چاڤەڕێ‌ دهێتە كرن سوبەهی پێنج شەمبی تیما یانەیا دهۆك ل باژێرێ‌ بەسرا ببیتە مێڤانا یانەیا نەفت ئەلبەسرا ژ چارچووڤەیێ‌ هەڤڕكیێن گەڕا 14ێ‌ یا قۆناغا ئێكێ‌ ژ خولا ستێرێن ئیراقێ‌ یا فوتبۆلێ‌ ئەوا بڕیارە ل دەمژمێر 4:30 ئێڤاری ل یاریگەها مینا یا نێڤدەولەتی هێتە كرن.
ئەلهۆیێن چیا دێ‌ ب مۆرالەكا بلند هێنە دناڤ یاریێ‌ دا پشتی دیارییا بۆری دا شیایی سەركەفتنەكا گرنگ ل سەر مێڤانا خوە ئەلقاسم ئینایی ب گۆلەكێ‌ بێ‌ بەرانبەر، د نوكە دا دهۆك ب21 خالان ژ شەش سەركەفتن، سێ‌ وەكهەڤی و چار خوسارەتی هەنە، خودانێن ئەردی 13 خال كۆمكرینە و رێزا 14ێ‌ دهێت و دێ‌ بزاڤێ‌ كەت بۆ سێ‌ خالان پێخەمەت بلندكرنا رێزبەندییا خوە، ژلایێ‌ خوەڤە یانەیا دهۆكێ‌ دێ‌ شەڕی بۆ سەركەفتنێ‌ كەت ب مەرەما پاراستنا جهێ‌ خوە یێ‌ رێزبەندیێ‌ و دوور كرن ژ هەڤڕكێن خوە.
ژلایێ‌ خوەڤە ل ئەینییا بهێت تیما یانەیا زاخۆ ل دەمژمێر دو یێ‌ پشتی نیڤرۆ دێ‌ ل یاریگەها خوە مێڤاندارییا ئەمانەت بەغدا كەت، كوڕێن خابووری گەشبینن ب پشتەگەرمییا جەماوەرێ‌ خوە سێ‌ خالێن گرنگ ل سەر رێزبەندیا خوە زێدەبكەت وپێشڤەچوونەكا باش پەیداكەن ئەوا نوكە ب16 خالان رێزا 11ێ‌ دهێت ژ سێ‌ سەركەفتن، حەفت وەكهەڤی و سێ‌ خوسارەتی، تیما بەغدایی ب12 خالان رێزا 18ێ‌ دهێت.
ژ یاریێن دی، زەورا- كەربەلا، جەوییە- نەفت میسان، نەفت ئەلوەسەت- نەفت، رۆژا ئەینی، هەولێر- كەرخ، ئەلقاسم- شورتە، مینا- حدوود، كارەبا- نەجەف.
رێزبەندییا لیستێ‌ بڤی رەنگی یە:
1- جەوییە 33خال.
2- شورتە 29 خال.
3- زەورا 24 خال.
4- دهۆك 21خال.
5- نەورۆز 20خال.
6- نەفت میسان 19خال.
7- حدود 19خال.
8- ئەلنەفت 18 خال.
9- تەلەبە 17 خال.
10- كارەبا 16خال.
11- زاخۆ 16خال.
12- مینا 15خال.
13- ئەلقاسم 13 خال.
14- نەفت ئەلبەسرا 13خال.
15- هەولێر 13خال.
16- نەجەف 13 خال.
17- كەرخ 12 خال.
18- ئەمانەت بەغدا 12 خال.
19- كەربەلا 10 خال.
20- نەفت ئەلوەسەت شەش خال.
بۆ زانین ئەیمەن حسێن هێرشبەرێ‌ جەوییە ب12 گۆلان سەرێ‌ لیستا گۆلكەرێن خولێ‌ دهێت، عەلا ئەلدالی هێرشبەرێ‌ نەفت میسان ب نەهـ خالان رێزا دویێ‌، ئیبراهیم غازی ب هەشت خالان رێزا سێیێ‌ دهێت.

جەماوەرێ‌ وەرزشی تایبەت یێ‌ تەپا پێی چاڤەڕێ‌ دو دیدارێن دی یێن ئاگرینین ئەوێن ئەڤرۆ ل دەمژمێر 11ێ‌ شەڤێ‌ ژ چارچووڤەیێ‌ قۆناغا 16ێ‌ و چوونێ‌ ژ قارەمانییا یانەیێن ئۆرۆپا قارەمانێن خولا چامپیۆنز لیگ هێنە ئەنجامدان، هەردو یانەیێن بایرن میونخ و پاریس سانجێرمان ژ بەربژارێن ناسناڤی دێ‌ د دو دیدارێن بهێز دابن
ئەرێ‌ لاتسیۆ دێ‌ شێت سەركەفتنێن بایرن میۆنخێ‌ راوەستینیت؟
د یارییەكا ب هێز دا بڕیارە یانەیا لاتسیۆ یا ئیتالی ل یاریگەها خوە ئۆلمپیكۆ مێڤاندارییا هەڤڕكا خوە یانەیا بایرن میۆنخ یا ئەلمانی ئێك ژ بەربژارێن ناسناڤی بكەت و دێ‌ هەمی بزاڤان كەت د ناڤ ئەرد و یاریگەها خوە دا سەركەفتنێ‌ بینت بەری دیدارا دویێ‌ یا چارەنڤیس، هەرچەندە د خولا كالیچیۆیێ‌ دا لاتسیۆ د رێزبەندیەكا باش دا نینە ئەوا ب37 خالان رێزا هەشتێ‌ دهێت لێ‌ بۆ چامپیۆنزێ‌ شێوازەكێ‌ دی دهێتە دیتن و كۆپا ئیتالیا ژی گەهشتییە پێش دووماهیێ‌، پشتگەرمییا وێ‌ دێ‌ ب شیرۆ ئێمۆبێلی، فلیپی ئەندرسۆن، ماتیاس زاكینی، لێ‌ ژلایێ‌ خوەڤە یانەیا بایرن میۆخ ئەو تیما ب سانەهی نابیت بەرانبەر خودانێن ئەردی و ناهێلیت ئەو هیڤی و ئارمانجێن هەین كو بەر ب ناسناڤی و ستێرا خوە یا حەفتێ‌ بچیت، یانەیا باڤارییا ب سەركێشیا تۆماس مۆلەر و هێرشبەرێ‌ گۆلكەر یێ‌ ئنگلتەرایێ‌ هاری كین گۆلكەرێ‌ خولا ئەلمانیا ب24 گۆلان و چار ل چامپیۆنزێ‌ هەنە و هەر ئێك ژ سێرجی جنابری، لێرۆی سانی، جەمال مۆسێلا، جۆشۆا كیمتچ كو ئەڤ ناڤە هێزەكا مەزنە بۆ بایرنێ‌ بشێن رێكێن سەركەفتنێ‌ و ئاستەنگا لاتسیۆ دەرباز بیت.
دیدارێن وان د بەرژوەندییا بایرنێ‌ دا بووینە
هەردو یانە ب تنێ‌ دو جاران بەرانبەر ئێك بووینە د دیدارێن هەردو یانەیان ژ قارەمانییا یانەیێن ئۆرۆپا قارەمانێن خولا، ئەوژی ل وەرزێ‌ 2021 ژ چارچووڤەیێ‌ قۆناغا 16ێ‌ بوو و هەردو دیدار ب سەركەفتنا یانەیا ئەلمانی بوویە، ل یارییا ئێكێ‌ د هەمان یاریگەها ئەڤ شەڤە دا هاتییە كرن بایرن ب چار گۆلان بەرانبەر گۆلەكێ‌ سەركەفتن ئینابوو و یارییا دویێ‌ دا ل ئالیانز لاتسیۆ خاترا خوە ژ قۆناغا 16ێ‌ خواست پشتی ب دو گۆلان بەرانبەر گۆلەكێ‌ تووشی خوسارەتیێ‌ بوویی، یارییا ئەڤ شەڤە هەمان قۆناغە، ئەرێ‌ دێ‌ بایرن میۆنخ هەمان سیناریۆیا بۆری دۆبارەكەت یان ژی لاتسیۆ دێ‌ تۆلێن خوە ڤەكەت و سەركەفتنێن یانەیا باڤارییا ل سەر تیما خوە و تیمێن ئیتالییا ب راوەستینیت كو سەرجەمێ‌ وان 12 یاریێن بۆری دا سەركەفت بوویە.
ریال سوسیداد مێڤانا گڕانە یا پاریس سانجێرمانێ‌
د یارییەكا دی یا پڕی هەڤڕكی دا یانەیا ریال سۆسیداد یا ئسپانی ل یاریگەها خوە پارك دی برانس مێڤاندارییا ئێك ژ تیمێن بزاڤان دكەت ببیتە بەربژارا ناسناڤی یانەیا پاریس سانجێرمان یا فرەنسی ئەوا بۆ چەندین سالە خەوان ب ناسناڤێ‌ ئێكێ‌ ڤە دبینت ئەوا ب زەحمەت گەهشتییە ڤێ‌ قۆناغێ‌ پشتی بتنێ‌ هەشت خال كۆمكرین ب جووداهییا دیدارێن دناڤبەرا وێ‌ و میلان دا، لێ‌ ریال سوسیداد وەكو هەسپێ‌ رەش یێ‌ قارەمانیێ‌ و د قۆناغا كۆمان دا خوە نیشان بدەت پشتی سەركێشییا كۆما چارێ‌ كری ب12 خالان، یانەیا فرەنسی پشتگەرمییا شارەزاهییا راهێنەرێ‌ خوە یێ‌ ئسپانی لویس ئەنرێكی یە ئەوێ‌ چار ناسناڤێن كێشوەرێ‌ ئۆرۆپا ب دەستڤە ئینایی ئەوێ‌ بۆ یارییا ئەڤ شەڤە دێ‌ هەمی باوەرییا خوە دەتە ستێرێ‌ خوە كێلیان مباپی، گۆنزالۆ رامۆس، راندال كۆلۆ مۆانی و برادلی باركۆلا هەرچەندە گۆمان د پشكدارییا هەردو یاریزانان ماركۆ ئەسینسیۆ و مانوێل ئۆگارتی دا هەیە ژبەر هنگاڤتنێ‌، لێ‌ ئەو ئاست و هێزا د خولێ‌ دا هەیی كو هەتا نوكە سەركێشا خولا فرەنسایە باوەرییا هەیی ژ ئاستەنگا یانەیا ئسپانی دەربازبكەت، سەرباری ترس هەیە ریال سۆسیداد وەكو هەسپێ‌ رەش دڤێ‌ یاریێ‌ دا خوە نیشان بدەت، بۆ زانین ئەڤ یارییە دبیتە یا ئێكێ‌ د دیرۆكا هەردو یانەیان دا د چامپیۆنزێ‌ لێ‌ ب گشتی پاریسێ‌ حەفت جاران یاری دگەل یانەیێن ئسپانی كرییە دگەل ریال مەدرید و بەرشەلۆنا، سیڤییا، ڤالنسیا، دیپۆرتیڤۆ لاكۆرۆنیا، ئەتلەتیكۆ بلباو و رایسینگ سانتاندێر، سەرجەمێ‌ وان شەش وەكهەڤی و سێ‌ خوسارەتی ئیناینە.

قەیس وەیس:

بڕیارە ل ئەینییا بهێت هەردو یانەیێن ئافرەتێن دهۆك یانەیا زاخۆ یا كچان یاریێن خوە یێن دویێ‌ و چارەنڤیس ژ دەرڤەیی یاریگەها خوە ئەنجامبدەت و چاڤ ل پلێتا دەربازبوونێ‌ بۆ یارییا دووماهیێ‌ یە دەمێ‌ دبنە مێڤانێن یانەیێن سیرۆانی حەلەبجە و سۆران ژ چارچووڤەیێ‌ قۆناغا چوارگۆشەیا زێرین و یاریین دویێ‌ و یا هاتنێ‌ دەربازبوون بۆ دووماهییا خولا فوتسالا كوردستانێ‌.
ئافرەتێن دهۆك دێ‌ ل هۆلا گرتییا زانكۆیا حەلەبجە دبیتە مێڤانا كچێن یانەیا سیروانی حەلەبجە د یارییەكا گرنگ و چارەنڤیس دا ژبۆ ئێكلاكرنا پلێتەكا دەربازبوو بۆ یارییا دووماهیێ‌، د یارییا ئێكێ‌ یا چوونێ‌ دا ئەوا ل هۆلا گرتییا چالاكیێن وەرزشی یا پەروەردەیا دهۆكێ‌ هاتیە كرن كچێن ئەلهۆیێن چیا شیان ب چار گۆلێن پاقژ سەركەفتنێ‌ بینن، سێ‌ گۆل ژلایێ‌ شۆخان نۆرەددین و گۆلا ژلایێ‌ دەلال تالب ڤە هاتنە تۆماركرن، هەرچەندە پێنگاڤەكا باش بۆ یارییا دووماهیێ‌ هاڤێتییە لێ‌ د یارییا فوتسالێ‌ دا تۆماركرنا گۆلان هەردەمەكی دهێت و دبیت رێژە ژی زێدەتر بیت، دهۆك پێدڤی ب وەكهەڤیێ‌ هەیە یان سەركەڤیت یان ژی هەكە تووشی خوسارەتیێ‌ بیت دڤێت تیما مێڤان زێدەتری چار گۆلان بینت، هەكە چار گۆل بێ‌ كو یانەیا ئافرەتێن دهۆكێ‌ چو گۆلان نەكەت دێ‌ یاری بەر ب پەنەلتیان چیت لێ‌ هەكە گۆلەك ژی كر دێ‌ باشترین بۆ دهۆكێ‌ بیت.
ژلایەكێ‌ دووڤە كچێن یانەیا زاخۆ ل هەولێری پایتەخت دێ‌ بیتە مێڤانا كچێن یانەیا سۆران، د یارییا بۆری دا كچێن خابووری شیابوون دناڤ یاریگەها خوە دا ب سێ‌ گۆلان بەرانبەر گۆلەكێ‌ سەركەفتنێ‌ بینن و پێگاڤەكا باش بۆ یارییا دووماهیێ‌ پاڤێژن، یاری بۆ تیما زاخۆ ب سانەهی نابیت و دڤێت تیما سۆران سێ‌ ب چنە و زێدەتر سەركەڤیت دا دەبازبیت، بۆ زانین هەردو یاری دێ‌ ل دەمژمێر دو یێ‌ پشتی نیڤرۆ هێنە كرن.
تیما ئافرەتێن دهۆكێ‌ وەكو قارەمانا كۆما ئێكێ‌ دەربازبیتە قۆناغا چارگۆشەیا زێرین ب شەش سەركەفتنێن ل دووڤ ئێك و كۆمكرنا 18 خالان، ژلایێ‌ خوە تیما كچێن یانەیا زاخۆ وەكو قارەمانا كۆما دویێ‌ دەربازبوو چارگۆشەیا زێرین پشتی ب كۆمكرنا 12 خالان.

رەمەزان زەكەریا
د داخویانیەكێدا راهێنەرێ گولپارێزێن یانەیا بجیل یاوەرزشی ئاشكراكر هەتا نوكە دو یاری هاتینە ئەنجامدان و بهیڤینە دەربازبینە پلا ئێكا كوردستانێ‌ یا فوتبۆلێ‌ ئەوا 17 یانە پشكدارن و هاتینە بەلاڤكرن ل سەر دو كۆما،هەر كۆمەك سێ یانە دەربازبنە قۆناغا دویێ‌ و هەڤڕكی دێ‌ بۆ دو پلێتێن پلا ئێك هێتە كرن.
زێدەتر سەفین ئیسماعیل سورچی بۆ ئەڤرۆ گۆت: ئەگەرێن خرابیا رەوشا یانەیا مە دیار نینە، كارگێری و پشتەڤان گەلەك هاریكارن دگەل یاریزان، مە دو یاری ئەنجامداینە دگەل جیهان و دینارتە ئەنجامێن تووشی خوسارەتیێ‌ بووینە، سەرباری تیما مە ئاستەكێ باش پێشكشكر لێ گول تۆمارنەكرن هەرچەندە هەبوونا چەندین یاریزانێن باش دگەل مە.
ناڤبری خویاكر: پشتی ئەنجامدانا دو یارییا نەشیاینە هیچ خالەكێ ب دەستڤەبینین مە شەش یاری ماینە و یانەیێ هیڤیەكا زۆر مایە بۆ گەهشتن ب خولا پلە دوا كوردستانێ، سەرەرایی راهێنەر هۆكارێ سەرەكیێ سەرنەكەفتنا یانەیا بجیل نەبوو لێ بۆ بەرژەوەندیا گشتی و پشتەڤانێن یانەیێ راهێنەرێ یانەیێ و هاریكاریێ وی دەست كاركێشان ل رێزێن یانەیی دا.

دهێتە چاڤەڕێ‌ كرن سوبەهی و ئەینییا بهێت هەشت یاری ژ هەڤڕكیێن گەڕا 20ێ‌ یا خولا پلا نایابا كوردستانێ‌ بهێنە ئەنجامدان، یانەیێن پارێزگەهێ‌ د یاریێن گرنگ و تاقیكرنێن ب هێز دا نە، ئاكرێ‌ دێ‌ بزاڤێ‌ بۆ ئاشتكرنا جەماوەرێ‌ خوە كەت و زاخۆ دێ‌ بەرانبەری خودانا سەرێ‌ لیستێ‌ بیت و دهۆك بۆ بەردەوانییا ئەنجامێن باش ئەوا هەمی یاریی دێ‌ ل دەمژمێر 2:30 پشتی نیڤرۆ هێنە كرن.
ل یاریگەها خوە بڕیارە سوبەهی پێنج شەمبی تیما یانەیا ئاكرێ‌ مێڤاندارییا یانەیا سیرۆانی نوو بكەت كو دهێتە هژمارتن تاقیكرنەكا ب هێز بۆ خودانێن ئەردی و دێ‌ شەڕی بۆ سێ‌ خالان كەن پێخەمەت ئاشتكرنا جەماوەرێ‌ تایبەت پشتی ئەوان ئەنجامێن لاواز یێن ڤێ‌ دووماهیێ‌ بوویە ئەگەر سەرێ‌ لیستێ‌ ژ دەستبدەت و د نوكە دا ب كۆمكرنا 29 خالان رێزا چارێ‌ بهێت، بەرانبەر دا ب هەمان خالان یانەیا سیرۆانی نوو رێزا پێنجێ‌ دهێت لێ‌ سەركەفتنەكا ئاكرێ‌ زێدەترە ژ یا مێڤانا وێ‌، هەروەسان سەرباری كارگێرییا یانەیا ئاكرێ‌ دەستكاركێشانا راهێنەرێ‌ خوە هەژار سابری قەبول نەكری دەرئەنجامێ‌ خوسارەتییا تیمێ‌ دگەل هەولێرێ‌، ئەڤچەندە ژی گڤاشتن ل سەر تیمێ‌ پەیداكرییە.
ژلایەكێ‌ دووڤە ل ئەینییا بهێت تیما یانەیا دهۆك ل هەولێرا پایتەخت دێ‌ بیتە مێڤانا یانەیا برایەتی، ئەلهۆیێن چیا ب سەركێشییا راهێنەر رابین هاشم شیاییە تا رادەیەكی ئاست و ئەنجامێن خوە باشبكەت و خوە ژ رێزێن داكەفتنێ‌ دوردكەت ئەوا نوكە ب21 خالان رێزا 14ێ‌ دهێت، ب هیڤییە بۆ ڤێ‌ یاریێ‌ بەردەوامیێ‌ ب دەتە سەركەفتنان، ژلایەكێ‌ دووڤە كوڕێن خابووری تیما یانەیا زاخۆ د بهێزترین یارییا خوە دا سوبەهی دێ‌ بیتە مێڤانا شێروانە خودانا سەرێ‌ لیستێ‌ ب 33 خالان، زاخۆ 27 خال كۆمكرینە و رێزا حەفتێ‌ دهێت.
ژ یاریێن دی، رۆژا پێنج شەمبی، رانیە- هەولێر، شەقلاوە- دەربەندیخان، سۆران- پێشمەرگەیا هەولێر، رۆژا ئەینی، ئارارات- سەیدسادق، چوراقۆرنە- هندرین.