موسا خالد:

رێڤەبەرا داینگەهەكێ‌ دیار كر كو داینگەهان رولەكێ‌ باش هەیە د پەروەردەكرنا زارۆكان دا و شیاینە هەتا رادەیەكی هاریكاریا ژنێن خودان كار و دەوام بكەن و گوت: زارۆك پێدڤی ب سێ تشتایە ئەو ژی ڤیان و گرنگیدان و ئاخفتنا نەرم و خوش ب ڤان رەفتاران ئەم دشێین ب رۆلێ دایكێ رابین ب پلە دو.

نارین سادق رێڤەبەرا داینگەها لیناز ل ئەڤرۆ ستی گۆت: (دەمێ زارۆك بەر ب داینگەهێ‌ دهێن ئەم بزاڤێ‌ دكەین چاڤدێریەكا باش بو بكەین و ئەو ڤالاتیێن هەین بۆ پڕ بكەین و كەش و هەوایەكێ باش و خۆش بۆ وان پەیدا دكەین و ب رۆلێ دایك و بابا رادبین ژ خێزانا خو ب دانین و ب رێكا راهێنان و یاریان خۆ نێزیكی وان دكەین داكو هەست بكەن ئەو یێن ل جهەكێ گرنك).
نارینێ‌ دیار كر، داینگەه دەلیڤەكا باشە بو كاركرنا ئافرەتێ‌، ژبەركو ئافرەت دشێن وەكو دایك رولێ‌ خۆ بگێرن و باشتر كارێ داینگەهێ ب رێڤە ببەن و پتر نێزیكی زارۆكی ببن و گۆت: (هەكە كەسێن بسپور د بیاڤێن پەروەردەیی و دەروونی و جڤاكی دا ل داینگەها كار بكەن دێ‌ باشتر بیت، ژبەركو دێ‌ رەفتار و سەرەدەریەكا زانستی و باشتر ل گەل زارۆكی كەن و پتر تێگەهن).
نارینێ‌ دا زانین كو پێدڤیە ستافێ‌ داینگەهێ‌ بەردەوام خولێن راهێنانا وەربگرن داكو ب رێكن گونجایی و هەرە باش خزمەتا زارۆكا بكەن و پەروەردە بكەن و گۆت: (زارۆك زور یێ نازكە وەكۆ لاپەرەكێ سپیە تە چەوا بڤێت تو دشێی وەسا ئاڤا بكەی، لەوا ئەز هەردەم تەكەزێ‌ ل سەر وێ‌ چەندێ‌ دكەم كو وەكو دایك رەفتارێ‌ ل گەل زارۆكی بكەن).
رێڤەبەرا داینگەها لیناز زێدەتر گۆت: (زارۆك پێدڤی ب سێ تشتانە ئەو ژی ڤیان و گرنگیدان و ئاخفتنا نەرم و خوش ب ڤان رەفتاران ئەم دشێین ب رۆلێ دایكێ رابین وەكو دایكەكا ژمارە دوو، چونكی دایكا درۆست بۆ زارۆكی ژمارە ئیكە).
نارینێ‌ د بەردەوامیا ئاخفتنێن خۆدا گۆت: (هیڤیدارم دایك و باب زارۆكێن خۆ پشتگوه نەئێخن و بەردەوام گرنگیێ پێ بدەن و هندی بشێن دەمێ‌ خۆ بو تەرخان بكەن، داخوازیێن وان بو ب جه بینن و ب شێوەیەكێ ساخلەم پەروەردە بكەن).

بامەرنێ‌، سالار محەمەد دۆسكی»

پێشمەرگەكێ‌ شۆرەشا گولانێ‌ بەحسێ‌ كاودانێن وی سەردەمی دكەت ل شۆرەشا گولانێ‌ و هەوا ئەنفالان و ئەو زولم و زورداری یا مللەتێ‌ كورد هاتیەكرن و هیڤیا یا وێ‌ چەندێ‌ خازیت ئەو رۆژ بچن و نە زڤرنە ڤە.
سالم جمیل محەمەد خەلكێ‌ گوندێ‌ زێوا شێخ پیراموس ل ناحیا بامەرنێ‌ ل سالا 1969 ل گوندێ‌ زێوێ‌ ژ دایك بوویە، قوناغا سەرەتایی یا خواندنێ‌ ل گوندێ‌ خوە تەمام كریە، سالم جمیل محەمەد زێوەی، بەحسێ‌ پەیوەندیێن خوە یێن رێكخستنێ‌ دكەت ل شۆرەشا گولانێ‌ و بۆ رۆژناما ئەڤرۆ گۆت: ل سالا 1983 هاتیمە رێكخستن سەر ب لژنا ناوچا دهۆك ڤە وی دەمی بەرپرسێ‌ مەیێ‌ رێكخستنێ‌ یێ‌ نهێنی هەڤال (رێڤینگ هروری) بوو و دووڤ دا بۆ (فەریق فاروق) هەتا سالا 1988ێ‌، ل سالا 1984ێ‌ من تڤەنگەك بخوە كری و ل گەل پێشمەرگێ‌ چاڤ نەترس (سەربەست بابیری) مە چەكێ‌ شەرەفێ‌ هەلگرتیە و بووینە پێشمەرگە و هەتا نوكە ژی ل سەر خەبات و ڤیانا وەلاتێ‌ خوە یێ‌ بەردەوام.
پێشمەرگەیێ‌ شۆرەشا گولانێ‌، سالم جەمیل ئەو ژی گۆت: ل سالا 1984 هەتا ئەنفالێن رەش ل سالا 1988 چەندین شەر و چالاكیێن پێشمەرگەی ل دەڤەرێن جو جودا پشكدار بوویمە، مینا شەرێن (سەرێ‌ عەمێ‌، كانی ماسێ‌) دەمێ‌ شەرێ‌ كانی ماسێ‌ هاتیەكرن هزر بەر ب وێ‌ چەندێ‌ دچوو كو دەڤەرەكا ئازاد بمینتە دەستێ‌ پێشمەرگەی دا و حوكمەت ژ بێگڤا دەركەڤیت و ئەو دەڤەر بمینتە دەستێ‌ پێشمەرگەی دا و هەشت رۆژا ماینە ل سەرێ‌ حەمێ‌ وی دەمی ئەز ل سەر دوشكێ‌ بووم و پشتی بورینا هەشت رۆژا عەبدوالخالق بابیری هاتیە و گۆت بەردەن وی گۆت ئەڤە فەرمانا جەنابێ‌ سەرۆكی یە و پتر ژ (50)خەلكێ‌ سڤیل شەهید بووینە وی دەمی رژێما بەعش چەكێ‌ قەدەغەكری ل سەر ئاستێ‌ جیهانێ‌ دژی خەلكێ‌ سڤیل بكارئینان و پشتی فەرمانا سەرۆكی مە خوە ڤەكێشا.
هەمان پێشمەرگەیێ‌ شۆرەشا گولانێ‌ ئەو ژی گۆت: ل هەوا ئەنفالان ئەم ل چیایێ‌ مەتینی بووین و ل شەڤا 28-29/8/1988 پێشتر هندەك كەس هاتبوونە گوندی بۆ گەهاندنا پەیاما ئەنفالێ‌ بەلێ‌ بۆ خودێ‌ و مێژوو دبێژم مە هاژێ‌ نەبوویە و ئەڤە ژ دەف مستەشار هاتبوون ، دەمێ‌ زێرەڤانیێ‌ من دیت نائیفێ‌ خودێ‌ ژێ‌ رازی یێ‌ ل سەر دەستا بەرەف من ڤە دهێت و گازی من كر و گۆت ڤێ‌ رەبیا دوژمنی دڤێت ل گەل مە باخڤن و ئەز ل گەل چەند پێشمەرگان ئەم زڤرینە گوندی و دەسپێكا ئەنفالان بوو و ئەز و (سەلیم، ئەشقی، پیرمیس، سەلیمێ‌ بەدو، ئەحمەدێ‌ مێرەمێ‌ ئەرەدنی و نائیف) چووینە نێزیك گوندی و نێزیكی رەبیێ‌ بووین و مە گازیكرێ‌ و چەند چەتەك هاتنە دەف مە و ئێك ژوانا مرۆڤەكێ‌ ب عەمر بوو دو گەنج ل گەل بوون و مرۆڤی دزانی ژ ناڤ چاڤێن وا گەلەك عاجزبوونن گۆت هوون بەرامبەر مە ڤێرە مە گۆتێ‌ بەلێ‌ گۆت هەوە خێرە مە گۆتێ‌ دێ‌ شەری كەین گۆتن دێ‌ بۆ هەوە تشتەكی بێژین مە گۆتێ‌ خێرە گۆتن هەرن نەمینن و پشتی ئەم رونشتینە خوارێ‌ لبنێ‌ دار كەزانەكێ‌، ئەو هەر دوكێن گەنج چوونە رەبیێ‌ بوومە فیشەكێن غەدارا و برنوویان و نارنوج ل گەل خوە بوومە ئینان، بوومە ئاخفتن و وەك نەخەشە شەرۆڤەكر و گۆت دووماهی خال ل دێرەلوكێ‌ بارەگایێ‌ لقێ (ئێك)ە و ژ باتیفا دهێنە هەمزا و پلان بگشتی شەرۆڤەكرن و گۆت كەسەك نەشێت شەری بكەت و خودێ‌ ژێ‌ رازی نائیف گۆتێ‌ مە تشتەكێ‌ هەی دێ‌ كەینە ئاڤێ‌ و دیارە ئەو مرۆڤێ‌ دانعمرێ‌ چەتە گەلەكێ‌ ب عاقل بوو گۆت بخودێ‌ خێزانێن خوە ببن و هەرن خوە مژوویل نەكەن و بریارا حوكمەتا ئیراقێ‌ ئەوە هەر جهەكێ‌ شەر تێدا بهێتەكرن ئێكسەر چەكێ‌ كومكوژ ب هاڤێژن و ب چ رەنگان هوون نەشێن بەرامبەر هێزا حوكمەتا ئیراقێ‌ ئەف جارە ب راوستن، بتنێ‌ پشتی بورینا (20) رۆژان ل سەر پێك هاتنا هەر دو وەلاتێن ئیراق و ئیرانێ‌ و بدووماهی هاتنا شەری حوكمەتا ئیراقێ‌ هێزا خوە هەمی ئینا كوردستانێ‌ و هەوا ئەنفالان دەست پێكر، پشتی ئەم ژ دەف وی مرۆڤێ‌ دانعەمرێ‌ چەتە هاتین ب رێكێ‌ ڤە من گۆتە شەهید نائیف تە ئاخفتێن ڤی مرۆڤی چەوا دیتن؟ گۆت گوهێ‌ خوە نەدێ‌ من گۆتێ‌ باوەركە ئەڤە ژ مە هەر دو دلسوزترە و كورد ترە ئەڤە مرۆڤەكێ‌ دلسوز و كورد پەروەرە و ئەڤە راست بێژیت و من گۆتێ‌ دا ئەڤان ئاخفتنێن وی گۆتین وەك ئەمانەت بێژینە مرۆڤێن خوە و هەر كەسەكێ‌ گوهداری یا مە كر كر یێ‌ نەكر ئەو ئاریشا وی یە، ئەم هاتین نێزیكی شكەفتەكێ‌ بووین و مە درێكا خوە دا دیت بابێ‌ منێ‌ ل ناف بیستانی ئاڤدانێ‌ دكەت 26/8/ 1988 و من گازیكرێ‌ و هات و مە سحبەت بۆ وی و خەلكێ‌ گوندی شرۆڤەكر و هندەك مالێن گوندیێن مە ل گوندێ‌(هەسن پیركا) بوو وی دەمی پەیوەندی مە ل گەل ئێك نەبوو و ئەوان پێشمەرگێن زێوەی گۆتن هەرن مالێن خوە ب ەهینن و وەرن ئەم دێ‌ شەری كەین، وێ‌ شەڤێ‌ مە خوە بەرهەفكر و زێرەڤانی ل خوە گرت و مە گۆت دێ‌ شەری كەین و شەڤا 28-29/8/1988 و رێكخراوێن پێشمەركەی ل سەرێ‌ بامەرنێ‌ بوون و ئەو ماوەك بوو (ئەحمەد تروانشی) ل جهێ‌ (خسرو بامەرنی) ب بوو بەرپرسێ‌ رێكخراوێ‌ چونكە (خسرو) شەهید ب بوو، دووڤ دا كاودان ب وی رەنگی بوون و تێكچوون و ئێدی هەوا ئەنفال دەست پێكر و هەر كەسەك بخوە چوو و ئەم چووینە گوندێ‌ (بێلیزانێ‌) و بەرەف ئاخا توركیا ب رێكەفتین و ئەم شەش كەس كەسێن زگورد ل گەل ئێك بووین و (350) پێشمەرگە بێ‌ خێزان ل گەل ئێك بوون و هەڤالەك چوو بوومە ئاڤ ئینا و ب قەپاخكی دامە و بتنێ‌ گۆتن ئەزمانێ‌ هەوە تەر ب بیت و بۆ مەغرەب ئەم بەرەف بۆ هەترشێ‌ شووین و دەربازبووینە توركا و دووڤ دا ئەم دەستە سەركرین و پێشتر گوتن وەرن دێ‌ رێكێ‌ دەینە هەوە هەرنە ئیرانێ‌ من گۆتە هەڤالێن خوە باوەركە ئنیاتا ڤان نەیا دروستە و هزر دكەم ئەڤە دێ‌ مە دەستە سەركەن و هەڤالێن مە گۆت نە مە ناگرن و پشتی ئەم چووین ئەم هەر (350) ژ چەك كرین و دووڤ دا ب رێكا چەند هەڤالان پێزانین گەهشتنە مە كو دێ‌ سپێدێ‌ ترۆمبێل هێن و دێ‌ مە رادەستی حوكمەتا ئیراقێ‌ كەن و هەمان دەم كورێ‌ موختارێ‌ گوندی ژی گازی بەرپرسێ‌ مە كر و ئاگەهدار كر كو دێ‌ حوكمەتا توركیا سپێدێ‌ هەوە هەمیان رادەستی حوكمەتا ئیراقێ‌ كەت، دووڤ دا ئەوێ‌ هێزا توركیا گازی بەرپرسێ‌ مە كر و ل گەل ئاخفتن ب شەڤ و كەتنە گەنگەشێ‌ بۆ سپێدێ‌ بۆچوونا خوە گوهورین، گۆتن چەكێ‌ خوە راكەن و هەر نە ئیراقێ‌ و ئەم ب پەكەكێ‌ گونەهباركرین و دەمێ‌ بوویە ئێڤار ئەو هێزێن وێ‌ دەڤەرێ‌ هەمی تێكەل بوون(ئێكەتی و پارتی و شوعی) ئێدی حزب نەما هەمی بوونە كورد و هندەك چەكێن خوە ڤەشارتن و هندەكا هاڤێتن و ئەم ژوورا چووینە ناف هندەك گوندان هەتا بوویە سپێدێ‌ و ئەم چووینە سلوپی یا و پشتی بورینا هەیڤەكێ‌ كاودانێن مە گەلەك نەخوش بوو و برس بوو و تەعدا بوو و رۆژەكێ‌ هاتن و گۆتن كێ دڤێت بچیتە ئیرانێ‌ و مە چار هزار كەسان ناڤێن خوە نڤێسین و كارێ‌ حوكمەتا توركیا ئەو بوو ئەگەر مرۆڤ ڤەگوهاست با دڤیابا مەغرەب با و هەتا ببا شەڤ دا مرۆڤ چ عەرد و جهان نەبینت و ئەم برینە پشتا شەمیزینا و گۆتن دێ‌ هەوە ب رێكێن نە قانوونی رادەستی ئیرانێ‌ كەین و ئەوانژی ئەم نە وەرگرتین و پشتی چار رۆژان ل گەڤەرێ‌ و پشتی چەند رۆژا رۆژەكێ‌ ئەم چەند هەڤال كەفتینە جادێ‌ و بەرەف ئیرانێ‌ چووین.
ل دووماهیێ‌ هەمان پێشمەرگە گۆت: داخازا من ژ خودێ‌ ئەوە كاودانێن نوكە بوومە پێلیت و ئەم ئەڤان كاودانان دا وەك برا پێكڤەبژین و چ ئەنفالێن دی ب سەرێ‌ مللەتێ‌ مە نەهێن.