە ژبەر رەوشا دارایی مە كێمتر ژی ژێ‌ وەرگرتینە و هەر كەسەكا دهێت هەكە باوەری ب خوە هەبیت دێ‌ شێت د دەه رۆژان دا فێربیت و هەبووینە پشتی دەه رۆژێن وان ب دووماهی هاتین چووینە موولەتا شۆفێریێ‌ ژی وەرگرتینە و رێڤەریا هاتن و چوونێ‌ ل گەل مە یا هاریكارە.